1, 2. a) ¿Ambe uétarhisïni eskachi jorhenaaka úni ka andi? b) ¿Ambechi exea ini artikulurhu?

AMBAKITI kristianuechachi jatsiska para jorhenani sési exeni informasionini engachi intsïnhajka ka sési eratsintani ambe enga uétarhijka úni (Prov. 3:21-23; 8:4, 5). Engachi no ísï úska, sánderu fásiliuati eska Satanasi ka imeri parhakpini uáka eskachi no sési eratsintaaka ambe ma (Efes. 5:6; Kol. 2:8). Buenu, parachi úni ambakiti ambe úni, uétarhinchasïngachi iámu informasioni jatsini. Ísï jimbo, Proverbios 18:13 arhisïndi eska “enga nema mókuntajka ante de kurhaani ambe ma, inde ambe tontuesti ka kʼuratsekua ma”.

² Ini artikulurhu, exeakachi imani ambe enga újka eskachi no uáka jatsini iámu informasioni ka eskachi no uáka sési eratsintani ambe ma para mítini ambe úni. Exeauakachi Bibliaeri prinsipiuechani ka ejempluechani engajtsïni jarhuataaka sési exeni imani informasionini engachi intsïnhajka.

3. ¿Andichisï jatsi para Bibliaeri prinsipiuni úrani enga Proverbios 14:15 jaka? (Exe je dibujuni enga uénakuarhu jaka).

³ Ini tiempu jimbo, kánikua informasionichi intsïnhasïnga. Pájinecha Internetiri, telebisionirhu ka máteru erramientecha para informasioni etsakuni, kánikua informasionksï niárasïndi petani. Ka ístu,  kʼuiripuechaksï uánikua korreu elektronikuechani axaminhaasïndi, mensajichani ka notisiauechani engaksï imecheri amiguecha axakuajka ka máteru kʼuiripuecha engaksï sési ambe uéjka úni. Peru ístuksï jarhasti kʼuiripuecha engaksï uéjka no sési ambe niátani, etsakuparini informasioni enga no jurhimbitiika ka engaksï máteru ambe uandantajka enga no ísïka. Ísï jimbo, jatsiskachi para jingontku jámani ka sési exeni imani ambe engachi arhintajka ka kurhaani. ¿Náki Bibliaeri prinsipiujtsïni uá jarhuani? Proverbios 14:15 arhisïndi: “Kʼuiripu no jánhaskati ma iámindu ambe jakajkusïndi, peru ima enga jánhaskatiika jingontku exesïndi ambe uá”.

4. a) ¿Nénajtsïni jarhuatasïni ambe enga arhijka Filipusʌ 4:8, 9 parachi sési erakuni ambe engachi arhintaaka? b) ¿Andisï xáni jukaparhakue eskachi jirinhantaaka informasioni enga ísïika? (Ístu exe je rekuadruni “ Jarhuajperatecha engajtsïni jarhuatajka iámu informasioni jatsini”).

⁴ Parachi imani ambe úni enga sési jaka, jatsiskachi para imani informasionini úrani enga segurueka. Ísï jimbo, jatsiskachi para sési erakuni ambe engachi arhintaaka (arhinta je Filipusʌ 4:8, 9). Ju je no ísku ambendarhini tiempu Internetirhu para jirinhantani jarhani notisia ambe enga no segurueka, ni arhiantani jarhani korreu elektronikuechani o mensajichani engaksï no jurhimbitku ambe uandantajka. Ka sánderu jukaparhakuesti eskachi méntku no jámaaka exeni imani pájinechani Internetiri engaksï apostatecha etsakuajka. Imaksï uékasïndi chkerani Tata Diosïri marhuaricheri jakajkukuani ka chkuanderakua ambeksï uandani jurhimbikueri. Iámindu i jásï informasionijtsïni uáti imani ambe úrani enga no sési jaka. Ju je no méni eratsini eskajtsïni no uáka no sési ambe úcheni juchari eratsikuarhu ka mintsitarhu (1 Tim. 6:20, 21).

5. ¿Náki informasionksï kurhaaspi israelitecha enga no ísïpka ka na pʼikuaskuaspi inde ambe?

⁵ Jakajkuni imani informasionini enga no ísïika, uáti no sési ambe úkuarhini. Por ejemplu, ju je eratsintani ambe enga úkuarhipka jiáni enga Moisesi dose espiechani axapka paraksï Echerini exeni engaksï Aiaminhapka. Diesi espiechaksï kʼuanhatsintaspti informasioni ma jingoni enga no sési japka (Núm. 13:25-33). Jukari jamberiksï uandantaspti ka inde ambe úspti eskaksï israelitecha desanimarikuarhipiringa (Núm. 14:1-4). ¿Andi? Jamberiksï eratsipti: “Engaksï sáno iámindu espiecha indeni ambe uandajka, jiájkani ísïiti”. Ísï jimbo, nóksï uékaspti ambakiti ambe kurhaani engaksï Josue ka Kalebi uandantenga, kʼuiripuecha engaksï mintsinharhikuepka (Núm. 14:6-10). Enbesi deksï asegurarikuarhini sini informasioni ísïspi ka mintsinharhini Jeobani, no sési ambeksï úspti engaksï informasionini jakajkupka enga no ísïpka.

6. ¿Andichisï no no sési exea engachi chkuanderakua ambe kurhaska Tata Diosïri ireteri ambe?

⁶ Jatsiskachi para sánderu jingontku jámani engachi chkuanderakua ambe kurhaska Tata Diosïri ireteri. Nochi mirikurhiaka eska Satanasi méntku no sési jásï ambe jauatakuani jarhasïnga Tata Diosïri ambakiti marhuarichani (Jaŋ. 12:10, TNM). Jimbojtsïnisï Jesusi adbertirichipti eskaksï juchari enemiguecha chkuanderakua ambe uandapiringa juchari ambe (Mat. 5:11). Engachi sési jimbo jakajkuska ini adbertensiani, nochi no sési exeaka engachi chkuanderakua ambe kurhaska Tata Diosïri ireteri ambe.

7. ¿Ambechi jatsiski para kurhamarhikuarhini ante dechi axaani mensajichani o korreu elektronikuechani?

⁷ ¿Tsitisïnchi axakuani korreu elektronikuechani ka mensajichani juchari amiguechani ka imani engachi mítiaka? Engachi exejka notisia ambe enga interesanti jaka o experiensia ma kurhaani engachi tsitiaka, ¿ísïskichi eska ima reporteru enga orhetku uéjka eianhpini? Antesi de axani mensaji ma o korreu ma, uétarhisïndi kurhamarhikuarhini: “¿Seguru jarhaski eska i informasioni ísïiska? ¿Jatsiski iámu informasioni?”. Engachi no seguru jaka, úpiringachi aianguani juchari erachichani informasioni  enga no ísïika. Ísï jimbo, sánderu sésisti eskachi jaiaskuaka botonini para borrarini ka no imani enga jindeka para axani.

8. a) ¿Ambeksï úski juchari enemiguecha máru lugaricha jimbo? b) ¿Nénachi uá juchajtu májkueni úni jarhani eska imecha sinchi kuenta íntskukuarhiparini?

⁸ Jirejiresï axantaani korreu elektronikuechani ka mensajichani, peligru máesti. Máru lugaricha jimbo, nochi úsïnga agustu eianhpini o asta meru nochi úni. Jamberi jimaksï juchari enemiguecha chkuanderakua ambe etsakujti parachi chéni ochi no mintsinharperani. Ju je eratsintani ambe enga úkuarhipka ióntki jini Unión Soviética. Polisia sekreta (ísï mítikata komu KGB) chkuanderakua ambe uandaspti, eskaksï uánikua erachicha engaksï kánikua mítikatepka, traisionariuaspkaksï Jeobaeri marhuarichani. * Uánikuechaksï jakajkuspti ka jurajkusptiksï Tata Diosïri organisasionini. Uánikuaksï kʼuanhatsentaspti, peruksï máteruecha no méni kʼuanhatsentaspti, jimboka imecheri jakajkukua chkespka (1 Tim. 1:19). ¿Ambechi uá úni parachi no májkueni úkuarhinchani? Ju je no méni reenbiariuani notisiauechani engaksï no jurhimbitkueka o engaksï ísku jatini uandanhajka. Ju je no tontueni ni jakajkuni iámindu ambe engachi kurhajka. Ju je asegurarikuarhini de jatsini iámu informasioni.

9. ¿Ambe máteru ambe úsïni úni eskachi no jatsiaka informasioni enga meru ísïika?

⁹ Máteru ambe enga újka eskachi no jatsiaka informasioni enga ísïika, jindesti eska no iámu ambe jurhimbitku uandanhantasïnga oksï no iámindu ambe uandantani. Ju je miáni eska ima informasioni enga no iámindu ambe ísïika, uákajtsïni enganiarini. ¿Ambechi uá úni parachi no ísï úkuarhinchani? (Efes. 4:14).

10. a) ¿Andisïksï israelitecha sáno uarhiperapi entre imecha? b) ¿Néna jimboksï no niáraspi uarhiperani?

¹⁰ Ju je exeni ambe enga úkuarhipka ióntki Israeli, Josueri jurhiatikuechani jimbo (Jos. 22:9-34). Israelitecha engaksï ríu Jordanirhu irekapka imani ladu jimbo enga jurhiata inchajtsïkuenga, kurhaasptiksï eska imecha engaksï máteru ladu jimbo irekani japka (Rubeniri ka Gadiri tribuecha ka ma parti Manasesiri tribueri) kʼéri altari maksï úspka ríurhu no iauani. Ima informasioni ísïspti, peru no iámindu ambe. Imani informasioni jingoni, imecha engaksï imani ladu jimbo japka enga jurhiata inchajtsïkuenga, eratsisptiksï eskaksï imecheri ermanuecha jurajkuspkia Jeobani,  jimboksïsï prepararikuarhipti para nirani uarhipeni imecha jingoni (arhinta je Josué 22:9-12). Peru xáni sési engaksï orheta axaapka máru kʼuiripuechani engaksï mintsinharhikuepka paraksï iámindu ambe inbestigarini. Eiangunhasptiksï eska imecheri ermanu jembechaksï no úspka altarini paraksï kéjtsïtakuechani uáni. Sánderu sési, jindespti monumentu ma paraksï iáminduecha mítipiringa eskaksï Jeobani marhuakusïrenga. Seguru eskaksï israelitecha engaksï ima ladu jimbo japka enga jurhiata inchajtsïkuenga, kánikuaksï tsípipka engaksï iámindu ambe sési inbestigaripka ka nóksï niárani uándikuani ermanu jembechani.

11. a) ¿Ambe úspi eska Mefibóseti no jurhimbikua jingoni kánhapiringa? b) ¿Ambe jatsispi para orheta úni Dabidi?

¹¹ Ístu, juchajtuchi uáka no sési pʼikuastanhani imani ambe jimbo enga uandanhaaka juchari ambe ka enga no iámindu ambe jurhimbitkueuaka. Ju je exeni ambe enga úkuarhipka rei Dabidi ka Mefibóseti jingoni. Dabidi sési kámaspti Mefibósetini ka intsaantaspti echerichani engaksï imeri tatita Sauliripka (2 Sam. 9:6, 7). Peru tátsekua, Mefibósetiri ambe eiangunhaspti. No inbestigariparini imani ambe enga eiangunhapka, euantaspti iámindu jatsikuarhikua ambe (2 Sam. 16:1-4). Enga uandontskuarhipkia Mefibósetini jingoni, kuenta íntskukuarhispti eska no sési ambe úspka ka íntsaantaspti máru echerichani (2 Sam. 19:24-29). Dabidi no niárapirindi imani ambe úni enga arhutapiringa tiempu para iámindu ambe sési inbestigarini, enbesi de jirejiresï úni ambe ma.

12, 13. a) ¿Ambe úspi Jesusi enga chkuanderakua ambe jauataminhapka? b) ¿Ambechi jatsiski para úni engachi chkuanderakua ambe jauataminhaska?

¹² Iásï, ¿ambechi jatsiski para úni engachi chkuanderakua ambe jauataminhaska? Inde ambeksïsï úkuarhinchapti Jesusi ka Juanu el Bautsita (arhinta je Mateu 11:18, 19). ¿Ambe úspi Jesusi? Enbesi de úrani imeri tiempu ka uinhapikuani para kuájpikuarhini, pʼímarhiaspti kʼuiripuechani paraksï imani ambe exeni ambe enga úkuarhini japka, ambe enga ima uénga ka jorhentpini. Eska Jesusi mismu na uandapka, “ambakiti jorhengua xarharasïndi eska ambakiska imani jimbo engachi janhanharhijka o úkuechani jimbo”.

¹³ Ambakiti ambechi jorhenguarhisïnga ixú. Jamberi ménisï, kʼuiripu mámaru ambe uandaati juchari ambe oksï imani ambe uandani engajtsïni no sési pakataaka. ¿Ambechi uá úni? Enga nema chkuanderakua ambe uandaska juchari ambe, uétarhisïndi eskachi ambakiti ambe uáka paraka xarharaaka eska ima ambe no ísïska. Ísï eska Jesusiri ejemplu na xarhatapka, engachi jánguarhintaska ambakiti kristianu máeni, xarhataakachi eska chkuanderakua ambeska ambe enga uandanhaka juchari ambe.

14, 15. ¿Andichisï no jatsi para mintsinharhikuarheni?

¹⁴ Exeskachia eska úkua jukaaka jatsini informasioni enga mintsinharhikueka. Máteru ambe enga uáka eskachi úkua jukanchaaka niárani imani ambe eratsini enga sési jauaka, jindesti jimbokachi no perfektueska. Ju je eranhaskani eskachi ióni páxakaia Jeobani marhuakuni ka niáranchi jánhaskati máeni ka jorhenanchi sési eratsintani ambe ma. Jamberi inde ambe uáti úni eskajtsïni máteruecha janhanharhiaka. Peru ¿uá trampa ma úkuarhini i ambe?

¹⁵ Jo, engachi jukari mintsinharhikuarhiska. Ima ambe engachi pʼikuarhinhijka ka na engachi exejka ambe ma, uáti no sési úkuni juchari eratsikuani. Uákachi ísï exeni eskachi uáka kurhanguni ambe úni situasioni ma jingoni, nájkirukachi no jatsiaka iámu informasioni. Peru inde ambe kánikua peligrosuesti. Bibliajtsïni arini adbertensia íntskusïndi: “Asï mintsika chíti eratsikuani” (Prov. 3:5, 6; 28:26).

16. Ini situasioni jingoni engachi eranhaskaka, ¿ambe úkuarhispi restaurantirhu ma ka ambe seguirispi eratsini Tomasi?

¹⁶ ¿Néna uá úkuarhini i ambe? Ju je eranhaskani  arini ambe. Erachi ma enga ióni orhejtsïkutikia enga Tomasi arhinhajka, restaurantirhu ma jarhasti. Peru ísku pakarasïndi enga exejka máteru orhejtsïkutini enga Juanu arhinhajka senarini jarhani nanaka ma jingoni enga no imeri témbeka. Tsimarhanksï agustu nitamakuarhixati, terekuarhixatiksï ka asta uékperakua jingonksï kamanharperaxati. Tomasi eratsisïndi eska Juanu enganiarixaka témbani ka kurhamarhikuarhisïndi: “¿Niáraaksï diborsiarikuarhini? ¿Ka ambe úkuarhia uájpecha jingoni?”. Sánhani arhisïndi sánderu uandanhiani, jimboka no i primeru xanhariska enga ini situasioni ambe exeka. Jamberi uánikua juchachi májkueni pʼikuarherapiringa eska Tomasi.

17. a) ¿Amberi kuenta íntskukuarhispi Tomasi? b) ¿Ambechi jorhenguarhisïni ini situasioniri ambe engachi eranhaskaka?

¹⁷ Peru ju je eratsintani. ¿Sési jimbo Tomasi jatsispi iámu informasioni para imani ambe eratsini? Ima mismu chúri uandajpaspti Juanuni. Kuenta intskukuarhispti eska ima nanaka enga restaurantirhu japka, imeri pirembespka enga ióni nóteru exepkia. Komu piremba no ióni pakarapiringa siudadirhu, pakatperasptiksï májku kʼéri senarini, peru Juanueri témba no úpirindi pámbitaani. Tomasi kánikua sési pʼikuarherantaspti. Ka sési úspti enga nótki nemani eianguni japka indeni ambe. ¿Ambechi jorhenguarhisïni íri ambe? Eska no arhiparini na xáni iónichi páxakia marhuakuni Jeobani, kánikua jukaparhakuesti jatsini iámu informasioni antesi de ísku ambe ma eratsini.

18. ¿Ambe úpirini úni eskachi ísku ambe ma niáraaka eratsini juchari erachiri ma?

¹⁸ Engachi no újka sési pájperani erachi ma jingoni ka ima erachi úni ambe ma, sánderuchi úkua jukanchaaka kurhanguni erachiri situasionini. Seguirini jarhanchi eratsini eskachi no úsïnga sési pájperani erachi jingoni, uáti úni eskachi ísku ambe ma eratsiaka erachiri. Ka inde ambe uáti eskachi sóntku jakajkuaka engachi kurhaska no sési jásï ambe erachiri. I ambejtsïni jorhendasïndi eska engachi jatanhekuaska erachichani, uáti úni eskachi ísku ambe ma eratsiaka imecheri (1 Tim. 6:4, 5). Parachi no niárani indeni ambe úni, ju je no jurajkuni eskachi uénaaka pʼikuarhinhini juchari mintsitarhu enbidia ambe ni selosueni. Ju je miáni eskachi jatsiska para uékaani erachichani ka mintsita jingoni puákuantaani (arhinta je Kolosasi 3:12-14).

19, 20. a) ¿Náki Bibliaeri prinsipiuechajtsïni jarhuataa sési exeni iámu informasionini? b) ¿Ambechi exea máteru artikulurhu?

¹⁹ Ini artikulurhuchi tanimu rasonichani exeaska engaksï újka eska úkua jukaaka jatsini iámu informasioni ambe máeri ka sési exeni imani ambe: sáno iámu informasioni engachi intsïnhajka no kompletuesïndi, uánikua ambe chkuanderakuesïndi ka jimbokachi no perfektueska. ¿Ambejtsïni uá jarhuatani? Eskachi jatsiska para kumpliriuani Bibliaeri prinsipiuechani. Ma prinsipiu arhisïndi eska sóntku mókuntani ante de kurhaani iámindu ambe, tontukueska ka kʼuratsekua ma (Prov. 18:13). Máteru prinsipiujtsïni miátantasïndi eskachi no jatsiska para iámindu ambe jakajkuni sini exeni eska ísïska (Prov. 14:15). Últimu, no arhiparini na xánchi ióni páxakia marhuakuni Jeobani, nochi jatsiska para mintsinharhikuarhini (Prov. 3:5, 6). Bibliaeri prinsipiuechajtsïni kuájchakusïndi engajtsïni jarhuatajka jirinhantani informasioni enga segurueka ka imani jarhuajperatechani úraani engaksï mintsinharhikueka para imani ambe eratsini enga ísïika ka ambakiti ambe erakuni úni.

²⁰ Peru útasï uétarhisïndi exeni máteru ambe. ¿Náki? Jirejiresï jusgarpini imani ambe jimbo engachi exejka. Máteru artikulurhuchi exeaka tanimu ambe enga újka eskachi indeni ambe uáka ka ambechi uá úni para no indeni ambe niátani.