Ji 1937 andajpenuska, koljósirhu ma o granjarhu ma engachi ánchitanhenga Tokmak no iauani (Kirguistán). Juchiti familia kirguisísti ka kirguísichi uandasïnga. Juchiti tátichaksï kampesinuespti ka chúskutasïrendiksï ánchikuarhini koljósirhu. Ánchikuarhirichaksï intsïnhasïrendi tʼirekua, peruksï ma ueltajkusï meiamunhendi ma uéxurhini jimbo. Para juchiti nándi no fásilispti tʼarhexerani juchiti ermana sapichuni ka jíndeni. Sinku uéxurhinijkusïni níka eskuela, jimbokani úndaspka chúskutani ánchikuarhini koljósirhu.

Jima engachi irekapka pobrenhaspti ka parachi andangutani tumina, jatsisïrengachi para jánguarhintani jimbochisï kuataratini kʼamarenga. Ísï jimbo, engani tumbiipka no eratsisïrenga andichisï kueraanha ka ni ambe úkuarhipirini sánderu orhepani. No eranhaskaspka eska Jeobaeri ambe mítini ka ambe enga ima uéjka úni para kʼuiripu, niárapiringa mójtakuni juchiti irekuani. Uékapiringaksïni aianguni na enga niáraka inde ambe mítikuarhini Kirguistán ka na enga etsakurhika iápurisï. Nortisï uénaspti, jima engani jí kʼuiripeka.

Jurhimbikua Jeobaeri ambe, 1956 uénasïndi mítikuarhini Kirguistán. Ka para úni mítinhani, kʼuiripu jatsispti para kénditani eratsikua komunistani. Jiánisï, Kirguistán Unión Soviética jingonispti ka Jeobaeri testiguechaksï no inchaakuspti politikarhisï iámu paisicharhu engaksï Unión jingoniipka (Juanu 18:36). Ka exeauasïrendiksï  komu enemiguecha Estadu komunisteri ka no sésiksï káspti. Peru no ma ambe uáti úni eska ambakiti kʼuiripu no mítiaka ambe enga Biblia arhijka. Ka ambe engani niáraka jorhenguarhini, jindesti eska para Jeoba “iámindu ambe úsïnga úkuarheni” (Mar. 10:27).

Engaksï no sési kánhapka Testiguecha, jarhuajpispti para eianhpikua iámu Kirguistán etsakurhini. ¿Néna ísï úkuarhespi? Siberia Unión Soviética jingonispti ka jimaksï mínhaasïrendi Estadueri enemiguechani. Engaksï jurajkuauenguia, uánikuaksï Kirguistán jurhasïrendi. Ka márujtsïni jorhendaspti jurhimbikua ambe, komu Emil Yantzen, enga 1919 andajpenupka Kirguistán ka enga kampu de trabajurhu ma axanhapka, jima mítiaspti Testiguechani. Emil mítispti jurhimbikuani ka 1956 kʼuanhatsentaspti paisirhu ka Sokuluk pakaraspti irekani, jima engani jí irekapka. Jima úkuarhispti primeru kúnguarhikua Kirguistán 1958.

Ma uéxurhinisï tátsekua, Viktor Vinter erachi ma enga uánikua tsʼéjkukuechani nitamaapka, Sokuluk mótsispti. Komu no inchaakuenga politikarhisï, tsimani uelta ónhanhaspti tanimu uéxurhinichani, ka tátsekua diesi uéxurhini ónhanhaspti ka sinku uéxurhini Siberia pánhaspti. Nájtukaksï no sési kánhapka, no ma ambe úspti úni eska jurhimbikua no etsakurhipiringa.

Para 1963, 160 testiguechisïksï jarhasptia Kirguistán. Uánikuaksï Alemania anapuespti, Ucrania ka Rusia. Ma jindespti Eduard Warter, exiliadu ma enga Alemania itsï atakuarhipka 1924. Nasichaksï kampu de konsentrasionirhu ma axaspti 1940 ísï, ka ísï no ióni jimbo, Unión Soviética anapu komunistechaksï exiliurhu axaspti. I ambakiti erachi, Kant mótsispti 1961, juchiti iretarhu no iauani.

Ístu, Elizabeth Fot, máteru ambakiti Testigu, Kant irekaxapti ka sïrikutiispti. Komu sési sïrikuenga, jatsiaspti klientichani engaksï doktoripka, maestruepka ka máteru profesionistecha. Aksamai Sultanalieva imeri klientespti ka uámba fiskalispti. Ma xanhari enga Aksamai Elizabetini nípka exeni, uánikua kurhamarhikuechani úkuaspti komu andichisï ixú jaki ka naniksï jarhaski uarhiricha. Elizabeth Biblia jingoni mókukuntaspti. Ísï tátsekua, Aksamai niáraspti ambakiti eianhpiri máeni.

Jiánisï, Nikolai Chimpoesh enga Moldavia anapuepka, sirkuitueri orhejtsïkuti únhaspti. Ka sáno treinta uéxurhini úspti ini ánchikuarhitani. A parti de kúnguarhikuechani pʼorhembiani, Nikolai enkargarikuarhisïrendi paraksï publikasionicha kopiarinhani ka etsakunhani. Komuksï autoridadicha mítipkia ambe enga uénga, Eduard Warter arhispti: “Engaksïni kurhamarhiaka ambe ma, tʼu nomasi arhia eskajtsïni Brooklyn uératini axachiasïnga publikasionichani, jima engaksï ofisinecha jaka. Éskuecharhu erati agenteni de KGB. Nori jatsiska para chéni” (Mat. 10:19).

Ísï tátsekua, Nikolai pʼitarkuarhinhaspti ofisinecharhu de KGB jini Kant. Ima uandasïndi: “Agenterini kurhamarhispti nénachi konseguiriuasïreni publikasionichani. Ji arhispka eskajtsïni Brooklyn uératini axachiasïrenga. Ima nóteru mítisptia ambe uandani. Jurajkusptirini parani níntani ka nóterurini pʼitarkuarhisptia”. Imaksï Testiguecha no chésïrendi ka seguirisptiksï jingontku etsakuni Reinueri ambe nortirhisï Kirguistán, jima no iauani  engani ji irekapka. Ka 1981, juchiti familia niáraspti kurhaani jurhimbikua ambe. Juchiti uarhiiti Mairambubu orheta kurhaaspti.

Mairambubu, Naryn anapuesti, lugari ma enga Kirguistán jaka. Juchiti pirenchiri kʼumanchikuarhuchi mítperaspka agostuni de 1974. Desdekani exepka, kánikua xénchaspka ka jiáni mísmuchi tembuchaspka.

Eneruni de 1981, Mairambubu kʼuanhatsintaxapti autobusirhu merkadurhu uératini ka kurhaaspti imani uandontskuarhitani engaksïni uénakuarhu aianguka. Ima uékasïrendi sánderu ambe mítini, jimbosï kurhamarhipti uarhiitini néna arhinhasïreni ka nani irekaspi. Ima arhispti eska Apun arhinhasïrenga, peru enbesi de ima íntskuni direksionini, ima euaspti juchari, jimbokaksï jiánisï Testiguecha no sésikua jatsispka aianhpeni ka jatsisïrendiksï para jingontku jámani. Juchiti uarhiiti tsípiparini niántaspti.

Mairambuburini arhispti: “Kánikua sési jásï ambe kurhaaska. Uarhiitirini ma arhisti eska nóteru ióndani kʼuiripu nóteru uarhiakia. Astaksïnha juátarhu anapu animalicha nóteru no sési jámaatia”. Para jí, inde ambe ísïspti komu kuentusi ma ka arhispka: “Ju erokuarhini eska juuaka parajtsïni sánderu ambe aianguni”.

Apun tanimu kutsï tátsekuajtsïni pʼorhembispti. Ka tátsekuajtsïni pʼorhembispti primeru pirenchicha engaksï kirguísipka. Imajtsïni jorhendaspti jurhimbikua ambe Jeobaeri ka ambe enga uéjka úni para iáminduecha. Úrasïrendiksï libruni De paraíso perdido a paraíso recobrado. * Peru Tokmak, ma librujkusï japti, jimbochisï jájki jimbo kopiaripka.

Ma ambe engajtsïni orheta jorhendapka, jindesti profesiani enga Génesis 3:15 jaka, enga imani Rei jimbo kumplirikuarhiaka enga Tata Diosï erakuka: Jesukristu. Inde ambe jukaparhakuesti ka iáminduechaksï jatsisti para kurhaani. Jimbochisï eratsipka uénani aianhpeni (Mat. 24:14). No ióni jimbo, Bibliaeri jorhenguarhikua, uénaspti mójtakuni juchari irekuani.

Tokmak anapu Testigu ma, pʼímarhisptijtsïni tembuchakuarhu ma ka juchiti uarhiiti ka jí, sóntkuchi exespka eskaksï Testiguecha ménderuenispka. Tembuchakuarhu, iáminduechaksï respetu jingoni jámaspti ka no kánhaspti kauikua. Méntku  ménderuenispti eskaksï ima tembuchakuecha engachi nípka, nani enga kauinhenga, no sési jánhani ka ísku ambe uandanhani.

Ístuchi niraspka máru tánguarhikuecharhu Tokmak anapu kúnguarhikuarhu. Juátarhuksï úkuarhesïrendi enga no no sési jánhaskuarhepiringa. Erachichaksï mítispti eskajtsïni polisiecha exeni jarhasïrenga, jimboksïsï jatsiendi kuárini ma. Inbiernurhu, kʼumanchikuarhuchi ma tánguarhisïrenga ka polisiajtsïni ménichanisï niraspti exeni. Jiáni engachi itsï atakuarhipka ríurhu Chu, juliuni de 1982, jatsispkachi para jingontku jámani (Mat. 10:16). Grupu sapichuecha jimbochi niárapaspka juátarhu, pirekuspkachi Jeobani ka kurhaaspkachi diskursuni itsï atakuarhikueri.

Uéxurhini 1987, erachirini ma kurhachispti eskani pʼorhembipiringa kʼuiripuni ma enga interesi xarhatapka jurhimbikua jimbo ka enga Balykchy irekapka. Parachi jima niárani, jatsisïrengachi para kuatru ora biajarini treni jimbo. Engachi someni nípkia aianhpini Balykchy, exespkachi eskaksï uánikuecha interesi xarhataspka. Ima ambejtsïni jarhuataspti parachi sánderu aianhpeni.

Mairambubu ka jí, kánikuachi nirasïrenga Balykchy. Sáno iámindu fin de semana jimachi jarhasïrenga, uérasïrengachi aianhpeni ka uásïrengachi tánguarhikuechani. Sánhani arhixapkachi sánderu publikasionichani uéani jimbochisï mishok ma jimbo páuenga, kostali ma enga papasï jatakueka. Apenasi tsimani kostali andakusïrendi para ma kutsï. Asta trenirhuchi úsïrenga aianhpeni.

Uéxurhini 1995, úkuarhispti kúnguarhikua ma Balykchy, ochu uéxurhini tátsekua engachi primeru uelta nípka. Kánikuachi tumina úraspka parachi nirani jima eianhpini. ¿Ka nénachi jámasïreni engachi no jatsikuarheripka? Erachijtsïni ma jarhuatasïrendi tumina jingoni. Komu Jeoba mítipka eskachi uékasïrenga sánderu aianhpini, mítachiasptijtsïni “auandarhu anapu puertechani” (Mal. 3:10). Ísïsti, para Jeoba iámindu ambe úsïndi úkuarhini.

Orhejtsïkuti únhaspka 1992. Jí primeru orhejtsïkutispka Kirguistán kirguísicheri. Úspkachi sánderu marhuakuni Jeobani juchari kúnguarhikuarhu enga Tokmak jaka. Por ejemplu, jorhendaaspkachi Bibliaeri ambe uánikua tumbiichani engaksï kirguísipka, máru eskuelecharhu engaksï jimesï japka. Iásï, ma ima tumbicheri komiterhu ma jarhastia enga sukursalini ma orhejtsïkujka ka tsimanksï prekursori espesialisti. Ístuchi jánguarhintaspka máteruechani jarhuataani tánguarhikuecharhu. Para 1990 ísï, ruso jimbojkuchisï jatsiapka publikasionichani ka tánguarhikuechaksï ruso jimboesïrendi. Peruksï sánhani arhixapti uánini erachicha engaksï kirguísipka, jimbosïni aiakukuarhepka parani interpretarikuani. I ambe jarhuataaspti sánderu sési kurhanguni jurhimbikuani.

Mairambubu ka jí, okupaduchi jarhaspka juchari sapiicha jingoni. Pásïrengachi eianhpikuarhu ka tánguarhikuecharhu. Enga juchari nanaka Gulsayra 12 jatiripka, tsitisïrendi Bibliaeri  ambe eianguni kʼuiripuni enga xanharisï nirani jarhenga. Iámindu juchari sapiichaksï tsitisïrendi memoria jimbo jorhenguarhiani textuechani. Juchari sapiicha ka nimakuecha, méntkisïksï okupadu jarhasïndi kúnguarhikuarhu. Juchari 9 sapiicheri ka 11 nimakuecheri engaksï útasï tsípiti jaka, 16 Jeobanksï marhuakusïndi oksï nirasïndi tánguarhikuecharhu táti jembecha jingoni.

Erachicha engaksï uénapka ixuesïsï aianhpini 1950 ísï, ískuksï pakarapirindi engaksï exepiringa na enga uánikua ambe mójtakurhikia. Por ejemplu, desde 1990 ísï, jatsiskachia libertadi para aianhpini ka parachi kʼérati grupuecha jimbo tánguarhini.

Juchiti uarhiiti ka jí, niraspkachi Kazajistán 1991, iretarhu Alma-Atá (iásï Almaty), parachi primeru kʼéri tánguarhikuarhu ma nirani. Ka 1993, úkuarhispti primeru kʼéri tánguarhikua Kirguistán Estadio Spartak jimbo enga Biskek jaka. Eianhpirichaksï ma semana jámaspti ambantskantani estadiurhu. Enkargadu ísku pakaraspti ka astajtsïni gratisi kuánetaspti estadiuni.

Ístu kʼéri ambe úkuarhispti 1994, enga primeru publikasioni uérapka kirguís jimbo. Iásï, Biskek anapu sukursalirhuksï tradusirikuarhisïndia publikasionicha kirguís jimbo. Ka desde 1998, Testiguechachi legaliskia Kirguistán. Jukari 5,000 eianhpiriskachia, 83 kúnguarhikuaksï jarhasti ka 25 grupuecha engaksï chino uandajka, inglés, kirguís, ruso ka lenguaje de señas ruso, turco, uigur ka uzbeko. Juchari erachichaksï mámaru járhatisti, peruksï májku kʼéri marhuakusïndi Jeobani. Jo, Jeobasï úti eska iámindu i ambe mójtakukuarhipiringa.

Jeoba mójtakusti juchiti irekuani. Familiarhu ma kʼuiripeska enga pobripka ka enga kampesinuepka ka sinku uéxurhintkuni niraska eskuela. Peru Jeobarini íntskusti sésikua parani orhejtsïkutini kúnguarhikuarhu ka parani jorhendaani jukaparhakua ambe Bibliaeri kʼuiripuechani engaksï sánderu ióni nika eskuela eskani ji. Ísïsti, Jeoba úsïndi eska úkuarhiaka asta ima ambe engari no eranhaskajka. Iámu ambe engani nitamaka, jarhuatasïndirini seguirini eianhpini Jeobaeri ambe, jimboka para Tata Diosï “iámindu ambe úsïn[ga] úkuarhini” (Mat. 19:26).