1. ¿Andichisï uandajki eska iásï, úkuarhixaka ambe ma enga no méni úkuarhini japka?

INI tiempu jimbo, úkuarhixati ambe ma enga no méni úkuarhini japka. Ísï eska Biblia na uandarini japkia, Jeoba tánantaaxati kʼuiripuechani engaksï “iámindu nasionicharhu ka iámindu tribuecharhu ka iretecharhu anapue[ka] ka engaksï táchani jásï idioma uandajka”. Íksï kʼuiripuecha felisisti ka “ireta uinhapiti” máesti enga jukari ochu miionirikia ka “marhuakunksï jarha[sïndi] chúrikua ka jurhiakua” Tata Diosïni (Jaŋ. 7:9, 15; Is. 60:22). No méni niáraspti xáni uáni kʼuiripu jarhani enga uéjka Tata Diosïni ka ístu máteruechani.

2. ¿Na jásï uékperakua xarhatasïni ima enga no Jeobaeri amigueka? (Exe je dibujuni enga uénakuarhu jaka).

² Peru Biblia ístu uandarixaptia eska ini jurhiatikuechani, ima enga no Jeobaeri amigueka, máteru jásï uékperakua xarhatapiringa, enga jindeka jukari uékakuarhini. Apostuli Pablu karaspti eska “últimu jurhiatikuechani”, uánikuaksï jukari “pendienti pákuarhi[piringa]” o imechajku uékakuarhini, “jukari jatsikuarhikuekanksï” ka eskaksï ‘sánderu uékapiringa tsípikuarhini’ ka eska “Tata Diosïni uékani” (2 Tim. 3:1-4). I jásï uékperakua, méntku ménderuenisti eska uékperakua engachi Tata Diosïni jimbo pʼikuarherajka ka no jarhuatasïndi kʼuiripuni para  felisiini ísï eska na uékapiringa. Sánderu sési, úsïndi eska kʼuiripu jukari uékakuarhiaka ka eska no uáka sési irekani.

3. ¿Ambechi exea ini artikulurhu ka andi?

³ Pablu mítispti eska uánikua kʼuiripu jukari uékakuarhipiringa ka eska i jásï uékperakua peligru máepiringa para kristianuecha. Jimbosï karapti eskachi jatsiska para kéndikukuani imechani engaksï i jásï uékperakua xarhatajka (2 Tim. 3:5). Ísïsti, nochi uáka meru no kúrhiani i jásï kʼuiripuechani. Peru ¿ambechi uá úni parachi no xásïini eska parhakpini anapu kʼuiripu ka jánguarhintanchi jaiapanherantani Jeobani, Tata Diosïni enga uékpitiika? Ju je exeni na jásï uékperakua uékasïni Tata Diosï eskachi xarhataaka ka na jásï uékperakueski enga 2 Timoteo 3:2-4 uandajka. I ambejtsïni jarhuataati exekuarhini ka mítini nénachi uá xarhatani uékperakuani enga uáka eskachi sési pʼikuarheraaka ka felisiini.

4. ¿Nénachi mítiski eska no no sési jarhaska uékakuarhini?

⁴ Eskachi na exekia, Pablu karaspti eska kʼuiripu jukari “pendienti pákuarhi[piringa]” o eskaksï imechajku uékakuarhipiringa. Jimajkani, ¿arhikuekasïni i ambe eska no sési jarhaska uékakuarhini? Nómbe. Normalisti ka uétarhisïndi eskachi uékakuarhiaka. Jeobajtsïni ísï kueraasti. Jesusi uandaspti: “Uékauakari máteruechani eska tʼujkumindu na uékakuarhijka” (Mar. 12:31). Ísïsti, nochi uáka uékaani máteruechani engachi juchajkumindu no uékakuarhijka. Biblia ístu arhisïndi eskaksï “achaticha uéauaka imecheri uarhiitichani eska imechajkumindu na uékakuarhijka. Ima enga uékajka imeri uarhiitini, jandiajkumindusï uékakuarhijti. Ka no nema jarhasti enga no exenchajka imeri mísmu kuerpuni, sino mejori sési tʼirerasïndi ka kuidarini” (Efes. 5:28, 29). Ísï jimbo, no no sési jarhasti eskachi uékakuarhiaka, peru no jukari.

5. ¿Nénaksï járhatiski imecha engaksï jukari uékakuarhijka?

⁵ Jandiajku uékakuarhini eska 2 Timoteo 3:2 na arhijka, no normalisti níjtu sési útspijki. I jásï uékperakua úsïndi eskachi no uandanhiauaka máteruecha jimbo. Ima engaksï jukari uékakuarhijka, jukari ambeksï eratsisïndi imecheri ambe (arhinta je Roma 12:3). Sánderuksï pendienti pákuarhisïndi imecha jimbo ka eska máteruecha jimbo. Ka enga ambe ma no sési uérajka, máteruechanksï kulpariuasïndi enbesi deksï jiókuarhini ambe engaksï no sési úka. I jásï kʼuiripu no meru felisisïndi.

6. ¿Ambe úkuarhisïni enga kʼuiripu xénchajka Tata Diosïni?

⁶ Máru engaksï Bibliaeri ambe exejka, eratsisïndiksï eska enga Pablu uandani japka na enga jásïpiringa kʼuiripu últimu jurhiatikuechani, orheta uandaspka eskaksï jandiajku uékakuarhipiringa jimboka i jásï uékperakua, úsïnga eskaksï imani no sési járhati kualidadichani xarhatauaka engaksï jima seguirijka arhini. Peru ima engaksï xénchajka Tata Diosïni, máteru járhati kualidadichanksï xarhataasïndi. Biblia arhisïndi eska xénchani Tata Diosïni jindeska tsípini, pínandikua jatsini, ióni tekaantani, sési kámpini, ambakitiini, Tata Diosïni mintsikani, kaxumbini, ka pʼíngukuarhini (Gal. 5:22, 23). Salmista karaspti: “¡Felisisti ireta enga imeri Tata Diosï jindeka Jeoba!” (Sal. 144:15). Jeoba, Tata Diosï felisi máesti ka imeri marhuarichajtuksï felisisti. Ka imecha engaksï jandiajku uékakuarhijka ka engaksï puru uéjka eskaksï intsïnhaaka, nóksï májkuenisti eska Jeobaeri marhuaricha engaksï felisika jimbokaksï íntspisïnga imecheri ambe para máteruechani jarhuataani (Uku. 20:35).

7. Engachi uéjka mítini na xánchi uékasïni Tata Diosïni, ¿ambechi uá kurhamarhikuarhini?

⁷ ¿Nénachi uá mítini sinchi sánderu uékakuarhixakia jucha eska Tata Diosïni? Ju je eratsintani arini konsejuni: “Asï jáma je úni ni ma ambe enbidia jimbo o teparakuarhikua jimbo, sino kaxumbikua jingoni, ka sánderu kʼéri ambe exeani  máteruechani ka eska chájkumindu, ka no solu pendienti páni para chájkumindu sési uérani, sino ístu pendienti páni para máteruecha” (Filip. 2:3, 4). Uákachi kurhamarhikuarhini: “¿Úraxaki ji ini konsejuni? ¿Jánguarhintasïni úni ambe enga Tata Diosï uéjka? ¿Jirinhakuntasïni néna jarhuataani máteruechani kúnguarhikuarhu ka eianhpikuarhu?”. No méntkisï fásilisïndi úrani juchari tiempu ka uinhapikua para máteruechani jarhuataani. Jamberichi jatsiaka para kánikua jánguarhintani ka jurajkuni máru ambe engachi tsitijka. Perujtsïni no ma ambe xáni sési pʼikuastaati komueska mítini eskajtsïni Tata Diosï enga Sánderu Kʼéri ambeka, jaiapanhentasïnga.

8. ¿Ambeksï úski máru kristianuecha engaksï uéjka Tata Diosïni?

⁸ Uékperakua Tata Diosïni jimbo ka uékani sánderu marhuakuni, ústi eskaksï máru kristianuecha jurajkupiringa karrera ma engaksï jimbo úpiringa kánikua tumina andani. Pirenchi ma enga Ericka arhinhajka, doktoresti, peru ima no uékaspti eska kʼéri ambe exenhapiringa. Sánderu sési, prekursora regulari úkuarhispti ka uánikua paisicharhu marhuaspti uámba jingoni. Ericka uandasïndi: “Uánikua ambechi nitamakuarhiska engachi máteru idioma apoiariika ka uánikua amiguechanchi jatsiaskia. Iámindu i ambe, úsïndi eskachi tsípini pʼikuarheraaka. Útasï doktoreska, peru ambe engarini felisi újka ka sési pʼikuastani, jindesti úrani sáno iámu juchiti tiempu ka uinhapikua para jorhentpini Jeobaeri ambe ka jarhuajpini kúnguarhikuarhu”.

9. ¿Andiksïsï no újki felisiini imecha engaksï tuminani tsitijka?

⁹ Pablu ístu uandaspti imecheri engaksï ‘jukari jatsikuarhikuekapiringa’. Sáni iónistia enga Irlanda anapu prekursori ma uandontskuarhikupka achatini ma Tata Diosïri ambe. I achati, pʼitaspti tumina imeri karterarhu ka sési xékuarhiparhini uandaspti: “¡Í jindesti juchiti tata diosï!”. Uánikua kʼuiripu májkueni eratsisïndi eska i achati, nájkiruka no jiókuarhijka. Jukariksï tsitisïndi tumina ka ambe enga újka piáni. Peru Biblia uandasïndi: “Ima enga tsitijka tuminani no méni niáraati konformi jarhani tumina jingoni, ni ima enga tsitijka jatsikuarhikuani imani tumina jingoni enga andajka” (Ecl. 5:10). Ima enga tsitijka tuminani, méntkisï uékaati sánderu jatsini ka jánguarhintaati konseguirini. Peru i puru “uandanhiata” ambe juákuauati (1 Tim. 6:9, 10).

10. ¿Ambe karaspi Aguri jatsikuarhikueri ambe ka pobreseri?

¹⁰ Ísïsti, iáminduchi uétarhinchasïnga tumina, jimbokajtsïni úsïnga kuájchakuni máru ambe jimbo (Ecl. 7:12). Peru ¿uá nema felisiini nájkiruka no kánikua ambe jatsikuarheaka? Jo, uáti felisiini (arhinta je Eclesiastés 5:12). Aguri, Jaqué uájpa, kurhakuspti Tata Diosïni: “Asï ú eskani pobriuaka ni eskani jatsikuarhiriuaka. Jurajku eskani imani tʼirekuajkuni auaka engani uétarhinchajka”. No úkua jukasti kurhanguni andisï no uékeni jukari pobriini. Ima mísmu uandaspti eska no uékasïrenga niárani sïpani jimboka no respetarini japiringa Tata Diosïni. Peru ¿andisï kurhakupi eska no íntskupiringa jatsikuarhikua ambe? Aguri karaspti: “Parani no niárani uinini ka negaringuini ka uandani: ‘¿Néski Jeoba?’” (Prov. 30:8, 9). Jamberichi mítika kʼuiripuni enga imeri jatsikuarhikuani mintsikajka enbesi de Tata Diosïni.

11. ¿Ambe uandaspi Jesusi tumineri ambe?

¹¹ Ima enga tsitijka tuminani, no úsïndi jaiapanherantani Tata Diosïni. Jesusi uandaspti: “No nema úsïndi marhuakuani tsimani patronichani, jimboka máechakuani ikiakuaka ka máteruni uékani, ka máechakuani andarhieraati, ka máteruni ísku exeni, ísï jimbo nójtsï uáka marhuakuni Diosïni ka jatsikuarhikuani”. Ka ístu uandaspti: “Asï jáma je patsakuarhini chári jatsikuarhikuani parhakpinirhu jima enga seperi arhajka, ka jima enga tiámu kʼuerejka, ka jima enga kuárhukpiticha inchatspijka ka petatspinksï ambe, sino patsa  je chári jatsikuarhikuani auandarhu, jima enga seperi no arhajka ka níjtu tiámu kʼuereni, ka jima engaksï kuárhukpiticha no inchatspijka ka ni sïpatspinksï ambe” (Mat. 6:19, 20, 24).

12. ¿Andisï sánderu fásiliua Tata Diosïni marhuakuni engachi arisku sáni irekaska? Jatsiku je ejemplu ma.

¹² Uánikuaksï kuenta íntskukuarhistia eska arisku sáni irekani, no solu úsïnga eskaksï sánderu felisiuaka, sino ístu eskaksï jatsiaka sánderu tiempu para Jeobani marhuakuni. Estados Unidos, erachi ma enga Jack arhinhajka, kʼéri ma kʼumanchikua jatsispti ka negosiu ma, peru atarantaaspti para prekursori úkuarhini témba jingoni. Ima uandasïndi: “Úkua jukanchaspkachi jurajkuni imani sési jásï kʼumanchikuani ka terrenuni engachi jatsipka. Peru ísïsti eskani méntkisï kuataratini niántasïrenga ánchikuarhitarhu anapu problemecha jimbo. Peru juchiti uarhiiti enga prekursoreka, méntkisï tsípini jarhasïrendi ka uandasïrendi: ‘No jarhasti sánderu ambakiti patroni eska juchiti’. Iásï engani jíjtuni prekursorikia, tsimarhanchi Jeobani ánchikuarhikusïnguia”.

13. ¿Ambejtsïni jarhuataa mítini nénachi exesïni tuminani?

¹³ ¿Ambejtsïni jarhuataa mítini nénachi exesïni tuminani? Jatsiskachi para arini ambe kurhamarhikuarhini: “¿Xarhatasïni juchiti irekua eskani meru jakajkusïnga ambe enga Biblia arhijka tumineri ambe? ¿Sánderu jukaparhakueski para ji tumina andani? ¿Sánderuni uandanhiasïni jatsikuarhikua ambe jimbo ka eska juchiti pájperakua Jeoba jingoni ka máteruecha jingoni? ¿Meru mintsikasïni eskarini Jeoba íntskuaka ambe engani uétarhinchajka?”. Uákachi seguru jarhani eska Jeoba no méni jurajkuauaka imechani engaksï mintsikajka (Mat. 6:33).

14. ¿Nénachi jatsiski para exeni tsípikuarhita ambe?

¹⁴ Eska na uandakata japkia, iásï uánikua kʼuiripu ‘sánderu uékasïndi tsípikuarhini’. Ísï eskachi na exekia, no no sési jarhasti uékakuarhini o uékani tumina jatsini, peru no jukari. Ka ístu, no no sési jarhasti tsípikuarhini peru no jatsisti para í ambe sánderu jukaparhakueni. Máruksï eratsisïndi eska uétarhisïnga jurajkuni iámindu imani ambe engachi jimbo uáka tsípikuarhini. Peru Jeoba no indeni ambesï uéjti. Biblia arhisïndi Tata Diosïri marhuarini: “Ní, ka a chíti tʼirekuani sési pʼikuarheraparini ka a chíti binuni tsípikua jingoni” (Ecl. 9:7).

15. ¿Ambe arhikuekasïni ‘sánderu uékani tsípikuarhini’?

 ¹⁵ Enga 2 Timoteo 3:4 imecheri uandajka engaksï uéjka tsípikuarhini, imechanisï arhikuekaajti engaksï jurajkujka Tata Diosïni. Exe je eska i textu uandasïnga eska kʼuiripu sánderu uékapiringa tsípikuarhini ka eska Tata Diosïni, peru i ambe no arhikuekasïndi eskaksï uékapiringa sánisï. Kʼuiripu ma enga Bibliaeri ambe exejka, arini ambe karaspti: “[I textu] no arhikuekasïndi eskaksï i kʼuiripuecha ístu uékasïnga sánisï Tata Diosïni. Arhikuekasïndi eskaksï no sáni uékasïnga”. I, adbertensia máesti para ima enga jukari uéjka tsípikuarhini. Ari uandakuecha ‘sánderu uékani tsípikuarhini’, sésiksï xarhatasïndi na engaksï járhatiika ima engaksï “sánderu pendienti” pájka para “tsípikuarhini” (Luk. 8:14).

16, 17. ¿Néna exesïreni Jesusi tsípikuarhita ambe?

¹⁶ Jesusi sési xarhataspti nénaminduchisï jatsi para exeni tsípikuarhita ambe. Ima niraspti “tembuchakua” ma jimbo ka ístu “kʼéri ma tʼirekua” jimbo (Juanu 2:1-10; Luk. 5:29). Enga tembuchakuarhu binu kʼamakurhipka, úspti eska itsï binu úkuarhintapiringa milagru ma jimbo. Ka ma xanhari enga kʼuiripu arhinhchapka jimboka tʼirespka ka binu arhani, ima arhiaspti eska no sési jarhaspka ísï eratsini (Luk. 7:33-36).

¹⁷ Nájkiruka ísï úpka, Jesusi no puru tsípikuarhini jámaspti. Orhetku péraspti Jeobaeri ambe ka jánguarhintaspti jarhuataani máteruechani. Ka dispuestu jarhaspti chkarirhu ma uarhini paraksï uánikuecha pʼímutanhantani. Arhiaspti iámindu imeri chúxapatichani: “Tsípisïngajtsï cha engaksïni kʼuiripuecha xukajchajka ka nóksïni sési kámani, ka jíndeni jimbo uandatsinksïni mámaru jásï chkuanderakua ambe. Tsípi je ka kánikua sési korhokani, jimbokajtsï kʼéri ma premio intsïnhaaka auandarhu, jimbokaksï májku jásï no sési kásïrenga ióntki anapu uandajtsïkpitichani” (Mat. 5:11, 12).

18. ¿Náki kurhamarhikuechajtsïni jarhuataa exeni na xánchi jukaparharasïni tsípikuarhita ambe?

¹⁸ ¿Ambejtsïni jarhuataa exeni na xánchi jukaparharasïni tsípikuarhita ambe? Ju je kurhamarhikuarhini: “¿Sánderuni jukaparharasïni tsípikuarhita ambe eska tánguarhikuechani ka aianhpikuani? ¿Dispuestu jarhaski jurajkuni máru ambe engani tsitijka parani úni marhuakuni Tata Diosïni? Engani erakuni jámajka néna tsípikuarhini, ¿kurhamarhikuarhisïni sini Jeoba jeiapanhinta?”. Engachi meru xénchajka Tata Diosïni, nochi uáka imani ambe engachi mítika eska no jeiapanhintasïnga ka ni imani ambe engachi eratsijka eska no jeiapanhintasïnga (arhinta je Mateu 22:37, 38).

19. ¿Na jásï kʼuiripu no méni uá meru felisiini?

¹⁹ Satanasiri parhakpini sáno seisi mili uéxurhini kómu nitamatarastia kʼuiripuni. Iásï engachi últimu jurhiatikuechani irekani jaka, uánikua kʼuiripu jarhasti enga jukari uékakuarhijka, enga jukari tsitijka tumina ka tsípikuarhita ambe. Puruksï imani ambe eratsini jarhasïndi engaksï tsitijka ka nénaksï uá konseguirini. I jásï kʼuiripu no méni uáti meru felisiini. Peru Biblia uandasïndi: “Tsípisïndi ima enga Jakobueri Tata Diosïni jatsika komu imeri jarhuajpiri, enga mintsikajka imeri Tata Diosï Jeobani” (Sal. 146:5).

20. ¿Nénaksïni jarhuataskia parajtsï felisiini chári uékperakua Tata Diosïni jimbo?

²⁰ Jeobaeri marhuarichachi pauani pauani sánderu xénchasïnga Jeobani. Ka mándani uéxurhini, ístu uánikua kʼuiripu niárasïndi mítini ka xénchani. I ambe xarhatasïndi eska Tata Diosïri Reinu juramuxaka ka eska no ióni jimbo, juauaka kóntperatechani engachi no újka ni eranhaskaani. Úni ambe enga Jeoba uéjka ka mítini eskachi jaiapanherantaxaka, uáti eskachi meru felisiuaka iásï ka para méntkisï. Máteru artikulurhu, exeakachi eska enga kʼuiripu jukari uékakuarhijka, niárasïnga no sési jásï ma jángua jatsini ka eska i, no terokuntasïnga kualidadicha jingoni engaksï Jeobaeri marhuaricha jatsiaka.