Ixú 2 Korintu 12:2, 3 jimbo Pablu uandaspti achatini ma enga “pʼíkunhantapka” “asta meru auandarhu [“terseru auandarhu”, TNM]”. ¿Néni arhikuekaxapi? Ini karta jimbo enga Korintu anapuechani axakuapka, uandaspti eska Tata Diosï imani úrasïrenga komu apostuli (2 Kor. 11:5, 23). Jimajkani uandaspti eska Tateri ambe jánhastanhaspka ka mítitaranhani. Ixú no uandaasïndi máteru ermanuechani. Ísï jimbo, sóntku kurhagukuarhisti eska ima achati enga jánhastanhapka ka mítitaranhani, Pabluespka (2 Kor. 12:1, 5).

Ísï jimbo, ima achati enga “pʼíkunhantapka” “meru auandarhu [“terseru auandarhu”, TNM]” ka “paraisurhu” jindespti Pablu (2 Kor. 12:2-4). Enga úrapka uandakuani “mítitaranhaka” arhikuekasïndi eska eiangunhaspka ambe máeri enga úkuarhiaka sánderu orhepani.

¿Ambeski meru auanda o terseru auanda enga Pablu exepka?

Bibliarhu, uandakua “auanda” mámaru ambe arhikuekasïndi. Por ejemplu, uáti arhikuekani auandani engachi exejka (Gén. 11:4; 27:28; Mat. 6:26). Ménisï, arhikuekasïndi kʼuiripuecheri gobiernuni (Dan. 4:20-22). Ka ístu uáti arhikuekani auandarhu anapu gobiernuni (Jaŋ. 21:1).

Jiájkani, ¿ambe arhikuekaxapi Pablu enga uandapka “meru auandarhu [“terseru auandarhu”, TNM]”? Ménisï Biblia tanimu xanhari úrasïndi ma uandakuani para xarhatani eska jukaparhakueska (Is. 6:3; Ezeq. 21:27; Jaŋ. 4:8). Enga Pablu uandapka “meru auandarhu [“terseru auandarhu”, TNM]”, imanisï xarhatani japti juramukuani enga sánderu kʼéri ambeka: Mesiasiri Reinu enga tata Jesukristu ka 144,000 erakukatecha juramuni jauaka (exe je Perspicacia para comprender las Escrituras, bolumeni 1, pájinecha 473, 476). Ini Mesiasiri Reinunisï arhikuekani japti apostuli Pedru enga karapka eskachi erokuarhixaka “jimbanhi auandani” enga Tata Diosï aiatspika (2 Ped. 3:13).

¿Ka ambe arhikuekasïreni imani paraisu jingoni enga Pablu uandapka?

Ístu uandakua paraisu uáti mámaru ambe arhikuekani. Primeru, mítiparini nani enga irekani japka uénani jámani kʼuiripu, kurhangukuarhisti eska uáka imani Paraisuni arhikuekani enga Echerirhu jauaka. Segundu, uáti imani pínandikuani arhikuekani engaksï erachicha jatsiaka jimbanhi parhakpinirhu. ka terseru, uáti arhikuekani na enga xáni sési jaka Tata Diosïri paraisu enga Jaŋaskuecha 2:7 jimbo arhijka (exe je La Atalaya del 15 de juliu de 2015, pájina 8, párrafu 8).

Jamberi Pablu ini tanimu ambe arhikuekani japti enga 2 Korintu 12:4 jimbo uandantajka ambe enga nitamakuarhipka.

Resumeni:

Meru auanda [‘terseru auanda’, TNM] enga 2 Korintu 12:2 arhijka, jamberi Mesiasiri Reinuni arhikuekajti enga tata Jesukristu ka 144,000 erakukatecha juramuni jauaka, o sea, ‘jimbanhi auanda’ (2 Ped. 3:13).

Ísï arhinhasïndi meru auanda [‘terseru auanda’, TNM], jimboka Reinu, juramukua máeska enga sánderu kʼéri ambeka.

Jamberi ima paraisu enga Pablu jánhaskua ma jimbo pʼíkunhantapka arhikuekajti: 1) imani Paraisuni enga Echerirhu jauaka, 2) na engaksï erachicha sánderu sési pájperaaka, peru jiáni kʼóru sánderu iápurisïa ka 3) Tata Diosïri paraisuni enga auandarhu jaka; iámindu i ambe májku kʼéri niárati úkuarhini jimbanhi parhakpinirhu.

Ísï jimbo, jimbanhi parhakpinirhu tsimani ambe jauati: ‘jimbanhi auanda’ ka ‘jimbanhi parhakpini’. Iámindu ambe jimbanhi ambeuati enga jindeka Tata Diosïri Reinu ka ístu kʼuiripuecha engaksï Jeobani marhuakuni jauaka Paraisurhu ixú Echerirhu.