Ju je pʼamojperakua xarhatakuani iámindu jásï kʼuiripuechani
ENGA Jesusi jorhendaapka imeri disipuluechani paraksï aianhpini ambakiti aianhperakuani, mítispti eska no iámindu kʼuiripu sési eroapiringa (Luk. 10:3, 5, 6). Aianhpikuarhu, ménisïchi exeantasïnga kʼuiripuechani engajtsïni no sési kámajka o asta engaksï uéjka uarhipeni. Jiájkani, kurhangukuarhisti eska i ambe úsïnga eska úkua jukaaka eskachi seguirini jauaka pʼamojperakua jingoni kámpini.
Kʼuiripu enga pʼamojpitika, exesïndi ambe engaksï uétarhinchani jarhajka máteruecha ka problemechani engaksï jatsiajka, pʼamojkuasïndi ka uékasïndi jarhuataani. Engachi nóteru pʼamojpitiuakia, uákachi nóteru xáni tsípikua jingoni aianhpinia nijtsïni sési nicheni. Peru engachi jánguarhintaaka pʼamojpitini, i ambe uáti eskachi seguiriuaka tsípikua jingoni jámani. Ísïuati komueska sánderu chkari jatsikuni chpirirhu paraka no pátakuarhiaka (1 Tes. 5:19, Táta Diósïri Uandakua Tata Jesukristueri Aiatsperakua).
¿Nénachi uá jorhenguarhini sánderu pʼamojpitini, asta engachi úkua jukanchaaka? Ju je exeani tanimu ejempluechani parachi májkueni úni: Jeobaeri, Jesusiri ka apostuli Pablueri.
JU JE MÁJKUENI PʼAMOJPINI ESKA JEOBA
Desde iónisïa, Jeoba tekantastia eska no sési járhati chkuanderakua ambe uandanhaaka imeri ambe. Peru seguirixati “kóndianta[ni] asta imechani jamberi engaksï no sáni diosmeiamukua arhijka ka maluenksï” (Luk. 6:35). Ka xarhatasïndi ini ambe enga tekaantani jaka. Ima uékasïndi “eskaksï iámindu kʼuiripuecha pʼímutantskateaka” (1 Tim. 2:3, 4). Nájkiruka kurhunhijka no sési jásï ambe, kánikua jukaparharasïndi kʼuiripuni ka no uékasïndi eska nema uarhiaka (2 Ped. 3:9).
Jeoba mítisti eska Satanasi úska eska kʼuiripu enga no jakajkutika, no uáka jánhaskani Tata Diosïri ambe (2 Kor. 4:3, 4). Uánikuechanksï desde sapichku jorhendasti chkuanderakua ambe Tata Diosïri. Ísï jimbo, na engaksï eratsijka ka pʼikuarherani, úsïndi eskaksï úkua jukanchaaka jiókuarhini Bibliaeri jurhimbikuani. Peru Jeoba uékaxati jarhuataani. ¿Nénachi mítiski?
Ju je exeni ambe enga úpka ninibitecha jingoni. Nájkirukaksï no sési úripka, Jeoba arhispti Jonasini: “¿No pʼamojkuapirini Nínibe anapu kʼuiripuechani, imani xáni kʼéri iretani nani engaksï irekani jaka jukari sientu beinte mili achaticha engaksï no jamberi újka mítini náki jindeski imecheri jájki jurhijkandani anapu ka náki enga jindeka uikixkandani anapu[?]” (Jon. 4:11). Jeoba kuenta íntskukuarhispti eskaksï ninibitecha no ma ambe mítispka imeri ambe. Jimbosï pʼamojkuapti ka Jonasini axani para aianguani ambe enga uékani japka úni imani iretani jingoni.
Juchajtu májkueni eska Jeoba, jukaparharaasïngachi kʼuiripuechani. Uákachi ísïini eska ima, engachi mintsita jingoni uékaska jarhuataani imechani engajtsïni kurhajchajka, nájkirukaksï ísï xarharaaka eskaksï no jiókuarhiaka jurhimbikuani.
JU JE MÁJKUENI PʼAMOJPINI ESKA JESUSI
Májkueni eska imeri Táti, Jesusi pʼamojkuaspti kʼuiripuechani engaksï uétarhinchani japka Tata Diosïri ambe mítini. “Enga exeapka xáni uánikua kʼuiripuechani, lastima uáspti, jimbokaksï jandiajku jámaxapka ka etsakuarhitini komueska karichicha engaksï nómbe erangutini jatsijka” (Mat. 9:36). Jesusi no solu exesïrendi na engaksï járhatipka kʼuiripuecha. Mítispti eskaksï relijioniri orhejtsïkuticha no sési kaaspka imechani engaksï nirenga Jesusini kurhajchani, ka eskaksï chkuanderakua ambe jorhendaaspka. Nájkiruka mítipka eskaksï uánikua ima kʼuiripuecha jurajkupiringa eskaksï imecheri uandanhiatecha úpiringa eskaksï nóteru chúxapapiringia Jesusini, ima “mámaru ambe jorhendasïrendi” (Mar. 4:1-9).
Ju je no chketakuarhini engajtsïni uénani jámani kʼuiripu no uékaaka kurhajchani
Kʼuiripueri irekua mójtakurhisïndi ka ístu, uáti tátsekua jiókuarhinia jurhimbikuani
Enga kʼuiripu no sési jiókuarhiaka ambe engachi aianhpijka, nochi jatsiska para solu imecheri jángua ambejku exeni, sino kurhamarhikuarhini andiksïsï ísï jámajki. Jamberiksï máru no jiókuarhijti Bibliaeri ambe o kristianu úkuarhini, imecheri kulpa jimbo engaksï no sési jámajka ka uandanksï eskaksï kristianueska. Jamberiksï máteruechani chkuanderakua ambe arhiati juchari jakajkukuecheri ambe. O jamberi jati nema enga chéjka eska engajtsïni kurhajchaaka, imecheri besinu o familiari ma teresmarhuaka.
Jamberiksï máru no jiókuarhijti jimbokaksï no sési jásï ambe nitamakuarhiska ka kómu pʼikuarheranksï jarhani. Misionera ma enga Kim arhinhajka, uandasïndi: “Lugarirhu ma engachi aianhpijka, uánikuaksï kómu nitamasti guerra ma jimbo nani engaksï iámu ambe tsïtakuarhika. Nóksï ma erokuarhikua jatsisti. Nóksï mítisti ambe úni ka no nemanksï mintsikasïndi. Sáno méntkisï, exeantasïngachi kʼuiripuechani engaksï no jiókuarhijka Bibliaeri ambe. Ma xanhari engani aianhpini japka, no sésijtsïni kámaspti”.
¿Ambe úsïni Kim para seguirini jarhani xarhatani pʼamojperakua? Pirenchi uandasïndi: “Engarini kʼuiripu no sési kámajka, jánguarhintasïnga miáni ambe enga arhijka Proverbios 19:11: ‘Kʼuiripueri jánhaskakua úsïndi eska no sóntku ikiauaka’. Exeni ambe engaksï nitamakuarhini jarhajka kʼuiripuecha, úsïndi eskani pʼamojkuauaka. Ka aparti, márujtsïni sési erokasïndi. Imani mísmu lugari jimbo, uánikuachi rebisitechani jatsiaska”.
Ístuchi úpiringa kurhamarhikuarhini nénachi jiókuarhipirini jucha Tata Diosïri Reinueri ambe engachi kʼuiripuecheri lugari jimbo japiringa. Por ejemplu, engajtsïni someni chkuanderakua ambe arhipiringa Jeobaeri testiguecheri ambe, jamberichi juchajtu no jiókuarhipiringa ka uétarhinchanchi eskajtsïni pʼamojkupiringa. Miáni Jesusiri juramukuani eskachi ísï káuaka máteruechani eskachi jucha na uéjka eskajtsïni kámaaka, inde ambe uáti eskachi kurhangukuauaka máteruechani, asta engachi úkua jukanchaaka (Mat. 7:12).
JU JE MÁJKUENI PʼAMOJPINI ESKA PABLU
Apostuli Pablu imechani jamberi pʼamojkuaspti engaksï no sési kámenga. ¿Andi? Jimboka no mirikurhisïrenga na enga jásïpka antesi. Uandaspti: “Nájkirukani orheta no sési arhienga Diosïni, ka no sési kaani jakajkutichani, ka xukajchaani. Peru kóndintastirini jimbokani ísï úsïrenga no mítiparini, jimajkani engani nótki jakajkuenga” (1 Tim. 1:13). Pablu kurhangusïrendi eskaksï Jeoba ka Jesusi kánikua pʼamojkuspka. Para xarhatani na enga pʼamojkunhapka, jánguarhispti predikarhikuani kʼuiripuechani.
Ménisï, Pablu exeantasïrendi kʼuiripuechani engaksï uánikua ambe jakajkuenga engaksï no sési japka. ¿Ambe úsïreni enga inde ambe úkuarhienga? Ukuecha 17:16 arhisïndi eska enga Atenasi japka, ma uelta, kánikua no sési pʼikuarheraspka “jimboka exespka eskaksï iámindu imani iretarhu anapuecha puru idoluechani kómarhiasïrenga”. Peru úraspti imani ambe enga no sési pʼikuastapka para úni predikariini (Uku. 17:22, 23). Pablu mójtakusïrendi na enga aianhpienga seguni kʼuiripuecheri irekua para úni salbariuani máru kʼuiripuechani xáni eska xáni úpiringa (1 Kor. 9:20-23).
Uákachi májkueni úni eska Pablu, engachi exentaska nemani engajtsïni no sési erokaaka o enga jakajkukuechani jatsiaka engaksï no jurhimbitiika. Ju je úrani ambe engachi mítika kʼuiripuecheri para jarhuataani mítini “ambakiti eianhperakuani, enga sánderu ambakiti ambeka” (Is. 52:7). Por ejemplu, pirenchi ma enga Dorothy arhinhajka, uandasïndi: “Uánikua kʼuiripuechani juchari territoriueri anapuechani, jorhendaastiksï eskajtsïni Tata Diosï no sáni pʼamojkuparini jusgarisïnga. Orheta, felisitariuasïnga engaksï jakajkujka Tata Diosïni ka tátsekuani jorhendaasïnga ambe enga Biblia arhijka Jeobaeri uékperakueri ambe ka ambe engajtsïni aiachejka para sánderu orhepani”.
JU JE SEGUIRINI AMBAKITI AMBE JIMBO ANDANI NO SÉSI JÁSÏ AMBENI
Engaksï kʼamakurhini jauakia ‘últimu jurhiatikuecha’, máru kʼuiripuecha engachi predikarikuajka sánhani arhiatiksï sánderu no sési jámani (2 Tim. 3:1, 13). Peru nochi jatsiska para jurajkuni eska i ambe uáka eskachi nóteru pʼamojpiakia o tsípini. Jeobajtsïni íntskusïndi uinhapikua parachi seguirini jarhani “ambakiti ambe jimbo anda[ni] indeni ambeni enga no sésika” (Rom. 12:21). Prekursora ma enga Jessica arhinhajka, uandasïndi: “Someni exentasïnga kʼuiripuni enga kʼéramakuarhijka ka engajtsïni no exenchajka, nijtsïni uékani kurhajchani. I ambejtsïni uáti no sési pʼikuaskuni. Engani uénajka uandontskuarhini nema jingoni, sïpatikuarku arhisïnga Jeobani eskarini jarhuataaka ísï exeni imani kʼuiripuni eska ima na exejka. Ísï úparini, nóteruni eratsesïrenguia ambe engani pʼikuarherajka ka mejori eratsisïnga néna jarhuataani”.
Seguirixakachi jirinhantaani imechani engaksï uéjka mítini jurhimbikuani
Tiempu jingoni, máruksï niáraati sési jiókuarhini na engachi jánguarhintajka jarhuataani mítini Jeobani
Ístuchi jatsiska para eratsini nénachi uá uinhaperantaani juchari kompanieruechani engachi jingoni aianhpijka. Jessica uandasïndi: “Enga maisï jucha no sési ambe nitamanchaka, jánguarhisïnga no imani ambe eratsini. Sánderu sési, jánguarhisïnga imeri ambe uandontskuarhini enga ambakiti ambeka, komu na enga xáni marhuajka juchari eianhperakua nájkirukajtsïni máru kʼuiripuecha no sési erokaaka”.
Jeoba sési mítisti problemechani engachi nitamanchaajka aianhpikuarhu ka seguruchi jarhaska eska kánikua tsípisïnga engachi ísï pʼamojpijka eska ima (Luk. 6:36). Ísïsti, Jeoba no méntkisï pʼamojpini jauati. Uákachi mintsikani eska sési mítiska na jatini sési jaua para kʼamajkuni no sési jásï ambe parhakpinirhu. Mientrasi, kánikua jukaparhakuesti eskachi seguiriuaka aianhpini (2 Tim. 4:2). Ísï jimbo, ju je seguirini tsípikua jingoni úni juchari ánchikuarhitani ka pʼamojperakua xarhatakuani iámindu jásï kʼuiripuechani.
