AMBEJTSÏ UAA ÚNI PARAJTSÏ NÓTERU KURHUNHPINIA
2 | Asï no sési útspinta je
Biblia uandasïndi:
“Ka asï jáma je no sési úkuntani imani engaksïni no sési úchiaka [...], ka chaari parti jimbo jánguarhi je eskajtsï xáni uaaka sési pájperani iámindu kʼuiripuechani jingoni enga újka ísï úkuarhini [...]. Jimboka karakata jarhaska: ʻJuchiitisti para maiamukuarhintani ka jísïni maiamuntaakaʼ” ísï uandasïndi Tata Diosï Jeoba (ROMA 12:17-19).
¿Ambe arhikuekasïni?
No no sési jarhasti ikiani engajtsïni nema no sési ambe úchijka, peru Tata Diosï no uékasïndi eskachi no sési útspintaaka. Sánderu sési, arhisïndijtsïni eskachi imeeri jájki jimbo jurajkuaka iámindu ambe jimboka ima aiatspeska eska nóteru ióni jimbo sési péntaaka iámindu no sési jásï ambe (Salmo 37:7, 10).
Uaakajtsï ini ambe úni:
Engachi no sési úkuantajka máteruechani, soluchi úni jarhasïnga eskaksï kʼuiripuecha seguiriuaka kurhunhpini. Ísï jimbo, engaksïni nema no sési kámaaka oksïni no sési ambe úcheni, asï májkueni káma je. Jánguarhinta je pʼíngukuarhini. Ménichani sánderu sési jauati eskajtsï mirikurhiaka ambe enga úkuarhika (Proverbios 19:11). Ka ménichani eskajtsï uaaka ambe ma. Pori ejemplu, engajtsï no sési ambe úminhaaka jamberijtsï eratseaka aianguani polisiechani o máteru nemani enga juramukua jatsiaka.
No sési úkuantani máteruechani, úsïndi eskachi sánderu no sési uéranchaaka
¿Ka engajtsï ísï exeaka enajkijtsï no uaa mirikurhini ambe engajtsï úminhaka? ¿Ojtsï iámindu ambe únia parajtsï sési peentani problemani? Nájkiruka ísïika, asï no sési útspinta je, ísïjtsï uaaka no xáni kʼéri úni problemani. Chájtsï uaaka nóteru kurhunhpinia. Mintsika je eska Tata Diosï sési peentaaka problemani. Salmo 37:3-5 arhisïndi: “Imani mintsika ka ima uaati ambe ma parakeni jarhuatani”.
Jamberijtsï ístu uéjka ini ambe míteni
BIBLIA JARHUATAASTI MÓJTAKUNI IREKUA
Uékasïrenga eska iámu ambe jurhimbikua jingoni úkuarhipiringa
Rafika grupu ma jingoni úkuarhispti enga uékenga eska iámu ambe jurhimbikua jingoni úkuarhipiringa. Tátsekua, kuenta íntskukuarhispti eska Biblia aiatspisïnga eska Tata Diosïri Reinu uáka eska pínandikua jauaka ka eska iámu ambe jurhimbikua jingoni úkuarhiaka.
BIBLIA JARHUATAASTI MÓJTAKUNI IREKUA
¿Káni andaa ambakiti uékperakua kurhunhperakuani?
Úkua jukasïndi xénchani máteru nanisï anapuechani, peru exe je na engaksï judiu ma Palestina anapu ma jingoni niáraka sési kámberani.
