1, 2. ¿Nénajtsïni xarhatachisïni Jeoba eska intsïmpitiiska?

JEOBA, Tata Diosï máesti enga intsïmpitiika. Iámu ambe engachi jatsika, imani jimboesti. Iámu oru, plata ka sési jásï ambe enga echerirhu jaka, imeristi ka íntspesïndi ambe enga xáni uétarhijka para tsípikua jarhani (Sal. 104:13-15; Ageo 2:8). Biblia arhisïndi eska Jeoba uánikua uelta úraspka ambe enga echerirhu jaka para milagruecha jimbo, íntsani imeri marhuarichani ambe engaksï uétarhinchaenga.

² Por ejemplu, Jeoba kuarenta uéxurhini íntsaspti israelitechani mana ka itsï engaksï desierturhu japka (Éx. 16:35). Ka ísï jimbo, “nóksï ambe ma kueratanchaspti” (Neh. 9:20, 21). Profeta Eliseuni úraparini, Jeoba milagru ma úspti para kánerakuntani aseiti ambakiti uarhiiti ma enga tsïndipka. Ini milagru jimbo, uarhiiti úspti íntspentani tumina enga kántspienga ka útasï pakajkuspti paraksï ima ka imeri uájpecha, mantenerikuarhini (2 Rey. 4:1-7). Ka ístu, Jeoba íntskuspti Jesusini uinhapikua para milagru ma jimbo, íntspeni tʼirekua ka tumina jiáni enga uétarhipka (Mat. 15:35-38; 17:27).

3. ¿Ambechi exea ini artikulurhu?

 ³ Jeoba uáti úrani ambe enga ima uékaaka paraka iámu ambe enga ima kueraaka Echerirhu, no kʼamakurhiaka. Peru pʼímarhiasïndi imeri marhuarichani paraksï úrani ambe engaksï jatsikuarhika para apoiarini imeri kúnguarhikuani (Éx. 36:3-7; arhinta je Proverbios 3:9). ¿Andisï Jeoba erokuarhijki eskachi úraaka juchari jatsikuarhikua ambe parachi íntskuntani ambe engajtsïni ima íntskuka? ¿Nénaksï apoiarispi ióntki anapu Tata Diosïri marhuaricha Jeobaeri kómarhikua jurhimbitini? ¿Néna úraasïni juchari organisasioni donasionichani engaksï íntspenhajka? Ini artikulurhu, exeauakachi mókuntskuechani ini kurhamarhikuecheri.

4. ¿Ambechi xarhatakusïni Jeobani engachi apoiarijka imeri ánchikuarhitani?

⁴ Íntskusïngachi Jeobani ambe engachi jatsika jimbokachi xénchasïnga ka agradeserikuni ambe enga xáni újka juchantsïni jimbo. Eratsintani ini ambe, úsïndi eskachi uékaaka úni ambe ma. Ísïchi pʼikuarherasïnga eska rei Dabidi enga eianhpipka ambe enga xáni uétarhini japka para templuni úni. Ima uandaspti eska ambe engachi xáni jatsika, Jeobani jimboeska ka eska ambe engachi xáni íntskujka, imeriska (arhinta je 1 Crónicas 29:11-14).

5. ¿Néna xarhatasïni Biblia eska para Jeobani kʼéri ambe arhini, uétarhisïnga íntspeni no ma ambe erokuarhiparini?

⁵ Máteru ambe jimbo engachi íntskujka Jeobani ambe engachi jatsika, jindesti para kʼéri ambe arhini. Bisioni ma jimbo, apostuli Juanu kurhaaspti engaksï Tata Diosïri marhuaricha auandarhu uératini uandani japka: “Tʼu juchari Tata, jukanchaskari tʼíntskua intsïnhani ka arhinhani eskari kʼéri ambeeska ka uinhapikua jatsindi, jimboka tʼu kueraaska iámindu ambe, ka jimbokari tʼu ísï uékaska, ísï jimbosïksï jarhani jati ka kueraakatenksï” (Jaŋ. 4:11). Ísïsti, Jeoba jukanchasti para kʼéri ambe arhinhani, jimbochisï jatsika para sánderu ambakiti ambe íntskuni. Ióntki, Jeoba Moisesini úraspti para juramukuani israelitechani eskaksï tanimu kʼuínchikua úntapiringa ma uéxurhini jimbo. Lei arhisïrendi eska no nema jatsispka para “no ma ambe jingoni niárani Jeobaeri orhepani jimbo” (Deut. 16:16). Eskachi na exejka, para kʼéri ambe arhini Jeobani, israelitechaksï jatsisïrendi para íntskuni ambe ma Jeobani kʼuínchikuecharhu. Iásïjtu kánikua jukaparhakuesti eskachi íntspiaka no ma ambe erokuarhiparini parachi kʼéri ambe arhini Jeobani. Ísï jámanchi xarhatasïnga eskachi apoiarisïnga ka jukaparharani ánchikuarhitani enga Jeobaeri kúnguarhikua úni jaka ixú.

6. ¿Andisï sésii para jucha íntspini ambe engachi jatsika? (Exe je fotuni enga uénakuarhu jaka).

⁶ Kánikuajtsïni sési úchesïndi juchantsïni eskachi intsïmpitiuaka ka no puru erokuarhini jarhani eskachi intsïmbinhaaka (arhinta je Ukuecha 20:35). Por ejemplu, ju je eranhaskani tataka sapichuni ma enga regalu ma úkuajka tátembechani imani tumina jingoni engaksï ima íntskujka. Tátembechaksï kánikua agradeseriuati, ¿a no? O ju je eranhaskani prekursorini ma enga tátembecha jingoni irekani jaka ka enga íntsaajka tumina para gastuecha. Jamberiksï tátembecha no erokuarhijti ini ambe, peruksï jamberi jiókuarhijti jimbokaksï mítiska eska ísï úparini, xarhatasïnga eska agradeserisïnga ambe engaksï xáni újka imani jimbo. Jeoba jingontu sáno májkuenisti, ima mítisti eska sésiska para jucha eskachi íntskuaka ambe engachi jatsikuarhika.

7, 8. a) ¿Nénaksï jarhuajpespi ióntki anapu Jeobaeri marhuaricha paraksï máru ánchikuarhitecha úkuarhini? b) ¿Nénaksï jarhuataasïreni tumina jingoni imechani engaksï orhejtsïkuenga?

⁷ Bibliarhu, jorhenguarhisïngachi eskaksï Jeobaeri marhuaricha íntspesïrenga ambe engaksï jatsikuarhipka para apoiarini Jeobaeri ánchikuarhitani.  Ménisïksï íntspesïrendi paraksï máru ánchikuarhitecha úkuarhini. Por ejemplu, Moisesi pʼímarhiaspti israelitechani paraksï íntspini ambe ma para tabernakulu únhani ka rei Dabidijtu májkueni úspti enga templu únhapiringa (Éx. 35:5; 1 Crón. 29:5-9). Rei Jeoásiri jurhiatikuechani jimbo, saserdotichaksï arreglarispti Jeobaeri kʼumanchikuani imani tumina jimbo enga ireta íntspipka (2 Rey. 12:4, 5). Primeru siglurhu, kristianuechaksï niáraspti mítini eskaksï imecheri ermanuecha uétarhinchaxapka jarhuajperata, jimboka Judea no jarhaspka tʼirekua. Biblia arhisïndi eskaksï iáminduecha jarhuajpespka seguni eskaksï na xáni jatsipka (Uku. 11:27-30).

⁸ Jeobaeri ireta, ístu íntspespti tumina para apoiariuani imechani engaksï orhejtsïkuenga kómarhikua jurhimbitini. Seguni Moisesiri Lei, lebitechaksï no intsïnhasïrendi erensia ma, ísï eska máteru tribuecha. Jimbosï ireta diesmu íntsauendi. I ambe jarhuataasïrendi lebitechani paraksï tabernakulurhujku ánchikuarhini (Núm. 18:21). Ióni tátsekua, máru uarhiitichajtuksï jarhuataspti Jesusini ka imeri chúxapatichani íntsaaparini “imecheri jatsikuarhikua ambe” (Luk. 8:1-3).

9. ¿Nani uérasïreni ambe engaksï Tata Diosïri marhuaricha íntspenga ióntki?

⁹ Iámindu ima ambe enga íntspenhapka, uápuru ísï uéraspti. Por ejemplu, enga tabernakulu únhapiringa desierturhu, jamberiksï israelitecha imani ambe íntspepti engaksï Ejiptu uératini pápka (Éx. 3:21, 22; 35:22-24). Primeru siglurhu, máru kristianuechaksï atarantaspti jatsikuarhikua ambe komu echerichani o kʼumanchikuechani ka apostulichanksï pákuaspti tumina. Ka íksï imechani íntsaspti engaksï sánderu uétarhinchenga (Uku. 4:34, 35). Máteruechaksï arhutasïrendi tumina ka íntspisïrendiksï para apoiarini kómarhikua jurhimbitini (1 Kor. 16:2). Ísï jimbo, desde ima enga sánderu jatsikuarhiripka asta ima enga sánderu pobripka, íntspesïrendi ambe enga xáni uénga (Luk. 21:1-4).

10, 11. a) ¿Nénachi uá májkueni intsïmpitiini eskaksï ióntki anapu Jeobaeri marhuaricha? b) ¿Nénajtsï pʼikuarherasïni engajtsï újka apoiarini Reinueri ánchikuarhitani?

¹⁰ Iásï, ístu uáti uétarhini eskachi íntspiaka donasioni para ánchikuarhita ma. Jamberi juchari kúnguarhikua uaani jati arregluechani para sési jájkuntani Kʼumanchikua Reinuerini o jimbanhi ma úni. Ochi jamberi aiangunhani eska uétarhixaka tumina para sukursali arreglarinhani, para kʼéri tánguarhikua úkuarhini nani engachi jucha nirajka o para jarhuataani erachichani engaksï no sési jásï ambe nitamakuarhika. Juchari donasionichaksï ístu marhuasïndi para apoiariuani misioneruechani, prekursori espesialichani, sirkuitueri orhejtsïkutichani ka imechani engaksï sede mundialirhu ánchikuarhijka ka interu parhakpini anapu sukursalicharhu. Ka seguruchi jarhaska eska juchari kúnguarhikua jatsika arreglu para mándani kutsï, axani jarhani tumina para programa enga jindeka para uaani Kʼumanchikuechani Reinueri ka Kʼumanchikuechani Kʼérati tánguarhikueri paraksï interu parhakpini anapu erachicha úraani.

¹¹ Iáminduechachi uaaka apoiarini ánchikuarhitani enga Jeoba úni jaka ini últimu jurhiatikuechani. Kasi no nema mítisïndi né uásïni donasionichani. Engachi jatsirajka donasioni kajecharhu engaksï Kʼumanchikua Reinuerirhu jaka, ochi jw.org jimbo íntspeni, nochi jurajkusïnga paraksï máteruecha mítini na xánchi íntspeski. Jamberichi ísï pʼikuarherajka enajkiksï juchari donasionicha no káni jarhuajpejki. Peru ambe enga ísïka, jindesti eskaksï sáno iámindu donasionicha engaksï úkuarhijka, nóksï máru kʼuiripuechajku úsïnga engaksï kánhachani íntspejka, sino uánikuecha engaksï sánhanitu íntspejka. Iámindu erachicha, asta imecha engaksï no káni jatsikuarhika, ísïstiksï eska Masedonia anapu kristianuecha primeru siglueri. Nájkirukaksï kánikua ‘kómu nitamaenga’, kurhajkuarhisptiksï eskaksï jurajkunhapiringa paraksï  jarhuajpeni ka íntspesptiksï ambe engaksï xáni úpka (2 Kor. 8:1-4).

12. ¿Ambe úsïni juchari organisasioni para sési úraani donasionichani?

¹² Grupu enga Orhejtsïkuajka iámindu kúnguarhikuechani, jánguarhintasïndi sési úrani organisasioniri tumina ka no ísku ambendarhini (Mat. 24:45). Íksï erachicha kómarhisïndi Jeobani ka sésiksï exesïndi nénaksï úraa ini tuminani (Luk. 14:28). Bibliaeri tiempuechani, ambarhati achatichaksï enkargarinhasïrendi paraksï exeni néna úrakuarhipirini tumina. Íksï, asegurarikuarhisïrendi eska tumina para puru kómarhikua jurhimbiti úrakuarhipiringa. Por ejemplu, ma xanhari Esdrasi níntaspti Jerusaleni kʼéri ma tesoru jingoni enga Persia anapu rei íntspipka, ima íntskuspti oru, plata ka máteru ambe enga iásï jukari 100 miioni dólari jukaparhapiringuia. Esdrasi ísï exesïrendi ini ambe komueska intsïmperata ma para Jeoba, jimbosï íntspiapti instruksionichani para i tesoru sési kuájchakunhani biajirhu enga kánikua peligrosuepka (Esd. 8:24-34). Ióni tátsekua, apostuli Pablu tánaspti tumina para Judea anapu erachichani jarhuataani ka asegurarikuarhispti eskaksï ‘jurhimbitku úpiringa iámindu ambe’ imecha engaksï arhukutspepiringa, ka “no solu juchari Tatani japarini, sino ístu kʼuiripuechani japarini” (arhinta je 2 Korintu 8:18-21). Iásï, juchari organisasioni chúngumasïndi Esdrasiri ka Pablueri ejempluni. Jimbosï íntspiajti instruksionichani na engaksï jatsika para úrakuarhini donasionicha.

13. ¿Andisï iásï sáni organisasioni uánikua ambe mójtaku?

¹³ Ménisï, máru familiechaksï jatsisïndi para mójtakuni máru ambe imecheri irekuarhu paraksï no imani tuminani jamberi úrani engaksï no jatsika. Oksï jirinhakuntani néna sánderu arisku sáni irekani paraksï sánderu marhuakuni Jeobani. Jeobaeri kúnguarhikuarhu, sáno májkueni ambe úkuarhisïndi. Arini últimu uéxurhinichani, uánikua jimbanhi ambe úkuarhisti ka ini ambe jimbo, ménisï sánderu tumina úrakuarhisti eska enga íntspinhenga. Jimbosï organisasioni jirinhakuntajti néna no xáni tumina úrani ka sánderu fásili úni ánchikuarhitani. Ka ísï jámani, juchari donasionichaksï úsïndi sési úrakuarhini.

14-16. a) ¿Nénaksï úrakuarhixaki juchari donasionicha? b) ¿Nénaksïni marhuachisïni ambe engajtsïni organisasioni íntskujka?

¹⁴ Uánikua erachicha engaksï ióni marhuakukia Jeobani, uandasïndiksï eskaksï no méni xáni uáni regalu pʼiraxapka organisasioniri. Ka ísïsti eskaksï na uandajka. Por ejemplu, arini uéxurhinichani, únhasti pájina jw.org ka kanali JW Broadcasting. Ka ístu, Traducción del Nuevo Mundo de las Santas Escrituras uánikua sánderu idiomecha jimbo jarhastia eska ióntki. Ístu, 2014  ka 2015, úkuarhisptiksï kʼéri tánguarhikua internasionalicha “Sigamos buscando primero el Reino de Dios”, 14 iretecha jimbo interu parhakpini, máru estadiuecharhu engaksï sánderu kʼéraka. Iámindu engaksï nípka, kánikuaksï sési nitamakuarhispti.

¹⁵ Uánikuaksï uandastia na engaksï xáni agradeserijka ini xáni sési jásï ambe jimbo engajtsïni Jeobaeri kúnguarhikua íntskujka. Por ejemplu, temungurhiri ma enga ireta sapichu ma jimbo marhuani jaka jini Asia, arini ambe karaspti programeri JW Broadcasting: “Ménisïchi ísï pʼikuarherasïnga enajkichi jandiajku jaki ka sóntkuchi mirikurhisïnga eska Jeobaeri kúnguarhikua interu parhakpini jarhaska. Peru engachi exeajka programechani, seguirisïngachi miántani eskachi interu parhakpini jatsiaska erachichani. Ixú, juchari erachichaksï kánikua tsípixati JW Broadcasting jimbo. Somenichi kurhajchaskia uandanksï jarhani eskaksï mándani kutsïri programecha jimbo, úsïngaksï sánderu mítiani erachichani engaksï jaka Grupurhu enga Orhejtsïkuajka iámindu kúnguarhikuechani. Iásïksï sánderu sési pʼikuarherasïndia Jeobaeri organisasionirhu jarhani”.

¹⁶ Interu parhakpini, únhaxatiksï o arreglarinhanksï sáno 2,500 Kʼumanchikuecha Reinueri. Jini Honduras, erachicha kúnguarhikuarhu anapu ma, arini ambeksï karaspti engaksï uénapka úrani imecheri jimbanhi salonini: “Kánikuachi tsípini pʼikuarherasïnga Jeobaeri familia jingoni kuenta úkuarhini ka iápurisï jatsiani erachichani. Jimboka ini ambe jimbo, úskachia úni Kʼumanchikua Reinueri ma juchari iretarhu”. Uánikuaksï sáno májkueni uandasïndi engaksï intsïnhajkia Bibliani ka máteru publikasionichani imecheri idioma jimbo, engaksï jarhuatanhajka engaksï no sési jásï ambe nitamakuarhijka o engaksï exejka ambe enga xáni úkuarhikia xanharu anapu eianhpikua jimbo ka siudadicharhu.

17. ¿Nénachi mítiski eska Jeoba jarhuataxaka iásï imeri kúnguarhikuani?

¹⁷ Uánikua engaksï no Jeobaeri testigueka, úkua jukanchasïndiksï jakajkuni eskachi úsïnga xáni uáni ambe úni donasionicha jingontku. Kʼéri empreseri jefe ma, niraspti exeni juchari imprentani ma ka ísku pakaraspti enga mítipka eskaksï iámu ambe boluntariuecha úsïnga donasionicha jingontku ka eska no na jatini únhasïnga ambe ma para tumina tánani. Uandaspti eska no úsïnga úkuarhini ambe engachi jucha újka. Ka ísïsti. Mítiskachi eska i ambe solu Jeobaeri jarhuajperata jimbo úsïnga úkuarhini (Job 42:2).

18. a) ¿Náki kóntperatechanchi pʼiuasïni engachi íntspijka para Reinuni apoiarini? b) ¿Nénachi uá jorhendaani sapiichani ka jimbanhichani paraksï imajtu jarhuajpini?

¹⁸ Jeobajtsïni íntskusïndi pribilejiu parachi apoiarini Reinueri ánchikuarhitani enga xáni kʼéka. Imajtsïni asegurarichesïndi eskachi pʼiuauaka kóntperatechani engachi apoiariska (Mal. 3:10). Ka aiakusïndi imani enga intsïmpitiika eska sési nikuaka (arhinta je Proverbios 11:24, 25). Ka ístu uákachi felisiini, jimboka “sánderu sésis[ka] intsïmpini, ka eska intsïmbinhani” (Uku. 20:35). Jatsiskachi pribilejiu para juchari uandakuecha ka úkuecha jingoni, jorhendaani juchari sapiichani ka jimbanhichani nénaksï uá imajtu jarhuajpini ka pʼiuanksï uánikua kóntperatechani.

19. ¿Nénaksïni uinhaperantaski i artikulu?

¹⁹ Iámu ambe engachi jatsika, Jeobani jimboesti. Engachi íntskujka ambe engachi jatsika, xarhatasïngachi eskachi xénchasïnga ka eskachi agradeserikusïnga ambe enga xáni újka juchantsïni jimbo (1 Crón. 29:17). Enga ireta Israeli íntspipka ambe ma para templu únhani, “kánikua tsípispti enga uápka kéjtsïtakuechani, jimbokaksï mintsita jingoni kéjtsïtakuspka Jeobani” (1 Crón. 29:9). Eskachi juchajtu seguiriuaka pʼikuarherani na enga xáni sésiika ka na enga xáni kʼéri ma tsípikuarhiteka íntskuntani Jeobani ambe engajtsïni ima íntskuka.