1-3. a) ¿Ambeksï jatsiski para úni iámindu tumbiicha ka ambe jingonchi úpirini terokutantani? (Exe fotuni enga uénakuarhu jaka). b) ¿Ambeksï uá úni tumbiicha engaksï Testigueka paraksï orhepani uérakuni ini ambe?

ERANHASKA eskari kʼéri ma biaji uáka autobusi jimbo parari tánguarhikuarhu ma nirani enga kánikua jukaparhakueka. Engari niárajka sentralirhu, méntkuri no jánhaskerasïnga ambe úni engari xáni uáni kʼuiripuni ka autobusichani exeajka. Peru komuri mítitini jakaia nanirisï uéjki nirani, seguirisïngari imani autobusini jatani engakini paaka. Nori ísku jatini imani autobusini jataaka engakini máteru nani paaka.

² Irekua ísïsti eska ima biaji, ka tumbiichaksï ísïsti eska ima kʼuiripu enga sentralirhu jaka. Ka komuksï uánikua ambe jatsika para erakuni, uátiksï ménisï no jánhaskani ambe úni. Peru engaksï sési mítitini jaka naniksïsï uéjki nirani, sánderu fásiliuati eskaksï imani ambe erakuaka úni enga jarhuatauaka niárani jima engaksï uéjka.

³ I artikulu pʼímarhiauati uátsïchani ka tumbiichani paraksï jánguarhintani jaiapanherantani Jeobani. I ambe arhikuekasïndi úraani Jeobaeri konsejuechani irekuarhu para iámu ambe, komu para exeni sinksï estudiariua, ambeksï ánchikuarhia, sinksï uambucha o tembucha,  o sinksï kaaua sapiichani. Ístu arhikuekasïndi andanguani imani metechani engaksïni andarheteraaka Jeobani (metas espirituales). Tumbiicha engaksï jánguarhintajka jaiapanherantani Jeobani, uátiksï seguru jarhani eska ima újchakurauaka ka eska sési nikuauaka irekuarhu (arhinta Proverbios 16:3).

4. ¿Ambechi exea ini artikulurhu?

⁴ Jatsikukuarhiani metechani engaksïni sánderu andarheteraaka Jeobani, ambakiti ambesti. ¿Andi? Tanimu rasonichanchi exeauaka ini artikulurhu. Primera ka segunda rasoni, exeraatikini eska jánguarhini imani ambe úni enga Jeoba jaiapanhintajka, jarhuatasïngakini sánderu ambakiti amigueni Jeobaeri. Ka terserakini exerauati kóntperatechani engaksï jarhajka engari tumbiitini o uátsïitini ísï újka.

5. ¿Náki jindeski primera rasoni engari jimbo jatsika para jatsikukuarhiani metechani?

⁵ Primera rasoni engari jimbo jatsika para jatsikukuarhiani metechani, jindesti para xarhatakuni Jeobani na engari xáni agradeserijka imeri uékperakua ka ambe enga xáni úkia tʼungini jimbo. Tata Diosïri marhuari ma karaspti: “Sésisti diosmeiamukua íntskuntani Jeobani”. Ka ístu uandaspti: “Jimbokari úska eskani tsípini pʼikuarheraaka, o Jeoba, chíti úkuecha jimbo; chíti jájkiri úkuecha jimbo, tsípisïnga uinhachaparini” (Sal. 92:1, 4). Uátsï ka tumbi, eratsi ambe engakini xáni íntskukia Jeoba: tsípiku, sésikua parari mítini imani ka imeri jurhimbikuani, Bibliani, kúnguarhikuani ka ambakiti erokuarhikua ma para sánderu orhepani. Engari orheta péraaska metechani engaksïni sánderu andarheterajka Jeobani, nori solu xarhatakuni jauaka eskari agradesidu jarhaska, ísturi sánderu ambakiti amigueuaka imeri.

6. a) ¿Nénaksïni jarhuatasïni metecha parari sánderu sési pájperani Jeoba jingoni? b) ¿Náki metechanksï uá jatsikukuarhiani sapiicha?

⁶ Segunda rasoni jindesti, eska engari jánguarhintajka andanguani metechani engaksïni sánderu andarheterajka Jeobani, ambakiti amberi úni jarhasïnga enga Jeoba exejka. Ka i ambekini ístu jarhuatasïndi parari ambakiti pájperakua ma jatsini imani jingoni. Apostuli Pablu arini ambe uandaspti: “Diosï jurhimbit[iisti], ísï jimbo ima no mirikurhiauati chári úkuechani ka níjtu indeni ambe engajtsï úni jaka xarhataparini eskajtsï uékasïnga” (Ebr. 6:10). No nema jukari sapichuesti para metechani jatsikukuarhiani. Por ejemplu, Christine * 10 jatirispti enga jatsikukuarhipka meta para iámindu erachicheri experiensiechani arhiantaani. Toby 12 jatirispti enga uandapka eska jatsispka para iámu arhintani Bibliani ante de itsï atakuarhini. Maxim 11 jatirispti ka imeri ermana Noemi 10 engaksï itsï atakuarhipka. Ka jima para orhepani, uénasptiksï ánchikuarhini paraksï andanguni imecheri metani para Beteli marhuani. Ka paraksï no mirikurhini ini metani, solisitudi de Beteli máksï manharhitaspti imechio. Ka tʼuia, ¿andirisï no exejki náki metechaniri sánderu jukaparharaasïni ka uénaniri ánchikuarhini parari andanguani? (Arhinta Filipusʌ 1:10, 11).

7, 8. a) ¿Andichisï uandajki eska sánderu fásilisïnga erakuni ambe úni engari jatsikukuarhiajka metechani? b) ¿Andisï uátsï ma erakupi no nirani unibersidadirhu?

⁷ Ju je exeni tersera rasonini enga jimbo uétarhijka eskari jatsikukuarhiauaka metechani. Engari uátsïjka o tumbiini, jatsisïngari para erakuni amberi estudiariua, naniri ánchikuarhia ka máteru ambe. Erakuni ambe úni, ísïsti komu exeni naniasïri niua engari kruserurhu ma niárajka. Engari sési mítitini jaka nanirisï uéjki nirani, sánderu fásiliuati exeni naniasï nirani. Ka sáno májkuenisti chíti tsípikua jingoni, engari sési mítitini jaka amberisï uéjki, sánderu fásiliuati exeni amberi jatsiski para úni. Proverbios 21:5 arhisïndi eska enga nema kuidadu jingoni eratsiska ambe enga uáka, iámu ambe sési uérakuaka. Entreri sánderu sóntku exeska amberisï uá ka jatsikukuarhiandi ambakiti metechani, sánderuri sóntku pʼiuauaka kóntperatechani. Ka ísï úkuarhinchaspti  Damaris, enga jatsipka para erakuni ambe ma enga jukaparhakuepka.

⁸ Damaris ambakiti kalifikasionicha jingoni uéntaspti preparatoriarhu ka beka ma aiaminhaspti para Derechu estudiarini unibersidadirhu. Peru ima mejori bankurhu ma inchaspti ánchikuarhini mediu tiempu. ¿Andi? Ima uandasïndi: “Iónisï mítispkia eskani uékasïrenga prekursoreni. Ka parani ísï úni, jatsipka parani mediu tiempujku ánchikuarhini. Engani estudiaripiringa Derechu, úpiringa kánikua andani, peruni no úpiringa mediu tiempujku ánchikuarhini”. Damaris iásï jamberi beinte uéxurhini paxatiia komu prekursora. ¿No sési pʼikuarherasïni imani ambe jimbo enga uátsïitini erakupka úni? Nómbe. Uandasïndi: “Bankurhu uánikua abogaduecha jingoni ánchikuarhisïnga engaksï imani ánchikuarhita újka engani ji úpiringa engani Derechu estudiaripiringa. Peruksï uánikua no felisisti imecheri ánchikuarhita jingoni. Ji erakuska prekursora úkuarhini, ka i amberini jarhuatasti parani ji no májkueni pʼikuarherani ka uánikua uéxurhinistia engani kánikua tsípikua jingoni marhuakuka Jeobani”.

9. ¿Andiksïsï jukancha juchari tumbiicha eskachi felisitariuauaka?

⁹ Interu parhakpini anapu kúnguarhikuecharhu, uánikua tumbiichaksï jarhasti engaksï jukanchaka eskachi felisitariuauaka, jimbokaksï mintsita jingoni marhuakusïnga Jeobani ka jánguarhintanksï jarhani imani metechani andanguani engaksï sánderu andarheterauaka Jeobani. Íksï tumbiicha tsípikuarhisïndi, peruksï ístu jorhenguarhisïndi exeni méntkisï ambe uandasïni Jeoba, komu por ejemplu ánchikuarhiteri, familieri ka eskueleri ambe. Salomoni karaspti: “Mintsika Jeobani iámu chíti mintsitani jingoni”. Ka ístu uandaspti: “Iámindu ambe engari uáka, ú imani eratsiparini, ka ima jurhimberaauati chíti xanharuechani” (Prov. 3:5, 6). Jeoba kánikua jukaparharaasïndi tumbiichani. Ima kánikua xénchaasïndi ka jimbosï kuájchakuajti, jarhuataani ka újchakuraani.

10. a) ¿Andirisï jatsi para kánikua jukaparharani eianhpikuani? b) ¿Ambekini jarhuataa parakini sési nicheni eianhpikuarhu?

¹⁰ Uátsï ma o tumbi ma jatsisti para kánikua jukaparharani eianhpikuani enga uéjka eska Jeoba jaiapanhintaaka. Jesusi jorhentpespti eska i ánchikuarhita kánikua jukaparhakueska jimboka ante de i parhakpini kʼamajkunhani, jatsiska para ‘eianhpinhani ambakiti eianhperakua’ (Mar. 13:10). Eskari na exejka, eianhpikua, ambe máesti engari jatsika para orheta peerani. Ísï jimbo, ¿ménisïri eratsiskia sánderu seguidu uérani eianhpini o asta prekursoriini? Peru engari no káni tsitijka eianhpini, ¿amberi uá úni? Ka ¿ambekini jarhuataa parakini sánderu sési nicheni engari Jeobaeri ambe eianhpiaka? Ú ini tsimani ambe: sési prepararikuarhi ka méntkisï eiangua máteruechani ambe engari mítika. A lo mejoriri ísku pakaraaka engari exeska na engari xáni sési pʼikuarheraaka.

11, 12. a) ¿Nénaksï uá tumbiicha listu jarhani paraksï eianhpini? b) ¿Ambe úspi tumbi ma enga sésikua intsïnhapka eskuela para Jeobaeri ambe uandantani?

¹¹ Orheta, prepararikuarhi parari mókukuantani chíti kompanieruechani engaksïni kurhamarhiska ambe ma, komu andirisï jakajkujki Tata Diosïni. Juchari pájina Internetirhu jw.org/tsz ka máteru publikasionicharhu, jarhastiksï artikuluecha para jarhuataani tumbiichani mókuantani máru kurhamarhikuechani engaksï sánderu únhajka. Por ejemplu, foietu Mókuntskuecha para 10 kurhamarhikuecha tumbiicheri, jarhuataatikini preparariuani mókuntskuechani para kurhamarhikuecha komu: “¿Jakajkusïniri Tata Diosïni?”, o “¿Jatsipirini parani jakajkuni ebolusionini?” (arhinta 1 Pedru 3:15).

¹² Engari jatsiaka oportunidadi, arhia chíti kompanieruechani eskaksï inchaaka pájinarhu jw.org/tsz. Indeni ambesï úpti Lucas, ma jurhiani enga klaserhu relijionicheri ambe uandanhani japka. Ima exespti eska libru ma chkuanderakua ambe uandasïrenga Jeobaeri testiguecheri. Nájkiruka chéni japka, sésikua kurhakuspti maestrani  para explikarini eska ambe enga libru uandenga, chkuanderakua ambespka. Iáminduechani japarini uandantaspti ambe enga jakajkujka ka ístu exeraaspti juchari pájina Internetiri. Maestra arhiaspti eska tarea jindespka exeni bideuni Néna kuájpikuarhini no nemani ataparini. Lucas kánikua tsípixapti enga úpka Jeobaeri ambe uandantani.

13. ¿Andirisï no jatsi para desanimarikuarhini engari ójkutakuechani jatsiauaka?

¹³ Asï desanimarikuarhi engari jatsiaska ójkutakuechani chíti irekuarhu parari andanguani chíti metechani. Jánguarhinta úni ambe engari eratsitini jakaia (2 Tim. 4:2). Katharina ísï úspti. Enga 17 jatiripka, meta jatsikukuarhispti para iámindu ánchikuarhitarhu anapu kompanieruechani predikarikuani. Máechakua méntku úndaspti no sési arhini, peru ima no chéspti. Imeri jángua ísku pakataspti kompanieru jembani ma enga Hans arhinhajka. Ka ini ambe jimbo, uénaspti arhiantaani juchari publikasionichani, estudiarini Bibliani ka itsï atakuarhini. Katharina no ma ambe mítispti jimboka mótsispkia. Trese uéxurhini tátsekua, Kʼumanchikua Reinuerirhu jarhaspti imeri familia jingoni ka ísku pakaraspti enga exepka eska ima enga nitamatarapiringa diskursuni para iáminduecha, jindespka Hans. Ka i ambe niáraspti ísï úkuarhini jimboka kumplirispka imeri metani para predikarikuani imeri kompanieruechani.

14, 15. a) ¿Amberi jatsiski para miáni engaksïni máteruecha presionarini jauaka? b) ¿Amberi uá úni parari orhepani uérani engaksïni máteruecha presionarini jauaka?

¹⁴ Asta ixú jamberi, i artikulukini pʼimarhistia parari jánguarhintani jaiapanherantani Jeobani ka jatsikukuarhiani metechani. Jamberi máteru uátsïcha o tumbiicha engaksï chíti edeka, méntkuksï tsípikuarhini jarhajti ka pʼímarhinksïni parari tʼujtu májkueni úni. Kókuani o ióndani, jatsiskari para xarhatani sindi meru uá ambe engari eratsitini jakaia. Asï jurajku eska máteruecheri presioni uáka eskari mirikurhiauaka chíti metechani. Eratsi ménderu sentraliri ejempluni. ¿No ísïski eska no nema jatapiringa autobusirhu ma nomasi jimboka ima engaksï jima jatarini jaka tsípikuarhixaka?

¹⁵ Mámaru ambe jarhasti engari uáka úni parari orhepani uérani engaksïni máteru uátsïcha o tumbiicha presionarini jauaka. Por ejemplu, asï jimesïsï ja engari mítika eska uáka jarhani tsʼéjkukua ambe (Prov. 22:3). Eratsi na enga xáni no sési  ambe úkuarhipiringa engari no sési ambe niátapiringa (Gal. 6:7). Máteru ambe engakini jarhuataaka, jindesti jiókuarhini eskari uétarhinchasïnga máteruecheri jarhuajperata. Engari kaxumbitiika, tsípikua jingoniri jiókuarhiauaka chíti táticheri konsejuechani ka máteru kristianuecheri engaksï jánhaskatiika (arhinta 1 Pedru 5:5, 6).

16. Uandanta experiensia ma enga xarhatajka andisï jukaparhakue kaxumbitiini.

¹⁶ Ju exeni tumbiiri ma ejemplu enga Christoph arhinhajka, ima kaxumbitispti ka jiókuarhiaspti konsejuechani enga intsïnhaapka. Ísï tátsekua enga itsï atakuarhipka, uénaspti gimnasiorhu nirani. Jima, máteru tumbichaksï pʼímarhispti para imecha jingoni apuntarikuarhini para chʼanani. Ima, orhejtsïkutini ma aianguspti ka ima arhispti eska ante de tantiarini ambe úni, eratsipiringa na xánksï uáni peligruecha jarhaspi, por ejemplu, méntkisï uékani andani. Peru Christoph siempri apuntarikuarhispti. Tátsekua, niáraspti kuenta íntskukuarhini eska ima chʼanakua atajperakueri ambespka ka eska asta peligrosuespka. Uánikua orhejtsïkuticha jingoni uandontskuarhispti íri ambe ka iáminduksï Biblia jingoni íntskuspti konseju. Ima uandasïndi: “Jeobarini erachichani axacheaspti parajtsïni ambakiti konsejuechani íntsaani, nájkirukani sáni ióndapka kurhajchani, siemprini kasu úkuspka”. ¿Jatsiskiri imani kaxumbikuani enga uétarhijka para jiókuarhiani konsejuechani?

17, 18. a) ¿Ambe uékasïni Jeoba para uátsïcha ka tumbiicha? b) ¿Amberi uá úni parari tátsekua no no sési pʼikuarherani imani ambe jimbo engari iásï erakuaka úni? Jatsiku ejemplu ma.

¹⁷ Jeobakini arhisïndi: “Tsípikuarhi tumbi iásï engari tumbiika, ka sésikini pʼikuaste chíti mintsita iásï engari sapichkueka” (Ecl. 11:9). Ima uékasïndi eskari felisiuaka. Ka ini artikulu jimbori jorhenguarhiskia eska parari felisiini, jatsiskari para jánguarhini andanguani imani metechani engaksïni sánderu andarheteraaka Jeobani ka ístu, méntkisï exeni néna eranguerasïni Jeoba ambe engari erakuni jámaaka úni. Entreri sánderu sapichku ísï úska, sánderuri sóntku exeaka na engakini Jeoba jarhuatajka, na engakini kuájchakujka ka újchakurani. Eratsia iámindu imani ambakiti konsejuechani engakini Bibliarhu íntsaajka ka ú ambe engaksï arhijka i uandakuecha: “Miá chíti Ambakiti Kuerajpirini iásï engari sapichkueka” (Ecl. 12:1).

¹⁸ No nema úsïndi méntkisï uátsïini o tumbiini. Engari jamberi kuenta íntskukuarhiaka, tʼuiniri kʼériuakia. Uánikua engaksï kʼériikia, no sésiksï pʼikuarherasïndi jimbokaksï no sési erakuska ambe ma, o no ma ambeksï úni ka i ambe májkueni no sési pʼikuastpesïndi. Peru ima uátsïcha o tumbiicha engaksï jánguarhijka imani metechani andanguani engaksï sánderu andarheterauaka Jeobani, agustuksï pʼikuarheraati engaksï kʼériuakia. Ísï pʼikuarherasïndi iásï Mirjana. Enga sapichku japka, ambakiti chʼanari máespti ka pʼímarhinhaspti para nirani chʼanani jima engaksï uánikua paisicha chʼanapiringa. Peru ima mejori Jeobani erakuspti marhuakuni tiempu kompletueri. Jukari treinta uéxurhinistia ka ima útasï tiempu kompletueri marhuaxati uámba jingoni. Ima uandasïndi: “Fama jatsini, uinhapikua ka kánikua tumina andani, ambe máesti enga no ióni marhuajka ka enga no ma ambe jukaparhakueka. Peru ambe enga kʼóru jukaparhakueka, jindesti Jeobani marhuakuni ka sikiera sáni jarhuajpini paraksï máteruecha úni mítini”.

19. ¿Náki kóntperatechaniri pʼiuaua engari jatsikukuarhiaska metechani?

¹⁹ Ima uátsïcha ka tumbiicha engaksï Jeobani marhuakuni jaka, jukanchastiksï parachi felisitariuani, jimboka ambe enga sánderu jukaparhakueka para imecha, jindeska Jeobani marhuakuni nájkirukaksï jatsiajka ójkutakuechani. Jánguarhintasïndiksï imani metechani andanguani engaksï sánderu andarheteraajka Jeobani, jukaparharani eianhpikuani ka no jurajkuni eska i parhakpini uáka eskaksï mirikurhiauaka imecheri metechani. Uátsï ka tumbi, uákari seguru jarhani eska no ískueska ambe engari xáni úni jaka ka eskari jatsiska erachicheri uékperakua ka apoiu. Engari Jeobani jurajkukuska iámindu chíti ambe, sésikini nicheati méntkisï.