1. ¿Ambe tʼuini uandaspia Isaiasi Jesusiri ambe, ka andijtsïnisï uinhaperantajki i profesia?

MA PROFESIARHU enga Jesusiri ambe uandajka, Isaiasi uandaspti: “No jusgarpiati seguni eska na jáxeaka ma kʼuiripu, ni seguni eska na kurhajchpiaka. Ka jurhimbikua jingoni jusgariauati pobrichani” (Is. 11:3, 4). I uandakuechajtsïni kánikua uinhaperantasïndi. ¿Andi? Jimbokachi irekaxaka parhakpinirhu ma enga no xénchperanhajka. Iáminduechachi erokuarhixaka eska niáraaka ima jurhiatikua enga Jesusi jusgarpiaka, Juesi perfektu enga no solu imani ambe jimbojtsïni jusgariuaka seguni na engachi xarharaaka.

2. ¿Ambejtsïni juramuchiski Jesusi, ka ambechi exea ini artikulurhu?

² Pauani pauani, niárasïngachi eratsini ambe ma máteruecheri. Jimbokachi no perfektueska, nochi úsïnga sési jusgarpini, ísï eska Jesusi na újka. Seguirisïngachi eratsini ambe ma imani ambe jimbojku engachi exejka. Peru nájkiruka ísïka, enga Jesusi Echerirhu japka, arini juramukuajtsïni íntskuspti: “Asï jáma je jusgarpini eska na xarharajka ma ambe, sino jusgarpi je eska námindu jurhimbikueka” (Juanu 7:24). Eskachi na exekia, Jesusi uékasïndi eskachi seguiriuaka imeri ejempluni ka no imani ambejku exeni seguni eska na xarharaaka nema. Ini artikulurhu, tanimu ambechi exeaka enga sáno méntkisï  újka eskachi máteru ambe eratsiaka kʼuiripueri ma: nani enga anapueuaka o rasa, tumina ka na enga xáni jatiriuaka. Mándani situasionirhu, exeakachi nénachi uá kumplirini ambe enga Jesusi juramuka.

3, 4. a) ¿Andisï apostuli Pedru niárapi ménderueni exeania no judiuechani? (Exe je dibujuni enga uénakuarhu jaka). b) ¿Jeoba náki jimbanhi jorhentperakua intskuspi Pedruni?

³ Ju je eranhaskani ambe enga xáni eratsipka apostuli Pedru enga arhinhapka eska ireta Sesarea jimbo nipiringa, Korneliueri kʼumanchikuarhu enga no judiuepka (Uku. 10:17-29). Ísï eska máteru judiuecha, Pedru imani eratsikua jingoni tʼarhexespti para ísï exeani no judiuechani komu kʼuiripuecha engaksï no pímbinharhapka. Peru nitamakuarhispti máru ambe enga úpka eska ménderueni eratsipiringia. Por ejemplu, Tata Diosï bisioni ma exeraspti (Uku. 10:9-16). Imani bisionirhu, exespti sabaneni jásï ma kétsini jarhani uánikua animalicha jingoni engaksï no pímbinharhapka, ístu kurhaaspti bosi ma auandarhu uératini enga arhienga eska uándikuapiringa animalichani ka auantaani. Peru no uékaspti. Jimajkani bosi arhispti: “Imani enga Diosï pímbinhajkuntaka, asï arhi tʼu eska ikichakueni jásïska”. Enga na kʼamarapkia exeni bisionini, apostuli Pedru no úsïrendi kurhanguni ambe enga ima bosi uékenga arhini. Ísï no ióndani, niárasptiksï máru achaticha enga Korneliu axaapka. Ka espiritu santueri jarhuajperata jimbo, Pedru niraspti imani achaticha jingoni Korneliueri kʼumanchikuarhu.

⁴ Judiuechaksï no méni inchaakusïrendi kʼumanchikuecharhu no judiuecheri jimbo. Ísï jimbo, enga Pedru imantku ambe exepiringa enga uérakisï xarharajka, no méni nipirindi Korneliueri kʼumanchikuarhu. Jimajkani, ¿andisï nípi? Niraspti imani ambe jimbo enga bisionirhu exepka ka ístu espiritu santueri jarhuajperata jimbo. Eska na kurhapkia ambe enga Korneliu uandantapka, Pedru kánikua sési pʼikuarheraspti enga jamberi Tata Diosïri jarhuajperata jimbo uandapka: “Iásï kʼóru sési jimbo mítiskani eska Diosï no nani kʼuetsapisïnga, sino eska jeiapanhintasïnga nákinterku ma nasioni anapu kʼuiripuni enga janhanharhijka imani, ka sési úni” (Uku. 10:34, 35). I jimbanhi jorhentperakua enga Pedru intsïnhapka, jarhuataapirindi iámindu kristianuechani. ¿Néna jimbo?

5. a) ¿Ambe uékasïni Jeoba eskachi iámindu kristianuecha kurhanguaka? b) Nájkirukachi mítika eska Jeoba iáminduechani jukaparharaasïnga, ¿ambechi uá úkuarhinchani?

⁵ Pedruni úraparini, Jeoba jarhuataaspti iámindu kristianuechani paraksï kurhanguni eska Jeoba iáminduechani jukaparharaasïnga. Jeoba no exesïndi rasani, nani enga anapueka, tribuni o idiomani. Jiókuarhiasïndi iámindu achatichani ka uarhiitichani engaksï janhanharhijka ka jurhimbitku ambe újka (Gal. 3:26-28; Jaŋ. 7:9, 10). Seguru eskachi iámindu kristianuecha mítika eska i ambe ísïska ka eratsinchi eskachi iáminduechani jukaparharasïnga. Peru engachi lugari ma jimbo tʼarhexeka o familiarhu ma enga no xénchajka máteruechani, jamberi uáti eska útasï juchari mintsitarhu inde jásï pʼikuarhinhikua ambe jauaka. Asta Pedru enga sésikua intsïnhapka para jarhuataani máteruechani exeni eska Jeoba iáminduechani jukaparharaasïnga, tiempu jingoni, Pedru xarhataspti eska útasï kueratasïrenga xénchaani iámindu jásï kʼuiripuechani (Gal. 2:11-14). Jiájkani, ¿nénachi uá kumplirini Jesusiri juramukuani ka nóteruchi jusgarpinia seguni eska na xarharaaka nema?

6. a) ¿Ambejtsïni jarhuata méntku kénditani juchari mintsitarhu ima ambe enga újka eskachi no xénchauaka máteruechani? b) ¿Ambe xarhataspi ambe enga uandapka orhejtsïkuti ma?

⁶ Parachi kuenta íntskukuarhini sinchi útasï kueratanchasïni xénchpini, uétarhisïndi eskachi terokutantaaka juchari jánguani, imani ambe jingoni engachi Bibliarhu jorhenguarhijka (Sal. 119:105). Ístuchi uáka amiguni ma kurhamarhini  enga mintsinharhikueka, sini útasï exesïni eskachi jucha no xénchaasïnga máteruechani (Gal. 2:11, 14). Uákachi útasï kueratanchani jarhani xénchaani máteruechani ka nochi kuenta íntskukuarhini. Ju je exeni ambe enga uandapka orhejtsïkuti ma, temungurhiriri ma engaksï tiempu kompletueri marhuani jaka. Uámba, grupu ma kʼuiripuecheri jimbo anapuesti engaksï no uánika ka sáno iámindu kʼuiripu no xénchaasïndi. Peru orhejtsïkuti no kuenta íntskukuarhixapti eska imajtu menusi úsïrenga imani grupuni. Orhejtsïkuti uánikua sési jásï ambe uandaspti ima erachiri ambe, peru kʼamarhukuni jámani karaspti: “Nájkiruka [i grupurhu anapueka], imeri jángua ka na enga jásï irekua jatsika, jarhuataasïndi máteruechani kurhanguni eska [i grupurhu anapueni] no arhikuekasïnga no sési jásï jámani ka arisku sáni irekani, ísï eskaksï na újka uánikua inde grupurhu anapuecha”. ¿Kurhanguskichi? No arhiparini ambe engachi responsabilidadi jatsika Jeobaeri iretarhu, jatsiskachi para kuidadu jingoni exekuarhini ka jurajkuni eskajtsïni máteruecha jarhuataaka exeni sini útasï juchari mintsitarhu jarhaski ambe ma engachi jimbo no xénchaajka máteruechani. ¿Ambeteruchi uá úni?

7. ¿Nénachi uá xarhatani eskachi mintsita jingoni uékaasïnga máteruechani?

⁷ Engachi mintsita jingoni jiókaaska iáminduechani, uékperakua uáti eskachi xénchaauaka iáminduechani (2 Kor. 6:11-13). ¿Pʼindeskichi solu imechani jingoni uandontskuarhini engaksï juchari idioma uandajka oksï juchari raseni, tribu, oksï májku lugarirhu anapueni eska jucha? Enga ísïika, ju je jánguarhintani kúnguarhini imecha jingoni engaksï máteru jásï pʼindekuechani jatsiaka. ¿Andichisï no pʼímarhiajki parachi májku kʼéri nirani eianhpini, ochi pʼímarhiani juchari kʼumanchikuarhu parachi arhani ambe ma o parachi májku kʼéri jarhani máteru erachicha jingoni? (Uku. 16:14, 15). Engachi ísï úska, juchari mintsitarhu puru uékperakua ambe jauati ka no jauati lugari para no xénchaani máteruechani. Ístu, jarhasti máteru ambe enga újka eskachi no sési jusgariuauaka máteruechani, tumina.

8. Seguni Levítico 19:15, ¿ambe uá úni eskachi ménderueni exeauaka máteruechani?

⁸ Máteru ambe enga uáka úni eskachi ménderueni exeauaka máteruechani, jindesti tumina. Indeni ambesï arhikuekajti Levítico 19:15 enga arhijka: “Nori jatsiska para no sési kámani pobrini ma, ori sánderu sési kámani rikuni ma. Jurhimbikua jingoniri jatsiska para jusgarini chíti prójimuni”. ¿Néna uá kʼuiripueri jatsikuarhikua ambe o pobrikua, úni eskachi ménderueni exeaka imani kʼuiripuni?

9. ¿Ambe karaspi Salomoni enga ísïika, ka ambechi jorhenguarhisïni inderi ambe?

⁹ Espiritu santuni jimbo, Salomoni karaspti ambe ma enga ísïika ka engaksï kʼuiripu imperfektuecha újka: “Kʼuiripu pobrini, niárasïndiksï asta besinuecha kurhunhini, peru riku ma uánikua amiguechani jatsiasïndi” (Prov. 14:20). ¿Ambechi jorhenguarhisïni i proberbiueri? Eska engachi no kuidadu jatsiska, uákachi imani erachichani jingontku kúnguarhini engaksï jatsikuarherika ka nochi uékani kúrhiani imechani engaksï no káni jatsikuarherika. ¿Andisï xáni peligrosue sánderu jukaparharaani máteruechani imani ambe jimbojku engaksï jatsika?

10. ¿Náki problemani uandaspi Santiagu?

¹⁰ Engachi jusgariuaska máteruechani imecheri tumina jimbo, uákachi úni eska kúnguarhikua no májku kʼéri jauaka. Primeru siglurhu, disipulu Santiagu adbertirikuaspti eska inde problema máespka enga úni japka eskaksï kúnguarhikuecha no májku kʼéri japiringa (arhinta je Santiagu 2:1-4). Ju je no jurajkuni eska í ambe úkuarhiaka juchari kúnguarhikuarhu. ¿Ambechi uá úni parachi no jusgarpini tumina jimbo?

11. Enga kʼuiripu ma sési pájperajka Jeoba jingoni, ¿imani ambe jimboeski na enga xáni jatsikuarhika?

¹¹ Jatsiskachi para ísï exeani juchari erachichani  eska Jeoba na exeajka. Ima no sánderu o menusi jukaparharaasïndi imechani engaksï rikueka o pobrika. Juchari pájperakua Jeoba jingoni no imani jimboeuati ambe engachi xáni jatsikuarhika. Ísïsti eska Jesusi uandaspka “eska úkua jukaska para ma jatsikuarheri inchani auandarhu anapu juramukuarhu”, peru no uandaspti eska meru no úpiringa (Mat. 19:23). Peru ístu uandaspti: “Tsípisïngajtsï cha engajtsï xáni kómu nitamajka o pobricha, jimboka cháriska Diosïri irekakua” (Luk. 6:20). Peru ini ambe jingoni no arhikuekaxapti eskaksï iámindu pobriicha kurhajchapiringa ka kʼérati kóntperatechanksï intsïnhaani. Astaksï jarhaspti pobriicha engaksï no méni niárapka Jesusiri disipulu úkuarhini. I ambe arhikuekasïndi eskachi no uáka uandani eska kʼuiripu ma Jeobaeri amigueska o nómbe, imani ambe jimbo enga jatsika.

12. ¿Ambe arhiasïni Biblia rikuechani ka pobrichani?

¹² Tata Diosïri iretarhu, jarhastiksï uánikua erachicha ka pirenchicha engaksï xénchajka Jeobani ka mintsita jingonksï marhuakuni. Máruksï rikuesti ka máruksï pobristi. Biblia juramukuasïndi rikuechani paraksï no jámani mintsikani “imecheri jatsikuarhikuani enga sóntku kʼamarajka, sino [...] Diosïni” (arhinta je 1 Timoteo 6:17-19). Peru ístu arhiasïndi iáminduechani engaksï Jeobani marhuakuni jaka —ia seaksï rikueni o pobrini— eska peligrosueska kánikua tumina uékani jatsini (1 Tim. 6:9, 10). Engachi ísï exeaska juchari erachichani eska Jeoba na exeajka, nochi jusgariuauaka imani ambe jimbo engaksï jatsikuarhika. Peru ¿sési japirini jusgariuani imani jimbo na engaksï xáni jatiriika? Ju je exeni.

13. ¿Ambejtsïni arhisïni Biblia na engachi jatsika para kaani erachichani engaksï jatirikia?

¹³ Bibliajtsïni someni juramuchisïndi eskachi janhanharhiauaka jatirichani. Levítico 19:32 arhisïndi: “Jauaraakari imani japarini enga tʼupuntsïka, ka jatsiskari para janhanharhini imani enga tʼarhepikia ka jatsiskari para janhanharhini chíti Tata Diosïni”. Proverbios 16:31 arhisïndijtsïni eska “tʼupuntsïkua jindes[ka] korona ma enga sési xarharajka, enga jurhimbikuarhu jarhajka”. Ka apostuli Pablu arhispti Timoteuni eska no jámapiringa no sési xukani achati jatirini ma, sino eska arhistakupiringa komueska tátini ma (1 Tim. 5:1, 2). Nájkiruka Timoteu jatsipka sánisï juramukua para erachicha jingoni engaksï sánderu jatiripka eska ima, jatsispti para respetu ka uékperakua jingoni kaani.

14. ¿Na jatini sési japirini jurhimberantani nemani enga sánderu jatirika eska jucha?

¹⁴ Peru ¿ambe úkuarhia enga erachi jatiri ma uékantku pekariska o imani ambe jorhentpini enga Tata Diosï no jeiapanhintajka? Jeoba no jusgariuati seguni na enga xarharajka erachi ka no ísku pakaraati solu jimboka ima erachi jatiriskia. Ju je exeni prinsipiuni enga Isaías 65:20 jimbo jaka: “Ka pekadorini jimbo, nájkiruka sieni uéxurhini jatiriuakia, niáraati uandanhani eska no sési ambe úkuarhinchaaka”. Májkueni jásï prinsipiu machi exentasïnga Esekieliri bisioni ma jimbo (Ezeq. 9:5-7). Ísï jimbo, ambe enga sánderu jukaparhakueka, jindesti méntkisï Jeobani respetarini, imani enga kánikua jatirikia (Dan. 7:9, 10, 13, 14). Jiájkani, nochi chéaka jurhimberantani nemani enga uétarhinchani jauaka, no arhiparini na uéjki xáni jatirini (Gal. 6:1).

15. ¿Ambechi jorhenguarhisïni apostuli Pablueri ambe de respetariuani erachichani engaksï tumbiika?

¹⁵ ¿Ka nénachi jatsiski para kaani tumbiichani kúnguarhikuarhu? Ju je exeni Timoteueri ambe. Apostuli Pablu arini ambe arhispti: “Asïkini nema no janhanharhie jimbokari nótki jatirisïnga, sino jindee t’u ma ejemplu para jakajkuticha chíti uandakuechani jimbo, sési jángua jimbo, uékperakua jimbo, espirituni jimbo, ka engari mintsikajka Diosïni ka pímbinhasïndi” (1 Tim. 4:12). Enga apostuli karapka ini ambe, Timoteu apenasi 30 ísï jatiripti. Peru Pablu kʼérati responsabilidadichani íntsaaspti. No arhiparini ambe enga jimbo íntskupka ini konsejuni,  ambe engachi jorhenguarhijka, jindesti eskachi no jatsiska para jusgariuani tumbiichani solu imecheri edadi jimbo. Ju je miáni eska asta Jesusi jiáni uénaspka eianhpini enga apenasi 30 ísï jatiripka.

16, 17. a) ¿Nénaksï exesïni orhejtsïkuticha sini ma erachi kumpliriuasïni rekisituechani para orhejtsïkutiri jarhuajpirini o orhejtsïkutini? b) ¿Náki problema úpirini jarhani entre Biblia ka juchari pʼindekuecha o na engachi eratsijka?

¹⁶ Máru lugarichani jimbo, nóksï kánikua jukaparharaasïndi tumbiichani. Enga i ambe úkuarhijka nani engachi anapueka, jamberi orhejtsïkutichaksï no rekomendariuajti tumbiichani engaksï kumpliriuajka iámindu rekisituechani paraksï orhejtsïkutiri jarhuajpirini o orhejtsïkutini. Orhejtsïkutichaksï jatsisti para miáni eska Biblia no arhisïnga edadi ma paraksï úni rekomendarini erachini ma (1 Tim. 3:1-10, 12, 13; Titu 1:5-9). Enga orhejtsïkuti ma regla ma úska jupindaskuarhiparini imeri pʼindekuecha jimbo, no úxati imani ambe enga Biblia jorhentpijka. Orhejtsïkutichaksï no jatsisti para jusgariuani tumbichani seguni eskaksï na exeauaka o iretarhu anapu pʼindekuecha jimbo, sino seguni eska Biblia na uandajka (2 Tim. 3:16, 17).

¹⁷ Engaksï orhejtsïkuticha imecheri pʼindekuecha jimbo jupindaskuarhiska enbesi de Biblia jimbo, jamberiksï no rekomendariuajti erachichani engaksï kumpliriuajka rekisituechani paraksï orhejtsïkutiri jarhuajpirini o orhejtsïkutini. Paisi ma jimbo, ambakiti orhejtsïkutiri jarhuajpiri ma, kʼérati responsabilidadichani jatsiaspti kúnguarhikuarhu. Nájkirukaksï orhejtsïkuticha de akuerdu japka eska jánguarhintaxapka para kumpliriuani Bibliaeri rekisituechani para orhejtsïkuti máeni, nóksï rekomendarispti. Solu máru orhejtsïkuticha engaksï jatiripkia, inchandimixaptiksï eska ima erachi jukari sapichu xarharasïrenga para orhejtsïkutini. Ka nóksï rekomendarispti erachini solu imani ambe jimbojku na enga xarharenga, xáni no sési. Ka i ambe, solu ma ejempluesti, peru informichaksï xarhatasïndi eskaksï uánikua orhejtsïkuticha uápurisï anapuecha ísï eratsisïnga. Kánikua jukaparhakuesti eskachi Bibliarhu jupindaskuarhiaka ka no juchari pʼindekuecha jimbo o ambe engachi eratsiaka. Solu ísï úparini, kurhajchaakachi Jesusini ka nóteruchi jusgarpiakia seguni eska na xarharaaka nema.

18, 19. ¿Ambechi jatsiski para úni parachi ísï exeani máteruechani eska Jeoba na exeajka?

¹⁸ Nájkirukachi no perfektueka, uákachi jorhenguarhini xénchaani iámindu jásï kʼuiripuechani, ísï eska Jeoba (Uku. 10:34, 35). Parachi ísï úni, jatsiskachi para méntku jánguarhintani jarhani ka úni imani ambe engajtsïni Biblia arhijka. Engachi ísï úska, kumplirini jauakachi Jesusiri juramukuani eskachi nóteru jusgarpiakia seguni eska na xarharaaka nema (Juanu 7:24).

¹⁹ No ióndani, juchari rei Jesukristu jurhimbikua jingoni jusgariuauati iámindu kʼuiripuni, no imani ambe jimbojku ambe engaksï imeri éskuecha exeaka o ambe enga kurhaauaka (Is. 11:3, 4). Jo, kánikua sési jásï ambeuati.