“PʼIKUNTSKUA kánikuesti, ka namunituestiksï pʼikuntsticha, ísï jimbo kómarhi je pʼikuntskueri Dueniembani eska axauakateru pʼikuntstichani” (Luk. 10:2). Íksï uandakuecha enga tata Jesukristu uandaapka ase dos mili uéxurhinisï, sésiksï xarhatasïndi ambe enga úkuarhini jaka Myanmar. ¿Andi? Jimboka Myanmar 4,200 eianhpirichajkuksïsï jaka engaksï eianguajka Reinueri ambe 55 miioni kʼuiripuechani.

Peru Jeoba, ‘pʼikuntskueri Dueniu’, uápuru ísï anapu erachichani mintsitarhu niárakuasti paraksï mótsini ini paisirhu enga sureste asiatikurhu jaka ka jarhuajpinksï Jeobaeri ambe mítitarpini. ¿Ambe manataaski paraksï jurajkuni imecheri paisini? ¿Nénaksï úspi ísï úni? ¿Náki kóntperatechanksï jatsiaxaki? Ju je exeni.

Nótki xáni iónisïndi enga Kazuhiro, Japón anapu prekursori ma, ataki epileptiku ma pʼípka, mirikurhispti ka ospitalirhuksï páspti. Doktori arhispti eska tsimani uéxurhini no manejaripiringa. Kazuhiro no úsïrendi jakajkuni ka eratsispti: “¿Ambe uáia? Ambe engani sánderu tsitijka, jindesti prekursorini ka no uékasïnga jurajkuni”. Mintsita jingoni kurhakuspti Jeobani eska jarhuatapiringa para úni seguirini prekursorini.

Kazuhiro uandantasïndi: “Ma kutsï tátsekua, juchiti amigu ma enga Myanmar marhuani japka, mítispti ambe engani úkuarhinchapka. Uandajpasptirini ka arhindini: ‘Ixú Myanmar, autobusi sánderu úrakuarhisïndi para nani mótsini. Engari jurhaska, úpiringari seguirini prekursorini ka nori jamberi uétarhinchaaka karruni ma’. Kurhamarhispka doktorini sini ji úpirini Myanmar nirani irekani nájkirukani pʼamenchani japka. Ambe engarini arhipka, ískurini pakataspti, jimboka uandaspka: ‘Myanmar anapu neurologu ma, (doktori ma enga éjpuni estudiarijka), Japón jarhasti iáiasï. Presentaricheakakini. Engari pʼiraska ménderu atake ma, imakini uáti atenderini’. Para ji, ima jindespti Jeobaeri mókuntskua”.

Kazuhiro seguirispti korreu elektroniku ma axani Myanmar anapu sukursalirhu, nani enga uandenga eskaksï ima ka imeri témba, uékasïrenga jima marhuani komueska prekursoricha. Sinku jurhiatikuajku tátsekua, sukursali mókukuspti: “Ju je, uétarhinchaaxakachi sánderu prekursorichani”. Kazuhiro ka témba Mari, atarantaasptiksï imecheri karruechani, úrkuarhiasptiksï bisechani ka piásptiksï abioniri boletuechani. Iásïksï kánikua tsípikua jingoni marhuaxatia grupurhu ma enga lenguaje de seniasirika jini Mandalay. Kazuhiro uandasïndi: “Ambe engachi xáni úkuarhinchaka, ústi eskachi sánderu mintsikaaka imani eiatsperakuani enga Salmo 37:5  uandajka: ‘Jeobani jurajkuku chíti xanharu, imani mintsika, ka ima uáti ambe ma parakini jarhuatani’”.

Uéxurhini 2014, Myanmar anapu Jeobaeri testiguechaksï kʼéri pribilegiu ma jatsispti: jima úkuarhipirindi kʼéri tánguarhikua espesiali ma. Uánikua máteru nanisï anapuechaksï pʼímarhinhaspti ini kʼéri tánguarhikuarhu. Ka ístu Monique, Estados Unidos anapu pirenchi ma enga 34 jatirika, uandasïndi: “Engani junguapkia kʼéri tánguarhikuarhu uératini, kómarhispka Jeobani de ambe engani jatsipiringa para úni juchiti tsípikua jingoni. Ístuni uandaxespka juchiti táticha jingoni de ambe engani uékenga úni parani sánderu marhuakuni Jeobani. Taniperanchi sési exespka eskani Myanmar nipiringa marhuani. Peru ante de meru eratsini ambesïni úpirini, jatsispka parani kánikua kómarhini Jeobani ka jurajkuspka eska nitamapiringa ma tiempu”. Monique, eiangusïndijtsïni andi.

Ima uandasïndi: “Jesusi pʼímarhiaspti imeri disipuluechani paraksï kalkulariuani gastuechani. Ísï jimbo, kurhamarhikuarhispka: ‘¿Jatsiski tumina xáni eska xáni uétarhijka parani ísï úni? ¿Uá mantenerikuarhini sini jatsini parani sánderu ánchikuarhini?”. Monique uandasïndi: “Kuenta íntskukuarhispka eskani no andangutapiringa tumina parani Myanmar nirani irekani”. Jimajkani, ¿ambe úspi para úni mótsini? (Luk. 14:28).

Monique seguirisïndi uandantani: “Ma jurhiani, juchiti patronarini arhispti eska uékasïrenga jíndini jingoni uandontskuarhini. Kánikua chéni pʼikuarheraspka, ísï eratsisïrenga enajkirini chútantapirini. Peru no ísï úspti, sánderu sési, agradeserichesptirini juchiti ambakiti ánchikuarhita jimbo, ka arhisptirini eska arreglarispkia iámindu ambe parakani intsïnhapiringa tumina ma. Meru xánispti eskani na xáni uétarhinchani japka parani meiampiani juchiti kántsperatechani”.

Monique, Myanmar irekaxatia desde disiembrini de 2014. ¿Néna pʼikuarherasïni jima marhuani jarhani engaksï kánikua uétarhini jaka publikadoricha? Ima uandasïndi: “Kánikuani tsípixaka engani ixú jaka. Tanimu kʼuiripuni jorhendaxaka Bibliaeri ambe. Ma uarhiiti máesti enga 67 jatirikia ka méntkisïrini tsípikua jingoni erokasïndi ka kamanharhindini. Asta ueraspti enga jorhenguarhipka eska Tata Diosï Jeoba arhinhasïnga. Arhisptirini: ‘I primeru ueltesti engani kurhajka Tata Diosïri nombrini. T’uri sánderu sapichueska eska ji ka t’urini jorhendaska ma ambe enga sánderu jukaparhakueka’. Ka asta ji jamberini ueraspka. I járhati experiensiaechaksï úsïndi eska tsípikuarhita máeuaka marhuani nani enga uétarhini jaka”. Nótki iónisïndi enga Monique nika Jorhentperakuarhu para Eianhpiricha Reinueri.

Ambe enga uandanhapka Anuario de los testigos de Jehová 2013, Myanmariri ambe, ístu jarhuataaspti máteruechani paraksï uékani mótsini indeni paisirhu. Li, pirenchi ma enga 30 ísï jatirikia, sureste asiático irekaspti ka tiempu kompletueri ánchikuarhisïrendi, peru ambe enga arhintapka Anuario jimbo, jarhuataspti para eratsini Myanmar nirani marhuani. Ima uandasïndi: “Uéxurhini 2014, engani Yangón nípka kʼéri tánguarhikua espesilirhu ma, temungurhirini ma mítispka engaksï kúnguarhikua chino jimbo marhuani japka jini Myanmar. Ka komu ji chino uandajka, eratsipka Myanmar mótsini para apoiarini grupuni ma chino jimbo. Monique ka ji eratsispkachi márku marhuani jini Mandalay. Jeobajtsïni újchakuraspti ka mísmu eskuelarhuchi exentaspka ánchikuarhita ma mediu tiempueri komu maestrecha. Ístuchi exentaspka kʼumanchikua ma para irekani jima no iauani. Nájkiruka kánikua aparhekuarhipka ka ístu jarhani máteru ambe, kánikua tsípisïnga ixú marhuani. Myanmar anapuechaksï arisku sáni irekasti, sésiksï kámpisïndi ka uékasïndiksï kurhaani Bibliaeri ambe. Kʼéri ma tsípikuarhitesti exeni na enga Jeoba újchakurajka eianhpikuani. Sési mítitixaka eska Jeoba uékasïnga eskani ixú Mandalay marhuani jauaka”.

Uánikua erachicha engaksï jarhuajpijka territoriuecharhu engaksï sánderu uétarhijka, exestiksï na enga xáni uinhapikua jatsika kómarhikua. Por ejemplu, Jumpei ka témba Nao, jukariksï treinta jatiristia ka marhuaxaptiksï lenguaje de seniasi ma jimbo jini Japón. ¿Andiksïsï Myanmar mótsi? Jumpei uandantasïndi: “Juchiti uarhiiti ka ji méntkisïchi uékaspka marhuani máteru paisirhu. Juchari kúnguarhikuarhu anapu erachi ma enga ístu lenguaje de seniasirhu japka, Myanmar mótsispti. Ka juchajtuni májkueni úspka maiuni de 2010, nájkirukachi no kánikua tumina patsarini japka. Myanmar anapu erachichajtsïni kánikua uékperakua jingoni erokaspti”. ¿Ambe uandasïni Jumpei Myanmar anapu aianhpikueri? Ima uandasïndi: “Kʼuiripu kánikua jukaparharasïndi ambe engachi eianguajka. Engaksï lenguaje de seniasi jimbo exeajka bideuechani, ima engaksï no kurhajka, ískuksï pakarasïndi. Kánikuachi sési pʼikuarheraxaka engachi erakuka ixú jurhani”.

¿Ambeksï úski Jumpei ka Nao paraksï andangutani tumina? Jumpei uandasïndi: “Engachi tanimu uéxurhini japkia, sánochi iámu úraspkia tumina engachi patsarini japka ka nóteruchi kámasïrenguia ni para meiampini máteru uéxurhiniri renta. Kánikuachi kómarhispka Jeobani. Ískuchi pakaraspka engajtsïni sukursali pʼímarhipka parachi ma tiempu marhuani komueska prekursori espesialicha. Mintsikaspkachi Jeobani ka imajtsïni no jurajkuspti. Méntkisïjtsïni kuájchakusïndi”. Nótki xáni iónisti enga Jumpei ka Nao nika Jorhentperakuarhu para Eianhpiricha Reinueri.

Simone, Italia anapu erachi ma enga 43 jatirika ka témba Anna enga Nueva Zelanda anapueka 37 jatiri, mótsistiksï Myanmar. ¿Ambe jarhuataaspi? Anna uandantasïndi: “Anuario 2013 enga Myanmariri ambe uandapka”. Simone seguirisïndi uandani: “Kʼéri ma pribilejiuesti Myanmar jarhani. Arisku sáni irenhasti ka sánderuni tiempu jatsisïnga parani Jeobani marhuakuni. Kʼéri ma tsípikuarhitesti exeni na engajtsïni Jeoba kuájchakujka engachi jima marhuajka nani engaksï sánderu eianhpiricha uétarhijka” (Sal. 121:5). Annajtu uandasïndi: “No na jatini xáni felisispka. Ariskuni sáni irekaska ka sánderu tiempu jatsisïnga parani juchiti achati jingoni jarhani; sánderuchi sési pájperasïnga. Ka ístuchi ambarhati amiguechani jatsiaska. Kʼuiripu sési kaasïndi Testiguechani ka kánikuaksï interesi xarhatasïndi jurhimbikua jimbo”. ¿Ambe arhikuekasïni?

Anna uandantasïndi: “Ma jurhiani, predikarikuspka merkadurhu nanakani ma enga unibersidadirhu nirenga ka arhispka eskani pʼorhembintapiringa. Engachi exejperantapka, ima amigani ma páspti. Ka engani ménderu pʼorhembipka, paaspti máteru. Ka tátsekua máteruechani. Iásï, sinku ima uátsïcha jingoni estudiarixakaia”. Simone uandasïndi: “Imechani engachi predikarikuajka, kánikuaksï sési kámpisïndi ka uánikua ambeksï uékasïndi mítini. Kánikuaksï tsitisïndi jorhenguarhini. Nochi andangutasïnga tiempu para iáminduechani pʼorhembiani”.

¿Ambeksï úspi máru erachicha ante deksï eratsini Myanmar nirani? Mizuho, Japón anapu,  uandantasïndi: “Juchiti achati Sachio ka ji, méntkisïchi uékaspka nirani paisirhu ma nani engaksï uétarhini japiringa sánderu eianhpiricha, peru ¿naniipirini? Mintsitarhujtsïni niárachespti ambakiti experiensiauecha Anuario 2013 anapueri. Ísï jimbo, eratsispkachi Myanmar nirani marhuani”. Sachio uandasïndi: “Eratsispkachi Yangón jarhani ma semana, kʼéri ireta ma Myanmar anapu. Uékasïrengachi exeni aberi néna jándespi. Inde ambe úspti eskachi eratsipiringa eskachi jatsispka para jima mótsini”.

Rodney ka imeri témba Jane, Australia anapuestiksï ka sinkuenta ísïksï jatiristi. Temungurhirini ka tsimani uájpecha jingoni, Jordan ka Danica, Myanmar marhuaxatiksïa desde 2010. Rodney uandantasïndi: “Ískuchi pakaraspka engachi exepka xáni uáni kʼuiripuni uétarhinchani jarhani Tata Diosïri ambe. Pʼímarhiauasïnga familiauechani paraksï jánguarhintani nirani marhuani paisi ma jimbo komu Myanmar”. ¿Andisï ísï uandajki? Rodney uandasïndi: “Nochi uáka terokutantaani kóntperatechani engachi ixú intsïnhaaka. Uánikua tumbiichaksï iásï uandanhiasïndi imecheri telefunu jimbo, karru, ánchikuarhita ka mámaru jásï ambe jimbo. Peru juchari sapiichaksï kánikua okupadu jarhasti para jorhenguarhiani jimbanhi uandakuechani para aianhpikuarhu úraani. Uékasïndiksï jorhenguarhini néna kurhangutaraani kʼuiripuechani engaksï no mítika Bibliani ka mókuntskua íntspiani tánguarhikuecharhu. Kánikuaksï okupadu jarhasti ini ambe jimbo ka máteru jásï ambe jimbo paraksï sánderu marhuakuni Jeobani”.

Oliver, Estados Unidos anapu erachi máesti enga 37 jatirika. Uandasïndi andisï sési jaki máteru paisi jimbo nirani jarhuajpini: “Jeobani marhuakuni máteru nani ísï, kánikuarini marhuachisti. Máteru nani ísï nirani irekani para Jeobani marhuakuni, ústi eskani sánderu jakajkuaka ka mintsikani Jeobani, no arhiparini ambe uéjki úkuarhini. Marhuani kʼuiripuecha jingoni engani no mítiapka, peru engaksï májkueni ambe jakajkujka eska ji, jarhuatastirini exeni eska parhakpinirhu no ma ambe jarhaska enga sánderu jukaparhakueka eska Tata Diosïri Reinu”. Iásï, Oliver ka imeri témba Anna, seguirixatiksï tsípikua jingoni predikarikuni kʼuiripuni enga chino uandajka.

Trazel, Australia anapu pirenchi ma enga 52 jatirika, Myanmar marhuaxati desde 2004, ima uandasïndi: “Pʼímarhiasïnga iáminduechani engajtsï uáka, parajtsï marhuani nani engaksï sánderu eianhpiricha uétarhini jaka. Kuenta íntskukuarhiska eska Jeoba kánikua újchakurasïnga imani enga uéjka marhuakuni. No méni eranhaskaspka xásï ma irekua. I jindesti sánderu ambakiti irekua engani úpiringa jatsini”.

Erokuarhisïngachi eskaksï i komentariuecha erachicheri, jarhuataaka para cha exekuarhini sintsï uá jarhuataani imechani engaksï nótki méni predikarimenhani jaka. Ísïsti enajkiksïni erachicha engaksï imani lugari jimbo marhuani jaka, arhipiringa: “¡Ju je Myanmar ka jarhuatajtsïni je!”.