¡Kʼuiripuechaksï nóteru méni kurhunhpiatia!
Nájkirukachi jucha nóteru kurhunhpiakia, nóchi uaaka úni eskaksï máteruecha májkueni uaaka. Exeparini eska iásï uánikua kʼuiripuecha jarhaska engaksï no xénchanhajka, ¿né uaa úni eskaksï kʼuiripuecha nóteru kurhunhpiakia?
Tata Diosï Jeobajkusï uaati úni eskaksï kʼuiripuecha nóteru kurhunhpiakia ka Biblia uandasïndi eska ísï uaaka (Proverbios 20:22).
TATA DIOSÏ KʼAMAJKUATI IMANI AMBE ENGA ÚJKA ESKAKSÏ KʼUIRIPUECHA KURHUNHPIAKA
-
1. NOAMBAKITINI. Satanasi jindeesti enga újka eskaksï kʼuiripuecha kurhunhpiaka. Tata Diosï kʼamajkuati Satanasini ka iámindu imeechani engaksï kurhunhpijka ísï eska ima (Salmo 37:38; Roma 16:20).
-
2. IMEECHANI ENGA SATANASI JURAMUKUAJKA. Tata Diosï kʼamajkuauati juramutichani engaksï no jurhimbikua jingoni jámajka ka relijioniri orhejtsïkutichani engaksï újka eskaksï kʼuiripuecha kurhunhpiaka. Ístu Tata Diosï kʼamajkuauati iámindu negosiuechani engaksï solu sánderu sentabu uéjka andani ka engaksï no sési úkuajka kʼuiripuechani (2 Pedru 3:13).
-
3. JUCHAARI PEKADUNI. Biblia jorhentpisïndi eskachi iáminduecha pekadoriska ka i ambe úsïndi eskachi no sési ambe eratseaka, pʼikuarheraaka ka úni (Roma 5:12). Ka ístu pekaduni jimbochisï kurhunhpijka. Joperujtsïni Tata Diosï jarhuataati parachi nóteru méni no sési ambe úni ka parachi nóteru méni kurhunhpini (Isaías 54:13).
BIBLIA AIATSPESÏNDI ESKACHI IREKAAKA PARHAKPINI MA JIMBO ENGA NÓTERU NEMA KURHUNHPIAKA
-
1. NÓTERU NEMA NO SÉSI KÁNHAATI. Tata Diosïri Reinu juramuati iámu parhakpinirhu auandarhu uératini ka inde juramukua para méntkisï jauati (Daniel 2:44). Nóteru nema menusi únhaati, nijtu no sési kánhani ka Tata Diosï jurhimbikua jingoni káuati iámindu imeechani engaksï iásï kómu nitamakuarhini jaka (Lukasʌ 18:7).
-
2. IÁMINDUECHACHI PÍNANDIKUA JINGONI IREKAAKA. Nóteru nema kómu nitamakuarhiati guerrecha jimbo o no sési kámberakua jimbo (Salmo 46:9). Segurueuati parhakpinirhu irekani jimboka ima kʼuiripuechajkusï irekaaka engaksï uéjka pínandikua jingoni irekani (Salmo 72:7).
-
3. SÉSICHI IREKAAKA. Iáminduechachi xénchperaaka (Mateu 22:39). No ma ambe jauati enga uaaka eskachi kómu pʼikuarheraaka, nijtuchi miántaa imani ambe engachi no sési nitamakuarhipka (Isaías 65:17). Enga nóteru nema kurhunhpiakia, kʼuiripuechaksï uaati sési pʼikuarherani “jimboka kánikua pínandikua jauaka” (Salmo 37:11).
¿Tsitipirintsï ísï irekani? Asta ini jurhiatikuechani jimbo, iámu parhakpinirhu anapu Jeobaeri testiguecha nóteruksï kurhunhpisïndia jimbokaksï úxaka ambe enga Biblia jorhentpijka (Salmo 37:8). Nájkirukaksï táchanisï anapueka o máteru járhati pʼindekuechani jatsiani, májku kʼériksï jarhasti jimbokaksï xénchperasïnga (Isaías 2:2-4).
Jeobaeri testiguechaksïni uaati tsípikua jingoni jorhendani ambe enga jarhuataani jaka imeechani parajtsï úni tekaantani engajtsï no sési kánhani jauaka ka engajtsï menusi únhaaka. Ambe engajtsï jorhenguarhiaka, jarhuataatiksïni parajtsï xénchpeni ka nóteru kurhunhpinia. Ístujtsï jorhenguarhiaka néna sési kaani máteruechani, asta imeechani jamberi engaksïni no sési kámajka o engaksïni kurhunhijka. Engajtsï ísï úska, sánderujtsï tsípikua jingoni irekaaka iásï ka sánderujtsï sési pájperaaka máteruecha jingoni. Ka sánderu jukaparhakua ambe, uaakajtsï míteni ambe engajtsï jatsika para úni engajtsï uéjka irekani jiáni enga Tata Diosïri Reinu uaaka eskaksï kʼuiripuecha nóteru méni kurhunhperaakia (Salmo 37:29).
Jamberijtsï ístu uéjka ini ambe míteni
AIANHPIRI
¿Ambe uá Tata Diosïri Reinu?
Jesusi mítespti eska Tata Diosïri Reinujkusï uáka iámu ambe sési péntani ixú Echerirhu. ¿Ambe xáni úskia Tata Diosïri Reinu parakachi uáka mintsikani?
¡TSÍNHARHI!
Menusi újpini: Ambe enga uáka kénditani
¿Nákiskiksï ima tʼámu ambe enga Tata Diosïri Juramukua uáka para nóteru menusi újperanhania?
