“Ima enga jurhimbitiika Jeobani jimbo tsípiati”
DIANA jukari 80 jatiristia. Imeri uámba Alzheimer pʼamenchaspti ka astaka uarhipka, kʼumanchikua ma jimbo irekaxapti enga jindeka para jatiricha. Diana ístu no sési nitamakuarhispti engaksï imeri tsimani uájpecha uarhipka ka enga kanseri (cáncer de mama) pʼamenchapka. Nájkiruka i ambe nitamakuarhini japka, kúnguarhikuarhu anapu erachichaksï uandasïndi eska méntkisï tsípini jarhasïnga engaksï exejka tánguarhikuarhu o aianhpikuarhu.
John, sirkuitueri orhejtsïkutispti jukari kuarentaitresi uéxurhini jimbo. Kánikua tsitisïrendi ini asignasionini, peru jatsispti para jurajkuni para parientini ma kuidarini enga pʼamenchani japka. Erachicha engaksï ióni mítikia Johnini ka exenksï kʼéri tánguarhikuarhu ma, uandasïndiksï eska ima májkueni seguirixaka tsípini.
¿Nénaksï úsïni Diana ka John paraksï seguirini jarhani tsípini? ¿Néna úsïni nema felisini nájkiruka no sési nitamakuarhini jauaka o jatsini para jurajkuni asignasioni ma enga kánikua tsitijka? Biblia mókuntasïndi: “Ima enga jurhimbitiika Jeobani jimbo tsípiati” (Sal. 64:10). Para sánderu sési kurhanguni ini ambe enga ísïka ka jukaparhakueni, ju je exeni ambe enga újka eskachi meru tsípini pʼikuarheraaka ka ambe nómbe.
PʼIKUARHINHIKUA MA ENGA KʼAMAKURHIJKA
Irekuarhu, jarhasti máru ambe engajtsïni tsíperajka, komu tembuchani o uambuchani, charhakuni ma kánguarhini o intsïnhani asignasioni ma para marhuakuni Tata Diosïni. Ka normalisti engachi ísï pʼikuarherajka, jimboka inde ambe Jeobaeri intsïmperakueska. Imasï kueraati temungurhirikuani, imasï úti eskachi uáka kaani sapiichani ka imajtsïnisï íntsaajti asignasionichani imeri kúnguarhikua jimbo (Gén. 2:18, 22; Sal. 127:3; 1 Tim. 3:1).
Peru máru ambe engachi jimbo sési pʼikuarherajka nóksï jindesti para méntkisï. Úpirindi ma repentku témba o uámba enganiarini o niárani uarhini (Ezeq. 24:18; Os. 3:1). Jamberiksï uájpecha no kurhajchauati tátembechani ni Tata Diosïni ka astaksï niárani expulsarinhani. Por ejemplu, profeta Samueliri uájpechaksï no marhuakuspti Jeobani ísï eska ima na jaiapanhintajka; ka rei Dabidi pekadu ma úspti ka indeni ambe jimbo uánikua uandanhiatechani jatsiaspti imeri familiarhu (1 Sam. 8: 1-3; 2 Sam. 12:11). I járhati uandanhiatechaksï úsïndi eska ma nóteru tsípiakia, sino no sési pʼikuarherani ka kómu nitamakuarhini.
Májkueni, ma úpirindi jurajkuni asignasioni ma, pʼamenchakua jimbo, para familiani atenderini o enga mójtakurhijka ambe ma Jeobaeri kúnguarhikuarhu. Uánikua erachicha engaksï jatsipka para jurajkuni imecheri asignasionini, uandasïndiksï eskaksï kánikua miántasïnga na engaksï xáni sési pʼikuarherenga imani asignasioni jimbo.
Jimajkani, exesïngachi eska ambe engachi jimbo sési pʼikuarherajka no jindeska para méntkisï. Peru Samueliri, Dabidiri ka máteruecheri ejemplu, xarhatasïndiksï eska jarhaska máteru jásï felisidadi enga ma újka seguirini jarhani pʼikuarherani nájkiruka niáraaka mátirku mójtakurhini ambe ma, ochi jatsiani uandanhiatechani.
PʼIKUARHINHIKUA MA ENGA NO KʼAMAKURHIJKA
Jesusi mítispti nénaespi meru felisini. Enga auandarhu irekapka, sési jásï ma irekua jatsispti. Jimbosï “kánikua tsípikua jingoni” jarhendi Jeobaeri “orhepatini [jimbo] pauani pauani” (Prov. 8:30). Peru enga jupka Echerirhu, ménisï jatsisïrendi para orhepani uérakuani kʼérati problemechani. Ka nájkiruka ísïpka, sési pʼikuarherasïrendi úni ambe enga imeri Táti uékenga (Juanu 4:34). ¿Ambe jarhuataspi para úni tekantani enga xáni kómu nitamakuarhini japka antesi de uarhini? Biblia arhisïndi: “Jimboka ima tekantaaska [...], no kasu úparini indeni kʼuratsekua ambeni enga arhinhapka” (Ebr. 12:2). Ju je tsimani ambe exeni enga Jesusi uandapka de tsípini pʼikuarherani, o sea para meru felisini.
Ma xanhari, 70 imeri chúxapatichaksï tsípiparini kʼuanhatsintaspti engaksï nípka aianhpini, jimbokaksï milagruechani uáspka, komu petarhitpentani demoniuechani. Jimajkani Jesusi arhiaspti: “Asï jáma je tsípini indeni ambe jimbo engaksïni no ambakitiri espirituecha kurhajchajka, sino tsípi je jimboka chári nombricha karakata jarhaska auandarhu” (Luk. 10:1-9, 17, 20). Ísïsti, nájkirukachi kánikua sési pʼikuarherajka marhuani asignasionirhu ma, úni eskajtsïni Jeoba jaiapanhintaka jindesti ambe ma enga sánderu jukaparhakueka ka úsïndi eskachi meru felisiuaka.
Máteru uelta enga Jesusi uánikuechani jorhendaani japka, uarhiiti judia ma uinhachaparini uandaspti eska ima ambakiti jorhentpiriri amamba jatsipiringa para kánikua tsípini pʼikuarherani. Peru Jesusi arhispti: “Sánderuksï tsípisïndi imecha engaksï kurhandijka Diosïri uandakuani ka únksï eska na arhijka” (Luk. 11:27, 28). Enga nema ambakiti uájpechani kaajka, seguru eska kánikua tsípini pʼikuarherajka. Peru sánderu tsípini pʼikuarheraati enga kurhajchaaka Jeobani ka ambakiti pájperakua ma jatsini imani jingoni.
Rom. 5:3-5). Ju je miáni eska ístu Jeoba íntsasïnga imeri espiritu imechani engaksï mintsikajka, ka kualidadi ma enga espiritu úrpijka jindesti tsípini pʼikuarherani (Gal. 5:22). Jimbosï Salmo 64:10 arhijti: “Ima enga jurhimbitiika Jeobani jimbo tsípiati”.
Ísïsti, ambe enga meru uétarhijka parachi úni meru tsípini pʼikuarherani jindesti mítini eskachi jatsiska Jeobaeri jeiapanhintskua. Nájkirukaksï uandanhiatecha no újka eskachi sési pʼikuarheraaka, ístu nóksï uáti úni eskachi nóteru tsípini pʼikuarherakia. Sánderu sési, engachi tekantaska ka no jurajkuni Jeobani, sánderuchi tsípini pʼikuarheraaka (¿Ambe jarhuataski Johnini para seguirini jarhani tsípini pʼikuarherani?
Iámindu i ambe xarhatasïndi andisï Diana ka John, engachi uénakuarhu uandaaka, nóksï méni jurajkupi tsípini pʼikuarherani nájkirukaksï uandanhiatechani jatsiapka. Diana uandasïndi: “Jeoba jingoni kuájchakukuarhisïnga májkueni eska sapi ma na kuájchakukuarhijka tátembecha jingoni. Ístu uandasïndi: “pʼikuarherasïnga na engarini Tata Diosï újchakurajka engarini jarhuatajka parani seguirini tsípikua jingoni aianhpini”. Ka John uandantasïndi eska 1998 jimbo arhinhaspka para jorhentpini Eskuelarhu de Entrenamiento Ministerial ka eska inde ambe úspka eska kánikua estudiaripiringa. Enga ísï xáni estudiaripka, jarhuataspti para no jurajkuni tsípini pʼikuarherani ka seguirini predikarini jiáni enga nóteru sirkuitueri orhejtsïkutipkia. Uandasïndi eska para ima ka imeri témba no xáni úkua jukaspka jurajkuni imani asignasionini jimbokaksï méntkisï listu jarhaspka paraksï úni ambe enga Jeoba kurhakuapiringa ka tsimaranksï uandasïndi eskaksï sési pʼikuarherasïnga marhuani nani engaksï imecha uáka.
Uánikua máteru erachichaksï exestia eska ísïska ambe enga uandajka Salmo 64:10. Ju je exeni temungurhiriri ejemplu ma engaksï jukari treinta uéxurhini marhuapka jini Beteli de Estados Unidos, peru tátsekuaksï axanhani komu prekursori espesialicha. Imechaksï uandasïndi: “Engari tsïtajka ambe ma engari kánikua jukaparharajka, normalisti no sési pʼikuarherani. Peruri no jatsiska para méntkisï ísï pʼikuarherani jarhani”. Sóntkuksï uénaspti aianhpini kúnguarhikuarhu anapu erachicha jingoni jima engaksï marhuani japka. Ístuksï uandasïndi: “Kómarhisïrengachi Jeobani meru ambe ma jimbo. Ka engachi exenga na engajtsïni mókuchintenga, kánikuachi sési pʼikuarherasïrenga. Ísï no ióni jimbo engachi niárapka kúnguarhikuarhu, máteru erachichaksï prekursori úkuarhispti. Ístu, tsimani estudiuechanchi jatsiaspka engaksï sóntku progresaripka”.
“MÉNTKISÏ KÁNIKUA TSÍPINI JA JE”
Ísïsti eska no méntkisï fasilisïnga tsípini pʼikuarherani. Jauati ménisï engachi komu pʼikuarherani jauaka. Perujtsïni Jeoba sési pʼikuastantasïndi uandakuecha jingoni engaksï Salmo 64:10 jimbo jaka. Nájkirukachi no sési pʼikuarherani jauaka, uákachi mintsikani eska “ima enga jurhimbitiika Jeobani jimbo tsípia[ka]”. I ambe arhikuekasïndi eska, ambe uéjki engachi nitamakuarhiaka, tsípini pʼikuarheranchi jauaka engachi no méni jurajkuska Jeobani. Ka erokuarhisïngachi imani jurhiatikuani enga kumplirikuarhiaka imeri aiatsperakua enga jauaka “jimbanhi auanda ma ka jimbanhi parhakpini ma”. Jimajkani, Tata Diosïri marhuarichaksï perfektueuatia ka “méntkisï[ksï] kánikua tsípini” jauati iámindu imani ambe jimbo enga Jeoba uáka (Is. 65:17, 18).
Ju je eratsini ambe enga arhikuekajka inde ambe: eskachi nóteru méni pʼamenchakia ka pauani pauanchi tsínharhiaka kánikua uinhapikua jingoni. Ambe uéjki engachi no sési nitamakuarhiaka ka no sésijtsïni pʼikuastani, nóteruchi miáuakia. Jeobajtsïni aiachesïndi eska “iámindu no sési jásï ambe enga ióntki japka” nóteru miánhantakia, ka nóterujtsïni no sési pʼikuastaatia. Tsíntskua jimbo, uákachi ménderu imecha jingoni jarhani engachi uarhiranchaka. Miioni jimboksï kʼuiripuecha xáni sési pʼikuarheraati engachi no újka jamberi jánhaskani, májkueni eskaksï na pʼikuarherapka tátembecha jiáni enga Jesusi tsítantapka uátsïni enga 12 jatiripka (Mar. 5:42). Ka niárati jurhiatikua engaksï iámindu kʼuiripuecha engaksï Echerirhu irekaaka, meruksï jurhimbitiuaka ka Jeobani jimboksï tsípini jauati para méntkisï.