1. a) ¿Náki problemechanchi jatsiasïni? b) ¿Andisï Jeoba sési pʼikuarherajki imeri ambakiti marhuaricha jimbo? (Exea je fotuechani engaksï uénakuarhu jaka).

ESKACHI na mítikia, i parhakpinirhuksï uánikua problemecha jarhasti. Juchari erachicha, uánikuajtsï kʼérati pʼamenchakuechani kánguarhiasïnga. Máteruechajtsï familiarini ma kuidarixaka enga jatirikia, nájkirukajtsï chájtu jatirikia. Márujtsï jánguarhixaka íntskuni chári familiani ambe enga uétarhinchajka. Ka mítiskachi eskajtsï uánikuecha, uánikua i járhati problemechani jatsiaska, no májku. I ambe kánikua kuatajkpesïndi ka kánikua tiempu ka tumina uétarhisïndi. Peru nájkiruka ísïika, chájtsï kánikua mintsinharhiasïnga Tata Diosïri eiatsperakuechani para sánderu orhepani. Jeoba kánikua sési pʼikuarherajti chári jakajkukua jimbo.

2. a) ¿Nénajtsïni uinhaperantasïni Isaías 40:29? b) ¿Ambe no sési japirini eskachi úpiringa?

² Peru ¿ménisïjtsï ísï pʼikuarherasïni enajkijtsï nóteru uáia xáni uáni problemecha jingoni? Nójtsï chájkusï ísï pʼikuarherajka. Biblia uandasïndi ióntki anapu marhuaricheri engaksï eratsipka eskaksï nóteru úpiringia orhepani uérani (1 Rey. 19:4; Job 7:7). Peruksï no kuatantaspti, sánderu sésiksï uinhapikua kurhakuspti Jeobani. Ka ima no jurajkuaspti, jimboka “íntskusïn[ga] uinhapikua imani enga kuataratini jaka” (Is. 40:29). Peru iásïksï jarhasti máru  Tata Diosïri marhuaricha engaksï niáraka eratsini eska paraksï orhepani uérakuani problemechani, uétarhisïnga jurajkuni ma ratu Jeobani. Imaksï ísï pʼikuarherasïndi enajki Jeobani marhuakuni karga máe ka no kóntperata ma. Jimboksïsï nóteru arhintajtia Bibliani, ni nirani tánguarhikuecharhu ka ni aianhpeni, imani ambemindu enga Satanasi uéjka.

3. a) ¿Ambechi uá úni parajtsïni Satanasi no chkerani? b) ¿Ambechi exea ini artikulurhu?

³ Noambakiti mítisti eskachi uinhapiti jarhasïnga engachi okupadu jarhajka Jeobaeri ambe jingoni. Ka ima indeni ambesï no uéjti. Ísï jimbo, engajtsï ísï pʼikuarheraaka enajkijtsï kuataratini jaki ka enajkijtsï nóteru ambe ma uéjkia mítini, asï jarhari je Jeobani. Sánderu sési, andarhiera je. Miá je eska Biblia arhisïnga eska Jeoba uáka eskachi “uinhapiaka” (1 Ped. 5:10; Sant. 4:8). Ini artikulurhu, exeakachi tsimani ambe enga uáka úni eskachi nóteru xáni marhuakuakia Tata Diosïni. Ístuchi exeaka na engajtsïni Bibliaeri prinsipiuecha jarhuataaka aguantarini. Peru antesi, ju je exeni Isaías 40:26-31 engajtsïni jorhendajka nénajtsïni íntskusïni uinhapikua Jeoba.

4. ¿Ambejtsïni jorhendasïni Isaías 40:26?

⁴ (Arhinta je Isaías 40:26). No nema úxati kuentuani iámu estreiechani engaksï unibersurhu jaka. Sientifikuechaksï eratsisïndi eska echerirhu uirhipandani, úpiringaksï asta 400 mili miioni estreiecha jarhani. Peru Jeoba jatsikuasti nombri iáminduechani. ¿Ambechi jorhenguarhisïni íri ambe? Enga Jeoba uandanhiajka imeri kueraakata jimbo enga no tsípiti jaka, ¿ambe pʼikuarherajki chánksïni jimbo engajtsï uékperakua jimbo marhuakujka ka no jimbokaksïni obligarisïnga? (Sal. 19:1, 3, 14). Juchari Tátiksïni sési mítisti, jimbosï Jesusi uandapti: “Chári jauiri jamberi iámindu kuentukata jarhasti” (Mat. 10:30). Ka salmuecheri karari ma uandaspti: “Jeoba mítisti ambe engaksï nitamakuarhejka jurhimbitiicha” (Sal. 37:18). I ambe arhikuekasïndi eska ima mítiska náki tsʼéjkukuechantsï jatsiaski ka uátiksïni íntskuni uinhapikua parajtsï orhepani uérakuani.

5. ¿Andichisï uá seguru jarhani eskajtsïni Jeoba uáka íntskuni na engachi xáni uinhapikua uétarhinchajka?

⁵ (Arhinta je Isaías 40:28). Jeoba jindesti ima enga uinhapikua íntspijka. Por ejemplu, eranhaska je na enga xáni uinhapikua íntskujka Jurhiatani. Davis Bodanis enga siensiaeri ambe karajka, uandaspti eska mándani segundu, Jurhiata xáni kombustible úsïnga eska uánikua miioni bomba atomikecha. Máteru sientifiku uandaspti eska iásï, Jurhiata xáni kombustible úsïnga komu para “úni dosientusi mili uéxurhini jarhani lusi para iáminduecha”. Enga Jeoba íntskujka uinhapikua Jurhiatani, ¿no ísïski eskajtsïni uáka juchantsïntu íntskuni na engachi xáni uinhapikua uétarhinchajka para orhepani uérakuni náki uéjki ma problemani?

6. a) ¿Andisï Jesusi uandapi eska imeri uananchatarakua no kʼuetsapiska? b) ¿Nénajtsïni jarhuatasïni mítini ini ambe?

⁶ (Arhinta je Isaías 40:29). Kʼéri tsípikuarhita máesti Jeobani marhuakuni. Jesusi arhiaspti imeri chúxapatichani: “Úra je juchiti uananchatarakuani”. Peru ístu arhiaspti: “Ísïksï mintsikustanhaati chári almecha, jimboka juchiti uananchatarakua no kʼirhindikpisïnga, ka no kʼuetsapini engani ji pájka” (Mat. 11:28-30). ¡I ambe meru ísïsti! Ménisïchi kánikua kuataratini jarhasïnga engachi nirajka tánguarhikuecharhu o eianhpini. Peru ¿no ísïski eskachi sánderu uinhapiti kʼuanhatsintasïnga ka sési preparadu para orhepani uérakuani problemechani? Ísïsti, Jesusiri uananchatarakua no kʼuetsapisti.

7. Uandanta je experiensia ma enga xarhatajka eska meru ísïska ambe enga Mateu 11:28-30 arhijka.

⁷ Ju je exeni pirenchiri ma experiensia enga depresioni pʼamenchajka, migrania ka ístu pʼamenchakua  ma enga újka eska kánikua kuataraaka. Ísï jimbo, ménisï kánikua úkua jukanchasïndi tánguarhikuecharhu nirani. Peru ma jurhiani enga jánguarhintapka nirani Tánguarhikuarhu para Iáminduecha, karaspti: “Diskursu desanimueri ambe uandasïrendi. Erachi ísï nitamataraspti informasioni enajki mítipi na engani pʼikuarherani japka, astarini uétaraspti. Kuenta íntskukuarhispka eskani tánguarhikuecharhusïni jatsika para jarhani”. I pirenchi kánikua tsípispti enga jánguarhintapka nirani tánguarhikuarhu.

8, 9. ¿Ambe arhikuekaxapi Pablu enga uandapka “engani ji débili pʼikuarherajka, jimajkanimindusïni sánderu uinhapitiijka”?

⁸ (Arhinta je Isaías 40:30). Úpiringachi uánikua ambe jorhenani úni, peru ístu jarhasti uánikua ambe engachi no újka úni juchari uinhapikua jimbojku. Ka iáminduechachi jatsiska para mítitini jarhani ini ambe. Ju je exeni apostuli Pablueri ambe. Ima uánikua ambe úsïrendi úni, peru no úsïrendi iámindu ambe úni. Enga eiangupka Tata Diosïni na enga pʼikuarheraenga, ima arhispti: “Juchiti uinhapikua sési jimbo uinhapitiis[ti] para ima enga sánderu débiliika”. Pablu kurhanguspti ini ambe ka uandaspti: “Engani ji débili pʼikuarherajka, jimajkanimindusïni sánderu uinhapitiijka” (2 Kor. 12:7-10). ¿Ambe arhikuekaxapi?

⁹ Pablu kuenta íntskukuarhispti eska jarhaspka uánikua ambe enga no úpiringa úni imeri uinhapikua jimbojku, eska uétarhinchasïrenga Tata Diosïri espiritu santu para jarhuatani enga débili japiringa ka para imani ambe úni enga no úpiringa jandiajku úni. Ka májkuenisti juchantsïni jingoni, Tata Diosïri uinhapikuajtsïni jarhuataati uinhapiti jarhani.

10. ¿Néna jarhuataspi Jeoba Dabidini para orhepani uérakuani problemechani?

¹⁰ Dabidi uánikua uelta pʼikuarheraspti Tata Diosïri espiritu santueri uinhapikuani. Karaspti: “Chíti jarhuajperata jingoni úsïnga andaani enemiguechani ka juchiti Tata Diosïni jimbo úsïnga parhikuni barda ma” (Sal. 18:29). Máru problemechaksï ísïsti komu kʼérati bardecha engachi no újka jandiajku uanajchakuani. Uétarhinchasïngachi Jeobaeri jarhuajperata.

11. ¿Nénajtsïni jarhuatasïni espiritu santu parachi orhepani uérakuani problemechani?

¹¹ (Arhinta je Isaías 40:31). Enga águila ma iótakuarhu kárajka, no imeri uinhapikua jimbojkuesïndi, sino tarhiata jorhepiti jimbo enga sïuiniini úkuarhijka ka enga jarhuatajka karhanchini no xáni uinhapikua úraparini. Ísï jimbo, engajtsï kʼéri ma uandanhiata jatsiaka, miánta je águilani. Kurhaku je Jeobani eskaksïni íntskuaka uinhapikua engajtsï uétarhinchajka, “jarhuajpiri[ni] enga jindeeka espiritu santu” (Juanu 14:26). Ka miá je eskajtsï uáka kurhakuni méntkisï engajtsï uétarhinchaaka, na uéjki jatini. Ju je eranhaskani ambe ma engachi jimbo jatsipiringa para kánikua jarhuajperata kurhakuni Jeobani: engachi arhirperata ma jatsijka erachi ma jingoni. ¿Andisï uá i ambe úkuarhini?

12. ¿Andisï arhirperata ambe jarhajki erachicha jingoni?

¹² Iáminduechachi kʼamanharhintstiska, jimbosï jarhajti arhirperata ambe erachicha jingoni. Ménisïksï erachicha uáti úni o uandani ambe ma engajtsïni ikiataaka, ochi jucha ikiataani imechani. I ambe uáti kʼéri tsʼéjkukua máeni. Peru Jeoba jurajkusïndi eska i ambe úkuarhiaka parachi xarhatakuni eskachi no jurajkuaka ka parachi jorhenguarhini imani erachicha jingoni ánchikuarhini enga Jeoba xénchaajka, nájkirukaksï no perfektueka.

13. ¿Ambejtsïni jorhendasïni Joseri irekua Jeobaeri ambe?

¹³ Joseri irekuajtsïni jorhendasïndi eska Jeoba jurajkusïnga paraksï imeri marhuaricha tsʼéjkunhani. Enga Jose tumbiipka, Ejiptu pánhaspti jimbokaksï imeri mediu ermanuecha atarantaspka komueska jántspiri ma enbidia jimbo (Gén. 37:28). Tata Diosï no sési pʼikuarheraspti enga exepka na engaksï no sési  kámenga imeri amigu Joseni, enga ambakiti kʼuiripu máepka. Peru no inchaakuspti. Ka ni jiáni inchaakupi enga uandanhenga eska Jose uékaspka Potifariri témbani biolarini ka ni engaksï ónhapka. Peru ¿jurajkuspi Tata Diosï Joseni? Nómbe. Biblia arhisïndi: “Jeoba úspti eska iámu ambe sési uérakupiringa” (Gén. 39:21-23).

14. ¿Ambe ka ambe jimbojtsïni jarhuatasïni no ikiani?

¹⁴ Ju je exeni máteru ejemplu. Nóksï iáminduecha májkueni sufriristi eska Dabidi, máteru Tata Diosïri amigu. Peru Dabidi no jurajkuspti eska ikiatapu andapiringa. Karaspti: “Jurajku ikiatapuni ka ístu kurhuri jáxekuani, asï ikia nomasi para no sési útspini” (Sal. 37:8). Rasoni enga sánderu jukaparhakueka para no ikiani, jindesti eska Jeoba no xásïska, “nójtsïni ísï kámasïndi eskachi na uétarhinchajka juchari pekaduecha jimbo” (Sal. 103:10). Ka ístu no ikiani, kánikua sési úkusïndi juchari kuerpuni. Ikiatapu úsïndi juaani pʼamenchakuechani komu presioni alta ka problemechani para jirejtani. Úsïndi daniu úkuni igaduni, pánkreasini ka sïturhini. Engachi ikiajka, nochi méntkisï sési eratsisïnga. Úpiringachi uandani o úni ambe ma engajtsïni ióni no sési pʼikuastapiringa. Jimbosï sánderu sésiiti trankilu jarhani. Biblia arhisïndi: “Mintsita trankilu ma sési úkusïndi kuerpuni” (Prov. 14:30). Jimajkani, ¿ambejtsïni jarhuataa sési péntani ambe ma erachi ma jingoni engajtsïni no sési pʼikuastaka? Úraani ambakiti konsejuechani Bibliaeri.

15, 16. ¿Ambechi uá úni engajtsïni nema no sési pʼikuastaaka?

¹⁵ (Arhinta je Efesu 4:26). Nójtsïni ísku pakatasïndi engajtsïni kʼuiripu no sési kámajka. Peru enga erachi máejka o familiari ma enga újka o uandani ambe ma engajtsïni no sési pʼikuastajka, uákachi kánikua no sési pʼikuarherani. Ju je eranhaskani eskachi no úsïnga mirikurhini ambe enga úkuarhika. ¿Ióni jamberichi ikiakua? ¿Ochi seguiriua arreglarini ambe ma ísï eska Biblia na arhijka? Engachi no sóntku arreglariska ambe ma, tátsekuachi sánderu úkua jukanchaka ísï úni.

¹⁶ Eranhaska je eskaksïni erachi ma no sési pʼikuastaska ka eska cha no úsïnga mirikurhini. ¿Ambeksïni jarhuataa arreglarini ambe ma? Orheta, mintsita jingoni kómarhi je Jeobani ka kurhaku je eskaksïni jarhuataaka sési uandontskuarhini erachi jingoni. Miá je eska erachijtu Jeobaeri amigueska ka eska Jeoba xénchasïnga (Sal. 25:14). Jeoba uékperakua jingoni kaasïndi imeri amiguechani ka erokuarhisïndi eskachi juchajtu májkueni uáka (Prov. 15:23; Mat. 7:12; Kol. 4:6). Tátsekua, sési eratsi je ambejtsï arhia erachini. Asï eratsi je eskaksïni meru uékaska no sési úcheni, jamberi no uékendi ísï úni o cha  támisï kurhanguni. Jiókuarhi je eskajtsï a lo mejori chájtu úka ambe ma. Úpiringajtsï arini ambe uénani arhini: “Jamberini sóntku no sési pʼikuarherajka, peru uitsindekua engarini uandontskuarhicheka, ji arisï ka arisï pʼikuarheraska”. Enga ini ambe jingoni no úska arreglarikuarhini ambe ma, exe je na jatintsï úpirini ménderu uandontskuarhikuni. Seguiri je kurhakuni Jeobani eska újchakuraaka erachini. Ka kómarhi je eskaksïni chánksïni jarhuataaka ambakiti kualidadichani exekuani imani erachini. Ambe uéjki úkuarhini, uákajtsï mintsikani eska Jeoba jeiapanhintaaka enga cha jánguarhintani jaka sési pájperani erachi jingoni enga Jeobaeri amigueka.

17. a) ¿Ambe jarhuajperatajtsïni íntskusïni Jeoba parachi sési pájperantani imani jingoni nájkirukachi kʼéri ma pekadu úka? b) ¿Andichisï jatsi para aprobecharini ini jarhuajperatani?

¹⁷ Máru kristianuechaksï ísï pʼikuarherasïndi enajkiksï no sésikua jatsi para Jeobani marhuakuni, jimbokaksï kʼéri ma pekadu niátaska. Kulpa uáti úni eskaksï chkeni pʼikuarheraaka ka eskaksï nóteru jatsiakia pínandikua niteruksï tsípini. Rei Dabidi arini uandakuecha jingoni xarhataspti na enga xáni úkua jukaka no kulpabli pʼikuarherani: “Engani no ma ambe uandantapka, juchiti únichaksï sánhani arhixapti kʼamakurhini engani chúskutenga no sési pʼikuarherani. Jimboka chíti jájki, chúrikua ka jurhiatikua kánikua kʼuetsapispka para ji”. Peru Dabidi balori úkuarhintaspti para úni ambe enga Jeoba uéjka eskaksï uáka imeri marhuaricha. Karaspti: “Últimu, eianguskakini juchiti pekaduni [...]. Ka tʼurini puácheantaska juchiti pekaduechani” (Sal. 32:3-5). Enga cha kʼéri ma pekadu úka, Jeobaksïni uékasïndi jarhuatani parajtsï ménderu sési pájperantani imani jingoni. Peru chájtsï jatsiska para jiókuarhini imani jarhuajperatani enga orhejtsïkuticha jimbo íntspijka (Prov. 24:16; Sant. 5:13-15). Asï iónda je, solujtsï ísï uáka jatsini tsípikua para méntkisï. Peru ¿ambejtsï uá úni engajtsï ióni tátsekua útasï kulpabli pʼikuarherajka nájkirukaksïni Tata Diosï puáchentakia?

18. ¿Néna jarhuataasïni Pablueri ejemplu imechani engaksï ísï pʼikuarherajka enajkiksï no sésikua jatsi para Jeobani marhuakuni?

¹⁸ Ménisï Pablu no sési pʼikuarherasïrendi imani ambe jimbo enga antesi úpka. Uandaspti: “Ji sánderu sapichitu ambeska ka eska iámindu apostulicha engani no jukanchaka arhinhani ma apostuli, jimbokani no sési kaasïrenga Diosïri tánguarhikuarhu anapuechani”. Peru ístu uandaspti: “Diosïri kóntperatani jimbo andajkuarhiskani ísï jindeni eskani na jindekia” (1 Kor. 15:9, 10). Jeoba jiókuarhispti Pabluni nájkiruka ióntki no sési ambe úpka, ka uékasïrendi eska Pablu seguru japiringa inde amberi. Enga cha meru moantakia chári ióntki anapu pekaduecha jimbo ka eianguntsïa Jeobani —ka enga uétarhiaka ístu orhejtsïkutichani—, uákajtsï seguru jarhani eskaksïni Tata Diosï xarhatachiaka pʼamojperakua. Ísï jimbo, mintsika je ka jiókuarhi je eskaksïni Jeoba puáchentaskia (Is. 55:6, 7).

19. ¿Nákiski 2018 anapu textu ka andisï sési jaki eska i jindeuaka?

¹⁹ I parhakpiniri kʼamakurhikua sánhani arhixati axuterku jarhania, ísï jimbo, uákachi erokuarhini eskaksï problemecha sánhani arhiaka uánini. Peru uákajtsï seguru jarhani eskaksïni Jeoba uáka íntskuni ambe engajtsï uétarhinchaaka para orhepani uérani, ima “íntskusïndi uinhapikua imani enga kuataratini jaka ka uinhaperantasïndi imani enga débili jaka” (Is. 40:29; Sal. 55:22; 68:19). Uéxurhini 2018 jimbo, miántaakachi ini ambe méntkisï engachi niuaka tánguarhini Kʼumanchikua Reinuerirhu ka exenchi ini textuni: “Ima engaksï mintsikajka Jeobani, uinhaperanhantaatiksï” (Is. 40:31).