Ju je jukaparharani temungurhirikuani
“Imechani enga Diosï kúndaaka, asï nema jáme jarhangutaani” (MAR. 10:9).
PIREKUECHA: 131, 132
1, 2. ¿Ambejtsïni jarhuataa úni ambe enga Ebreu 13:4 (TNM) arhijka?
IÁMINDUECHACHI uékasïnga kʼéri ambe arhini Jeobani ka janhanharhini. Ima jukanchasti para ísï exenhani ka aiatspesïndi eskajtsïni sési exeaka engachi ísï úska (1 Sam. 2:30; Prov. 3:9; Jaŋ. 4:11). Ístu, ima uékasïndi eskachi janhanharhiauaka máteru kʼuiripuechani komu juramutichani engaksï gobiernurhu anapueka (Rom. 12:10; 13:7). Peru jarhasti ambe ma enga espesialika engachi jatsika para sánderu janhanharhini o jukaparharani: temungurhirikua.
2 Apostuli Pablu karaspti: “Eska temungurhirikua jukaparharanhaaka iáminduechani jimbo ka eska relasioni sexuali pímbinhasïuaka” (Ebreu 13:4, TNM). Pablu no ískusï uandapti temungurhirikueri ambe erachicha jingoni. Sánderu sési, juramukuaxapti kristianuechani eskaksï kánikua jukaparharapiringa temungurhirikuani. ¿Iáminduechachi ísï jukaparharasïni temungurhirikuani, ka sánderia imecha engaksï tembuchatika o uambuchatini?
3. ¿Náki konseju enga kánikua jukaparhakueka íntspespi Jesusi enga temungurhirikueri ambeka? (Exe je dibujuni enga uénakuarhu jaka).
3 Engachi kánikua jukaparharaska ka janhanharhini temungurhirikuani, ísïchi úxaka eska Jesusi. Engaksï fariseuecha kurhamarhipka diborsiueri ambe, ima mókukuantaspti imani uandakuecha jingoni enga Jeoba arhipka primeru temungurhirini: “Ísï jimbosï ma achati jatsiti para jurajkuni imeri tátembani ka imeri amambani para kúnguarhini imeri témbani jingoni, ka imecha tsimarhani, solu máechakua kuerpu úkuarhiatiksï”. Ka ístu uandaspti: “Imechani enga Diosï kúndaaka, asï nema jáme jarhangutaani” (arhinta je Markusʌ 10:2-12; Gén. 2:24).
4. ¿Ambe uékasïreni Jeoba para temungurhiricha?
4 Eskachi na exekia, Jesusi sési mítispti eska Jeoba kueraaska temungurhirikuani ka uandaspti eska jindeska ambe ma para méntkisï. Jeoba no arhiaspti Adani ka Ebani eskaksï úpiringa diborsiarikuarini. Sánderu sési, ima uékasïrendi eskaksï “tsimarhani” márku japiringa para méntkisï.
MÁRU AMBE ENGA MA TIEMPU JIMBO MÓJTAKUKA TEMUNGURHIRIKUANI
5. ¿Ambe niárasïni úkuarhini temungurhirikuarhu uarhikua jimbo?
5 Mítiskachi eska enga Adani pekaripka, uánikua ambe mójtakurhispka. Ma ambe jindesti eskaksï kʼuiripuecha uénaspka uarhini ka indeni ambe jimbo temungurhirikua nóteru májkuenipirindia. Apostuli Pablu eksplikarispti eska enga nema uarhijka, jima kʼamakurhisïnga temungurhirikua ka eska ima enga tsípiti pakarajka, uáka ménderu tembuchantani o uambuchantani (Rom. 7:1-3).
6. Moisesiri Lei jimbo, ¿néna xarharasïni eska Jeoba jukaparharasïnga temungurhirikuani?
6 Imani Lei jimbo enga Jeoba ireta Israelini íntskupka, exentasïngachi máru ambe enga temungurhirikueri ambeka. Por ejemplu, israelita ma úsïrendi jukari máechakua témbani jatsini, ambe ma enga ísï mítikateka komueska poligamia ka inde ambe tʼuini únhasïrendia ante de Tata Diosï íntsaani Leichani. Peru para kuájchakuani uarhiitichani ka sapiichani, Jeoba juramukuaspti israelitechani ambe engaksï úpiringa. Por ejemplu, enga israelita ma tembuchapiringa nanaka ma jingoni enga jántspiripka ka tátsekua máteruni tembuni, jatsispti para seguirini jarhani tʼirerani primeru témbani, xukuparhakua ambe íntskuni ka relasioni sexuali jatsini imani jingoni. Tata Diosï juramukuasïrendi eskaksï kuájchakuapiringa uarhiitichani ka kuidariuani (Éx. 21:9, 10). Iásï, juchachi no uétarhisïnga Moisesiri Leini kumplirini, peru jimini arhisïndi na enga xáni jukaparharajka Jeoba temungurhirikuani. Ka i ambejtsïni jarhuatasïndi májkueni jukaparharani eska ima.
7, 8. a) Seguni Deuteronomio 24:1, ¿ambe arhisïreni Lei? b) ¿Ka Jeoba néna exesïni diborsiuni?
7 ¿Ambe uandasïreni Lei diborsiueri ambe? Nájkiruka Tata Diosï seguirini japka májkueni jukaparharani temungurhirikuani, jurajkuspti eskaksï israelitecha diborsiarikuarhipiringa (arhinta je Deuteronomio 24:1). Israelita ma úpirindi diborsiarikuarhini témberi enga kuenta íntskukuarhipiringa eska témba úspka “ambe ma enga no sési jaka”. ¿Ambe úpirini jindeni ima ambe “enga no sési jaka”? Lei no uandasïrendi ambespi inde ambe. Peru imani ambe arhikuekendi enga kánikua no sési japka o kʼuratsekua ambeni, no imani ambe enga no xáni kʼéri ambepiringa (Deut. 23:14). Xáni no sési enga Jesusiri jurhiatikuecha jimbo, uánikua judiuechaksï ambe uéjki jimbo uékenga diborsiarikuarhini (Mat. 19:3). Peru juchachi no uékasïnga ísïni eska imecha.
8 Profeta Malakiasiri jurhiatikuecha jimbo, achatichaksï pʼindespti diborsiarikuarhini imecheri uarhiiticheri, jamberi paraksï sánderu sapichu uarhiiti ma jingoni tembuchantani enga no Jeobani kómarhienga. Malakiasi uandaspti na enga eratsenga Jeoba inderi ambe. Karaspti eska Jeoba kurhunhisïnga enga nema diborsiarikuarhijka (Mal. 2:14-16). Desde uénakuarhu, Tata Diosï májkueni exesïndi temungurhirikuani enga uandapka eska achati ma jatsiska para “kúnguarhini imeri uarhiiti jingoni” ka ‘tsimarhanksï májku kuerpueni’ (Gén. 2:24). Ka Jesusi xarhataspti eska apoiarisïrenga na enga eratsijka imeri Tátemba enga uandapka: “Imechani enga Diosï kúndaaka, asï nema jáme jarhangutaantani” (Mat. 19:6).
MA RASONTKUSÏ JATI PARA DIBORSIARIKUARHINI
9. ¿Nénachi jatsiski para kurhanguni ambe enga Jesusi uandapka Markusʌ 10:11, 12 jimbo?
9 Jamberi nema kurhanguarhijti: “¿Jaki rasoni ma enga jurajkujka kristianuni ma diborsiarikuarhini ka ménderu tembuchantani o uambuchantani?”. Buenu, Jesusi uandaspti na enga exenga diborsiueri ambe: “Nákinterku nema enga chúntaaka imeri témbani ka tembuchantani máteru uarhiiti jingoni, ísku jándi úkuarhisïndi imani japarini. Ka enga ma uarhiiti jarharintaaka imeri uámbani ka tembunhantani máteru achatini jingoni, ístu ísku jándi úkuarhisïndi” (Mar. 10:11, 12; Luk. 16:18). Xarharasïndi eska Jesusi jukaparharasïrenga temungurhirikuani ka uékasïrendi eskaksï máteruecha májkueni úpiringa. Né enga diborsiarikuarhienga imeri uarhiiti jingoni ambe uéjki jimbo ka máteru jingoni tembuchantani, ísku jándikua ambe úsïrendi. I ambe ísïsti jimboka para Tata Diosï, diborsiarikuarhini ambe uéjki jimbo no arhikuekasïnga eska jimini kʼamakurhisïnga temungurhirikua. Para Jeoba, tsimarhanksï seguirixati máechakua kuerpuni. Ístu Jesusi uandaspti eska né enga diborsiarikuarhipiringa, úsïrendi eska témba niárapiringa ísku jándikua ambe úni. ¿Andi? Jimboka imani jurhiatikuecha jimbo, ima uarhiiti enga diborsiada japiringa exesïrendi eska uétarhinchasïrenga uambuchantani paraksï mantenerini. Ka uambuchantani májkuenispti eska ísku jándikua ambe úni.
10. ¿Náki rasoni jimbo uá kristianu ma diborsiarikuarhini ka ménderu tembuchantani o uambuchantani?
10 Peru Jesusi ístu uandaspti eska jarhaska rasoni ma para nema úni diborsiarikuarhini. Uandaspti: “Jíksïni arhisïnga eska nákinterku nema enga chúntaaka imeri uarhiitini no jimboka ísku ambe úska [ísku jándikua] sino máteru ambe jimbo, ka tembuchantani máteruni jingoni, eska ísku jándi úkuarhisïnga” (Mat. 19:9). Sáno májkueni jásï ambe uandaspti Sermoni del Monte jimbo (Mat. 5:31, 32). Ini tsimani xanhari, uandaspti ísku jándikueri ambe (griegu jimbo pornéia). Inde uandakua, iámindu imani ambe arhikuekasïndi komu enga ma temungurhiri enganiarperajka, enga tataka ka nanaka ma márkuksï irekani jarhajka ka nóksï sibilarikuarhitini jarhani, enga tataka ma mismu tataka ma jingoni o nanaka ma, nanaka ma jingoni ikichakueni jásï ambe újka o engaksï ísku jándikua ambe újka animalicha jingoni. Por ejemplu, ju je eranhaskani eska achati ma ísku jándikua ambe niátasïnga. Jimajkani, imeri témba jatsiati para exeni sini diborsiarikuarhia o nómbe. Enga diborsiarikuarhiska, para Tata Diosï jimini kʼamakurhisïndi temungurhirikua.
11. ¿Andisï úpirini kristianu ma no diborsiarikuarhini nájkiruka jatsika rasoni ma para ísï úni?
11 Ju je exeni eska Jesusi no uandaspka eska ísku jándikua jimbo (pornéia), témba o uámba enga no kulpa jatsika meru jatsiska para diborsiarikuarhini. Por ejemplu, uarhiiti ma úpirindi erakuni no diborsiarikuarhini nájkiruka imeri achati enganiaripiringa. Jamberi útasï xénchajti ka uékani puákuntani ka jánguarhintani uámba jingoni paraka imecheri temungurhirikua sési niántaaka. Jimboka sési eratsintaparini, enga diborsiarikuarhiska ka nóteru uambuchantania, jatsiauati máru problemechani. ¿Néna uá orhepani uérani enga niáraska uétarhinchani ambe ma o enga uékaaka relasioni sexuali jatsini? ¿Ka enga niáraakia jandiajku pʼikuarherani? Ka engaksï sapiichani kaajka, ¿uá jandiajku jorhendaani Tata Diosïri ambe? (1 Kor. 7:14). Ísïsti, ima enga diborsiarikuarhijka nájkiruka no ima kulpa jatsika, jatsiauati uandanhiatechani.
12, 13. a) ¿Ambe úkuarhispi Oseasiri temungurhirikua jingoni? b) ¿Oseasi andisï ménderu pántapi Gómerini imeri kʼumanchikuarhu? c) ¿Ambejtsïni jorhendasïni iámindu i ambe temungurhirikueri?
12 Ambe enga profeta Oseasi nitamanchapka, jorhendasïndijtsïni na enga exejka Jeoba temungurhirikuani. Jeoba arhispti Oseasini eska tembuchapiringa uátsï ma jingoni enga Gómeri arhinhenga. Gómeri niárapirindi ísku jándikua ambe úni ka ísku jándikua jimbo kánguarhiapirindi sapiichani. Gómeri kánguarhispti sapi ma Oseasi jingoni (Os. 1:2, 3). Ísï tátsekua, kánguarhispti nanaka ka tataka sapichuni ma, jamberi máteru achati jingoni. Nájkiruka uánikua xanhari ísku jándikua ambe úpka, Oseasi seguirixapti imeri uámbeni. Tiempu jingoni, Gómeri jurajkuspti ka niáraspti jántspiri máeni. Peru Oseasi piántaspti (Os. 3:1, 2). Jeoba úraspti ambe enga Oseasi nitamanchapka para xarhatani na enga uánikua uelta puákuntapka ireta Israelini engaksï jurajkupka Jeobani ka máteru diosïchani kómarhiani. ¿Ambejtsïni jorhendasïni i ambe?
13 Eskachi na exekia, enga kristianu ma ísku jándikua ambe uáka, imeri uarhiiti o achati jatsiati para exeni ambe uá. Jesusi uandaspti eska ima enga no kulpa jatsika, uáka diborsiarikuarhini ka úni ménderu tembuchantani o uambuchantani. Peru ístu úpirindi puákuntani ka no diborsiarikuarhinia, no no sési japirindi enga ísï úpiringa. Biblia uandasïndi eska Oseasi ménderu pántaspka Gómerini imeri kʼumanchikuarhu. Jiáni uératini, Gómeri nóteru jatsipirindia para apondini máteru achati jingoni. Oseasi ma tiempu no apondispti Gomeri jingoni (Os. 3:3, nota, nwt). Peru seguru eska ísï tátsekua ménderu uénaspka apondini imani jingoni. I ambe xarhataspti na enga Jeoba uékapka ménderu jiókuarhintani imeri iretani ka ambakiti pájperakua ma jatsini imani jingoni (Os. 1:11; 3:3-5). Ambe engachi jorhenguarhijka, jindesti eska enga achati o uarhiiti enga no kulpa jatsika erakujka no diborsiarikuarhini ka ménderu apondini imani jingoni, xarhatasïndi eska puákuntaskia uámbani o témbani enga enganiarika (1 Kor. 7:3, 5). Enga ísï úska nóteru uátia diborsiarikuarhini. Jiáni uératini, tsimarhanksï jatsisti para jánguarhintani ísï exeni temungurhirikuani eska Jeoba na exejka.
JU JE JUKAPARHARANI TEMUNGURHIRIKUANI NÁJKIRUKAKSÏ JAUAKA KʼÉRATI PROBLEMECHA
14. Eska na arhijka 1 Korintu 7:10, 11, ¿ambe uá úkuarhini máru temungurhiricha jingoni?
14 Iámindu kristianuechachi jatsiska para jánguarhintani janhanharhini temungurhirikuani, ísï eska Jeoba ka Jesusi. Peru ménisïksï máru no ísï úsïndi jimbokachi no perfektueska (Rom. 7:18-23). Jimbojtsïnisï no ísku pakatajti engaksï primeru siglurhu, máru kristianuecha engaksï temungurhiripka jatsiauenga problemechani. Pablu karaspti eska “uarhiiti no jarharintaaka imeri uámbani”, peru jarhasptiksï máru engaksï ísï úpka (arhinta je 1 Korintu 7:10, 11).
¿Ambe uétarhisïni úni paraka temungurhiri ma no niáraaka jurajperani nájkirukaksï kʼérati problemechani jatsiauaka? (Exe je párrafu 15).
15, 16. a) Asta engaksï problemechani jatsiauaka, ¿temungurhirichaksï ambe jatsiski para úni ka andi? b) Ka enga achati o uarhiiti no marhuakujka Jeobani, ¿jatsiski para májkueni úkuarhini?
15 Pablu no uandaspti andiksïsï jurajperapi máru temungurhiricha. Por ejemplu, problema no jindespti eska achati ísku jándikua ambe úpiringa, jimboka enga ísïpiringa uarhiiti jatsipirindi rasoni ma para diborsiarikuarhini ka ménderu uambuchantani. Pablu karaspti eska uarhiiti enga jurajkupiringa uámbani, no jatsispka para uambuchantani o eska mejori kúnguarhintapiringa uámba jingoni. Para Tata Diosï, seguirixaptiksï temungurhiri máeni. Apostuli arhiaspti temungurhirichani eska enga no nema ísku jándikua ambe úpiringa, eskaksï jánguarhintapiringa puátsperantani no arhiparini náki uéjki problemechanksï jatsiani. Tsimarhanksï úpirindi jarhuajperata kurhakuani orhejtsïkutichani. Ka imechaksï íntsaapirindi jarhuajperata Biblia jingoni.
16 Jamberi sánderu úkua jukendi enga kristianu ma tembuchatini o uambuchatini jarhenga nema jingoni enga no marhuakuenga Jeobani. ¿I ambe jindepirini rasoni ma paraksï jurajperani jiáni engaksï problemechani jatsiapiringa? Eskachi na exekia, Biblia arhisïndi eska ísku jándikua jindeska rasoni ma para úni diborsiarikuarhini, peru nóteru ambe ma arhisïndia engaksï jimbo uáka jurajperani. Pablu karaspti: “Enga ma uarhiiti jakajkutiri uámba no jakajkutiika, peru enga uékajka irekani imani jingoni, asï jáme jarharintani” (1 Kor. 7:12, 13). I prinsipiu seguirixati marhuani asta iásï jamberi.
17, 18. ¿Andiksïsï máru temungurhiricha no jurajperajki nájkirukaksï kʼérati problemechani jatsiauaka?
17 Ju je miáni eska ménisï niáraska úkuarhini enga ‘uámba no jakajkuti’ xarhataka eska nóteru uékasïngia témba jingoni irekani. Jamberi xáni no sési kámendi témbani enga jamberi ima úpiringa eratsini eska uámba niárapiringa uándikuni. Jamberi no uékendi mantenerini témbani ni familiarhu anapuechani o nóteru jurajkunia témbani para Jeobani marhuakuni. Enga i jásï ambe úkuarhijka, máru kristianechaksï niárasïndi eratsini eska achati xarhataxaka eska nóteru uékasïngia paraksï májku kʼéri irekani ka eska sánderu sésiska jurajperani. Peru máru pirenchicha engaksï májkueni jásï ambe nitamakuarhijka nóksï ísï eratsisïndi. Tekantaxatiksï ka jánguarhintani paraksï úni sánderu sési irekani. ¿Andi?
18 Ma rasoni jindesti jimboka uarhiiti ka achati ma engaksï jurajperajka, seguirinksï jarhasïndi temungurhirini ka jatsiauatiksï problemechani engachi antesi uandaaka. Ka apostuli Pablu máteru ambe uandaspti engaksï jimbo uáka seguirini májku kʼéri jarhani. Karaspti: “Jimboka achati no jakajkuti pímbinhajkunhantasïnga imeri témbani jimbo. Ka ístu uarhiiti no jakajkuti pímbinhajkunhantasïndi imeri uámbani jimbo. Enga no ísïpiringa chári uátsïticha nó[ksï] pímbinhajkuntskatepirindi, peru iásïksï pímbinhajkunhantastia” (1 Kor. 7:14). Uánikua kristianuecha engaksï erakuka no jurajkuni imeri uarhiitini o achatini enga no Testigueka nájkirukaksï uánikua problemechani jatsiapka, sésiksï pʼikuarherasti engaksï ísï úka, sánderia jiáni enga imeri uarhiiti o achati niáraka Jeoba marhuakuni (arhinta je 1 Korintu 7:16; 1 Ped. 3:1, 2).
19. ¿Andiksïsï jaki kúnguarhikuecharhu uánikua temungurhiricha engaksï felisika?
19 Jesusi diborsiueri ambe uandaspti ka apostuli Pablu adbertensia íntspespti jurajperakueri ambe. Tsimarhanksï uékasïrendi eskaksï Jeobaeri marhuaricha janhanharhipiringa temungurhirikuani. Iásï, interu parhakpini anapu kúnguarhikuecharhu jarhastiksï uánikua temungurhiricha engaksï sési irekani jaka. Jamberi juchari kúnguarhikuarhuksï uánikua temungurhiricha jati engaksï felisika, jimboka achati xénchasïnga témbani ka no enganiarini ka ístu uarhiiti xénchasïndi ka janhanharhini uámbani. Iámindu imechaksï xarhatasïndi eska ma úsïnga jukaparharani ka respetarini temungurhirikuani. Kánikuachi tsípisïnga engaksï uánikua achaticha ka uarhiiticha xarhatajka eskaksï ísïska ari Tata Diosïri uandakuecha: “Ísï jimbo achati jurajkuati imeri tátembani ka imeri amambani ka kúnguarhiati imeri uarhiitini jingoni, ka ísï tsimarherani márku úkuarhintanksï” (Efes. 5:31, 33).
