1-3. a) ¿Ambejtsïni jarhuaata ini últimu jurhiatikuechani parachi no jurajkuni Jeobani? b) ¿Ambechi exea ini artikulurhu?

IÁSÏ, irekaxakachi últimu jurhiatikuechani engaksï kʼamakurhini jámajkia. Ka kʼuiripu no sési úri “uáni[xati] ísï eska uitsakua na kánijka” (Sal. 92:7). Jimbojtsïnisï no ísku pakatajti exeni eska kʼuiripu sánhani arhixaka nóteru respetariuania Tata Diosïri juramukuechani. Jimajkani, ¿nénachi uá ísïni eska “sapirhaticha engaksï no mítika pekadu úni” peru ístu kʼuiripu máeni enga újka uánikua ambe kurhanguni? (1 Kor. 14:20).

² Mókuntskua, i artikulueri texturhu jarhasti, ma parti arhisïndi eskaksï “imecha engaksï jirinhantani jaka Jeobani, úsïn[ga] iámu ambe kurhanguni”, o sea ambe enga uétarhijka para jaiapanherantani Jeobani (Prov. 28:5). Proverbios 2:7, 9 ístu jorhentpesïndi eska Jeoba íntsaasïnga mímixekua imechani engaksï jurhimbitku jámajka ka eskaksï ini ambe jimbo, niárasïnga “kurhanguni ambeski jurhimbikua, ambakiti eratsikua ka jurhimbitku jámani, ambe enga újka eska ambakiti ambe únhaaka”.

 ³ Noe, Danieli ka Jobu niárasptiksï i jásï mímixekua jatsini (Ezeq. 14:14). Ka úsïngachi májkueni ambe uandani iásï Tata Diosïri ireteri. ¿Ka cháia, kurhanguskijtsïa ambe xáni uétarhisïni para jaiapanherantani Jeobani? Ambe enga uétarhijka, jindesti sési mítini Jeobani. Ísï jimbo, ju je exeni tanimu ambe. Primeru, nénaksï niáraspi mítini Jeobani, Noe, Danieli ka Jobu. Segundu, néna jarhuataaspi engaksï mítipka Jeobani. Ka terseru, nénachi uá xásï ma jakajkukua jatsini eskaksï ima.

4. a) ¿Néna niáraspi Noe mítini Jeobani? b) ¿Néna jarhuataspi Noeni sési mítini Jeobani?

⁴ Néna niáraspi mítini Jeobani. Desdeka kʼuiripu kueraanhaka, achaticha ka uarhiiticha engaksï jatsijka jakajkukua, úsïndiksï jorhenguarhini Jeobaeri ambe tanimu ambe jimbo: exeparini ambe enga ima kueraaka, kurhaapariani máteru Tata Diosïri marhuarichani ka exepariani kóntperatechani engaksï jatsiajka por úni ambe engaksï Tata Diosïri juramukuecha ka prinsipiuecha arhijka (Is. 48:18). Enga Noe exepka kueraakata ambe, uánikua pruebechani exeaspti engaksï xarhatajka eska Tata Diosï jarhaska ka eska uánikua kualidadichani jatsiaska. Ísï jámani, úspti kurhanguni “imeri uinhapikua enga méntkisï jindeka ka imeri Diosïkua”, o sea eska Jeoba kánikua uinhapiska ka eska imajkusï Tata Diosï jurhimbitiika (Rom. 1:20). Ini ambe jimbo, Noe niáraspti kʼéri ma jakajkukua jatsini Jeobani jimbo.

5. ¿Néna jorhenguarhipi Noe ambe enga Tata Diosï uékenga para kʼuiripu?

⁵ Biblia arhisïndi eska kʼuiripu ma úsïnga jakajkukua jatsini imani ambe jimbo enga kurhajka (Rom. 10:17). ¿Né jorhendapi Noeni Jeobaeri ambe? Seguru eska uánikua ambe jorhenguarhipka imeri familiaricha jimbo, komu imeri tátemba Lameki jimbo, enga jakajkuti máepka ka enga jiáni andajpenupka enga Adani útasï irekani japka (exe je dibujuni enga uénakuarhu jaka). Ka máteru parientichaksï jindespti imecheri abuelu Matusaleni ka Jaredi Matusaleniri abuelu enga tresientusi sesentaiseisi uéxurhini tátsekua uarhipka enga Noe andajpenupka (Luk. 3:36, 37). * Jamberiksï i achaticha ka imeri témbecha jorhendapti Noeni eska Jeoba kueraaspka kʼuiripuni ka eska uékasïrenga eskaksï kaapiringa sapiichani, eskaksï uinirapiringa Echerini ka eskaksï marhuakupiringa. Ístu, jamberi Noe jorhenguarhipti eskaksï Adani ka Eba no kurhajchaspka Jeobani ka exeendi ambe enga úkuarhini japka imecheri no kurhandirakua jimbo (Gén. 1:28; 3:16-19, 24). Ambe enga Noe jorhenguarhipka, mintsitarhu niárakuspti ka inde ambe úspti eska marhuakupiringa Tata Diosïni (Gén. 6:9).

6, 7. ¿Náki erokuarhikua uinhaperantaspi Noeri jakajkukuani?

⁶ Erokuarhikua uinhaperantasïndi jakajkukuani. Ju je eranhaskani na enga pʼikuarherapka Noe enga mítipka eska imeri nombri, jamberi arhikuekenga “Mintsikuarhini” o “Sési pʼikuastpentani” ka eska erokuarhikua ma íntspesïrenga (Gén. 5:29, nota). Tata Diosï úspti eska Lameki ini ambe uandapiringa Noeri: “I uáti eskachi sési pʼikuarherantaaka [...] jimbokachi kánikua ianhajkurhasïnga ánchikuarhita jimbo, jimboka Jeoba úska eska echeri nóteru íntspepiringuia tʼirekua”. Noe mintsikasïrendi Jeobani. Ka májkueni eska Abeli ka Enoki, jakajkusïrendi eska japiringa “desendensia” ma enga chʼatajtsïkupiringa akuitsini (Gén. 3:15).

⁷ Jamberi Noe no kurhanguendi ambe enga xáni arhikuekenga profesia enga Génesis 3:15 jaka. Peru kurhanguendi eskaksï inde uandakuecha aiatspisïrenga eska japiringa pʼímutantskua ma. Enoki sáno májkueni jásï ma mensaji eianhpispti eska inde profesia. Uandantaspti eska Jeoba kʼamajkuapiringa no sési úrichani (Jud. 14, 15). I mensaji enga Armajedoni jimbo kʼamaraaka kumplirikuarhini, kánikua uinhaperantapti Noeri jakajkukuani ka imani erokuarhikuani enga jatsipka.

8. ¿Néna kuájchakuspi Noeni sési mítini Tata Diosïni?

 ⁸ Néna jarhuataspi Noeni sési mítini Jeobani. Ambe enga Noe jorhenguarhipka, úspti eska jatsipiringa jakajkukua ka Tata Diosïri mímixekua. I ambe kuájchakuspti Noeni, ka sánderia para no úni imani ambe enga no sési pʼikuastapiringa Jeobani. Por ejemplu, “Noe Tata Diosï jurhimbiti jingoni jámasïrendi”, jimbosï no kúrhiauendi imechani engaksï no janhanharhienga Tata Diosïni. Ístu, no jurajkuspti eskaksï ánjilicha enganiaripiringa engaksï kʼuiripu úkuarhintapka ka engaksï Echerirhu kétsipka. Peru kʼuiripu enga no jakajkuenga Jeobani, ísku pakarasïrendi enga exenga demoniuecheri uinhapikua ka jamberiksï uékendi kómarhiani (Gén. 6:1-4, 9). Ístu, Noe mítispti eska Tata Diosï juramukuaspka kʼuiripuechani eskaksï kápiringa sapiichani ka eskaksï uinirapiringa Echerini (Gén. 1:27, 28). Ini ambe jimbo, mítipti eska no sési jarhaspka eskaksï demoniuecha tembuchapiringa uarhiiticha jingoni ka eskaksï kánguarhiapiringa sapiichani. Ka exespti eska ísïispka enga exepka na engaksï ima sapiicha sánderu kʼérapka ka uinhapini eska máteruecha. Enga nitamapkia tiempu, Tata Diosï arhispti Noeni eska dilubiu ma juápiringa. Noe jakajkuspti ini ambe, jimbosï úpti arkani enga salbaripka imeri familiani (Ebr. 11:7).

9, 10. ¿Nénachi uá xásï ma jakajkukua jatsini eska Noe?

⁹ Nénachi uá xásï ma jakajkukua jatsini eska Noe. Uétarhisïndi sési estudiarini Tata Diosïri Karakatani, jukaparharani ambe engachi jorhenguarhijka ka jurajkuni eskajtsïni i ambe mójtakuaka ka eskajtsïni jarhuataaka erakuni ambe úni (1 Ped. 1:13-15). Engachi ísï úska, jakajkukua ka Tata Diosïri mímixekua, kuájchakuatijtsïni Satanasiri trampecheri ka parachi no úni imani ambe engaksï parhakpini anapuecha újka (2 Kor. 2:11). Parhakpini anapu kʼuiripu, tsitisïndi atajperakua ambe, úni ambe enga uéjka, ka ísku jándikua ambe (1 Juanu 2:15, 16). Nóksï exesïndi eska parhakpiniri kʼamakurhikua axuterku jarhaskia. Ka engachi jucha no uinhapiti jatsiaka juchari jakajkuani, úpiringachi uénani májkueni eratsini. Ju je miáni eska enga Jesusi terokutantapka Noeri jurhiatikuechani ini jurhiatikuecha jingoni, no atajperakueri ambe uandaspka o ísku jándikueri, sino eska peligru jindespka sánderu okupadu jarhani juchari ambe jingoni ka eska Tata Diosïni marhuakuni (arhinta je Mateu 24:36-39).

¹⁰ Kurhamarhikuarhi je: “¿Xarhatasïni juchiti irekua eskani sési mítiska Jeobani? ¿Úsïni juchiti jakajkua eskani no solu kurhajchauaka Jeobaeri juramukuechani, sino ístu eskani mítitarpiauaka?”. Ambe engajtsï mókuntaaka, xarhataati sintsï chájtu Tata Diosï jurhimbiti jingoni jámaxaki.

11. a) ¿Ambe jorhendanhaspi Danieli? b) ¿Náki kualidadichantsï uékapirini xarhataani ísï eska Danieli?

¹¹ Néna niáraspi mítini Jeobani. Seguruchi jarhaska eskaksï Danieliri tátembecha ambakiti ambe jorhendaspka, komu uékani Jeobani ka imeri Karakatani. Ka inde uékperakua no méni kʼamakurhispti, jimbokachi mítiska eska sési estudiarisïrenga Tata Diosïri Karakatani nájkiruka jatiripkia (Dan. 9:1, 2). Kómarhikua enga Daniel 9:3-19 jaka, xarhatasïndi eska Danieli sési mítispka Jeobani ka ambe enga xáni úpka israelitecha jimbo, jimboka mintsitarhu uératini kómarhispka ka kaxumbikua jingoni. ¿Andijtsïsï no arhutajki tiempu parajtsï arhintani ini komarhikuani ka eratsintani ambe enga arhijka? Kurhamarhikuarhi je: “¿Amberini jorhendasïni Danieliri ambe?”.

12-14. a) ¿Néna xarhataspi Danieli Tata Diosïri mímixekua? b) ¿Néna újchakuraspi Jeoba Danielini?

¹² Néna jarhuataspi Danielini sési mítini Jeobani. Para judiuecha engaksï no jurajkupka Jeobani, kánikua úkua jukaspti iretarhu ma irekani komu Babilonia enga no jakajkuenga Jeobani. Por ejemplu, Jeoba arhiaspti judiuechani eskaksï jirinhapiringa imani ireteri pínandikua nani enga úpka eskaksï pánhapiringa (Jer. 29:7). Peru ístu erokuarhisïrendi eskaksï imantku marhuakupiringa iámu mintsita jingoni (Éx. 34:14). ¿Néna úspi Danieli kumpliriuani ini tsimani juramukuechani? Tata Diosïri mímixekua jarhuataspti kurhanguni eska orheta  Jeobanisï jatsipka para kurhajchani ka tátsekua juramutichani. Uánikua uéxurhini tátsekua, Jesusi májkueni jásï ambe jorhentpespti (Luk. 20:25).

¹³ Eratsi je ambe enga úpka Danieli enga lei ma uandapka eska treinta jurhiatikua, no nema úpiringa kómarhini o kurhakuni ambe ma diosïni ma o kʼuiripuni ma, sino reintku (arhinta je Daniel 6:7-10). Danieli úpirindi eratsini ka uandani: “Treinta jurhiatikuajkuesti, no para méntkisï”. Peru no jurajkuspti eska kʼuiripueri lei ma sánderu jukaparhakuepiringa eska Tata Diosïni kómarhini. Ísïsti, úpirindi jirikuarhitini kómarhini para no nema exeni. Peru mítispti eskaksï uánikuecha kuenta íntskukuarhisïrenga eska ima pauani pauani kómarhisïrenga. Ísï jimbo, nájkiruka mítipka eska úpiringa uarhini, no uékaspti ni sikiera eska kʼuiripu eratsipiringa eska nóteru marhuakusïrenguia Jeobani.

¹⁴ Danielini no méni jurajkuspti Jeobani ka no chésïrendi, jimbosï Jeoba újchakurapti, úparini eskaksï leonicha no antapiringa. Ka i ambe úspti eska iámu kʼuiripu Medopersia anapu niárapiringa mítini Jeobaeri ambe (Dan. 6:25-27).

15. ¿Nénachi uá xásï ma jakajkukua jatsini eska Danieli?

¹⁵ Nénachi uá xásï ma jakajkukua jatsini eska Danieli. No solu uétarhisïndi arhintani Tata Diosïri Karakatani. Ambe enga uétarhijka para juchari jakajkukua uinhapiti jarhani, jindesti kurhanguni ambe engachi arhintajka (Mat. 13:23). Uékasïngachi mítini néna eratsisïni Jeoba, ka parachi ísï úni, uétarhisïndi kurhanguani Bibliaeri prinsipiuechani. Jimbochisï jatsika para eratsintani ambe engachi arhintajka. Ístu, uétarhisïndi eskachi pʼindeaka mintsitarhu uératini kómarhini, ka sánderia jiáni engachi kʼérati problemechani jatsiauaka. Uákachi mintsikani eskajtsïni Jeoba íntskuaka mímixekua ka uinhapikua engachi kurhakujka (Sant. 1:5).

16, 17. ¿Néna niáraspi Jobu sési mítini Jeobani?

¹⁶ Néna niáraspi mítini Jeobani. Jobu no israelitespti, peru parientispti Abraaniri, Isaakiri ka Jakobueri. Jeoba eianguaspti íchani imeri ambe ka ambe enga uékenga úni kʼuiripu jimbo. Nájkirukachi no mítika néna, peru Jobu uánikua ambe niáraspti mítini (Job 23:12). Ima arhispti Jeobani: “Kurhaska chíti ambe” (Job 42:5). Ka Jeoba uandaspti eska ísïspka ambe enga Jobu uandapka imeri ambe (Job 42:7, 8).

¹⁷ Jobu ístu niáraspti mítiani Jeobaeri kualidadichani enga exepka imeri kueraakatani (Job 12:7-9, 13). Tátsekua, Eliú ka Jeoba, úrasptiksï kueraakata ambe komu ejemplu para miátantani Jobuni eskachi kánikua sapichu ambeska Jeoba jingoni (Job 37:14; 38:1-4). Ambe enga Jeoba arhipka Jobuni mintsitarhu niárakuspti,  jimbosï kaxumbikua jingoni uandapti: “Mítiskia eskari iámu ambe úsïnga úni ka eska no ma ambe jarhaska engari no újka úni”. Ka ístu uandaspti eska kánikua pʼamondakuarhisïrenga (Job 42:2, 6).

18, 19. ¿Néna xarhataspi Jobu eska sési mítispka Jeobani?

¹⁸ Néna jarhuataspi Jobuni sési mítini Jeobani. Jobu sési kurhanguasïrendi Jeobaeri prinsipiuechani. Sési mítispti Jeobani ka i ambe jarhuataspti ambakiti ambe úni. Por ejemplu, mítispti eska no úpiringa uandani eska xénchasïrenga Tata Diosïni ka jini no sési kaani máteruechani (Job 6:14). No eratsisïrendi eska sánderu kʼéri ambespka eska máteru nema, ia sea rikueni o pobriini, sino ísï kámasïrendi komu familiani. Uandaspti: “¿Andi Ima engarini jíndeni kueraaka matrisirhu no kueraaski imantu?” (Job 31:13-22). Nájkiruka Jobu kánikua mítikatepka ka jatsikuarheriini, no jurajkuspti eska i ambe úpiringa eska kʼéramakuarhipiringa o menusi uáni máteruechani. Méntku ménderuenispti eskaksï uánikua iásï anapu rikuecha ka juramuticha.

¹⁹ Jobu no jurajkuspti eska jatsikuarhikua ambe o máteru ambe sánderu jukaparhakuepiringa eska Jeoba. Mítispti eska enga jurajkupiringa eska i ambe úkuarhipiringa, ísïipiringa komu máteru diosïchani kómarhiani jarhani. Eska ima mísmu na uandapka, negarini japirindi Tata Diosï jurhimbitini (arhinta je Job 31:24-28). Ístu, ísï exesïrendi temungurhikuani komu ambe ma enga Tata Diosï úpka entre tataka ma ka nanaka ma. Asta “pakatperakua ma” úspti imeri éskuecha jingoni para no exeni uarhiitini ma ísku ambe ma eratsiparini (Job 31:1). Ju je miántani eska imani tiempunisï, Jeoba jurajkusïrenga eskaksï achaticha uánikua uarhiitichani jatsiapiringa. Ísï jimbo, enga Jobu uékapiringa, úpirindi tsimani uarhiitichani jatsiani. * Peru imani ambe erakuspti úni enga Jeoba jardini de Edenirhu uaxastapka, eska temungurhikua ma jindeska solu entre tataka ka nanaka ma (Gén. 2:18, 24). Mili seisientu uéxurhinisï tátsekua, Jesusi jorhentpespti eskachi májkueni jatsiska para kurhajchaani prinsipiuechani engaksï sexueri ka temungurhikueri ambe uandajka (Mat. 5:28; 19:4, 5).

20. ¿Nénajtsïni jarhuatasïni sési mítini Jeobani ka imeri prinsipiuechani parachi sési erakuni nénachi tsípikuarhia ka né jingonchi kúnguarhia?

²⁰ Nénachi uá xásï ma jakajkukua jatsini eska Jobu. Uétarhisïndi sési mítini Jeobani ka jurajkuni eska ambe engachi mítika Jeobaeri ambe, jarhuataakajtsïni juchari irekuarhu. Por ejemplu, Bibliajtsïni jorhendasïndi eska Jeoba “ikimchasïnga né uéjkini enga atajperakua ambe tsitijka” ka eskachi no jatsiska para kúnguarhini “no jurhimbiticha jingoni” (arhinta je Salmo 11:5; 26:4). ¿Ambejtsïni jorhendasïni i textuecha na enga eratsijka Jeoba? ¿Nénajtsïni jarhuataa i ambe orheta pérani ambe enga sánderu jukaparhakueka, exeni nénachi úraa Internetini, né jingonchi kúnguarhia ka nénachi tsípikuarhia? Mókuntskuechajtsïni jarhuataati exeni sinchi sési mítiski Jeobani. Engachi uéjka limpiu jarhani ini parhakpinirhu, uétarhisïndi ‘pʼindeni eratsini’ parachi no solu mítini ambe sési jarhaski ka ambe nómbe, sino ístu na jatinchi uá úni ambe ma ka na jatini nómbe (Ebr. 5:14; Efes. 5:15).

21. ¿Ambejtsïni jarhuataa kurhanguni ambe enga xáni uétarhijka parachi jaiapanherantani Jeobani?

²¹ Noe, Danieli ka Jobu, jánguarhintasptiksï jirinhantani Jeobani ka jimbosï ima jarhuataapti paraksï úni kurhanguni ambe enga xáni uétarhijka para jaiapanherantani Jeobani. Ísï jámanksï niáraspti ambakiti ejemplueni imecheri jurhimbikua jimbo ka meruksï felisispti (Sal. 1:1-3). Ísï jimbo, ju je kurhamarhikuarhini: “¿Sési mítiski Jeobani ísï eska Noe, Danieli ka Jobu?”. Iásïchi uákia sánderu sési mítini, jimbokachi sánderu informasioni jatsiskia imeri ambe (Prov. 4:18). Jimajkani, ju je sési estudiarini Tata Diosïri Karakatani, eratsintani ambe engachi arhintajka ka kurhakuni Jeobani imeri espiritu santu. Engachi ísï úska, parhakpini anapuechajtsïni no uáti támisï páni. Mímixekua jingonchi uáka ambe ma ka juchari pájperakua Jeoba jingoni pauani pauani sánderu uinhapiati (Prov. 2:4-7).