SYLVIANA, prekursora ma enga 25 ísï jatirika, uandantasïndi: “Engaksï juchiti amiguecha uandantenga na engaksï xáni tsípenga jima marhuani engaksï sánderu prekursoricha uétarhenga, jíjtuni uékasïrenga májkueni pʼikuarherani”. Ka ístu uandasïndi: “Peruni ísï pʼikuarherasïrenga enajkini no úpirini máteru nanisï marhuani”.

¿Ménisïjtsï ísï pʼikuarheraski eska Sylviana? ¿Uékapirintsï nirani eianhpini nani enga uétarhini jaka, perujtsï kurhamarhikuarhisïni sintsï uá ísï úni? Enga ísïka, ¡asï desanimarikuarhi je! Jeoba uánikua erachichani jarhuataastia orhepani uérakuani ójkutakuechani engaksï no jurajkuauenga paraksï sánderu marhuakuni. Peru ¿néna jarhuataaski? Ju je exeani máru ejempluechani jini Madagascar, kuarta isla enga sánderu kʼéka.

Últimu diesi uéxurhini jimbo, jukari 70 prekursoricha ka publikadoricha 11 paisicheri, * mótsistiksï África, territoriurhu ma enga kʼuiripu uéjka jorhenguarhini Bibliaeri ambe ka enga respetarijka. Ístu, uánikua publikadoricha i paisiri, mótsistiksï máteru lugaricharhu paraksï jorhentpini Bibliaeri ambe ini xáni kʼéri territoriurhu enga islarhu jaka. ¿Uékapirintsï mítiani máru erachichani?

Louis ka Perrine, temungurhiri máesti engaksï jukari 30 jatirika ka Francia uératinksï Madagascar mótsisti. Iónksï eratsesptia máteru paisirhu nirani eianhpini, peru Perrine no xáni segura jarhaspti. Ima uandasïndi: “Chésïrenga imani ambe úni engani no méni úpka. Uandanhiasïrenga jurajkuni familiani, kúnguarhikuani, kʼumanchikuani, juchari irekuani ka imani ambe engachi pʼindepkia úni. Ísïsti, ambe engarini sánderu pʼínguenga, jindespti eskani chésïrenga imani ambe jimbo engani no mítipka”. Peru 2012 jimbo, Perrine balori úkuarhintaspti ka temungurhirinksï mótsispti. ¿Néna pʼikuarherasïnia iásï? Perrine uandasïndi: “Engani eratsijka ambe engachi xáni nitamakia, úsïnga uandani eska juchiti jakajkukua sánderu uinhapiska exeparini na engajtsïni Jeoba jarhuatajka”. Ka Louis uandasïndi: “Primeru Konmemorasionirhu engachi Madagascar japka, kánikuachi sési ambe nitamaspka jimbokaksï jurhaspka diesi estudianticha engachi Bibliaeri ambe jorhendaajka”.

 ¿Ambeksï úspi paraksï uinhapikua jatsini ka seguirinksï imecheri asignasionirhu engaksï uandanhiatechani jatsiapka? Kómarhisptiksï Jeobani ka kurhakusptiksï eska íntsaapiringa uinhapikua paraksï úni aguantarini. Louis uandasïndi: “Exespkachi eska Jeoba mókuantaasïrenga juchari kómarhikuechani ka eskajtsïni íntskusïrenga imeri pínandikua. Ka exespkachi na engajtsïni xáni sési pʼikuastenga eianhpini. Ka ístu, Francia anapu amiguechajtsïni axachiaspti korreu elektronikuechani ka kartechani engajtsïni jarhuatapka no kuatantani” (Filip. 4:6, 7; 2 Kor. 4:7).

Louis ka Perrine, aguantarisptiksï, jimbosï Jeoba íntsaapti kóntperatechani. Louis uandasïndi: “Oktubrini de 2014, niraspkachi Escuela Bíblica para Matrimonios Cristianos jini Francia. * Nirani imani eskuelarhu, Jeobaeri regalu máesti engachi no méni mirikurhiaka”. I temungurhiri kánikua tsípispti engaksï eskuela kʼamaratini ménderu Madagascar axanhantapka.

Didier ka Nadine, Francia anapu temungurhiri ma, jukariksï 50 jatirisptia engaksï Madagascar mótsipka 2010 jimbo. Didier uandantasïndi: “Engachi sapirhatku japka, prekursorispkachi ka tátsekuachi tanimu sapiichani kaaspka. Engaksï kʼérapkia, eratsispkachi eskachi úpiringa máteru paisi nirani marhuani”. Nadine uandasïndi: “Ambe engarini pʼínguenga, jindespti eratsini eskani iauani japiringa juchiti sapiicheri, peru imajtsïni arhispti: ‘Engajtsï máteru paisirhu mótsiska para aianhpini, ¡kánikuachi sési pʼikuarheraaka chánksïni jimbo!’. Imecheri uandakuechajtsïni jarhuataspti parachi ísï úni. Nájkirukachi iauani jaka, sésijtsïni pʼikuastasïndi seguidu uandontskuarhini imecha jingoni”.

Para Didier ka Nadine, no fásilispti malgache jorhenguarhini. Nadine tsípiparini uandasïndi: “Nóteruchi 20 jatiriskia”. Peru ¿ambeksï úspi paraksï úni jorhenguarhini? Orhetaksï kúnguarhikuarhu ma niraspti enga francés jimboepka. Ka engaksï listu japkia, mótsisptiksï kúnguarhikuarhu ma enga malgache uandanhenga. Nadine uandasïndi: “Eianhpikuarhuchi uánikua kʼuiripuni exentasïnga enga tsitijka Bibliaeri ambe jorhenguarhini ka engajtsïni agradeserichejka engachi pʼorhembiajka. Uénani jámani ísï pʼikuarherasïrenga enajkini tsánharhini japi. Sési pʼikuarherasïnga prekursoreni ini territoriurhu. Engani jauarajka, eratsisïnga: ‘¡Xáni sési, iásï uéraaka eianhpini!’”.

Didier méntkisï tsípisïndi enga miántajka ima tiempuni enga uénapka malgache jorhenguarhini. Ima uandantasïndi: “Ma xanhari, tánguarhikuani kondusirixapka ka no ma komentariu kurhangusïrenga. Solu diosmeiamukua arhiasïrenga. Tátsekua, pirenchi ma komentarispti ka ji diosmeiamukua arhispka, peru ima engaksï imeri tátsepani japka, uénasptijtsïni seniasi úcheni. Uékasïrendijtsïni eianguni eska imeri komentariu no sési jarhaspka. Seguirispka máteru erachini íntskuni komentariu ka ima sési mókuntaspti. Buenu, erokuarhisïnga eska ísïipka”.

Kʼéri tánguarhikuarhu ma 2005 jimbo, Thierry ka imeri témba Nadia, exesptiksï dramani Vayamos tras metas  que honran a Dios, enga Timoteueri ambe uandantenga. I uandantskua enga Bibliarhu pʼitakateka, mintsitarhu niárakuaspti ka jarhuataaspti paraksï sánderu uékani nirani marhuani jima enga jarhuajperata uétarhienga para eianhpini. Thierry uandantasïndi: “Enga drama kʼamarapkia ka engachi pasajkuni japka, arhispka Nadiani: ‘¿Ka juchachi nani niuaia?’. Ka imarini arhispti eska imajtu májkueni eratsexapka”. Ísï no ióndani, uénasptiksï úni ambe enga uétarhienga paraksï úni ísï úni. Nadia uandasïndi: “Sánhani arhispkachi nóteru xáni uánikua ambe jatsinia. ¡Tátsekua, úsïrengachia iámu ambe tʼámu maletarhuterku jatsirania!”.

Ka 2006 jimbo, nirasptiksï Madagascar ka desdekaksï niárapka, kánikuaksï sési pʼikuarheraspti eianhpini. Nadia uandasïndi: “Sésijtsïni pʼikuastasïndi exeni na enga kʼuiripu jiókuarhijka Jeobaeri ambe”.

Peru seisi uéxurhini tátsekua, i temungurhiri niáraspti kʼéri ma uandanhiata jatsini. Nadiaueri amamba, Marie-Madeleine, enga Francia irekapka, kuarhatsespti, éjpurhu atakuarhispti ka kuarhajkuni. Engaksï uandontskuarhipkia doktori jingoni, Thierry ka Nadia kurhamarhisptiksï amambani sini uékasïreni imechani jingoni nirani irekani Madagascar. Nájtuka 80 jatiripkia, tsípikua jingoni jiókuarhispti. ¿Néna exesïni Marie-Madeleine máteru paisirhu irekani? Ima uandasïndi: “Úkua jukanchasïnga máru ambe, peru exesïnga eskani kánikua jarhuajpisïnga kúnguarhikuarhu nájkirukani uánikua ambe no újka úni. Ka ambe engarini sánderu sési pʼikuastajka, jindesti eska juchiti nanaka ka imeri uámba, úxakaksï seguirini aianhpini i lugarirhu enga uánikua kʼuiripu jiókuarhijka Jeobaeri ambe”.

Riana, erachi máesti enga jukari 20 jatirika. Alaotra Mangoro tʼarhexesti, lugari ma enga uánikua ambe jukajka ka Madagascariri esterhisï jarhasti. Rianani sési nikusïrendi eskuela, jimbosï uékendi karrera ma estudiarini. Peru enga Bibliaeri ambe jorhenguarhipka, nóteru májkueni eratsisptia. Ima mísmu uandasïndi: “Eratsispka sóntku kʼamarani sekundariani ka aiakuspka Jeobani: ‘Engani úska pasarini últimu exameni, prekursori úkuarhiaka’”. Enga graduarikuarhipkia, Riana úspti ambe enga uandapka. Prekursori ma jingoni niraspti irekani, ánchikuarhita ma jirinhaspti enga no kánikua tiempu euenga ka prekursori úkuarhispti. Ima uandasïndi: “Í jindesti sánderu ambakiti ambe engani erakuka úni”.

Peru imeri familia no kurhangusïrendi andisï nóteru uékapia estudiarini. Riana uandasïndi: “Juchiti táti, juchiti tíu ka juchiti abueleri jingonikua, uékasïrendiksï eskani nipiringa unibersidadirhu. Peru ji no ma ambe jimbo jurajkupiringa prekursoraduni”. Ísï no ióni jimbo, Riana mótsispti nani engaksï uétarhini japka eianhpiricha. ¿Ambe úspi eska uékapiringa ísï úni? Ima uandasïndi: “Inchachesptijtsïni ka uánikua ambejtsïni sïpachespti. Inde amberini eratsitaraspti ambe enga Jesusi uandapka de auandarhu patsani juchari jatsikuarhikua ambe. Jimbosïni jánguarhintapka sánderu kánerani juchiti jatsikuarhikua ambe, peru Jeoba jingoni” (Mat. 6:19, 20). Riana paisiri surirhu niraspti, lugarirhu ma enga kánikua kʼarhindika ka engaksï antandroicha irekaka. I lugari 1,300 kilometru (800 millas) iauani pakarasïndi jima uératini enga irekapka. ¿Andisï xáni iauani uékapi nirani?

Ma kutsï ante deksï sïpakuni, Riana uénaspti Bibliaeri ambe jorhendaani tsimani achatichani engaksï antandroipka. Jorhenguarhiaspti máru uandakuechani imecheri idioma jimbo ka eratsispti eska uánikua kʼuiripu enga imani idioma uandenga, nótki kurhaaxapka Reinueri ambe. Ima uandasïndi: “Kurhakuspka Jeobani eskarini jarhuatapiringa jima mótsini enga tandroy uandanhajka”.

Enga apenasi mótsipka, uandanhiata ma jatsispti: no exentasïrendi ánchikuarhita. Achati ma arhispti: “¿Andirisï juki? Ixú anapuechaksï chíti iretarhu nirasïndi jirinhani ánchikuarhita”. Tsimani semana tátsekua, Riana kʼéri tánguarhikuarhu rejioniri niraspti. Komu sánderku kámani japkia tumina, eratsisïrendi ambe úpirini. Últimu jurhiatikua kʼéri tánguarhikueri, erachi ma jatsirakuspti ambe ma abrigurhu. Tuminespti ka sésku andangupirindi para jima niántani engaksï antandroicha jaka ka negosiu ma uénani para ioguri atarantani. Riana uandantasïndi: “Pʼikuarheraspka na engarini Jeoba jarhuatapka engani meru uétarhinchani japka. Iásï kʼóruni úpiringa seguirini jarhuataani imechani engaksï no mítipka Jeobani”. Ka kúnguarhikuarhujtu uánikua ambe jarhaspti para úni. Riana uandasïndi: “Kada kinse día tokarisïrenga diskursu públiku ma nitamatarani. Jeobarini jorhendaxapti imeri kúnguarhikuani  úraparini”. Riana seguirixati jorhendaani Reinueri ambe imechani engaksï tandroy uandajka ka engaksï uéjka jorhenguarhini Jeobaeri ambe.

Jeoba aiatspesïndi eska újchakurauaka imechani engaksï jánguarhintajka marhuakuni (Is. 65:16). Ísïsti, engachi jánguarhintajka orhepani uérakuani ójkutakuechani ka sánderuchi eianhpini, pʼiuasïngachi kóntperatechani. Por ejemplu Sylviana, engachi uénakuarhu uandaka, eratsisïrendi eska no méni úpiringa jima marhuani enga uétarhini japka. ¿Andisï ísï pʼikuarhereni? Ima mísmu uandasïndi: “Komu juchiti jantsiri ma nuebi sentimetru [3,5 pulgadas] sánderu sapichueka eska máteru, renguejtasïnga ka sóntkuni kuatarasïnga”.

Peru nájkiruka ísï jaka, 2014 jimbo, Sylviana niraspti imeri kúnguarhikuarhu anapu ma prekursora jingoni enga Sylvie Ann arhinhajka, ireta sapichurhu ma enga 85 kilometru (53 millas) iauani jaka imeri kʼumanchikuarhu uératini. Nájkiruka japka máru ambe enga ójkutenga, Sylviana úspti ambe enga uékenga. Ka ístu, ambakiti kóntperata ma pʼiraspti. Sylviana uandantasïndi: “Ma uéxurhintku tátsekua engani mótsipkia, Doratine, uarhiiti sapichu ma engani estudiu íntskuenga, itsï atakuarhispti kʼéri tánguarhikuarhu sirkuitueri”.

Ambe engaksï i erachicha uandantajka, jorhendasïndijtsïni eska engachi jánguarhintaska orhepani uérakuni imani ambe engajtsïni ójkutajka parachi sánderu marhuakuni Jeobani, exeakachi eskaksï ari Jeobaeri uandakuecha meru ísïska: “Jíkini uinhaperantaaka. Jo, jíkini jarhuataaka” (Is. 41:10). I ambe uinhaperaati juchari pájperakua Jeoba jingoni. Ístu, tsípikua jingoni aiakukuarheni para jarhuajpini —juchari paisirhu o máteru nani—, preparariuatijtsïni parachi Jeobaeri ambe úni jimbanhi parhakpinirhu. Eska na uandajka Didier, engachi antesi uandaka, “jima marhuani enga uétarhini jaka, ambe máesti engajtsïni prepararijka para sánderu orhepani”. Erokuarhisïngachi eskaksï sánderu erachicha tsípikua jingoni aiakukuarheaka paraksï i jásï preparasioni pʼirani.