1. ¿Nénachi uá ánchikuarhini Jeobani jingoni?

JIÁNI engajtsïni Jeoba kueraapka, uékasïrendi eskachi májku kʼéri ánchikuarhipiringa imani jingoni paraka úpiringa kumplirikuarhini ambe enga ima uékenga. Nájkirukachi iásï nóteru perfektuekia, ambakiti Tata Diosïri marhuarichachi uáka pauani pauani ánchikuarhini imani jingoni. Por ejemplu, Biblia arhisïndi eskachi “jindeska Diosïri jarhuajpiricha” engachi eianhpijka ka disipulu uáni (1 Kor. 3:5-9). Kʼéri ma kóntperatesti eska Kuerajpiri enga iámindu ambe újka úni, íntskuakajtsïni sésikua parachi jarhuatani úni ini ánchikuarhitani enga xáni jukaparharajka. Peru jarhasti máteru ambe engachi uáka úni para Jeoba jingoni ánchikuarhini. Ini artikulurhu, exeakachi máru ambe: jarhuatani juchari familiani ka erachichani, sési kámpini, aiatspikuarhini para ánchikuarhini para organisasioni ka sánderu marhuakuni Tata Diosïni (Kol. 3:23).

2. ¿Andichisï no jatsi para terokutantani ambe engachi xáni újka jucha Jeoba jimbo imani ambe jingoni na engaksï xáni újka úni máteruecha?

² Engachi estudiarini jauaka ini artikuluni, nochi terokutantaaka ambe engachi xáni újka jucha Jeoba jimbo imani ambe jingoni na engaksï xáni újka úni máteruecha. Ju je miáni eskaksï máru pʼamenchasïnga, nochi iáminduecha májkueni jatiriska, májkueni jorhenani úni ambe ma o májkueni ambe nitamanchani jarhani. Tata Diosïri  jarhuajperata jimbo, apostuli Pablu uandaspti: “Uétarhisïndi eskajtsï mándani arhini exekuarhiaka na engajtsï jámani jaka, parajtsï úni mándani arhini sési pʼikuarherani chári ambe jimbojku ka no máterueri ambe jimbo” (Gal. 6:4).

3. ¿Andichisï uandajki eska ima enga imeri familiani kuidarini jaka Jeoba jingoni ánchikuarhixaka?

³ Jeoba erokuarhisïndi eskaksï imeri marhuaricha kuidariuauaka imecheri familiechani. Por ejemplu, máruksï jatsisti para ánchikuarhini paraksï úni kéndani imeri familiani. Uánikua nándichaksï jatsisti para kʼumanchikuarhu pakarani paraksï uájpechani tʼarhexeraani. Ka máru kristianuechaksï jatsisti para kuidariuani tátembechani engaksï jatirikia. I ambe jindesti enga meru uétarhijka para úni. Biblia arhisïndi: “Enga ma jakajkuti no jarhuataaka imeri parientembechani, sánderu para imeri kʼumanchikuarhu anapuechani, ima negaristia juchari jakajkukuani ka sánderu no sési úsïndi ka eska ma no jakajkuti” (1 Timoteo 5:8). Engachi jatsiaka máru i járhati responsabilidadichani, jamberichi no újka marhuakuni Jeobani xáni eskachi na xáni uékapiringa. Peru ju je no kuatantani. Tata Diosï sési exesïndi eskachi kuidariuaka juchari familiani (1 Kor. 10:31).

4. ¿Nénaksï uá táticha orheta pérani Reinueri ambe enbesi de imecheri ambe ka ambe úkuarhia engaksï ísï uáka?

⁴ Tátichaksï májku kʼéri ánchikuarhisïndi Jeoba jingoni engaksï animariuajka uájpechani paraksï sánderu marhuakuni Jeobani. Tiempu jingoni, uánikuaksï inde sapiicha niárasïndi marhuani tiempu kompletueri ka iauanisïksï nirani marhuani. Máruksï misioneruesti, máteruechaksï marhuaxati komu prekursoricha nani engaksï uétarhini jaka Reinueri eianhpiricha ka máruksï Beteli marhuaxati. Buenu, jimbokaksï iauani irekani jaka, imecheri familiechaksï no úsïndi exeani xáni eskaksï na xáni uékapiringa. Nájkiruka ísïika, táticha engaksï sakrifikarikuarhijka, animariuasïndiksï uájpechani paraksï seguirini jima marhuani nani engaksï jaka. ¿Andi? Jimbokaksï kánikua sési pʼikuarherasïnga exeni eskaksï imecheri sapiicha orheta péraxaka Tata Diosïri Reinuni (3 Juanu 4). Uánikua i tátichaksï jamberi ísï pʼikuarherajti eska Ana, enga uandapka eska Jeobani kuanitaspka imeri uájpa Samuelini. Ima tátichaksï sési úsïndi ísï exeni eska kʼéri kóntperata máeska Tata Diosï jingoni ánchikuarhini ka engaksï no ma ambe jingoni mójtakupiringa (1 Sam. 1:28).

5. ¿Nénachi uá jarhuataani kúnguarhikuarhu anapuechani? (Exea je fotuechani engaksï uénakuarhu jaka).

⁵ ¿Ambechi uá úni engachi no jatsiaka xáni kʼérati responsabilidadichani familiarhu? Jamberichi uáka jarhuataani erachichani engaksï jatirikia, pʼamenchani jaka o imechani engaksï máteru ambe uétarhinchani jaka. Ístuchi úpiringa imechani jarhuataani engaksï ini erachichani kuidariuani jaka. ¿Andichisï no eratsiajki kúnguarhikuarhu anapuechani ka exenchi nénchi uá jarhuatani? Ju je eranhaskani eska pirenchi ma imeri tátini kuidarixaka enga jatirikia. ¿Andichisï no arhutajki tiempu para imeri táti jingoni jarhani paraka pirenchi uáka máteru ambe úni? O jamberichi uáka aiatspikuarhini para páni nemani tánguarhikuecharhu, familiarini ma pʼorhembini ospitalirhu, piáni ambe ma o ánchperata ma úni. Ísï úparini, úpiringachi Jeobani jarhuatani jarhani mókuantani i erachicheri kómarhikuechani (arhinta je 1 Korintu 10:24).

6. ¿Ambe arhikuekasïni sési kámpini?

⁶ Tata Diosïri jarhuajpirichaksï mítikatesti jimbokaksï sési kámpisïnga. Karakata Griegaecharhu, uandakua enga ísï tradusirikuarhijka komu “sési kámpini” arhikuekasïndi “sési kaani imechani engachi no mítiauaka” (Ebr. 13:2). Biblia uánikua istoriechani uandaasïndi engajtsïni jorhendajka nénachi uá sési kámpini (Gén. 18:1-5). Sésichi úsïnga engachi jánguarhintajka méntkisï jarhuataani máteruechani, no arhiparini sinksï erachicheski o nómbe (Gal. 6:10).

7. ¿Andichisï jatsi para sési kaani imechani engaksï tiempu kompletueri marhuani jaka engaksï pʼorhembiaka juchari kúnguarhikuani?

 ⁷ Uákachi Jeoba jingoni ánchikuarhini engachi sési kaaska imechani engaksï tiempu kompletueri marhuajka, engaksï uétarhinchaaka lugari ma para pakarani (arhinta je 3 Juanu 5, 8). Sáno méntkisï engachi pʼorhembinhajka, úsïndi eskachi uinhaperperantaaka (Rom. 1:11, 12). Ju je exeni ambe enga nitamanchapka erachi ma enga Olaf arhinhajka. Ióntkia, enga tumbipka, imeri kúnguarhikuarhu pʼorhembispti sirkuitueri orhejtsïkuti ma enga tumbi máepka, ka no nema úpirindi íntskuni ospedaji. Olaf, kurhamarhiaspti imeri tátichani, engaksï no Testiguepka, sini úpirini imecho pakarani. Arhisptiksï eska jo, peruksï arhispti eska ima jatsipiringa para siionirhu kʼuíni. I ambe kánikua marhuaspti. Olaf miántasïndi eska ima semana kánikua ambakiti máespka. Uandasïndi: “Sirkuitueri orhejtsïkuti ka ji pauani pauanchi xarhintku jauarasïrenga ka ambakiti temecheri ambechi uandontskuarhisïrenga desaiunurhu. Ambe engarini xáni arhipka, úspti eskani uékapiringa marhuani tiempu kompletueri”. Olaf, marhuastia komu misioneru uánikua paisicharhu arini kuarenta uéxurhinicha jimbo engaksï nitamakia.

8. ¿Andichisï jatsi para xarhatani uékperakua nájkiruka ísï xarharaka enajkijtsïni no agradeserichejki? Jatsiku je ejemplu ma.

⁸ Uákachi mámaru ambe úni para sési kaani imechani engachi no mítiaka, nájkirukaksï uénani jámani no agradeseriuaka ambe engachi újka imecha jimbo. Ju je exeni ejemplu ma. Jini España, aianhpiri ma estudiu íntskuxapti uarhiitini ma enga Yésica arhinhajka ka uarhiiti pʼiaraspti uerani. Pirenchi kurhamarhispti ambe úsïreni ka Yésica eianguspti eska antesi de España nirani, xáni pobrispka enga ma jurhiani no ma ambe jatsipka para tʼireni. Solu itsïjkusï uéndi íntskuni imeri nanaka sapichuni. Mientrasi enga kamanharhitini kʼuístani japka uájpani, uénaspti kómarhikua ma úni. Ísï tátsekua, tsimani Testiguechaksï uámutakuspti puertarhu. Yésica kánikua no sési eroaspti, asta karukuspti rebistani engaksï aiakupka. Uinhachakuaspti: “¿Ini ambe íntskua juchiti sapini parani tʼirerani?”. Pirenchichaksï jánguarhintaspti sési pʼikuastantani, peru nóksï úspti. Ísï tátsekua, tsïkiatarhuksï ma jurajkukuspti tʼirekua imeri puertarhu. Iásï, kánikua tsípisïrendi miántani pirenchicheri uékperakua, nájkiruka no sési pʼikuarherenga enga miántenga eska Tata Diosï mókukuntaspka imeri kómarhikuani ka ima no kasu úkuni. Peru iásï kʼóru uékasïrendia marhuakuni Jeobani. Ka ambe enga jarhuatapka jindespti pirenchicheri uékperakua (Ecl. 11:1, 6).

9, 10. a) Ióntki ireta Israeli, ¿káni uétarhispi kurhajkuarhiani boluntariuechani? b) ¿Iásï, ambe uétarhisïni atenderini máru ambe kúnguarhikuarhu?

⁹ Ióntki ireta Israeli, uánikua xanhari uétarhispti kurhajkuarhiani boluntariuechani (Éx. 36:2; 1 Crón. 29:5; Neh. 11:2). Iásï, ístuchi uánikua oportunidadichani jatsiasïnga para úrani juchari tiempu, jatsikuarhikua ambe ka ambe engachi jorhenaka úni para jarhuataani juchari erachichani. Engachi ísï uáka, kánikuachi sési pʼikuarheraaka ka uánikua kóntperatechanchi jatsiauaka.

¹⁰ Biblia pʼímarhiasïndi tatakechani paraksï Tata Diosïni jingoni ánchikuarhini, jánguarhintaparini paraksï orhejtsïkuticheri jarhuajpirini ka orhejtsïkutini (1 Tim. 3:1, 8, 9; 1 Ped. 5:2, 3). Imecha engaksï ísï úni jaka, tsitisïndiksï jarhuataani imecheri erachichani espiritualmenti ka ístu máteru ambe úparini enga marhuakuauaka (Uku. 6:1-4). ¿Kurhamarhiskijtsïnia orhejtsïkuticha sinchi uékasïni akomodadorini, publikasionicheri enkargarikuarhini o territoriuecheri, jarhuajpini para mantenimientu úni o máteru i jásï ánchikuarhita ambe? Erachicha engaksï ini responsabilidadichani jimbo enkargarikuarhijka seguru eskajtsïni arhiaka eska kánikua sési pʼikuarherakuarhisïnga jarhuataani máteruechani.

11. ¿Néna jarhuataspi pirenchini ma, sési pájperani máteruecha jingoni mientrasi enga jarhuajpini japka Kʼumanchikuechani Reinueri uáni?

 ¹¹ Imecha engaksï ánchikuarhijka para organisasioni, niárasïndiksï jimbanhi amiguechani jatsiani. Ju je exeni ambe enga nitamanchapka Margie, pirenchi ma enga diesiochu uéxurhini ánchikuarhikia Kʼumanchikuechani Reinueri uáni. Imani uéxurhinichani jimbo, jorhendaaspti uánikua pirenchichani engaksï sapichku japka. Para Margie, jiáni jindespti sánderu ambakiti tiempu paraksï uinhaperpentani espiritualmenti (Rom. 1:12). Ka enga no sési ambe nitamanchapka, iámindu ima amigaechaksï kánikua uinhaperantaspti. ¿Aiakukuarheskichia ménisï para konstruksionirhu ánchikuarhini? Uákachi ísï úni, nájkirukachi mítiaka ánchikuarhita ma úni o nómbe.

12. ¿Nénachi uá jarhuajpini enga no sési ambe úkuarhiaka?

¹² Enga no sési ambe úkuarhijka, oportunidadi máesïndi paraksï Tata Diosïri marhuaricha ánchikuarhini Jeobani jingoni, jarhuatapariani erachichani imani ambe úparini engaksï uétarhinchani jauaka. Por ejemplu, úsïndiksï tumina íntspini para imecha engaksï no sési nitamanchaka (Juanu 13:34, 35; Uku. 11:27-30). Ístuksï uáti ánchikuarhini para limpiarini ka kʼumanchikuechani sési péntaani. Pirenchi ma jini Polonia anapu enga Gabriela arhinhajka, tsïtaspti imeri kʼumanchikuani iorhentpikua ma jimbo. Peru kánikua sési pʼikuarherantaspti engaksï nípka jarhuatani erachicha kúnguarhikuecheri engaksï jimajkisï japka. Gabriela uandantasïndi: “No uékasïnga ima amberi uandani engani tsïtaka, nochka solu jatsikuarhikua ambejkueskandi. Sánderu sési, ima amberi uékasïnga uandani na engani xáni andaka. Ambe engani nitamakuarhika, xarhatachestirini eska Jeobaeri kúnguarhikuarhu jarhani, kʼéri kóntperata máeska ka tsípikuarhita ma”. Uánikua erachicha engaksï jarhuajperata intsïnhaka enga no sési ambe úkuarhijka, uandasïndiksï eska ima jarhuajperata kánikua uinhaperantaaska. Ka ima engaksï Jeoba jingoni ánchikuarhijka jarhuatapariani máteruechani, kánikuaksï sési pʼikuarherasïndi (arhinta je Ukuecha 20:35; 2 Korintu 9:6, 7).

13. ¿Néna úsïni eskachi sánderu xénchaaka Jeobani engachi aiakukuarhiaka komu boluntariuecha? Jatsiku je ejemplu ma.

¹³ Pirenchi ma enga Stephanie arhinhajka ka ístu máteru aianhpiricha, sésiksï pʼikuarheraspti Tata Diosïni jingoni ánchikuarhini jarhuatapariani máru Testiguechani engaksï Estados Unidos nípka sïpakuarhini jimboka imecheri paisicharhu guerra jarhaspka. Jarhuajpisptiksï jirinhapariani  ka arreglaripariani kʼumanchikuechani paraksï i erachicha pakarani. Pirenchi uandantasïndi: “Kánikuachi sési pʼikuarheraspka exeni na engaksï xáni tsípini japka ka agradesidu jarhani, uékperakua jimbo engaksï interu parhakpini anapu erachicha xarhatakuapka. Imaksï eratsisïndi eskachi jarhuataaska, peru sánderu sési, imaksï sánderu ambe ústi juchantsïni jimbo. Uékperakua, na engaksï májku kʼéri jaka, jakajkukua ka na engaksï xáni mintsikajka Jeobani, ústi eskachi sánderu xénchaaka Tata Diosïni. Ka i ambe ústi eskachi sánderu jukaparharaaka iámindu ambe engajtsïni íntskujka imeri organisasioni jimbo”.

14, 15. a) ¿Náki ambakiti jángua xarhataspi profeta Isaiasi? b) ¿Nénachi uá kristianuecha ísïini eska Isaiasi?

¹⁴ ¿Uékapirinchi sánderu ánchikuarhini Jeobani jingoni? ¿Tsitipirinchi mótsini nani enga organisasioni uétarhinchaani jaka sánderu ánchikuarhirichani? Ísïsti eskachi Jeobaeri marhuaricha no uétarhinchasïnga iauanisï mótsini kʼumanchikuarhu uératini parachi xarhatani juchari uékperakua. Peruksï máru erachicha jatsisïndi modu para iauanisï mótsini para Jeobani marhuakuni. Imecheri eratsikua májkueni jásïsti eska profeta Isaiasiri. Jeoba kurhanguarhispti: “¿Néni axaa, ka né niua juchantsïni jimbo?”, Isaiasi mókuntaspti: “¡Ixú jarhaska ji! Jíndini axa” (Is. 6:8). ¿Uékasïnchi májkueni mókuntani enga jauaka oportunidadi ma ka modu para ísï úni? Ini tiempu jimbo, ¿ambe uétarhixaki para úni?

¹⁵ Aianhpikueri ambe uandaparini ka disipulu uáni, Jesusi uandaspti: “Kánikuesti pʼikuntskua, peru ánchikuarhiricha namunituesti. Kómarhichkanderu je pʼikuntskueri Dueniuembani eska axauaka máruteru ánchikuarhirichani imeri pʼikuntskuarhu” (Mat. 9:37, 38). ¿Uáchi marhuani komu prekursoricha nani enga uétarhini jaka para sánderu aianhpini? O ¿uáchi jarhuatani máteru nemani para inde ambe úni? Para uánikua erachicha, paraksï úni sánderu sési xarhatani imecheri uékperakua Jeobani jimbo ka kʼuiripu, jindesti marhuani komu prekursoricha imani lugaricharhu nani engaksï uétarhini jaka aianhpiricha. ¿Jarhaskiksï máteru oportunidadicha para sánderu marhuakuni Tata Diosïni? Engachi aprobechariuaska, kánikuachi sési pʼikuarheraaka.

16, 17. ¿Náki oportunidadichaksï jarhaski para imecha engaksï uéjka sánderu marhuakuni Jeobani?

¹⁶ ¿Úpirinchi Beteli marhuani o konstruksionirhu ma, ia sea para ma tiempujku ánchikuarhini o komu boluntariuecha? Kánikua uétarhixati eskaksï erachicha uékaaka ánchikuarhini nani uéjkisï ka náki uéjki ánchikuarhitarhu engaksï intsïnhaaka. Jamberi i ambe arhikuekaati marhuani nani enga uétarhini jaka jarhuajperata, nájkirukachi máteru ambe mítikuaka sési úni. Ambe uéjkichi úni, Jeoba jukaparharaasïndi imechani engaksï aiakukuarhijka no ma ambe erokuarhiparini para imani ambe úni enga uétarhiaka (Sal. 110:3).

¹⁷ Engachi uéjka parachi sánderu jorhendanhani parachi Jeobani marhuakuni, jamberichi kumpliriuajka rekisituechani para nirani Jorhentperakuarhu para Eianhpiricha Reinueri. Ixuksï jorhendaasïndi erachichani ka pirenchichani engaksï espiritualika ka engaksï tiempu kompletueri marhuani jaka paraka Jeobaeri organisasioni uáka sánderu sési úraani. Imecha engaksï uékaaka nirani ini jorhentperakuarhu, jatsistiksï para tsípikua jingoni jiókuarhini náki uéjki asignasioni ma engaksï intsïnhaaka ísï tátsekua engaksï kʼamaraakia. ¿Úpirinchi nirani ini jorhentperakuarhu ka ísïchi intsïnhaani sánderu kʼérati responsabilidadichani? (1 Kor. 9:23).

18. ¿Náki kóntperatechanchi jatsiaua engachi pauani pauani ánchikuarhiska Jeoba jingoni?

¹⁸ Jeobaeri marhuarichachi uékasïnga intsïmpitiini, uékperakua xarhatani ka sési kámpini ka pauani pauanchi interesi páni máteruecha jimbo. I ambe uáti eskachi sési pʼikuarheraaka, eskachi pínandikua jatsiaka ka eskachi felisiuaka (Gal. 5:22, 23). No arhiparini ambe uéjkichi nitamakuarhini jarhani, uákachi sési pʼikuarherani engachi májkueni sési kámpiaka eska Jeoba ka engachi imecha jingoni kuenta úkuarhiaka engaksï imani jingoni ánchikuarhijka (Prov. 3:9, 10).