¿Miásïntsï?
¿Arhiantaskijtsï últimu rebistechani Aianhpiri? Exe je sintsï uá mókuantani arini kurhamarhikuechani:
¿Ambe arhisïni Biblia enga xarhatajka eskajtsïni Tata Diosï kurhanguchisïnga?
Engaksï israelitecha jántspiripka jini Ejiptu, Tata Diosï mítispti eskaksï kómu nitamakuarhixapka ka no sésiksï pʼikuarherani (Éx. 3:7; Is. 63:9). Komu juchachi ísï kueraakata jaka eska Tata Diosï, úsïngachi máteruechani kurhangukuani. Imajtsïni kurhanguchisïndi asta jiáni engachi ísï exejka enajkichi no jukancha parajtsïni xénchani (wp18.3-S, pájina 8 ka 9).
¿Jesusi néna jarhuataaspi kʼuiripuechani paraksï iáminduecha jingoni sési pájperani?
Jesusiri jurhiatikuecha jimbo, uánikua judiuechaksï no uékaasïrendi máteru kʼuiripuechani. Tata Jesukristu exeraaspti na enga xáni jukaparhakueka kaxumbitini ka na enga xáni no sési jaka kʼéri exekuarhini rasa jimbo. Uandaspti eskaksï imeri chúxapaticha jatsispka paraksï ísï exejperani komu ermanuecha (w18.06, pájina 9 ka 10).
¿Ambechi jorhenguarhisïni imani amberi enga úpka eska Tata Diosï no jurajkupiringa Moisesini inchani Echerirhu engaksï Aiaminhapka?
Moisesi ambakiti pájperakua ma jatsispti Jeoba jingoni (Deut. 34:10). Engaksï israelitecha kʼamarani japkia biajini desierturhu ísï enga kuarenta uéxurhini duraripka, ménderuksï kejarikuarhispti jimbokaksï no jatsispka itsï. Tata Diosï arhispti Moisesini eska uandajpapiringa kʼerendani. Peru enbesi de ísï úni, Moisesi uánharhitaspti tsakapurhu. Jamberi Jeoba ikiapti imani jingoni jimboka no úspka ambe enga ima arhipka o jimboka no kʼéri ambe arhispka imani milagru jimbo (Núm. 20:6-12). I ambejtsïni jorhendasïndi eska kánikua jukaparhakueska kurhajchani Jeobani ka kʼéri ambe arhini (w18.07, pájina 13 ka 14).
¿Ambechi úpirini no sési úni engachi jusgariuapiringa máteruechani imani ambe jimbo na engaksï xarharajka?
Tanimu ambe jarhasti enga újka eskaksï uánikua kʼuiripuecha máteru ambe eratsiaka nemaeri: nani enga anapueka o rasa, tumina ka na enga xáni jatiriuaka. Kánikua jukaparhakuesti eskachi jorhenguarhiaka no menusi uáni máteruechani, sino ísï exeani eska Jeoba na exeajka (Uku. 10:34, 35) (w18.08, pájina 8 a 12).
¿Nénaksï uá jarhuajpini kúnguarhikuarhu erachicha engaksï jatirikia?
Tata Diosï seguirixati jukaparharani erachini enga jatirikia ka intsïnhani jimbanhi asignasioni ma, erachi uáti kánikua jarhuataani máteruechani. Uáti jarhuataani pirenchicheri uámbechani engaksï no Testigueka, jarhuataani imechani engaksï nóteru eianhpijkia, Bibliaeri ambe jorhentpini ka mámaru ambe úni para eianhpini (w18.09, pájina a 11).
¿Náki publikasionichaksï jarhaski juchari erramientecharhu para jorhentpini?
Máru publikasionichaksï jindesti tarjetecha para jw.org inchani, pʼímarperakuecha, ochu trataduecha engaksï sési úkata jaka ka rebistecha La Atalaya ka ¡Despertad! Ístuchi jatsiaska máru foietuechani, tsimani libruechani engachi úrajka para estudiu íntspini ka tʼámu bideuechani engaksï kánikua marhuajka, ma jindesti ¿Andisï uétarhijki jorhenguarhini Bibliaeri ambe? (w18.10, pájina 16).
¿Ambe jatsiski para úni kristianu ma para piáni jurhimbikuani, ísï eska na arhijka Proverbios 23:23?
No uétarhisïndi eskachi tumina íntspiaka parachi konseguirini jurhimbikuani. Peru uétarhisïndi eskachi arhutaka tiempu ka jánguarhintani parachi úni jurhimbikuarhu jarhani (w18.11, pájina 4).
¿Ambechi jorhenguarhisïni na enga kámapka Oseasi imeri témba Gómerini?
Gómeri uánikua xanhari ísku jándikua ambe úspti. Peru Oseasi puákuntaspti ka seguirispti tembuchatini jarhani imani jingoni. Enga témba o uámba ma enga ísku jándikua ambe uáka, ima enga no kulpa jatsika uáti puákuntani. Peru ia sea enga achati o uarhiiti ménderu apondiaka imani jingoni enga ísku jándikua ambe úka, nóteru jatsiatia rasoni ma para diborsiarikuarhini (w18.12, pájina 13).