1, 2. a) ¿Andisï Pablueri tiempuni kʼuiripu uandanhiaueni jántspiricha jimbo ka libertadi jimbo? b) Seguni Pablu, ¿néski Ima enga újka eskachi meru libreuaka?

KʼUIRIPU enga Roma irekapka, kánikua kʼéramakuarhisïrendi leicha jimbo, gobiernu jimbo ka libertadi jimbo engaksï jatsipka. Peru uinhapikua enga Roma jatsipka, jántspiricheri ánchikuarhita jimboespti. Niáraspti jarhani ma tiempu enga masi o menusi 30% kʼuiripu jántspiripka. Seguru eska kʼuiripu pobri uandanhiauenga libertadiri ambe jimbo o jántspiricha jimbo, ka ístu kristianuecha engaksï jima irekapka.

² Apostuli Pablu uánikua ambe karaspti libertadiri ambe. Peru no para sési péntaani parhakpiniri uandanhiatechani eska jiánisï anapu kʼuiripu na uékenga úni. Sánderu sési, Pablu ka máteru kristianuechaksï jánguarhintaspti jarhuatani kʼuiripuni para kurhanguni Tata Diosïri Reinueri ambe ka na enga xáni jukaparhakueka tata Jesukristueri uarhikua. Apostuli exeraaspti kristianuechani néski Ima enga újka eskachi meru libreuaka. Por ejemplu, segunda kartarhu para korintuecha, karaspti: “Juchari  Tata jindes[ti] Espiritu, ka jima enga jarhajka juchari Tateeri Espiritu, jima nóteru nema jántspiristi[a]” (2 Kor. 3:17).

3, 4. a) ¿Amberi ambe uandaspi Pablu bersikuluecharhu engaksï ante de 2 Korintu 3:17 jaka? b) ¿Ambechi jatsiski para úni parajtsïni marhuachini ima libertadi engajtsïni Jeoba íntskujka?

³ Ini mísmu kartarhu enga korintuechani karakuapka, Pablu tʼuini karasptia ambe enga úkuarhinchapka Moisesi enga kétsintapka Sinairi juátarhu enga Jeobaeri ánjili ma jingoni japka. Imeri kánharhikua kánikua tsónhastpesïrendi. Engaksï israelitecha exepka, chésptiksï ka ima jimbosï takusï ma ónharhipti (Éx. 34:29, 30, 33; 2 Kor. 3:7, 13). Pablu uandaspti eska enga nema andarhientajka Jeobani, ísïska komu ónharhikua ma kénditani (2 Kor. 3:16). ¿Ambe arhikuekaxapi?

⁴ Eskachi na exeka máteru artikulurhu, Jeobajkusï kʼamakʼamasï libreti, ima enga Kueraaka iámu ambe. Jimbosï normaliti eska nani enga imeri espiritu jaka, jauaka libertadi. Engachi uéjka eskajtsïni i libertadi marhuachiaka, jatsiskachi para andarhientani Jeobani. I ambe arhikuekasïndi ambakiti pájperakua ma jatsini imani jingoni. Engaksï israelitecha desierturhisï jámani japka, nóksï májkueni exesïrendi ambe ma eska Jeoba. Ísïspti komu enajki takusï ma ójchakurani japi imecheri mintsitani ka eratsikuani. Uékasïrendiksï úrani imani libertadini engaksï jatsipka nomasi paraksï úni ambe engaksï uékenga (Ebr. 3:8-10).

5. a) ¿Na jásï libertadijtsïni íntskusïni Jeobaeri espiritu? b) ¿Nénachi mítiski eska asta ima enga jántspirika o enga ónhakata jaka uáka jatsini libertadini enga Jeoba íntspijka? c) ¿Náki kurhamarhikuachi exeaua?

⁵ Ima libertadi enga Jeobaeri espiritu íntspijka, no solu úsïndi eska ma libreuaka para nóteru jántspirinia. Ístu úsïndi eskachi nóteru jántspiriuakia pekadueri ni uarhikueri ka ni relijioni no jurhimbitiri ka ni imeri pʼindekuecheri. Ambe ma enga kʼuiripu no méni uáka úni (Rom. 6:23; 8:2). Xáni enga sésiika i jásï libertadi jatsini, jimboka asta ima uáka jatsini enga jántspirika o enga ónhakata jaka (Gén. 39:20-23). Ka ísï úkuarhinchaspti pirenchi Nancy Yuen ka erachi Harold King. Tsimarhanksï ióni ónhanhaspti imecheri jakajkukua jimbo. Uákachi mítiani ka kurhaani ambe engaksï uandantajka, kanalirhu JW Broadcasting (VIDEOS > ENTREVISTAS Y EXPERIENCIAS > SE ENFRENTAN A PRUEBAS). Peru iásï ju je arini ambe exeni: ¿Nénachi xarhatasïni eskachi jukaparharasïnga juchari libertadini? Ka, ¿nénachi uá sési úrani?

6. ¿Nénaksï xarhataspi israelitecha eskaksï no jukaparharasïrenga imani libertadini enga Jeoba íntsaapka?

⁶ Engajtsïni nema sési jásï ma regalu íntskujka, juchachi kánikua agradeserikusïnga. Peru israelitechaksï no jukaparharaspti imani libertadini enga Jeoba intsïkuarhiapka jiáni enga Ejiptu uératini petatantaapka paraksï nóteru jántspirinia. Máru kutsï tátsekua, uénasptiksï jirinhantani imani tʼirekuani engaksï Ejiptu arhenga ka nóteruksï jaiapanhintasptia ambe enga Jeoba íntsauenga. Astaksï uandaspti eskaksï uékasïrenga kʼuanhatsintani Ejiptu. Para imecha sánderu jukaparhakuespti kurucha, pepinu, sandia, puerru, seboia ka ajusï, ka eska libreeni para Jeobani kómarhini. Jimbosï Jeoba xáni ikiapti imecha jingoni (Núm. 11:5, 6, 10; 14:3, 4). I ambejtsïni jukaparhakua ambe jorhendasïndi.

7. ¿Néna úraspi Pablu imani konsejuni enga ima mísmu íntspipka 2 Korintu 6:1 ka nénachi uá juchajtu májkueni úni?

⁷ Apostuli Pablu pʼímarhiaspti kristianuechani paraksï jukaparharani imani libertadini  engajtsïni Jeoba íntskuka imeri Uájpa Jesukristuni jimbo (arhinta je 2 Korintu 6:1). Ju je miántani na enga xáni no sési pʼikuarherenga Pablu enga jántspiripka pekadueri ka uarhikueri. Peru úraspti imeri mísmu konsejuni ka uandaspti: “Diosmeiamu arhisïnga Diosïni juchari Acha Jesukristuni jimbo”. ¿Andi? Uandaspti: “Jimboka engani juramuminhajka Espiritu Santuni jimbo enga tsípikua íntspijka Kristu Jesusini jimbo, ísï kuájpinhasïngani para eskarini pekadu ka uarhikua nóteru juramuchiaka” (Rom. 7:24, 25, Táta Diósïri Uandakua Tata Jesukristueri Aiatsperakua; 8:2). Juchajtuchi jatsiska para jukaparharani enga Jeoba úka eskachi nóteru jántspiriuakia pekadueri ka uarhikueri, jimbokachi tata Jesukristueri uarhikua jimbo, úsïnga pímbinhasï konsiensia ma jingoni marhuakuni Jeobani (Sal. 40:8).

8, 9. a) ¿Ambe konsejujtsïni íntskuski Pedru de nénachi jatsiski para úrani libertadini? b) ¿Náki peligruechaksï jarhaski iásï?

⁸ Aparte dechi agradeserini, jatsiskachi para sési úrani juchari libertadini. Apostuli Pedru uandaspti eskachi no úrapiringa juchari libertadini para no sési jásï ambe úni (arhinta je 1 Pedru 2:16). I adbertensiajtsïni imani ambe miátantasïndi engaksï israelitecha úkuarhinchapka desierturhu. Ka juchajtuchi iásï uétarhinchasïnga ini adbertensiani ka asta sánderu eskaksï ima. Satanasi ka imeri parhakpini, sánhani arhixatiksï mámaru jásï takusï ambe aiatspini, akua ambe, tsípikuarhita ka máteru jásï ambe. Ima enga jorhenaka ini ambe atarantani, sési járhati kʼuiripuechani úraasïndi parachi jucha eratsini eskachi jatsiska para piáni ambe ma nájkirukachi no uétarhinchani jauaka. Kánikua fásilisti ísï eratsini ka no sési úrani juchari libertadini.

⁹ Pedrueri konsejujtsïni ístu marhuachisïndi para exeni máteru ambe enga sánderu jukaparhakueka, komu sinchi niua eskuela o ambechi ánchikuarhia. Por ejemplu, tumbiichaksï arhinhasïndi eskuela eskaksï jánguarhintaaka unibersidadirhu nirani. Arhiasïndiksï eska engaksï kʼamaraska unibersidadini, uákaksï ambakiti ánchikuarhita ma jatsini nani engaksï kánikua tumina andaaka ka respetarinhanksï. Ka exeranhasïndiksï informasioni enga xarhatajka na engaksï xáni andajka imecha engaksï nika unibersidadirhu ka ístu imecha engaksï no nika. Iámindu i ambe uáti kánikua sési kurhaakuarhini para tumbi ma enga jatsika para erakuni ambe uá imeri tsípikua jingoni. ¿Ambe jatsiski para miáni i tumbi ka imeri táticha?

10. ¿Ambechi jatsiski para miáni engachi erakuni jámaaka ambe ma úni?

¹⁰ Máruksï jamberi uáti eratsini eska komu i ambe kada kieniriika, jatsiskaksï libertadi para úni ambe engaksï uékaaka enga imecheri konsiensia no no sési pʼikuastajka. Jamberiksï uáti eratsini: “¿Andisïni jatsi para jusgarinhani máteru nemaeri konsiensia jimbo, indeni ambe jimbo engani libreka para úni?”. Ísïsti eskachi libreska para erakuni ambechi estudiariua ka ambechi uá juchari tsípikua jingoni. Peru uétarhisïndi miáni eskachi no kʼamakʼamasï libreska ka eska ambe engachi erakuaka úni, uáka sési ambe juáni o no sési ambe. Jimbosï Pablu uandapti: “Sésikua jatsiska para úni iámindu ambe, peru no iámindu ambe terokuntasïndi [o marhuani]. Ji sésikua jatsiskani para iámindu ambe úni, peru no iámindu ambe jarhuatpisïndi” (1 Kor. 10:23). I ambejtsïni jarhuatasïndi miáni engachi erakuni jámaaka ambe ma úni, eska no sánderu jukaparhakueska ambe engachi jucha uéjka.

11. ¿Para ambejtsïni salbariski Jeoba?

¹¹ Enga Pedru uandapka eskachi  no no sési úrapiringa libertadini, ístu uandaspti eska parachi úni sési úrani, jatsiskachi para “Diosïri ambarhati jántspirich[eni]”. Jeobajtsïni salbaristi pekadueri ka uarhikueri Jesusini jimbo parachi jucha méntkisï marhuakuni.

12. ¿Ambe ejemplujtsïni íntskuski Noe ka imeri familia?

¹² Ambe engajtsïni jarhuataaka no no sési úrani libertadini, ni ménderu jántspirini imani amberi engachi tsitijka o enga parhakpini uéjka, jindesti okupadu jarhani Jeobaeri ambe jingoni (Gal. 5:16). Ju je exeni Noeri ka imeri familiaeri ejemplu. Nájkiruka jiánisï kánikua ísku jándikua ambe japka ka atajperakua ambe, nóksï jurajkuspti eska ima ambe enga kʼuiripu uékenga, támisï paapiringa. ¿Ambe jarhuataaspi? Kánikua okupadu jarhani imani ambe jimbo enga Jeoba arhiapka eskaksï úpiringa: arkani úni, tʼirekua patsani para imecha ka animalicha ka aianguni kʼuiripuni eska kʼamakurhikua niáraxapkia. Biblia arhisïndi: “Noe ísï úspti iámindu ambe eska Tata Diosï na arhipka. Ísïmindu úspti eska na arhinhapka” (Gén. 6:22). Ini ambe jimbo, Noe ka imeri familiaksï salbarikuarhispti (Ebr. 11:7).

13. ¿Náki juramukuajtsïni íntskuski Jeoba?

¹³ ¿Náki juramukuajtsïni íntskuski Jeoba? Jesusiri chúxapatichachi mítiska eskajtsïni juramuchiska aianhpini (arhinta je Lukasʌ 4:18, 19). Ini jurhiatikuechani, Satanasi úsïndi eska sáno iámindu kʼuiripu no kuenta íntskukuarhiaka ambe enga újka ka eska jántspiriuaka relijionicheri, jatsikuarhikueri ambe ka imani amberi engaksï újka para terokukuni kʼuiripuni (2 Kor. 4:4). Peru juchachi jatsiska pribilegiu para Jesusiri ejempluni seguirini ka jarhuatani kʼuiripuni para mítini ka marhuakuni Jeobani, imani Tata Diosïni enga íntspijka libertadi (Mat. 28:19, 20). I ambe no fásilisti ka uánikua ójkutakuechaksï jarhasti. Máru paisicharhu, kʼuiripu no uékasïndi kurhani Jeobaeri ambe ka máruksï asta ikiasïndi engachi predikarikuajka. Peru komujtsïni Jeoba juramuchika predikarini, jatsiskachi para kurhamarhikuarhini, ¿uá úrani juchiti libertadini parani sánderu apoiarini Reinueri ánchikuarhitani?

14, 15. ¿Ambeksï niáraski úni uánikua Jeobaeri marhuaricha? (Exea je fotuechani engaksï uénakuarhu jaka).

 ¹⁴ Kánikuajtsïni uinhaperantasïndi exeni na engaksï xáni uáni Jeobaeri marhuaricha, arisku sáni irekani jaka paraksï úni tiempu kompletueri marhuani jimbokaksï kurhangusïnga eska kʼamakurhikua axuterku jarhaskia (1 Kor. 9:19, 23). Máruksï imecheri mísmu kúnguarhikuarhu ísï úxati ka máteruksï mótsisti nani enga sánderu uétarhini jaka jarhuajperata para predikarini. Informichaksï xarhatasïndi eska arini últimu sinku uéxurhini, jukari 250,000 erachichaksï uénaska tiempu kompletueri marhuani. Iásï, en totaliksï jindestia jukari 1,100,000. ¡Xáni enga sési ambe úkuarhijka enga nema sési úrajka imeri libertadini para Jeobani marhuakuni! (Sal. 110:3).

¹⁵ ¿Ambe jarhuataski ini erachichani paraksï ísï úni? Ju je John ka Judithiri ejemplu exeni. Uánikua paisicharhuksï marhuasti arini treinta uéxurhini jimbo enga nitamakia. Miásïndiksï eska enga uénakuarhipka Jorhentperakua para Prekursoricha uéxurhini 1977, estudiantichaksï kurhaminhasïrenga mótsini nani engaksï sánderu eianhpiricha uétarhini japiringa. John uandasïndi eska uánikua uelta mójtakuspka imeri ánchikuarhitani paraksï úni arisku sáni irekani ka sánderu marhuani. Tátsekua, máteru paisirhuksï niraspti predikarini. Jimaksï kuenta íntskukuarhispti eska kómarhini Jeobani ka mintsikani, jarhuataasïrenga orhepani uérakuani ójkutakuechani, komu jimbanhi idioma ma jorhenguarhini, jimbanhi pʼindekuechani jatsiani ka p’indeni jima enga kánikua aparhekuarhipiringa ka tsʼirakuarhini. ¿Nénaksï pʼikuarherasïni engaksï xáni ióni marhuakuka Jeobani? John uandasïndi: “Ísï pʼikuarherasïnga enajkini no na jatini xáni ambakiti ambe úpi. Para ji, Jeoba ísïsti eska kʼuiripu ma, ísï eska táti uékpiti ma. Iásï, sánderuni sési kurhangusïnguia ambe enga arhikuekajka Santiagu 4:8 enga arhijka: ‘Andarhiera je Diosïni, ka imajtuksïni andarhierati chánksïni’. Mítispka eskani exentaspkia ambe engani jirinhantani japka: agustu irekani ka propositu ma jingoni”.

16. ¿Nénaksï úraski uánikua erachicha imecheri libertadini?

¹⁶ Máteru erachichaksï no úsïndi ióni marhuani tiempu kompletueri imani ambe jimbo engaksï nitamakuarhini jarhajka. Peru uánikuaksï aiakukuarhesïndi para jarhuajpini konstruksionirhu enga interu parhakpini úkuarhini jaka. Por ejemplu, 27,000 erachicha ísïksï ánchikuarhisti para jimbanhi sentrali mundiali únhani Warwick (Nueva York). Máruksï tsimani semana marhuaspti, máteruksï mesicha jimbo ka máteruksï ma uéxurhini o asta sánderu jamberi. Uánikua engaksï nípka ánchikuarhini, kʼérati sakrifisiuechanksï uáspti. Ambakiti ejemplu máestiksï de néna úrani libertadini engajtsïni Jeoba íntskuka para kʼéri ambe arhini.

17. ¿Ambe erokuarhikua jatsiski ima enga sési úrani jaka imani libertadini enga Jeoba íntspijka?

¹⁷ Agradesiduchi jarhaska jimbokachi mítiska Jeobani ka jatsiskachi libertadi para kʼéri ambe arhini. Eska ambe engachi erakuaka úni, xarhataaka eskachi jukaparharasïnga indeni libertadini. Enbesi dechi no sési úrani, ju je úrani para sánderu sési marhuakuni Jeobani. Engachi ísï úska, uákachi mintsikani eskachi jatsiauaka ini kóntperatechani enga ima aiatspiaka arini uandakuecha jingoni: “Iámindu ambe enga kueraakateka, nóteru juramuminhaa[tia] uarhikuani jimbo, sino jimbanheranhantani, jimajkani engaksï Diosïri uájpecha xarhantaaka tʼíntskua jingoni” (Rom. 8:21).