SÁNO iáminduechaksï uékasïndi felisiini. Peru ini últimu jurhiatikuechani úkua jukasti (2 Tim. 3:1). Uánikua ambe úsïndi eska kʼuiripu no felisiuaka, komu enga no sési kánhaaka, pʼamenchakuecha, no jatsini ánchikuarhita o uarhiranchani nemani. Jeobaeri marhuarichajtuksï uáti desanimarikuarini ka sánhani arhinksï nóteru tsípinia. Engachi i ambe nitamakuarhini jaka, ¿nénachi uá ménderu tsípini pʼikuarherantani?

Para mókuntani ini ambe, orhetachi kurhanguaka ambe arhikuekasïni tsípini pʼikuarherani ka na engaksï máru no tsïtajka tsípikuarhitani nájkirukaksï jatsiajka problemechani. Tátsekuachi exeaka ambechi uá úni parachi no tsïtani ka sánderuchi tsípini pʼikuarherani.

Tsípini pʼikuarherani no májkuenisti eska alegre jarhani. Por ejemplu, kʼuiripu ma enga jukari alkoli arhajka jamberi uáti tsípini jarhani peru enga ambonhaskajkia, nóteru tsípisïndia ka miántasïndi eska uánikua problemechani jatsiaska. Ma ratujkusï alegre japti. No meru tsípini pʼikuarheraxapti (Prov. 14:13).

Tsípini pʼikuarherani méntku ménderuenisti. Felisidadi máesti engachi pʼikuarhinhijka o tsípikuarhita ma jimbokachi jatsiska ambe ma o jimbokachi erokuarhixaka ambe ma. Arhikuekasïndi felisi jarhani no arhiparini ambe uéjkichi nitamani jarhani (1 Tes. 1:6). Kʼuiripu ma uáti no sési pʼikuarherakua ma jatsini peru tsípini pʼikuarherani jarhani. Por ejemplu, apostulichaksï kʼuikirhinhaspti jimbokaksï Kristueri ambe aianhpisïrenga, peru Biblia arhisïndi eskaksï ima “uéntasp[ka] jusgadurhu kánikua tsípiparini, jimboka Diosï íntsaaspka sésikua no sési arhinhanksï Kristueri nombri jimbo” (Uku. 5:41). Nóksï tsípispti jimbokaksï kʼuikirhinhaspka, sino jimbokaksï no jurajkuspka Jeobani.

No nema tsípini pʼikuarheraparini andajpenusïndi ka ni ísku jatini ísï pʼikuarherajki. ¿Andi? Jimboka tsípini pʼikuarherani ambe máeska enga espiritu santu úrpijka. I espiritujtsïni jarhuatasïndi jimbanhi kʼuiripu máeni ka únchi tsípini pʼikuarherani (Efes. 4:24, TDU; Gal. 5:22). Ka ísïchi sánderu sési orhepani uérakuasïnga problemechani.

Enga Jeoba Echerini úpka, uékasïrendi eska iámu ambe sésipiringa, no ísï eska iásï na jánhaskuarheka. Ka nájkiruka kʼuiripu no sési ambe újka, Jeoba útasï tsípini pʼikuarherasïndi. Biblia arhisïndi eska ima uinhapitiiska ka eska tsípini pʼikuarherasïnga (1 Crón. 16:27). Ístu, tsípisïndi engaksï imeri marhuaricha sési ambe újka (Prov. 27:11).

Uákachi májkueni úni eska Jeoba engachi no jukari uandanhiauaka enga ambe ma no ísï uéraska eskachi na erokuarhienga. Enbesi dechi nóteru tsípinia, ju je exeni ambakiti ambe engachi  jatsika ka tekantskua jingonchi erokuarhiaka eska ambe ma sési niántaaka. *

Bibliarhuksï jarhasti ejempluecha Jeobaeri marhuaricheri engaksï tsípini pʼikuarherapka nájkirukaksï no sési nitamanchapka. Ma jindespti Abraani. Ima problemechani jatsiaspti máteruecheri kulpa jimbo ka nitamakuarhispti máru ambe enga jimbo úpiringa uarhini (Gén. 12:10-20; 14:8-16; 16:4, 5; 20:1-18; 21:8, 9). Peru méntkisï tsípini pʼikuarheraspti. ¿Andi? Jimboka miásïrenga eska erokuarhikua ma jatsispka para jimbanhi parhakpinirhu irekani enga Mesiasi juramuni japiringuia (Gén. 22:15-18; Ebr. 11:10). Jesusi uandaspti: “Chári táti Abrani tsípisïrendi jimboka exepiringa juchiti jurhiatikuani” (Juanu 8:56). Juchajtuchi májkueni uáka eska Abraani engachi tsípikua jingoni eratsintaska iámindu ambakiti ambe engachi jatsiaka sánderu orhepatini (Rom. 8:21).

Ísï eska Abraani, apostuli Pablu ka Silasi, miásïrediksï Jeobaeri aiatsperakuechani. Imecheri jakajkukua uinhapispti, jimboksïsï tsípini pʼikuarherapti nájkirukaksï no sési nitamakuarhini japka. Ma uelta, kʼuikirhinhasptiksï ka ónhanhanksï. Biblia arhisïndi: “Terojkani chúrikua ísï, Pablu ka Silasi kómarhixaptiksï ka pirekunksï Diosïni” (Uku. 16:23-25). A parti deksï uinhapikuarhintani imecheri erokuarhikua jimbo, tsípinksï pʼikuarherasïrendi jimbokaksï Kristueri nombri jimbosï no sési nitamakuarhini japka. Engachi juchajtu uéjka májkueni úni, jatsiskachi para miáni eska ambakiti ambe jarhasïnga engachi jakajkukua jingoni marhuakujka Jeobani (Filip. 1:12-14).

Iásïjtu, jarhastiksï ambakiti ejempluecha erachicheri engaksï no tsïtajka tsípikuarhitani nájkirukaksï jatsiajka problemechani. Por ejemplu, nobiembrini de 2013, supertifón Haiyan kʼamajkuspti sentruni de Filipinas. Kʼamajkuaspti jukari mili familia Testiguecheri kʼumanchikuechani. I ambe úkuarhinchaspti George, Tacloban anapu erachi ma. Uandaspti: “Nájkiruka i ambe úkuarheka, erachichaksï tsípixati. No úsïnga uandani na engachi xáni tsípini pʼikuarherajka”. Engachi eratsintaska ambe enga úkia Jeoba juchantsïni jimbo ka engachi agradesidueska, tsípinchi pʼikuarheraaka nájkirukachi no sési nitamakuarhiaka. ¿Ambeterujtsïni íntskuski Jeoba parachi tsípini pʼikuarherani?

Kʼéri ma rasonichi jatsiska parachi tsípini pʼikuarherani, jimbokachi sési pájperasïnga Jeoba jingoni. Mítiskachi imani enga Juramutiika iámindu amberi. Ima jindesti juchari Tata Diosï, Táti, ka Amigu (Sal. 71:17, 18).

Máteru rasoni parachi tsípini pʼikuarherani, jindesti eskachi tsípiti jarhaska ka úsïngachi tsípikuarhini (Ecl. 3:12, 13). Ístu, komu Jeoba úka eskachi andarherapiringa, mítiskachi néna eratsisïni ka ambe uékasïni eskachi uáka (Kol. 1:9, 10). Ini ambe jimbo, mítiskachi ambe úni juchari tsípikua jingoni, peru sáno iámindu kʼuiripu no mítisti. Pablu ini ambe uandaspti: “‘Inde ambe enga no nema exeka, ka níjtu kurhandini, ka enga no nema tantiaripka eratsini imeri mintsitarhu, inde ambe jindesti enga Diosï preparadu jatsika para imecha engaksï uékajka imani’. Peru Diosïjtsïni mítitarasti juchantsïni indeni ambe imeri Espirituni jimbo” (1 Kor. 2:9, 10). Kurhanguni Tata Diosïri eratsikuani ka ambe enga uéjka, jindesti máteru rasoni parachi tsípini pʼikuarherani.

Exeakachi máteru ambe enga Jeoba úka imeri ireta jimbo. Ústi ambe enga xáni uétarhijka parachi puáminhantaani pekaduechani (1 Juanu 2:12). Ka imeri pʼamojperakua jimbo, íntskustijtsïni erokuarhikua parachi irekani jimbanhi parhakpinirhu enga axuterku jakaia (Rom. 12:12). Ka íntskusïndijtsïni familia ma parachi májku kʼéri marhuakuni (Sal. 133:1). Ístu, Bibliajtsïni arhisïndi eska Jeoba kuidarisïnga imeri iretani Satanasiri ka demoniuecheri (Sal. 91:11). Engachi eratsintaska ini ambe, sánhani arhiakachi sánderu tsípini pʼikuarherani (Filip. 4:4).

¿Uáchi sánderu tsípini pʼikuarherani? Jesusi uandaspti: “Ini ambeksïni uandontskuarhichiska para eskajtsï chájtu jatsiaka indeni tsípikuarhitani engani ji jatsika ka para eskajtsï kánikuamindu tsípiaka” (Juanu 15:11). I textu xarhatasïndi eskachi uáka sánderu tsípini pʼikuarherani. Tsípikuarhita ísïsti komueska chpiri. Engachi uéjka eska chpiri sánderu tixaraaka, jatsiskachi para sánderu chkari jatsikuni. Májkueni, engachi uéjka sánderu tsípini pʼikuarherani, jatsiskachi para uinhaperani Tata Diosïri espiritu jingoni. Jimbochisï seguiriuaka kurhakuni Jeobani imeri espiritu ka eratsintani ambe engachi arhintajka Bibliarhu, enga espiritu santu jimboeka (Sal. 1:1, 2; Luk. 11:13).

Máteru ambe engachi jimbo uáka sánderu tsípini pʼikuarherani, jindesti úni ambe enga Jeoba jaiapanhintajka (Sal. 35:27; 112:1). ¿Andi? Jimbokajtsïni ima kueraaska parachi úni ambe enga ima uéjka. Bibliajtsïni arhisïndi: “Chénhari Tata Diosïni enga sési jimboeka ka patsa imeri juramukuechani. Jimboka i ambeska sánderu jukaparhakua ambe, enga jatsika para úni kʼuiripu” (Ecl. 12:13). Jimbochisï tsípini pʼikuarherajka engachi marhuakujka Jeobani. *

Engachi tsípini pʼikuarheraaka, nochi incharinisïjkusï ísï pʼikuarheraaka, ístuchi jatsiauaka máteru kóntperatechani. Por ejemplu, engachi tsípikua jingoni marhuakujka Jeobani, nájkirukachi problemechani jatsiauaka, jaiapanherantanchi jarhasïnga (Deut. 16:15; 1 Tes. 5:16-18). Engachi tsípini pʼikuarheraaka, nochi uékaaka jukari jatsikuarhikuekani ka sánderuchi ambe uáka Reinu jimbo (Mat. 13:44). Engachi ísï úska, sánderuchi tsípini pʼikuarheraaka, agustuchi jauaka ka jánguarhintaakachi sési pʼikuastaani máteruechani (Uku. 20:35; Filip. 1:3-5).

Ístu, sánderu tsípini pʼikuarherani, jamberi uáti eskachi no xáni pʼamenchaaka. Biblia arhisïndi: “Mintsita ma enga tsípini pʼikuarherani jarhajka ísïsti eska ambakiti medisina” (Prov. 17:22). Inbestigadori ma enga doktorika Universidad de Nebraska (Estados Unidos), arini ambe uandaspti enga terokuntajka Biblia jingoni: “Enga cha iáiasï felisiika ka sésijtsï pʼikuarherani ísï eskajtsï na irekaka, jamberijtsï sánderu orhepani no xáni pʼamenchaaka”.

Eskachi na exekia, nájkirukachi irekani jaka ini jurhiatikuechani engaksï úkua jukaka, uákachi tsípini pʼikuarherani. Jimbochisï jatsika para kurhajkuarhini espiritu santu, estudiarini Bibliani ka eratsintani. Ístu, engachi uéjka sánderu tsípini pʼikuarherani, jatsiskachi para eratsiantani kóntperatechani engachi jatsiaka, xásï ma jakajkukua jatsini eska máteru Jeobaeri marhuaricha ka úni ambe enga Jeoba uéjka. Ísïchi pʼikuarheraaka ambe enga Salmo 64:10 arhijka: “Ima enga jurhimbitiika Jeobani jimbo tsípiati ka imani andarhieraati para kuájchakukuarhini”.