1, 2. ¿Ambeksï eranhaskasïni máru kʼuiripuecha engaksï kurhajka uandakuani paraisu?

KÁNIKUA sési pʼikuarherakuarhispti. Kʼamakurhisptia kʼéri tánguarhikua jini Seúl (Corea) ka engaksï ima erachicha engaksï representantipka máteru paisicheri uéntani japkia estadiurhu, uáni erachicha ka pirenchichaksï niraspti uandajpaani. Engaksï uandanuntperantani japkia arhijperasïrendiksï: “Paraisurhuchi exejperantaaka”. ¿Ambeksï arhikuekaxapi?

² Ini jurhiatikuecha jimbo, uandakua paraisu uáti mámaru jásï ambe eranhaskataraani kʼuiripuechani. Máruksï uandasïndi eska ambe máeska enga no méni úkuarhiaka. Máteruksï eranhaskasïndi lugari ma enga kánikua sési jándeka, nani enga sési pʼikuarherakuarhika ka tsitini jima jarhani komu pákua ma jimbo enga sési járhati tsïtsïkicha jukaka. Ka para jurhimbiti kristianuecha, ¿ambeski Paraisu? ¿Ambe máeski engachi erokuarhini jaka eska jauaka sánderu orhepani?

3. Bibliarhu, ¿nani uénasïni Paraisueri ambe uandani?

³ Biblia uandasïndi eska ióntki Paraisu ma jarhaspka ka eska jauaka máteru sánderu orhepani. Ka desde uénakuarhutki uandasïrendia inderi ambe. Bersioni katolika Scío de San Miguel, enga latini uératini tradusirinhaka, Génesis 2:8 arhisïndi: “Tata Diosï desde uénakuarhu  úspti paraisu ma enga agustu pʼikuarherakuarhenga: nani enga pérapka kʼuiripuni enga kueraapka” (palabrecha engaksï kursiba jimbo jaka jucharistiksï). Ebreu orijinali jimbo, i bersikulu úrasïndi uandakuani “jardini de Edeni”. Uandakua Edeni arhikuekasïndi “sési pʼikuarherani” o “tsitini jima jarhani”, meru ambakiti ma nombri para ima lugari. Kánikua tʼirekua jarhaspti, sési járhati lugaricha ka kʼuiripu no ma animalini chérhisïrendi (Gén. 1:29-31).

4. ¿Andichisï uá arhini paraisu jardini de Edenini?

⁴ Uandakua enga ebreu jimbo jindeka jardini, griegu jimbo jindesti parádeisos. Ensiklopedia ma uandasïndi eska enga griegu ma kurhauenga inde uandakuani, eranhaskasïrendi sési jásï lugari ma enga kánikua kʼépka, kʼérati anhatapuecha jingoni engaksï mámaru jásï fruta jukenga, ka iorhekua ambe jingoni enga itsï kánikua pímbinhanharhienga nani engaksï sési járhati animalicha uitsakua arhani jarhenga uanamukutini (Cyclopaedia, de M’Clintock ka Strong; Génesis 2:15, 16 jingoni terokutanta je). I ambejtsïni jarhuatasïndi kurhanguni andichisï uá arhini eska jardini de Edeni paraisu máeska.

5, 6. a) ¿Andisï nóteru jakiia Paraisu ma? b) ¿Nema ambe úpirini kurhamarhikuarhini?

⁵ Tata Diosï inde jásï ma jardini jimbosï pérapti Adani ka Ebani, peru tátsekua petaantaspti jimbokaksï no kurhajchaspka. Ísï jimbo, imecha ka imecheri desendientichaksï nóteru paraisurhu irekapirindia (Gén. 3:23, 24). Nóteru nema irekasptia ima lugari jimbo enga xáni sési jándipka astaka Dilubiu janopka ka kʼamajkuni.

⁶ Jamberi nema uáti kurhamarhikuarhini sini ménderu jaua Paraisu ma ixú Echerirhu. ¿Ambe xarhatasïni eska ísïuaka? ¿Jarhaski ambe ma engachi jimbo uáka erokuarhini jarhani Paraisurhu irekani imecha jingoni engachi xáni xénchaajka? ¿Úpirinchi eksplikarini andichisï seguru jaki eska Paraisu ma jauaka?

7, 8. a) ¿Jeoba ambe aiakuspi Abraanini? b) ¿Ambe eratsipi Abraani enga Jeoba indeni ambe aiakupka?

⁷ Nani enga sánderu sési jaka para exeantaani mókuntskuechani jindesti Bibliarhu, libru enga kararkuarhika ima enga kueraapka primeru Paraisuni. Por ejemplu, jimini arhisïndi eska Jeoba arhispka Abraanini eska imeri desendensia ísïpiringa “komueska arena enga marirhu uanamukuni jaka”. Ístu aiakuspti: “Iámu nasionichaksï újchakuranhaati chíti desendensia jimbo, jimbokari kurhaaska juchiti uandakuani” (Gén. 22:17, 18). Ísï tátsekua, Tata Diosï ménderu arhispti inde ambe Abraaniri uájpani ka imeri nimakuani (arhinta je Génesis 26:4; 28:14).

⁸ No nani arhisïndi Bibliarhu eska Abraani jakajkupiringa eskaksï kʼuiripuecha erokuarhipiringa paraisurhu ma irekani enga auandarhu japiringa. Ísï jimbo enga Tata Diosï arhipka eskaksï ‘iámu nasionicha’ újchakuranhapiringa, seguru eska Echerirhu eranhaskapka. ¿Ambe máteru ambe uandasïni Biblia parachi úni jakajkuni eska sánderu orhepani echerirhu paraisu ma jauaka?

9, 10. ¿Náki máteru aiatsperakuechaksï xarhatasïni eska jauaka paraisu ma sánderu orhepani?

⁹ Dabidi enga Abraaniri desendientipka, uandaspti eska sánderu orhepani nóteruksï japiringia kʼuiripuecha engaksï no sési úripiringa (Sal. 37:1, 2, 10). Uandaspti eska echeri kaxumbiticheriuaka, “ka sésiksï pʼikuarheraati jimboka kánikua pínandikua jauaka”. Ístu Tata Diosï úspti eska arini ambe uandapiringa: “Echeri jurhimbiticheriuati, ka jimaksï irekaati para méntkisï” (Sal. 37:11, 29; 2 Sam. 23:2). ¿Néna marhuakuaspi i eiatsperakua imechani engaksï uékenga úni ambe enga Tata Diosï uéjka? Úspti eskaksï jakajkupiringa eska niáraaka paraisu ma jarhani, sáno májkueni jásï ma eska jardini de Edeni, nani engaksï Echerirhu solu jurhimbiticha irekaaka.

¹⁰ Enga tiempu nitamapkia, sáno iámindu israelitecha engaksï uandenga eskaksï Tata Diosïni  kómarhisïrenga, nóteruksï kurhajchasptia. Ísï jimbo Jeoba jurajkuspti eskaksï Babiloniuecha andaapiringa, kʼamajkunksï paisini ka eskaksï uánikuechani Babilonia paapiringa (2 Crón. 36:15-21; Jer. 4:22-27). Peruksï Jeobaeri profetecha uandaspti eska setenta uéxurhini tátsekua, israelitechaksï jurajkunhapiringa paraksï kʼuanhatsintani imecheri ireta jimbo. Íksï profesiecha jiáni kumplirikuarhispti, peru ístuksï arhikuekasïndi ambe ma para jucha. Ju je exeani máru indeni profesiechani ka exeakachi néna terokuntasïni imani Paraisu jingoni enga echerirhu jauaka sánderu orhepani.

11. a) ¿Néna kumplirikuarhispi Isaías 11: 6-9? b) ¿Náki kurhamarhikua uétarhisïni mókuntani?

¹¹ (Arhinta je Isaías 11: 6-9). Tata Diosï úraspti Isaiasini para uandani eska japiringa pínandikua echerirhu nani engaksï kʼuanhatsintapiringa israelitecha ka nóksï jatsipirindi para chérhiani animalichani ni kʼuiripu no sési úrini. Sapiicha ka jatirichaksï kuájchakukata japirindi. ¿A no eskajtsïni inde ambe eratsitarasïnga na enga jindepka irekua jardini de Edenirhu? (Is. 51:3). Inde parti profesieri imani tiempu jimbo kumplirikuarhispti. Peru profesia ístu uandasïrendi eska echerirhu —peru méntku iámu echeri, no solu ireta Israeli— japiringa “Jeobaeri mímixekua ísï eska itsï na jaka marirhu”. ¿Na jatinksï kumplirikuarhipirini i uandakuecha?

12. a) ¿Náki kóntperatechanksï intsïnhaaspi imecha engaksï Babilonia uératini kʼuanhatsintapka? b) ¿Ambe xarhatasïni eska Isaías 35:5-10 ístu jatsiaka para sánderu orhepani kumplirikuarhini?

¹² (Arhinta je Isaías 35: 5-10). Isaiasi asegurarispti eska imecha engaksï Babilonia uératini kʼuanhatsintapiringa nóksï chérhiapirindi kʼuiripuechani ni animalichani. Echerirhu uánikua ambe jukapirindi jimboka kánikua itsï japiringa, ísï eska na japka jardini de Edenirhu (Gén. 2:10-14; Jer. 31:12). ¿I profesia jiántku kumplirikuarhipirini? Ju je exeni eska ístu uandasïnga eskaksï imecha engaksï siegueka, kojueka ka engaksï kándiika, milagru ma jimboksï tsinakuarhipiringa. Peru i ambe no úkuarhispti israelitecha jingoni. I ambe arhikuekasïndi eskaksï i milagruecha sánderu orhepani úkuarhiaka.

13, 14. Engaksï israelitecha kʼuanhatsintapka Babilonia uératini, ¿nénaksï exespi kumplirikuarhini ambe enga Isaías 65:21-23 arhijka, peru ambeteru kueratasïni para kumplirikuarhini i profesieri? (Exe je dibujuni enga uénakuarhu jaka).

¹³ (Arhinta je Isaías 65:21-23). Engaksï judiuecha kʼuanhatsintapka, nóksï jarhaspti sési járhati kʼumanchikuecha ni echericha enga ubasï jukapiringa. Peru Tata Diosïri kóntperata jingoni, inde ambe mójtakurhipirindi. Seguru eskaksï imecha kánikua tsitipka kʼumanchikuechani uaani nani engaksï irekapiringa, echerirhu ikarani ambe ma ka arani imani áspiti ambe enga jukapiringa.

¹⁴ Ju je exeni eska i profesia uandasïnga eskachi xáni ióni irekaaka komueska “anhatapu ma”. Máru anhatapuechaksï úsïndi mili uéxurhinicha jimbo durarini. Kʼuiripuechachi uétarhinchapiringa no méni pʼamenchani parachi úni xáni ióni irekani. Ísï irekani eska Isaiasi na uandapka, úpirindi ísï xarharani komueska tsánharhikua ma. Pero no ísïsti. I profesia kumplirikuarhiati.

15. ¿Nákiskiksï máru aiatsperakuecha engaksï libru de Isaías jimbo jaka?

¹⁵ Ju je eratsintani na engaksï iámindu i profesiecha xarhatajka eska jauaka paraisu ma sánderu orhepani. Tata Diosï újchakuraauati iámu parhakpini anapu kʼuiripuechani. No nema chérhiauati animalichani ni kʼuiripu no sési úrini. Imecha engaksï siegueka, kándini ka kojueni, tsinakuarhiatiksï. Kʼuiripuechaksï úkuarhiauati kʼumanchikuechani ka ikaraatiksï ambe ma enga áspiaka ka sési útspini. Kʼuiripuechaksï sánderu ióni irekaati eska anhatapuecha. Ísïsti, Biblia meru xarhatasïndi eskachi ísï irekaaka sánderu orhepani. Peru ¿ambechi mókuntapirini engajtsïni nema arhipiringa eskachi támisï kurhanguxaka ambe engaksï arhikuekajka i profesiaecha? ¿Andichisï uá jakajkuni eska paraisu ma jauaka Echerirhu? Achamasï enga desde iónisï sánderu mítikateka, íntskusïndijtsïni ambakiti rasoni ma.

16, 17. ¿Jesusi na jatini uandaspi Paraisueri ambe?

¹⁶ Nájkiruka Jesusi no ma ambe no sési úpka, cháparhatasptiksï chkari ma jimbo. Imeri mándani ladu jimbo, jarhaspti no sési úri judiu ma. Máechakua enga jiókuarhipka eska Jesusi reispka, ari ambe kurhakuspti ante de uarhini: “Miántarini engari juramuni jauakia” (Luc. 23:39-42, TNM). Jesusiri mókuntskua enga Lukasʌ 23:43 [TNM] jimbo jaka, ístu xarhatasïndi na engachi irekaaka sánderu orhepani. Iásï, mámaru uandanhasïndi nani enga jatsika para koma ma jukani ini bersikulu jimbo. Máru jorhenaticha engaksï Bibliaeri ambe exejka, koma o tsimani puntuechanksï jatsikusïndi antesi de uandakua “iásï”, ísï jimbo i karakata arhisïndi: “Sési jimbokini arhisïnga: iásï jíndini jingoniri jauaka paraisurhu”. Peru ¿inde ambesï arhikuekani japi Jesusi?

¹⁷ Uánikua iásï anapu idiomecha jimbo, úrakuarhisïndi koma para sési kurhangukuarhini orasioni ma. Peru ióntki anapu karakatecha griegu jimbo, no méntkisï úrakuarhisïrendi koma. Ísï jimbo, ambe meru arhikuekaspi Jesusi: ¿sési jimbomindukinisï arhini jaka: iásï jíndini jingoniri jauaka paraisurhu?, o ¿sési jimbomindukinisï arhini jaka iásï: jíndini jingoniri jauaka paraisurhu? Imecha engaksï tradusirijka, ísïksï karasïndi seguni ambe engaksï eratsijka eska Jesusi arhikuekaxapka. Ka ísïchi exentasïnga uánikua Bibliaecharhu.

18, 19. ¿Náki eksplikasiontsïni jarhuatasïni kurhanguni ambe enga Jesusi arhikuekani japka?

¹⁸ Peru ju je miántani tsimani ambe enga Jesusi antesi arhiapka imeri chúxapatichani: ‘Uájpa Achatiri echerirhu inchatsitini jauati tanimu jurhiatikua ka tanimu chúrikua’ ka “Uájpa Achatiri entregarpinhaati kʼuiripuecheri jájkicharhu, ka uándikuatiksï, peru tanimu jurhiatikua jimbo tsíntaati” (Mat. 12:40; 16:21; 17:22, 23; Mar. 10:34). Ka apostuli Pedru uandaspti eska inde ambe ísï úkuarhispka (Uku. 10:39, 40). Ísï jimbo, Jesusi no ma paraisurhu niraspti ima jurhiatikua enga ima ka no sési úri uarhipka. Biblia arhisïndi eska máru jurhiatikuecha jimbo, Jesusi sepulturarhu jarhaspka astaka Jeoba tsítantapka (Uku. 2:31, 32). *

¹⁹ Eskachi na exejka, enga Jesusi úkupka aiatsperakuani imani no sési úrini, arini uandakuecha jingoni uénaspti, “sési jimbomindukinisï arhini jaka iásï”. Moisesiri jurhiatikuecha jimbo, kánikua pʼindenhasptia úranhani inde uandakua. Por ejemplu, ma jurhiatikua Moisesi uandaspti: “I uandakuechani engakini juramuchini jaka iásï, jatsistiksï para chíti mintsitarhu jarhani” (Deut. 6:6; 7:11; 8:1, 19; 30:15).

20. ¿Náki eksplikasioni xarhatasïni eska ísïska na engachi kurhangujka ambe enga Jesusi uandapka?

²⁰ Oriente Mediu anapu traduktori ma eksplikarhispti Jesusiri mókuntskuani: “Ini karakata jimbo, nani enga jatsika para sánderu uinhamu arhikuarhintani jindesti uandakuarhu ‘iásï’ ka ísï arhiati ‘sési jimbomindukinisï arhini jaka iásï: jíndini jingoniri jauaka paraisurhu’. Eiatsperakua imani jurhiatikua jimbo úkuarhispti ka tátsekua kumplirikuarhipirindi. Oriente anapuechaksï ísï pʼindesti uandani ka arhikuekasïndiksï eska engaksï ma jurhiani aiatspijka ambe ma, eska niáraaka ísï úkuarhini”. Siria anapu Biblia ma enga 1,600 uéxurhinisïkia enga karanhaka terokuntasïndi indeni eksplikasioni jingoni ka ísï tradusirisïndi Jesusiri mókuntskuani: “Merukini arhisïnga iásï eskari jíndeni jingoni jauaka Jardini de Edenirhu”. Jo ísïsti, i aiatsperakuajtsïni meru uinhaperantasïndi.

21. ¿Para ambe no erakunhaspi no sési úri, ka nénachi mítiski?

²¹ Ima no sési úri no erakunhaspti para auandarhu nirani. Ima no mítispti eska Jesusi pakatperakua ma úspka imeri apostulicha jingoni paraksï auandarhu juramuni imani jingoni (Luk.  22:29). Ístu no itsï atakuarhitixapti (Juanu 3:3-6, 12). Ísï jimbo, kurhangusïngachi eska Jesusi paraisuni masï arhikuekani japka ixú echerirhu. Ístu, ísï ióni jimbo apostuli Pablu uandantaspti eska achati ma, bisioni ma exespka enga ‘pʼíkunhantapka paraisurhu’ (2 Kor. 12:1-4). Pablu ka máteru apostulichaksï erakunhaspti para auandarhu nirani ka Jesusi jingoni juramuni, ambe ma enga no sési úri no sésikua jatsipka. Peru Pablu arhikuekaxapti ambe ma enga niárapiringa úkuarhini: “paraisu” ma sánderu orhepatini. * ¿Inde paraisu Echerirhu jaua? ¿Uáchi jucha jima irekani?

22, 23. ¿Ambechi uá erokuarhini?

²² Ju je miántani eska Dabidi uandaspka eska niáraaka jurhiatikua enga ‘Echeri jurhimbiticheriuaka’ (Sal. 37:29; 2 Ped. 3:13). Imani jurhiatikuechanisï arhikuekendi engaksï iáminduecha engaksï Echerirhu irekaaka kumplirhiuauaka Tata Diosïri juramukuechani. Isaías 65:22 arhisïndi: ‘Ísï ióni irekaati juchiti ireta, eska anhatapu ma’. I ambe arhikuekasïndi eskaksï kʼuiripuecha mili uéxurhinicha jimbo irekaaka. ¿Meruchi uá erokuarhini eska i ambe úkuarhiaka? Jo, jimboka Jaŋaskuecha 21:1-4 arhisïnga eska uarhikua nóteru jauakia jimbanhi parhakpinirhu, nani enga Tata Diosï újchakurauaka imeri ambakiti marhuarichani.

²³ Ambe enga Biblia jorhentpijka meru ísïsti. Paraisu enga uénakuarhu japka tsïnchisti, peru no para méntkisï. Tata Diosï aiatspesti eska imecha engaksï Echerirhu irekaaka kóntperata maksï intsïnhaaka. Ka Dabidi Tata Diosïri jarhuajperata jimbo uandaspti eska Echeri ambakiti kʼuiripuecheriuaka ka jurhimbiticheri ka eskaksï jima irekaaka para méntkisï. Ístu, Isaiasiri profesiechaksï úsïndi eskachi tsípikua jingoni erokani jauaka na enga xáni sési jánhaskuarheaka jiáni enga kumplirikuarhiaka ambe enga Jesusi aiakupka no sési úrini. Chájtsï uáka irekani indeni Paraisurhu. Enga niáraka ima jurhiatikua, úkuarhiati ambe engaksï ima erachicha uandapka kʼéri tánguarhikuarhu jini Corea: “Paraisurhuchi exejperantaaka”.