1, 2. a) ¿Amberi kuenta íntskukuarhispi erachi ma? b) ¿Ambe úspi para sési péntani imeri problemani?

ROBERT 15 uéxurhini jatirispti enga itsï atakuarhipka, peru no káni jukaparharasïrendi jurhimbikuani. Uandasïndi: “No méni no sési ambe úspka, peruni marhuakusïrenga Jeobani nomasi jimbokani ísï pʼindespka. Ísï xarharasïrendi enajkini espiritualipi, jimbokani méntkisï nirasïrenga tánguarhikuecharhu ka uánikua uelta prekursori auxiliari úkuarhesïrenga ma uéxurhini jimbo. Peruni kueratanchasïrenga ambe ma”.

² Robert no kurhanguspti nákispi problema astaka tembuchapka. Ménisïksï chʼanasïrendi témba jingoni Bibliaeri ambe kurhamarperani. Imeri témba espiritualispti ka mítiaspti mókuntskuechani. Peru Robert méntkisï kʼuratsekua jingoni pakarasïrendi jimboka kasi no méni sési mókuntasïrenga ka ísï pʼikuarherasïrendi enajki no ma ambe mítipi. Jimbosï eratsipti: “Engani ji orhejtsïkuaka juchiti uarhiitini para ima sési jarhani Jeoba jingoni, jatsiska para úni ambe ma”. Ka ísï úspti. Uandantasïndi: “Uénaspka kánikua estudiarini Bibliani ka úndaspka uánikua ambe kurhanguni”. Ísï úparini, niáraspti kurhanguni Bibliaeri ambe, peru sánderu jukaparhakua ambe jindespti eska niáraspka ambakiti pájperakua ma jatsini Jeoba jingoni.

3. a) ¿Ambejtsïni jorhendasïni ambe enga Robert nitamakuarhipka? b) ¿Náki kurhamarhikuechanchi exeaua engaksï jukaparhakueka?

 ³ Ambe enga Robert nitamakuarhipka, jukaparhakua ambejtsïni jorhendasïndi. Jamberichi sánisï mítika Bibliaeri ambe, jamberichi méntkisï nirajka tánguarhikuecharhu ka eianhpini kúnguarhikua jingoni. Peru inde ambe no arhikuekasïndi eskachi kʼuiripu espirituali máeska. Ístu, jamberichi úkia ambe ma parachi sánderu espiritualiini, peru engachi sési eratsintaska, a lo mejorichi kueratanchani jaka sánderu sési úni ambe ma (Filip. 3:16). Ambe ma engajtsïni jarhuataaka seguirini sánderu sési úni ambe ma, jindesti exeani arini tanimu kurhamarhikuechani engaksï jukaparhakueka. Primeru, ¿ambejtsïni jarhuataa exeni néna jarhaski juchari espiritualidadi? Segundu, ¿ambechi jatsiski para úni parachi sánderu espiritualiini? Ka terseru, ¿nénajtsïni jarhuataa juchari irekuarhu uinhapiti jatsini juchari espiritualidadini?

4. ¿Néksï jatsiski para úni ambe enga Efesu 4:23, 24 arhijka?

⁴ Parachi úni Tata Diosïri marhuarini, uánikua ambechi mójtakuska juchari irekuarhu. Ka seguirixakachi ísï úni nájkirukachi itsï atakuarhikia. Bibliajtsïni arhisïndi: “Eskaksï jimbanheranhantaaka chári eratsikuecha” (Efes. 4:23, 24). Griegu jimbo, uandakua “jimbanheranhantaaka”, arhikuekasïndi eska ambe máeska enga méntku jatsika para úkuarhini jarhani. Komuchi no perfektueka, iáminduechachi jatsiska para seguirini jarhani mójtakurini. Asta imecha engaksï iónisï marhuakukia Jeobani, jatsistiksï para kuidarini imecheri espiritualidadini (Filip. 3:12, 13).

5. ¿Náki kurhamarhikuechajtsïni jarhuataa exeni néna jarhaski juchari espiritualidadi?

⁵ Iáminduecha, kʼérati ka tumbicha, jatsiskachi para sési exeni néna jarhaski juchari espiritualidadi. Úpiringachi arini ambe kurhamarhikuarhini: “¿Exesïni eskani sánderu espiritualiskia? ¿Sánhani arhixaki ísïini eska Kristu? ¿Ambe xarhatasïni juchiti jángua tánguarhikuecharhu? ¿Ambe xarhatasïni eskani uékasïnga úni na engani uandontskuarhijka? ¿Ambe xarhatasïni juchiti ambe na engani estudiarijka, na engani xukuparhajka ka arreglarikuarhini ka ambe engani újka engani konseju ma intsïnhajka? ¿Ambe úsïni engani tsʼéjkunhajka? ¿Niáraskia ji kristianu máeni enga jánhaskatiika?” (Efes. 4:13). Eratsintani ambe engachi mókuntaka, jarhuataatijtsïni exeni na xánchi sánderu espiritualiskia.

6. ¿Ambechi máteru ambe uá uétarhinchani parachi exeni néna jarhaski juchari espiritualidadi?

⁶ Parachi exeni néna jarhaski juchari espiritualidadi, jamberi ménisï uétarhiati eskajtsïni máteru erachicha jarhuataaka. Apostuli Pablu uandaspti eska ima enga no jukaparharajka Tata Diosïri ambe, no kuenta íntskukuarhisïnga eska ambe enga újka no sési pʼikuastasïnga Tata Diosïni. Peru kʼuiripu espirituali ma, ísï exesïndi ambe ma eska Tata Diosï ka exesïndi eska ima enga no jukaparharajka Jeobaeri ambe, támisï niraxaka (1 Kor. 2:14-16, TNM; 3:1-3). Orhejtsïkutichaksï májkueni eratsisïndi eska Kristu, jimboksïsï uánikua uelta sóntku kuenta íntskukuarhejti enga nema no ísï exejka ambe ma komu Jeoba. Engachi juchepiringa engachi ísï úkuarhinchapiringa ka orhejtsïkutichajtsïni uékani jarhuatani, ¿úpirinchi ambe engajtsïni ima arhipiringa? Engachi ísï úpiringa, xarhatanchi japiringa eskachi uékasïnga sánderu espiritualiini (Ecl. 7:5, 9).

7. ¿Nénachi mítiski eska no solu uétarhisïnga Bibliaeri ambe mítini parachi kʼuiripu espirituali máeni?

⁷ Jatsiskachi para miáni eska no solu uétarhisïnga mítini Bibliaeri ambe parachi kʼuiripu espirituali máeni. Rei Salomoni uánikua ambe mítispti Jeobaeri. Ka máru ambe enga uandapka, niárasti Bibliarhu karanhani. Peru últimu, jurajkuspti Jeobani (1 Rey. 4:29, 30; 11:4-6). Ísï jimbo, a parti de mítini Bibliaeri ambe, jatsiskachi  para uinhapiti jatsini juchari jakajkukuani (Kol. 2:6, 7). ¿Nénachi uá ísï úni?

8, 9. a) ¿Ambejtsïni jarhuataa uinhapiti jatsini juchari espiritualidadini? b) ¿Andichisï estudiarijki ka eratsintani? (Exea je fotuechani engaksï uénakuarhu jaka).

⁸ Pablu méntku úndaspti pʼímarhiani primeru siglurhu anapu kristianuechani “paraksï sési jánhaskatini jarhani” (Ebr. 6:1). Iásïjtuchi jatsiska para úni ambe enga Pablu uandapka. Jimbosï jukaparhakueti eskachi estudiariuaka libruni “Tata Diosïri xénchperakuarhu ja je”. Ísï úni, jarhuataatijtsïni exeni nénachi uá úraani Bibliaeri prinsipiuechani juchari irekuarhu. Engachi kʼamarakia libruni, uákachi máteru publikasionichani estudiariuani engajtsïni jarhuataaka uinhapiti jatsini juchari jakajkukuani (Kol. 1:23). Ístuchi jatsiska para kómarhini ka eratsintani nénachi uá úrani ambe engachi jorhenguarhijka.

⁹ Estudiarisïngachi ka eratsintani jimbokachi uékasïnga eskajtsïni i ambe, jarhuataaka mintsitarhu uératini kurhajchani Jeobani ka úni ambe enga ima jaiapanhintajka (Sal. 40:8; 119:97). Ka ístu, jorhenguarhisïngachi no jiókuarhini imani ambe engajtsïni no jurajkujka parachi sánderu espiritualiini (Titu 2:11, 12).

10. ¿Ambeksï uá úni tumbiicha paraksï sánderu espiritualiini?

¹⁰ Tumbi, ¿mítiskiria amberi uékasïni úni parari sánderu marhuakuni Jeobani? Erachi ma enga Beteli marhuajka, pʼindesti uandontskuarhini kʼéri tánguarhikua sirkuituerirhu, tumbiicha jingoni engaksï itsï atakuarhiaka. Kurhamarhiasïndi ambeksï uékasïni úni paraksï sánderu marhuakuni Jeobani. Ambe engaksï uánikuecha mókuntajka, xarhatasïndi eskaksï sési mítitixakaia ambe engaksï uéjka úni sánderu orhepani para Jeobani marhuakuni. Máruksï uékasïndi tiempu kompletueri marhuani o nirani nani engaksï uétarhijka sánderu eianhpiricha. Peru ménisï, erachi uandontskuarhisïndi tumbiicha jingoni engaksï no jánhaskajka ambe arhini. I ambe úpirindi ísï úkuarhini jimbokaksï eratsisïnga eskaksï no uétarhinchasïnga sánderu marhuakuni Jeobani. Ini ambe jimbo, tumbiichaksï jatsisti para kurhamarhikuarhini: “¿Nirasïni tánguarhikuecharhu ka eianhpini nomasi jimbokaksï juchiti táticha uékasïnga eskani ísï uáka? ¿O sési pájperasïni Jeoba jingoni?”. Ísïsti, iáminduechachi jatsiska para exeni nénachi uá sánderu marhuakuni Jeobani, ia seachi tumbiini ochi kʼératini. I ambejtsïni jarhuataati uinhapiti jatsini juchari espiritualidadini (Ecl. 12:1, 13).

11. a) ¿Ambechi jatsiski para úni parachi sánderu uinhapiti jatsini juchari espiritualidadini? b) ¿Náki Bibliaeri ejempluchi uá chúngumani?

¹¹ Engachi exekia ambechi kueratanchasïni sánderu sési úni, jatsiskachi para seguirini uénani mójtakuni ambe enga uétarhijka. I ambe kánikua jukaparhakuesti. Jimboka i ambe uáka úni eskachi tsípiti pakaraaka o eskachi uarhiaka (Rom. 8:6-8). Jeoba no erokuarhesïndi eskachi iámu ambe sési uáka ka íntskusïndijtsïni imeri espiritu santu parajtsïni jarhuatani. Peruchi jatsiska para jánguarhintani. Erachi John Barr, enga jindepka Grupueri enga Orhejtsïkuajka iámindu kúnguarhikuechani, uandaspti máru ambe enga Lukasʌ 13:24 arhijka ka uandaspti eskaksï uánikua kristianuecha no úsïnga orhepani uérani jimbokaksï no jánguarhintasïnga estudiarini Bibliani ni úraani Bibliaeri prinsipiuechani. Jatsiskachi para ísïini eska Jakobu, enga ánjili ma jingoni uarhipepka astaka i újchakurapka (Gén. 32:26-28). Bibliani estudiarini uátijtsïni sési pʼikuastani, peruchi no jatsiska para erokuarhini eska ísïiuka komueska nobela ma. Jatsiskachi para inbestigarini parachi jukaparhakua ambe exentani engajtsïni jarhuataaka.

12, 13. a) ¿Ambejtsïni jarhuataa ísï eratsini eska Kristu? b) ¿Nénajtsïni jarhuatasïni apostuli Pedrueri ejemplu ka imeri konseju? c) ¿Nénachi uá sánderu espiritualiini? (Exe je rekuadruni “ Ambechi uá úni parachi sánderu espiritualiini”).

¹² Engachi jánguarhintajka sánderu espiritualiini, espiritu santujtsïni jarhuatasïndi mójtakuni na engachi eratsijka ka sánhani arhisïngachi ísï eratsini eska Kristu (1 Kor. 2:16). Ístu, espiritu santujtsïni jarhuatasïndi nóteru tsitinia  imani ambe engaksï parhakpini anapuecha tsitijka ka jatsiani imani kualidadichani enga Jeoba jaiapanhiantajka (Gal. 5:16, 22, 23). Engachi kuenta íntskukuarhijka eskachi tsitisïnga jatsikuarhekua ambe o imani ambe engaksï parhakpini anapuecha tsitijka, ju je no kuatantani. Ju je seguirini kurhajkuarhini espiritu santu ka Jeobajtsïni jarhuataati imani ambe eratsini enga sési jaka (Luk. 11:13). Ju je miántani ambe enga úkuarhinchapka apostuli Pedru. Uánikua xanhari no ísï úspti ambe ma eska kʼuiripu espirituali ma (Mat. 16:22, 23; Luk. 22:34, 54-62; Gal. 2:11-14). Peru no kuatantaspti. Jeobaeri jarhuajperata jimbo, sánhani arhispti ísï eratsini eska Kristu. Ka juchajtuchi uáka ísï úni.

¹³ Ísï tátsekua, Pedru niáraspti uandani eskachi jatsiska para xarhataani kualidadichani komu tekaantskua ka eskachi jatsiska para pʼíngukuarhini, ka sési pájperani máteruecha jingoni (arhinta je 2 Pedru 1:5-8). Jatsiskachi para jánguarhintani xarhataani i járhati kualidadichani parachi sánderu espiritualiini. Sési japirindi eskachi pauani pauani kurhamarhikuarhipiringa: “¿Ambe uá úni iásï parani sánderu espiritualiini?”.

14. ¿Nénajtsïni jarhuataa juchari irekuarhu kʼuiripu espirituali máeni?

¹⁴ Ísï eratsini eska Kristu, uátijtsïni jarhuatani sánderu ambakiti jángua ma jatsini eskuelarhu o ánchikuarhitarhu, sési uandontskuarhini ka pauani pauani ambakiti ambe erakuni úni. Ísï úparini, xarhatanchi jauaka eskachi jánguarhintasïnga Kristueri chúxapatiini. Engachi kʼuiripu espirituali máeska, nochi jurajkuaka eskajtsïni ambe ma ójkutaaka juchari pájperakuarhu Jeoba jingoni. Engachi tsʼéjkukua ma jatsiaka, uákachi pʼíngukuarhini. Ka engachi erakuni jámaaka ambe úni, arini ambechi kurhamarhikuarhiaka: “¿Náki ka náki prinsipiurini jarhuataa erakuni ambe úni? ¿Ambe úpirini Kristu enga ini ambe nitamanchani japiringa? ¿Ambe jaiapanhintaa Jeoba eskani uáka?”. Jatsiskachi para pʼindeni ísï eratsini. Ju je exeni na jatinchi úpirini ísï úni. Mándani ejemplurhu, úraakachi Bibliaeri prinsipiu ma engajtsïni jarhuataaka ambakiti ambe erakuni úni.

15, 16. Uandaa je máru ejempluechani engaksï xarhatajka na engajtsïni jarhuatajka ísï eratsini eska Kristu a) engachi erakuni jámaaka né jingoni uambuchani o tembuchani; b) engachi erakuani jámaaka juchari amiguechani.

¹⁵ Engachi erakuni jámaaka né jingoni uambuchani o tembuchani. Bibliaeri prinsipiu jindesti 2 Korintu 6:14, 15 (arhinta je). Ambe enga Pablu uandapka, xarhatasïndi eska kʼuiripu espirituali ma no uáka imani jingoni jarhani enga no jukaparharajka Jeobaeri ambe. ¿Nénachi uá úrani ini prinsipiuni engachi erakuni jámaaka né jingoni uambuchani o tembuchani?

¹⁶ Engachi juchari amiguechani erakuani jámaaka. Ju je exeni Bibliaeri prinsipiuni enga jindeka 1 Korintu 15:33 (arhinta je). Kʼuiripu espirituali ma, no amigu úkuarhiati ima kʼuiripueri enga uáka no sési úkuni imeri espiritualidadini. Jatsiskachi para eratsintani nénachi uá úrani ini prinsipiuni, por ejemplu, engachi erakuni jámaaka néna úraani redesi sosialichani o engajtsïni nema engachi no mítika, pʼímarhijka imani jingoni chʼanani Interneti jimbo.

17-19. a) ¿Ambe ka ambechi no uá engachi kʼuiripu espirituali máeka? b) ¿Ambechi uá parachi sánderu marhuakuni Jeobani engachi kʼuiripu espirituali máeka? c) ¿Nénajtsïni jarhuatasïni espiritualidadi engachi problema ma jatsijka nema jingoni?

¹⁷ Máru ambe engajtsïni ójkutajka parachi sánderu  espiritualiini. Bibliajtsïni adbertensia ma íntskusïndi arini texturhu Ebreu 6:1 (arhinta je). Enga Pablu uandajka ixú eskachi jatsiska para “jurajkuani úkuechani engaksï no marhuajka”, imani ambesï arhikuekani jati engajtsïni no jarhuatajka parachi sánderu espiritualiini. I adbertensiajtsïni uáti jarhuatani mókuantaani ari járhati kurhamarhikuechani: “I ambe engani úni jaka, ¿marhuachisïnirini para ambe ma o nómbe? ¿Sési jaki eskani jiókuarhiaka ini ánchikuarhitani parani sánderu tumina andani? ¿Andisïni no jatsi para grupuni ma kúrhini enga uéjka sési péntani ini parhakpinini?”.

¹⁸ Sánderu marhuakuni Jeobani. Sermoni del Monterhu, Jesusi uandaspti nénachi uá sánderu marhuakuni Jeobani (Mat. 6:33). Kʼuiripu espirituali ma, orheta pérasïndi Tata Diosïri Reinuni imeri irekuarhu. Miáni ini prinsipiuni, jarhuatasïndijtsïni erakuni por ejemplu sinchi niua unibersidadirhu o nómbe, sinchi jiókuarhia ánchikuarhita ma o nómbe.

¹⁹ Arhirperata ambe. Ma ambe engajtsïni jarhuatajka engachi arhirperajka kʼuiripu ma jingoni, jindesti úni ambe enga Pablu arhipka Roma anapu kúnguarhikuani (Rom. 12:18). Kristueri chúxapatichachi jánguarhintasïnga “sési pájperani iámindu kʼuiripuechani jingoni”. ¿Ambechi úsïni engachi problema ma jatsijka nema jingoni? ¿Úkua jukanchasïnchi jiókuarhini ambe engaksï máteruecha uandajka, ochi mítikateski komueska nema enga jánguarhintajka sési péntani ambe ma? (Sant. 3:18).

20. ¿Andijtsïsï uéjki sánderu espiritualiini?

²⁰ Eskaksï na xarhatajka i ejempluecha, eratsintani ambe engaksï Bibliaeri prinsipiuecha arhijka, jarhuatasïndijtsïni imani ambe erakuni úni enga xarhatajka eskachi kʼuiripu espirituali máeska. I ambejtsïni jarhuatasïndi sánderu tsípikua jingoni irekani. Robert, engachi uénakuarhu uandaka, uandasïndi: “Engani niárapkia ambakiti pájperakua ma jatsini Jeoba jingoni, sánderu ambakiti ma achatispkia ka táti. Kánikua sési pʼikuarheraspka ka felisi”. Juchajtuchi uáka jatsiani i járhati kóntperatechani engachi jánguarhintaska kʼuiripu espirituali máeni. Jo, sánderuchi sési irekaaka ka sánderu orhepanchi niáraaka jatsini “tsípikua [para] méntkisï” (1 Tim. 6:19).