1, 2. ¿Náki tánguarhikua uá eska kʼuiripu májku kʼéri jauaka 2018 jimbo, ka andisï xáni jukaparhakue i tánguarhikua? (Exe je fotuni enga uénakuarhu jaka).

JURHIATIKUA 31 de marsuni de 2018, Tata Diosïri marhuaricha ka uánikua máteru kʼuiripu, tánguarhiatiksï enga jamberi Jurhiata inchajtsïkuni jauakia paraksï úntani Tateeri Senani. Solu tata Jesukristueri uarhikueri Miántskua enga mándani uéxurhintku úkuarhijka, úsïndi eska kʼuiripu májku kʼéri jauaka, no jarhasti máteru ambe parhakpinirhu enga újka ini ambe úni.

² Jeoba ka Jesusi, kánikuaksï tsípejti engaksï exejka na enga uánikua kʼuiripu interu parhakpini, nirajka ini tánguarhikuarhu enga xáni jukaparhakueka. Biblia uandarixaptia eskaksï ‘uánikua kʼuiripuecha’ enga no nema uénga kuentuani “iámindu nasionicharhu ka iámindu tribuecharhu ka iretecharhu anapuecha ka engaksï táchani jásï idioma uandaenga”, uinhachapiringa: “Pʼímutantskua juchari Diosïni jimboesti enga uaxakatini jaka kʼéri uaxantsïkuarhu, ka ístu Karichi sapichuni  jimbo” (Jaŋ. 7:9, 10). Xáni ambakiti ambeka eska xáni uáni kʼuiripu kʼéri ambe arhiaka Jeobani ka Jesusini mándani uéxurhini Konmemorasionirhu.

3. ¿Náki kurhamarhikuechanchi mókuantaua ini artikulurhu?

³ Ini artikulurhu, mókuantauakachi tʼámu kurhamarhikuechani. Primeru, ¿nénachi uá prepararikuarhini para Konmemorasioni ka jorhenguarhini ambe ma? Segundu, ¿andisï Konmemorasioni újki eskachi Jeobaeri marhuaricha májku kʼéri jauaka? Terseru, ¿nénachi uá jarhuajpini parachi májku kʼéri jarhani? Ka kuartu, ¿jaua ménisï engachi últimu Konmemorasioni úntaaka? Enga ísïka, ¿na jatiniua?

4. ¿Andisï xáni jukaparhakue eskachi jánguarhintaaka nirani Konmemorasionirhu?

⁴ ¿Andisï xáni jukaparhakue eskachi niuaka Konmemorasionirhu? Uétarhisïndi miáni eskaksï tánguarhikuecha jindeska para kʼéri ambe arhini Jeobani. Seguruchi jarhaska eskaksï Jeoba ka Jesusi exejka na enga kʼuiripu jánguarhintajka nirani ini tánguarhikuarhu enga xáni jukaparhakueka. Uékasïngachi eskaksï Jeoba ka Jesusi exeaka eskachi jima jauaka, solu engachi meru no uákia nirani pʼamenchakua ma jimbo o máteru ambe jimbo. Engachi juchari úkuecha jimbo xarhatajka eskachi jukaparharaasïnga tánguarhikuechani, Jeoba jatsisïndi máteru rasoni para no kénditani juchari nombrini ‘libru miántskuerirhu’ uératini. Ini librurhu, enga ístu arhinhajka “libru tsípikueri”, jukanharhistiksï imecheri nombri enga Jeoba uéjka íntsaani tsípikua para méntkisï (Mal. 3:16; Jaŋ. 20:15).

5. Ante de Konmemorasioniini, ¿nénachi uá exeni sini juchari jakajkukua uinhapiti jarhaski?

⁵ Ante de Konmemorasioniini, uákachi arhutani tiempu para kómarhini ka eratsintani sinchi ambakiti pájperakua ma jatsiski Jeoba jingoni (arhinta je 2 Korintu 13:5). ¿Nénachi uá ísï úni? Pablu uandaspti eskachi jatsiska para exekuarhini sini juchari jakajkukua uinhapiti jarhaski. Parachi ísï úni, uétarhisïndi kurhamarhikuarhini: “¿Meru jakajkusïni eska íjku jindeska kúnguarhikua enga Jeoba úrajka para úni ambe enga ima uéjka? ¿Jánguarhintasïni eianhpini ka jorhentpini Reinueri ambe? ¿Xarhatasïni juchiti úkuecha jimbo eskani jakajkusïnga eskachi últimu jurhiatikuechani irekaxaka ka eska no ióndani kʼamajkunhakia Satanasiri gobiernu? ¿Seguirixaki májkueni mintsikani Jeobani ka Jesusini eska jiáni engani aiakukuarhepka?” (Mat. 24:14; 2 Tim. 3:1; Ebr. 3:14). Sési eratsiantaani mókuntskuechani i kurhamarhikuecheri, jarhuataatijtsïni exeni néna jarhaski juchari jakajkukua.

6. a) ¿Ambe uétarhisïni para úni jatsini tsípikua para méntkisï? b) ¿Néna prepararikuarhisïni mándani uéxurhini erachi ma para Konmemorasioni? c) ¿Nénachi uá juchajtu májkueni úni eska i erachi?

⁶ Ma ambe engachi uáka úni parachi prepararikuarhini para Konmemorasioni, jindesti arhiantani ka eratsiantani máru artikuluechani engaksï uandajka na enga xáni jukaparhakueka i tánguarhikua (arhinta je Juanu 3:16; 17:3). Parachi úni jatsini tsípikua para méntkisï, uétarhisïndi mítini Jeobani ka jakajkuni Jesusini, imeri máechakua Uájpani. Parachi prepararikuarhini para Konmemorasioni, uákachi inbestigarini juchari jorhenguarhikuarhu máru temechani engajtsïni jarhuataaka sánderu andarherani Jeobani ka Jesusini. Ju je exeni ambe enga újka erachi ma enga ióni orhejtsïkutiikia. Desde iónisïa, artikuluechani tánaasïndi rebisteri La Atalaya engaksï Konmemorasioniri ambe uandajka ka na engajtsïni xáni uéjka Jeoba ka Jesusi. Mándani uéxurhini máru semana antesi, arhiantasïndi ménderu artikuluechani ka eratsintasïndi na enga xáni jukaparhakueka i tánguarhikua. Ménisï, ma o tsimani artikuluechani kúndaasïndi imani rebistecha jingoni enga jatsiakia. Kuenta íntskukuarhisti eska exeni ménderu ini informasionini, arhintani Bibliaeri arhintskuani para Konmemorasioni ka eratsintani ambe enga  arhintajka, jarhuatasïnga para sánderu ambe jorhenguarhini. Peru ambe enga sánderu jukaparhakueka, jindesti eska sánderu uékasïnga Jeobani ka Jesusini. Engachi juchajtu inbestigariska, sánderuchi uékaaka Jeobani ka Jesusini, ka i ambe uáti eskachi sánderu ambe jorhenguarhiaka Konmemorasionirhu.

7. a) ¿Ambe kurhajkuarhispi Jesusi kómarhikua jimbo primeru Tateeri Senarhu? b) ¿Nénachi mítiski eska Jeoba mókuntaska Jesusiri kómarhikuani?

⁷ Ima chúrikua enga primeru Tateeri Sena úkuarhipka, Jesusi kómarhispti eskaksï imeri chúxapaticha úpiringa májku kʼéri jarhani, ísï eska ima ka imeri Táti (arhinta je Juanu 17:20, 21). Sési jimbo, Jeoba mókukuntasti ini kómarhikuani enga imeri Uájpa úkupka. Sánderu eska náki uéjki ma tánguarhikua, Konmemorasioni sési xarhatasïndi eskachi Jeobaeri testiguecha májku kʼéri jarhaska. Jiáni, mámaru jásï kʼuiripu ka uánikua paisicharhu anapu, tánguarhintasïndiksï interu parhakpini ka xarhatasïndiksï eskaksï jakajkusïnga eska Jeoba axaska imeri Uájpani. Máru lugaricharhu, nóksï káni únhasïndi tánguarhikuecha nani enga mámaru jásï kʼuiripu jarhajka, oksï no sési exenhani. Peru Jeoba ka Jesusi, kánikuaksï sési exesïndi eska kʼuiripu májku kʼéri jauaka.

8. ¿Jeoba náki mensaji íntskuspi Esekielini?

⁸ Jeobaeri marhuarichantsïni no ísku pakatasïndi exeni eskachi májku kʼéri jarhaska. Jimboka Jeoba arhirixapkia ini ambe profeta Esekielini. Arhispti eskaksï tsimani chkaricha, chkari “para Juda” ka chkari “para Jose”, kúndanhapiringa paraksï májku chkari úkuarhintani (arhinta je Ezequiel 37:15-17). Parti “Preguntas de los lectores”, rebisteri La Atalaya juliueri de 2016, uandaspti: “Jeoba íntskuspti Esekielini ambakiti mensaji ma: aiatspespti eska kúndantapiringa ireta Israelini enga kʼuanhatsintapiringa imani Echerirhu enga Aiaminhapka. Ini mensaji jingoni, ístu uandaxapti eska Tata Diosïri ireta májku kʼéri japiringa últimu jurhiatikuechani”.

9. ¿Néna xarharasïni mándani uéxurhini Konmemorasionirhu eska Esekieliri profesia kumplirikuarhixaka?

⁹ Desde 1919 jimbo, Jeoba sánhani arhispti ménderu organisariuani ka tánantaani erakukatechani, engaksï ísïpka komu ima chkari “para Juda”. Tátsekua, uénasptiksï kúrhiani ima engaksï Echerirhu irekaaka, engaksï ísïka komu chkari “para Jose”. Jeoba uandaspti eska kúndaapiringa tsimani chkarichani ka eska “májku chkari” úntapiringa imeri jájkirhu (Ezeq. 37:19). Jeoba kúndaasti erakukatechani ka “máteru karichichani” paraksï “májku úkuarhinta[ni]” (Juanu 10:16; Zac. 8:23). Iásï, i tsimani grupuecha májku kʼériksï marhuakuxati Jeobani ka ma Reinkuksï jatsisti, Jesukristu, imani enga Esekieliri profesiarhu Tata Diosï arhipka “juchiti marhuari Dabidi” (Ezeq. 37:24, 25). Mándani uéxurhini, i ambe enga Esekieli uandapka xarharasïndi engaksï erakukatecha ka máteru karichicha tánguarhintajka paraksï miántani tata Jesukristueri uarhikuani. Peru ¿ambechi uá úni mándani arhini parachi úni eskachi májku kʼéri jauaka?

10. ¿Nénachi uá jarhuajpini para Tata Diosïri ireta májku kʼéri jarhani?

¹⁰ Primeru, parachi úni jarhuajpeni para Tata Diosïri ireta májku kʼéri jarhani, jatsiskachi para kaxumbitiini. Enga Jesusi Echerirhu japka, arhiaspti imeri chúxapatichani eskaksï jatsispka para kaxumbitiini (Mat. 23:12). Parhakpini anapu kʼuiripu, kasi méntkisï eratsisïndi eska sánderu kʼéri ambeska eska máteruecha. Peru engachi kaxumbitiiuaka, janhanharhiauakachi imechani engaksï orhejtsïkujka kúnguarhikuani. Engachi uéjka eska kúnguarhikua májku kʼéri jauaka, jatsiskachi para kurhandirani. Peru ambe enga sánderu jukaparhakueka, jindesti eskachi sési pʼikuastaaka Jeobani, jimboka ima “no jiókuarhiasïnga imechani engaksï teparakuarhijka,  peru imechani engaksï kaxumbitiika kóndiantasïndi” (1 Ped. 5:5).

11. ¿Andijtsïnisï jarhuatajki májku kʼéri jarhani eratsintani ambe enga arhikuekajka kurhinda ka binu?

¹¹ Segundu, parachi úni jarhuajpeni para Tata Diosïri ireta májku kʼéri jarhani, jatsiskachi para eratsintani ambe enga arhikuekajka kurhinda ka binu Konmemorasioniiri. Jatsiskachi para ísï úni ante de ima chúrikua ka sánderia imani chúri (1 Kor. 11:23-25, TNM). Kurhinda no xarhiperakua jingoni, Jesusiri kuerpuni arhikuekasïndi enga no pekadu jukarapka ka enga íntspipka kʼuiripu jimbo. Ka binu imani iurhirini arhikuekasïndi enga tsïtapka. Peru no solu uétarhisïndi mítini ambe arhikuekasïni kurhinda ka binu. Jatsiskachi para miántani eska Jesusiri uarhikua xarhataspka tsimani kʼuiripueri uékperakua: uékperakua enga Jeoba xarhatapka enga íntspipka imeri Uájpani parajtsïni pʼímutantani ka Jesusiri uékperakuani enga uékapka íntspini imeri tsípikua juchantsïni jimbo. Eratsintani na engajtsïni xáni xénchajka, uáti eskachi juchajtu xénchauaka. Ka inde uékperakua engachi jucha ka juchari erachicha pʼikuarherajka Jeobani jimbo, úsïndi eskachi májku kʼéri jauaka.

12. ¿Néna xarhataspi Jesusi eska Jeoba uékasïnga eskachi puákuantauaka máteruechani enga jatsikupka reiri ejempluni ka jántspiricheri?

¹² Terseru, parachi úni jarhuajpeni para Tata Diosïri ireta májku kʼéri jarhani, jatsiskachi para tsípikua jingoni puákuantaani máteruechani. Engachi puákuantajka imechani engajtsïni no sési pʼikuastaka, xarhatanchi jarhasïnga eskachi agradesidu jarhaska engajtsïni Jeoba puáchiantaajka pekaduechani tata Jesukristueri uarhikua jimbo. Ju je eratsintani ejempluni enga Jesusi uandapka enga Mateu 18:23-34 jaka. Ju je kurhamarhikuarhini: “¿Jarhuatasïnirini i ejemplu parani úni ambe enga Jesusi jorhentpika? ¿Kurhangukuasïni ka tekakuantaani erachichani? ¿Dispuestu jarhasïni parani puákuntani imani engarini no sési pʼikuastaka?”. Ísïsti, máru pekaduechaksï sánderu kʼérasïndi eska máteruecha. Ka komuchi no perfektueka, úkua jukanchasïngachi puákuantaani máteruecha engajtsïni ménisï no sési pʼikuastajka. Peru ambe enga Jesusi uandapka, xarhatasïndi ambe enga Jeoba uéjka eskachi uáka (arhinta je Mateu 18:35). Jesusi sési jimbo xarhatasti eska engachi no puákuantaska erachichani engaksï sési jimbo moantajka, Jeobajtujtsïni no puáchentaaka.  Jatsiskachi para sési eratsintani ini ambe. Engachi kurhajchajka Jesusini ka puákuantaanchi máteruechani, jarhuajpenchi jarhasïnga parachi méntkisï májku kʼéri jarhani.

13. ¿Nénachi úsïni májku kʼéri jarhani engachi sési pájperajka iáminduecha jingoni?

¹³ Engachi puákuantajka juchari erachichani, sésichi pájperasïnga iáminduecha jingoni. Apostuli Pablu uandaspti eskachi jatsiska para jánguarhintani májku kʼéri jarhani ka sésichi pájperani (Efes. 4:3). Ini jurhiatikuechani ante de Konmemorasioni niárani ka sánderia ima chúri, ju je eratsintani nénachi kaasïni máteruechani. Ju je kurhamarhikuarhini: “¿Xarhatasïni juchiti úkuecha jingoni eskani no jatanhetspesïnga? ¿Exesïnksï máteruecha eskani jánguarhintaxaka jarhuajpeni parachi májku kʼéri jarhani ka sésichi pájperani?”. Ini jurhiatikuechani, ju je eratsiantani ini kurhamarhikuechani engaksï xáni jukaparhakueka.

14. ¿Nénachi uá xarhatani eskachi uékperakua jimbo tekatspentasïnga?

¹⁴ Kuartu, parachi úni jarhuajpeni para Tata Diosïri ireta májku kʼéri jarhani, jatsiskachi para uékperakua xarhatani ísï eska Jeoba na újka, jimboka Tata Diosï uékperakueska (1 Juanu 4:8). Ju je no méni uandani arini ambe: “Mítiska eskani jatsiska para tekakuantaani erachichani, peruni no jatsiska andi sési kaani”. Engachi ísï eratsijka, nochi úni jarhasïnga ambe enga Pablu arhiapka kristianuechani eskaksï jatsispka para “tekaatsperantani máteru ka máteruni jingoni, [...] uékperakua jimbo” (Efes. 4:2). Ju je exeni eska no solu uandaspka eskachi jatsiska para tekaatsperantani, sino eskachi jatsiska para “uékperakua jimbo” úni. I ambe no májkuenisti, ¿a no? Jeoba mámaru jásï kʼuiripuni andaparhaterastia kúnguarhikuecharhu (Juanu 6:44). Ka ima uánikua rasonichani jatsiasti para uékaani erachichani. Jiájkani, ¿nénachi uá uandani eska erachi ma no jukanchaska eskachi uékaaka? Jatsiskachi para iáminduechani xarhatakuani imani uékperakua engajtsïni Jeoba juramuchijka eskachi xarhataaka (1 Juanu 4:20, 21).

15. ¿Andichisï míti eska ma jurhiani nóteru jauakia Konmemorasioni?

¹⁵ Jauati ma jurhiani engachi úntaaka últimu Konmemorasionini. ¿Andichisï ísï uandajki? Pablu arhiaspti kristianu erakukatechani eska mándani uéxurhini engaksï úntajka Jesusiri uarhikueri miántskuani ‘eianhpini jarhasïngaksï juchari Tateeri uarhikueri ambe asta káni enga ima junguaaka’ (1 Kor. 11:26). Enga Jesusi uandaapka profesiaechani últimu jurhiatikuecheri, ístu uandaspti káni junguapirini. Ima arini ambe uandaspti grani tribulasioniri: “Xarharaati mínda [seniali] Achati Uájperi auandarhisï, ka iámindu kʼuiripuecha engaksï parhakpinirhu jaka uandanhiauatiksï. Ka exeatiksï Uájpa Achatirini junguani jarhani janikuecharhisï kánikua uinhapikua ka tʼíntskua jingoni. Ka ima axauati imeri ánjilichani, ka kurhaakuarhiati trompeta uinhamu kústanhani jarhani, ka tántauatiksï imeri erakukatechani iápuru parhakpinirhu ka asta auandarhu jamberi” (Mat. 24:29-31). Jesusi jiáni tánantauati “erakukatechani” enga auandarhu paauakia erakukatechani engaksï útasï Echerirhu jauaka. I ambe jiáni úkuarhiati enga na uénaakia grani tribulasioni, peru antesi de Armajedoni uénani. Ini guerrarhu, Jesusi ka 144,000 erakukatecha, kʼamajkuauatiksï reichani engaksï Echerirhu jaka (Jaŋ. 17:12-14). Últimu Konmemorasioni jiáni úkuarhiati ante de Jesusi junguani para auandarhu paani erakukatechani.

16. ¿Andisïjtsï eratsitini jaki no kueratani i uéxurhini Konmemorasionirhu?

¹⁶ Ju je jánguarhintani parachi no kueratani Konmemorasionirhu enga 31 de marsuni de 2018 úkuarhiaka. Ka ju je kurhakuni Jeobani jarhuajperata parachi seguirini májku kʼéri jarhani imeri iretarhu (arhinta je Salmo 133:1). Ju je no mirikurhini eska niáraaka ima jurhiatikua engachi niuaka últimu Konmemorasionirhu. Mientrasi, ju je xarhatani eskachi kánikua jukaparharasïnga na enga xáni sési pʼikuarherakuarhijka májku kʼéri jarhani Konmemorasionirhu.