1, 2. ¿Andichisï Jeobaeri marhuaricha jatsi para kánikua kuidarikuarhini? (Exea je fotuechani engaksï uénakuarhu jaka).

UÁNIKUA doktoricha ka enfermerecha, atenderiauasïndiksï kʼuiripuechani engaksï pʼamenchakua ma kánguarhijka enga újka kéretperanhani. Atenderiuasïndiksï jimbokaksï uékasïnga jarhuataani. Peru engaksï no uéjka kérekuarhini, jatsistiksï para kuidarikuarhini. Jeobaeri marhuarichajtuchi sáno májkueni jarhaska, irekaxakachi ka ánchikuarhini imecha jingoni engaksï méntku no sáni xarhataajka Tata Diosïri kualidadichani ka engaksï no sési jásï ma jángua jatsika, i ambe méntku no sáni terokuntasïndi Tata Diosïri kualidadicha jingoni. Engachi no uéjka májkueni jámani, jatsiskachi para kánikua kuidarikuarhini.

² Ini últimu jurhiatikuechani, kʼuiripu no respetariuasïndi Jeobaeri leichani engaksï uandajka ambe enga sési jaka ka ambe enga no sési jaka. Segundu Karakata para Timoteu jimbo, Pablu uandaspti na engaksï járhatiipiringa kʼuiripuecha engaksï jarharetini jaka Tata Diosïni. Eska na niárapani japiringa jurhiatikua para kʼamajkunhani no sési jásï ambe, sánhani arhipirindi uánini kʼuiripu enga xasïipiringa (arhinta je 2 Timoteo 3:1-5, 13). Ka nájkirukachi jucha no sáni tsitijka ini  ambe, úpiringachi uénani májkueni eratsini, uandani ka jámani eska i kʼuiripu (Prov. 13:20). Jimbochisï ini artikulurhu exeaka eska iásï anapu kʼuiripueri jángua, méntku no sáni terokuntasïnga imani kualidadicha jingoni engaksï Jeobaeri marhuaricha jatsika. Ístuchi exeaka ambechi uá úni parachi no niárani xásï ma jángua jatsini engachi jamberi jarhuataani jauaka mítini Jeobani.

3. ¿Néchaksï ísï jámapirini eska 2 Timoteo 3:2-5 na arhijka?

³ Eskachi na exekia, Pablu uandaspti eska ‘últimu jurhiatikuechani jimbo japiringa peligru’. Tátsekua, karaaspti 19 no sési járhati kualidadichani enga uánikua kʼuiripu xarhataapiringa iásï. Roma 1:29-31 jimbo, sáno májkueni jásï ma lista jarhasti, peru ima enga 2 Timoteo jaka, úraasïndi uandakuechani engaksï no nani máteru ladu úrakuarhijka Karakata Griegaecharhu. Ini últimu listarhu, Pablu ini uandakuecha jingoni uénasïndi: “Jimajkanisï anapu kʼuiripuecha”, peru i ambe no arhikuekasïndi eskaksï iáminduecha xarhatiipiringa. Kristianu jurhimbitichaksï méntku ménderuenipirindi (arhinta je Malaquías 3:18).

4. ¿Néna jásïski ima enga kʼéramakuarhijka?

⁴ Enga Pablu uandapkia eskaksï uánikuecha jandiajku uékakuarhipiringa ka eskaksï jukari jatsikuarhikuekapiringa, ístu uandaspti eskaksï uánikuecha teparakuarhipiringa ka sési xékuarhinksï ka eskaksï jukari kʼéramakuarhipiringa. I jásï kʼuiripu, kʼéri ambe exekuarhisïndi imani ambe jimbo enga jorhenaka úni, na enga jáxeka ka tumina jimbo ka ístu tsitisïndi eskaksï máteruecha kʼéri ambe exeaka. Kʼuiripu ma enga Bibliaeri ambe exejka, arini ambe uandaspti imecheri engaksï kʼéramakuarhijka: “Imecheri mintsitarhuksï altari sapichu ma jatsikuarhisti paraksï tinguixurhikuarhini”. Jarhasti kʼuiripu enga uandajka eska no nema tsitisïnga eska kʼuiripu kʼéramakuarhiaka, jimbosï ima kʼuiripu jamberi enga kʼéramakuarhijka, no sési exejti enga exejka máteruni enga kʼéramakuarhijka.

5. ¿Ambeksï úkuarhinchaski máru Tata Diosïri marhuaricha?

⁵ Biblia arhisïndi eska Jeoba kurhunhesïnga eska nema kʼéramakuarhiaka (Prov. 6:16, 17). Ima enga kʼéramakuarhijka, jarharesïndi Jeobani (Sal. 10:4). Ka kʼéramakuarhikua Noambakitiriisti (1 Tim. 3:6). Peru asta máru Jeobaeri marhuarichaksï niárasïndi kʼéramakuarhini. Ma enga ísï úpka jindespti Usíasi. I Judá anapu rei, ióni sési marhuakuspti Tata Diosïni, peru Biblia arhisïndi eska “enga uinhapikua jatsipkia, imeri mintsita niáraspti xáni kʼéramakuarhini enga jamberi niárapka no sési ambe úkuarhinchani ka no janhanharhispti Jeobani, imeri Tata Diosïni ka inchaspti Jeobaeri templurhu para kurhirani insiensu altarirhu enga insiensueripka”. Máru uéxurhini tátsekua, rei Esekiasijtu niáraspti kʼéramakuarhini, peru ma tiempujku (2 Crón. 26:16; 32:25, 26).

6. a) ¿Ambe úpirini úni eska Dabidi kʼéramakuarhipiringa? b) ¿Ambe jarhuataspi para méntkisï kaxumbitiini?

⁶ Máru kʼuiripuechaksï kʼéramakuarhisïndi jimbokaksï sési jáxeska ka mítikatenksï, jimbokaksï jorhenaska kústani ka uinhapinksï o jimbokaksï máteruecha kʼéri ambe exeasïnga. Dabidi jatsispti iámindu ini ambe, peru ima méntkisï xarhataspti kaxumbikua. Por ejemplu, enga Goliatini uándikupka, rei Sauli arhispti eska úpiringa tembuchani imeri uájpa jingoni. Peru Dabidi arhispti: “¿Néski ji ka néskiksï juchiti parienticha, juchiti tátiri familia, ireta Israeli jimbo, parani ji reiri iernueni?” (1 Sam. 18:18). ¿Ambe jarhuataspi Dabidini para méntkisï kaxumbitiini? Miántani eska ambe enga jorhenapka úni ka eska enga jatsiapka kualidadichani ka pribilejiuechani, jindespka jimboka Tata Diosï kaxumbitiska ka jimboka exespka na enga jásïpka Dabidi (Sal. 113:5-8). Ima mítispti eska Jeobani jimbosï jatsipka iámu ambe (terokutanta je 1 Korintu 4:7 jingoni).

7. ¿Ambejtsïni jarhuataa kaxumbitiini?

⁷ Iásï, Jeobaeri marhuarichachi jánguarhintasïnga kaxumbitiini ísï eska Dabidi. Ískujtsïni pakatasïndi mítini eska Jeoba kaxumbitiska nájkiruka  ima Juramutiika iámu amberi (Sal. 18:35). Jánguarhisïngachi úni ambe enga ari konseju arhijka: “Sési kámbera je ka nójtsï teparakuarhitsperani, sino kaxumbitsperani ka no ikiatsperani” (Kol. 3:12). Ístu, mítiskachi eska ima enga uékpijka ‘no uékasïnga eska kʼéri ambe exenhaaka ka níjtu méni teparakuarhini’ (1 Kor. 13:4). Ka miásïngachi eska májkueni eska achati ma na uáka jakajkuti úkuarhini témberi ambakiti jángua jimbo, kʼuiripuechajtuksï uáka andarherani Jeobani engaksï exeska eskachi imeri marhuaricha kaxumbitiiska (1 Ped. 3:1).

8. a) ¿Nénaksï exesïni máru engaksï sapiicha no janhanharhiajka tátembechani? b) ¿Ambe arhiasïni Biblia sapiichani?

⁸ Pablu ístu uandaspti na engaksï kámberapiringa kʼuiripuecha últimu jurhiatikuechani. Por ejemplu, uandaspti eskaksï sapiicha no janhanharhiapiringa tátembechani. Ini jurhiatikuechani jimbo, libruecha, pelikulecha ka telebisioniri programecha, ísïksï xarhatasïni ini ambe enajki normali ka enajki no no sési jaki. Peru enga nema no kurhandirajka, úsïndi eska familia no sési jauaka. Ka kʼuiripu desde iónisï mítistia eska i ambe ísïska. Por ejemplu, jini Grecia, enga ióntki tataka ma atauenga tátembechani, iauanisï axanhasïrendi. Ka Roma anapu lei uandasïrendi eska ataani tátichani, xáni no sésispka komueska uándikpini. Karakata Ebreaecha ka ístu Karakata Griegaecha, arhiasïndiksï sapiichani eskaksï janhanharhiauaka tátembechani (Éx. 20:12; Efes. 6:1-3).

9. ¿Ambe jarhuataua tumbiichani paraksï kurhajchaani tátembechani?

⁹ ¿Ambe jarhuataua sapiichani paraksï kurhandirani ka nóksï májkueniini eska iásï anapuecha? Ambe enga jarhuatauaka paraksï agradesidueni ka kurhajchaani tátembechani, jindesti eratsintani ambe engaksï xáni úkia tátembecha imecha jimbo. Ístu, uétarhisïndi eskaksï sapiicha kurhanguaka eska Jeoba, juchari Táti, erokuarhisïnga eskaksï kurhajchauaka tátembechani. Engaksï tumbiicha sési ambe uandajka tátembecheri, jarhuataasïndiksï máteru tumbiichani paraksï imajtu janhanharhiani tátembechani. Peru engaksï táticha no xarhatakuaska uékperakua, jamberiksï sapiicha sánderu úkua jukanchaati tsípikua jingoni kurhajchaani. Peru engaksï sapiicha exeska eskaksï tátembecha meru uékaasïnga, i ambe jarhuatauati paraksï kurhajchaani nájkirukaksï úkua jukanchaaka. Austin, tumbi ma enga Testigueka, uandasïndi: “Ísïsti eskani someni uékasïrenga imani ambe úni enga no sési japka, peru juchiti tátichajtsïni arhisïrendi ambe engani no úpiringa úni, explikarichesïrendijtsïni andi ka méntkisïchi úsïrenga uandontskuarhini. I amberini jarhuataspti parani kurhajchaani. Méntkisï exespka eskaksï uandanhiasïrenga jíndeni jimbo ka inde ambe úspti eskani uékapiringa kurhajchaani”.

10, 11. a) ¿Ambe máteru ambe xarhatasïni eskaksï kʼuiripuecha no uékpesïnga? b) ¿Néchani jamberiksï uékaapirini jurhimbiti kristianuecha?

¹⁰ Pablu ístu uandaspti máteru ambe enga xarhatajka eskaksï kʼuiripuecha no uékpesïnga. Enga uandapkia eskaksï ‘no janhanharhiapiringa tátembechani’, ístu uandaspti eskaksï no agradeseritspepiringa ka i ambe ísïsti, jimboka i jásï kʼuiripu no agradeserisïnga ambe engaksï máteruecha újka imecha jimbo. Uánikua kʼuiripu ístu no janhanharhipirindi Tata Diosïni ka kurhuraxeni o no uékani sési pájperantani máteruecha jingoni. No sésiksï arhipirindi Tata Diosïni ka traisionarpepirindiksï, jimbokaksï no sési jásï ambe uandapiringa máteruecheri, asta Tata Diosïri ambe. Ístuksï chkuanderakua ambe uandatspepirindi paraksï no sési pakataani máteruechani. *

¹¹ Kʼuiripu no sáni xarhatasïndi uékperakua, peru Jeobaeri marhuarichaksï méntku ménderuenisti, jimbokaksï ambakiti uékperakua xarhatatspesïnga. Ka méntkisïksï ísï ústia. Jesusi  uandaspti eska primeru mandamientu sánderu kʼéri enga Moisesiri leirhu japka, jindespka uékani Tata Diosïni ka segundu, uékaani máteruechani. I últimu uékperakua jindesti agápe (Mat. 22:38, 39). Ístu, uandaspti eskaksï jurhimbiti kristianuecha mítinhantapiringa jimbokaksï xarhatatsperapiringa uékperakua (arhinta je Juanu 13:34, 35). Astaksï imecheri enemiguechani uékaapirindi (Mat. 5:43, 44).

12. ¿Néna xarhataspi Jesusi eska uékasïrenga kʼuiripuni?

¹² Jesusi kánikua uékperakua xarhatakuspti kʼuiripuni. Niraspti iretecharhisï para eianhpini ambakiti ambe Tata Diosïri Reinueri. Tsinaaspti sieguechani, kojuechani, leprosuechani ka kándichani, asta uarhirichani jamberi tsítantaaspti (Luk. 7:22). Ka niáraspti íntspini imeri tsípikua iámindu kʼuiripuechani jimbo, nájkirukaksï uánikuecha kurhunhenga. Sési xarhataspti na enga xáni uékpitiika imeri Táti. Iásï, interu parhakpini anapu Jeobaeri testiguechaksï májkueni úsïndi eska Jesusi ka xarhatatspesïndiksï uékperakua.

13. ¿Ambe uá úkuarhini engachi xarhatatspeska uékperakua?

¹³ Enga kʼuiripu exeaka eskachi uékpesïnga, jamberi uékaati mítini juchari Táti auandarhu anapuni. Por ejemplu, jini Tailandia, achati ma niraspti kʼéri tánguarhikuarhu ma rejioniri ka ísku pakaraspti enga exepka na engaksï xáni uékperenga erachicha. Enga níntapkia, kurhajkuarhispti eskaksï ma semana jimbo, tsimani xanhari jorhendapiringa Bibliaeri ambe. Predikarikuaspti iámindu imeri parientechani ka apenasi seisi kutsï nitamaspti kʼéri tánguarhikueri enga nitamatarapka Bibliaeri arhintskua Kʼumanchikua Reinuerirhu. Engachi uéjka mítini sinchi xarhatatspexaki uékperakua, ju je kurhamarhikuarhini: “¿Jánguarhintasïni jarhuataani máteruechani juchiti familiarhu, kúnguarhikuarhu ka eianhpikuarhu? ¿Jánguarhintasïni ísï exeani máteruechani eska Jeoba na exeajka?”.

14, 15. a) ¿Néna jámasïni uánikua kʼuiripu? b) ¿Ambe úskia uánikua kʼuiripu?

¹⁴ Últimu jurhiatikuechani, kʼuiripu xarhatapirindi máteru ambe engachi jimbo no jatsika para kúrhiani. Por ejemplu, uánikua engaksï no mítika Tata Diosïni, nóminduksï jeiapanhintapirindi ambakiti ambe. Máteru Bibliaechaksï arhisïndi: “Kurhunhiatiksï ambakiti ambe” o “enemigueuatiksï  ambakiti amberi”. Ístuksï no pʼíngukuarhipirindi ka no sésiksï kámpepirindi. Ka máruksï sóntku úpirindi ambe engaksï eratsipiringa, íksï uandakuecha griegu jimbo, imechani arhikuekaasïndi engaksï úpajka ambe engaksï pʼikuarherajka ka nóksï jamberi eratsintani ambe enga uáka úkuarhini imecheri jángua jimbo.

¹⁵ Iásï, kumplirikuarhixati sési jásï ma profesia enga Bibliarhu jaka, eska uánikua kʼuiripu enga ísï jámaenga eskaksï animalicha, mójtakukuarhipiringa (arhinta je Isaías 11:6, 7). I profesia arhisïndi eskaksï animali salbajecha komueska jiuatsï ka leoni, niárapiringa márku irekani animalichani jingoni komueska karichi ka beserru. Ka ístu arhisïndi eska iápurisï jauaka pínandikua jimboka “echeri meru uiniaka Jeobaeri mímixekua” (Is. 11:9). Animalichaksï no úsïndi Jeobaeri ambe jorhenguarhini, ísï jimbo, i profesia kʼuiripunisï arhikuekajti.

16. ¿Néna jarhuataaskia Biblia máru kʼuiripuechani paraksï mójtakurhini?

¹⁶ Uánikua kʼuiripu jarhasti enga antesi ísï no ambakepka eskaksï jiuatsïcha, peru enga iásï sési pájperajkia máteruecha jingoni. Uákachi arhiantani máru experiensiechani partirhu “La Biblia les cambió la vida” enga jw.org jaka. Imecha engaksï niárakia mítini Jeobani ka marhuakunksï, nóksï ísïsti komu imecha engaksï ísï jámajka enajkiksï janhanharhijki Tata Diosïni, peruksï mintsitarhu nómindu janhanharhini. Íksï, uandasïndi eskaksï kʼéri ambe arhisïnga Tata Diosïni, peru imecheri jángua máteru ambe xarhatasïndi. Máru Jeobaeri marhuaricha engaksï ióntki no sési kámpenga, mójtakurhistiksïa “ísï eska Diosï na kuerajpejka, ka kaxumbini ka pímbinhaxentani ísï eska Diosï na uéjka” (Efes. 4:23, 24, Táta Diósïri Uandakua Tata Jesukristueri Aiatsperakua). Enga kʼuiripu jorhenguarhijka Jeobaeri ambe, kurhangusïndi eska jatsiska para kurhajchaani imeri juramukuechani. I ambe jarhuatasïndi para mójtakuni ambe enga jakajkujka, ambe enga eratsijka ka ambe enga újka. No fásilisti ísï úni, peru espiritu santu jarhuataasïndi imechani engaksï mintsita jingoni uéjka úni ambe enga Jeoba uékajka.

17. ¿Ambechi uá úni parachi no májkueni jásï ma jángua jatsini eska máteruecha?

¹⁷ Sánhani arhixati xarharani né Tata Diosïri marhuariski ka né nómbe. Jucha engachi marhuakujka, jatsiskachi para kuidadu jingoni jámani parachi no niárani xásï ma jángua jatsini eska kʼuiripu. Uékasïngachi kurhajchani Tata Diosïni engajtsïni arhijka eskachi kéndikukuauaka imechani engaksï ísï jámajka eska 2 Timoteo 3:2-5 na arhijka. Ísïsti, nochi uáka meru no kúrhiani, jimbokachi a lo mejori jatsika para imecha jingoni ánchikuarhini, nirani eskuela o irekani. Ambe engachi kʼóru uáka úni, jindesti no ísï eratsini ni ísï jámani eskaksï imecha. ¿Nénachi uá ísï úni? Jatsiskachi para uinhaperantani juchari pájperakua Jeoba jingoni estudiariparini Bibliani ka imechani erakupariani komu amigu engaksï eratsitini jaka Jeobani marhuakuni.

18. ¿Néna jarhuataua máteruechani juchari jángua ka na engachi uandontskuarhijka paraksï mítini Tata Diosïri ambe?

¹⁸ Ístuchi jatsiska para jánguarhintani jarhuatani kʼuiripuni para mítini Jeobani. Ju je jánguarhintani predikarini ka ístu kurhakuni Jeobani eskajtsïni jarhuataaka mítini na jatini uandani ka ambe uandani. Ju je arhini kʼuiripuni eskachi Jeobaeri testigueska. Engachi ísï úska, juchari ambakiti jángua uáti eska kʼuiripu Tata Diosïni kʼéri ambe arhiaka ka no juchantsïni. Jorhendanhaskachia eskachi “méntku jurajkuaka pekaduni, ka indeni jásï ambe enga parhakpini anapuecha tsitijka, ka irekanchi iásï ini tiempu jimbo eska na jindeka para sési eratsini ka jurhimbitku jámani ka Diosïni janhanharhini” (Titu 2:11-14). Engachi májkueni úska eska Jeoba ka kurhajchanchi, kʼuiripuechaksï exeati ka jamberiksï uandaati: “Uékasïngachi chánksïni jingoni nirani, jimbokachi kurhaaska eska Tata Diosï chánksïni jingoni jarhaska” (Zac. 8:23).