UÉXURHINI, uánikua Jeobaeri testiguechaksï interu parhakpini anapu erakunhasti para orhejtsïkutiini ka orhejtsïkuticheri jarhuajpiriini. Enga cha jindeka ma ísï i erachi, seguru eskajtsï tsípini jaka jimbanhi asignasioni jimbo.

Perujtsï jamberi sáni chéni pʼikuarherajka ka normalisti. Jason, orhejtsïkuti sapichku ma, uandasïndi: “Engani orhejtsïkuti únhapka, eratsispka eskani no úpiringa xáni kʼéri ma ánchikuarhita jingoni”. Moisesi ka Jeremiasi, ístuksï ísï pʼikuarheraspti enajkiksï no úpirini úni imani ánchikuarhitani enga Jeoba íntsaapka (Éx. 4:10; Jer. 1:6). ¿Chájtu ménisï ísï pʼikuarheraski? ¿Ambejtsï uá úni parajtsï no ísï pʼikuarherani ka seguirintsï progresarini? Exeakachi Timoteueri ejemplu (Uku. 16:1-3).

Jamberi Timoteu 20 ísï jatiripti enga Pablu pʼímarhipka imeri biajicharhu. Jamberi uénani jámani chéndi ka úkua jukanchani úni imeri ánchikuarhita kúnguarhikuarhu (1 Tim. 4:11, 12; 2 Tim. 1:1, 2, 7). Peru diesi uéxurhini tátsekua, Pablu úspti arhini Filipusi anapu kúnguarhikuani: “Mintsikaxaka tata Jesukristuni eskaksïni no ióni jimbo axachiaka Timoteuni [...], jimbokani nóteru nemani jatsiska ixú enga ísï májku jásï pʼikuarherajka eskani ji” (Filip. 2:19, 20).

¿Néna niáraspi Timoteu xáni ambakiti orhejtsïkuti máeni? Ju je seisi ambe exeni imeri engajtsï uáka jorhenguarhini.

1. Meru uandanhiasïrendi máteruecha jimbo. Pablu arhiaspti Filipusi anapu erachichani eska Timoteu meru uandanhiasïrenga imecha jimbo (Filip. 2:20). Jo, Timoteu uandanhiasïrendi máteruecha jimbo. Uékasïrendi eskaksï sánderu andarherapiringa Jeobani ka úspti ambe enga uétarhipka para jarhuataani.

William, enga jukari 20 uéxurhini orhejtsïkutikia, arini konseju íntskusïndi imani enga nombradueka: “Uékperakua jingoni kaa erachichani. Exe ambeksï uétarhinchasïni ka no solu ambe enga uétarhijka kúnguarhikuarhu”. Ísï jimbo, asï ísïi je eska autobusiri choferi ma enga sánderu uandanhiajka para sóntku niárani paradarhu ka eska kʼuiripuni jatsirani.

2. Orheta péraspti eianhpikuani. Enga Pablu uandapkia Timoteueri jángueri, uandaspti eskaksï iámindu máteruecha ‘jirinhasïrenga solu imecheri ambe ka nóteruksï pendienti pánia Kristu Jesusiri ambe jimbo’ (Filip. 2:21). Pablu Roma jarhaspti enga karapka ini ambe ka exespti eskaksï jima anapu erachicha jukari okupadu jarhaspka imecheri ambe jimbo. Nóksï sáni jánguarhintasïrendi para Jeobani marhuakuni. Peru Timoteu jo. Enga jatsienga modu para sánderu aianhpini, imeri eratsikua ísïsïrendi eska Isaiasiri enga uandapka: “¡Ixú jarhaska ji! Jíndini axa” (Is. 6:8).

¿Ambejtsï uá úni parajtsï kumplirini chári ambe jingoni ka kúnguarhikueri ambe jingoni? Orheta, exe je ambe sánderu jukaparhakueski. Pablu uandaspti eska jukaparhakueska jorhenani “erakuni ambe enga sánderu ambakitiika” (Filip. 1:10). Jukaparhara je ambe enga Jeoba jukaparharajka. Segundu, mójtaku je máru ambe. Asï ú je imani ambe engaksïni tiempu euaka ka uinhapikua. Pablu arhispti Timoteuni: “Sïpakuarhiku indeni ambeni  engaksï jimbo tsípikuarhijka tumbicha, ka jánguarhi jurhimbitku jámani ka Diosïni mintsikani ka uékpini ka pínandikua jatsini” (2 Tim. 2:22).

3. Kánikua ánchikuarhispti para Jeobani marhuakuni. Pablu miátantaspti filipusichani: “Chájtsï mítiskia na enga xáni ambakitiika ima [Timoteu], ka exeskajtsï eska ima ísï jámaska jíndini jingoni para etsakuni ambakiti eianhperakuani komueska ma uájpa imeri tátembani jingoni” (Filip. 2:22). Timoteu no xépespti. Ima Pablu jingoni ánchikuarhispti ka i ambe uinhaperaspti imecheri pájperakua.

Jeobaeri kúnguarhikuarhu, kánikua ánchikuarhita jarhasti engaksïni sési pʼikuastaaka ka engaksïni andarhiteraaka erachicha jingoni. Ísï jimbo, jatsikukuarhi je meta parajtsï ‘méntku jauenani úni Diosïri’ ambe (1 Kor. 15:58).

4. Úspti ambe enga jorhenguarhipka. Pablu karakuspti Timoteuni: “Peruri t’u chúngumaska juchiti jorhenguani, na engani jámajka, juchiti proposituni, juchiti jakajkukuani, juchiti tekantskuani, juchiti uékperakuani, juchiti aguanteni” (2 Tim. 3:10, TNM). Timoteu úspti ambe enga jorhenguarhipka, jimbosï niárapti jatsiani kʼérati responsabilidadichani (1 Kor. 4:17).

¿Jatsiskijtsï ejemplu orhejtsïkuti jánhaskatiri ma engajtsï uáka chúngumani? Enga no ísïka, ¿andijtsïsï no jirinhajki ma? Tom, enga ióni orhejtsïkutikia, miásïndi: “Erachi ma enga ióni orhejtsïkutipkia, uandanhiaspti jíndeni jimbo ka niáraspti juchiti jorhentpiriini. Seguidu kurhakusïrenga konseju ka úraasïrenga. Inde amberini jarhuataspti sánderu seguru pʼikuarherani”.

5. Seguirispti sánderu jorhenguarhini. Pablu pʼímarhispti Timoteuni para jorhenguarhini ‘janhanharhiparini Diosïni’ (1 Tim. 4:7). Uiriari ma uáti jatsini né enga jorhendajka, peru ístu jatsisti para jorhenguarhikuarhini. Pablu arhispti Timoteuni: “Méntku jauena arhitspintani Diosïri karakatani, ka arhistatspini ka jorhentpini [...]. Méntku jauena eratsini ini ambe, ka mintsita jingoni ísï ú, paraka xarharaaka iáminduechani japarini eskari seguirixaka para orhepani” (1 Tim. 4:13-15).

Chájtujtsï uáka seguirini progresarini. Ambakiti estudianti máe je ka pendienti ja je jimbanhi instruksionicha jingoni Jeobaeri kúnguarhikueri. Asï jukari mintsikakuarhi je, jamberi eratsiparini eskajtsï kánikua jánhaskatiskia ka eskajtsï nóteru xáni uétarhinchasïngia inbestigarini para atenderini ambe ma. Májkueni eska Timoteu, seguiri je jorhenguarhini ka jorhendaani máteruechani (1 Tim. 4:16).

6. Mintsikaspti Jeobaeri espirituni. Pablu arhispti Timoteuni eska kuidaripiringa imeri ánchikuarhitani “espiritu santuni jimbo” (2 Tim. 1:14). Para kuidarini imeri ánchikuarhitani, Timoteu jatsispti para mintsikani Jeobaeri espiritu santuni.

Donald, enga ióni orhejtsïkutikia, uandasïndi: “Nombraduechaksï jatsisti para jukaparharani ka kuidarini imecheri pájperakua Jeoba jingoni, ísï jámanksï sánhani arhiati uinhapini. Engaksï kurhakuska Jeobani espiritu santu ka xarhataanksï imeri kualidadichani, kʼéri kóntperata máeuatiksï para erachicha” (Sal. 84:7; 1 Ped. 4:11).

Kánikua sésisti exeni eska Jeoba úraaxaka iámindu imani erachichani engaksï apenasi nombrarinhaka, komueska cha. Jason, engachi uénakuarhu uandaka, uandasïndi: “Desdekani uénaka orhejtsïkutiini, uánikua ambe jorhenguarhiskia ka iásï sánderuni seguru pʼikuarherasïngia. Tsitisïnga juchiti asignasionini ka ísï exesïnga eska kʼéri ma kóntperata”.

Ka cháia, ¿jurajkuajtsï paraksïni Jeoba seguirini úrani? Jatsikukuarhi je meta de ísïini eska Timoteu. Ísïjtsï chájtu uáka kóntperata máeni para Jeobaeri ireta.