1. ¿Andisï Jeoba újki uandani eska iámindu ambe imeriska? (Exe je fotuni enga uénakuarhu jaka).

JEOBAERISTI iámindu ambe enga jaka: “auanda, asta enga sánderu iótakuarhueka jini auandarhu, echeri ka iámindu ambe enga xáni echerirhu jaka” (Deut. 10:14; Jaŋ. 4:11). Ka jimboka kʼuiripuechani ima kueraauaska, juchajtuchi imeriska (Sal. 100:3). Peru desdeka kʼuiripu uénaka irekani, Jeoba niárasti erakuani máru grupu kʼuiripuecheri paraksï imeri ireta espesialini.

2. ¿Biblia náki grupu kʼuiripuecheri uandasïndi eskaksï Jeobaeri ireta espesialiska?

² Por ejemplu, Salmo 135 arhisïndi eska ióntki anapu israelitecha engaksï no méni jurajkupka Tata Diosïni, jindespkaksï imeri “ireta espesiali” (Sal. 135:4). Ístu, libru de Oseas tʼuini uandasptia eskaksï máru no israelitecha niárapiringa Jeobaeri ireta jingoni úkuarhini (Os. 2:23). I profesia jiáni kumplirikuarhispti enga Tata Diosï uénapka erakuani imechani engaksï no judiuepka paraksï Jesusi jingoni juramuni auandarhu (Uku. 10:45; Rom. 9:23-26). Ini kʼuiripuechani engaksï espiritu santu jimbo erakunhaka, arhinhasïndiksï “kʼuiripu pímbinharhaticha” Jeobaeri “míndakatecha” (1 Ped. 2:9, 10). Ka ístu, sáno iámindu kristianuechani engaksï jurhimbitku jámajka ka engaksï erokuarhini jaka Echerirhu irekani, Jeoba arhiasïndi eskaksï imeri ireteska ka imeri erakukatecha (Is. 65:22).

3. a) ¿Iásï, néchaksï jatsiski ambakiti pájperakua ma Jeoba jingoni? b) ¿Ambechi exea ini artikulurhu?

 ³ Iásï, imecha engaksï erokuarhikua jatsika para auandarhu nirani, engaksï arhinhajka “karichicha” ka imecha engaksï erokuarhikua jatsika para Echerirhu irekani, ‘máteru karichicha’, májku kʼériksï marhuakuxati Jeobani (Luk. 12:32; Juanu 10:16). Ísïsti, meruchi uékasïnga xarhatakuni Jeobani eskachi agradesidu jarhaska engajtsïni jurajkujka jatsini ambakiti pájperakua ma imani jingoni. Ini artikulurhuchi exeaka máru ambe de nénachi uá xarhatakuni eskachi agradesidu jarhaska xáni kʼéri kóntperata jimbo.

4. a) ¿Nénachi uá agradeserikuni Jeobani engajtsïni jurajkujka parachi imeri amigueni? b) ¿Ka ístu ambe úspi Jesusi enga sáno májkuenipka?

⁴ Ma ambe engachi uáka úni para agradeserikuni, jindesti kʼamakʼamasï íntskuntani Jeobani juchari tsípikua. Engachi itsï atakuarhijkia, jiókuarhisïngachi máteruechani japarini eskachi jucha Jeobaeriska ka eskachi uékasïnga kurhajchani (Ebr. 12:9). Jesusi sáno májkueni ambe úspti enga itsï atakuarhipka, jimboka ísïspka komu arhini imeri Tátini: “Úni imani ambe engari tʼu uéjka, oh juchiti Tata Diosï, kʼéri tsípikuarhita máesti” (Sal. 40:7, 8). Tsípikua jingoni aiakukuarhespti para úni ambe enga Tata Diosï uékenga, nájkiruka ireta ma jimbo andajpenupka enga aiakukuarhetini japkia Jeobani.

5, 6. a) ¿Néna pʼikuarheraspi Jeoba enga Jesusi itsï atakuarhipka? b) Úra je ejemplu ma enga xarhatajka na enga pʼikuarherajka Jeoba engachi aiakukuarhejka.

⁵ ¿Néna pʼikuarheraspi Jeoba enga Jesusi itsï atakuarhipka? Biblia arhisïndi: “Eska na bautisarikuarhipka Jesusi, luejku uémintaspti itsïrhu, ka auanda mítakuarhispti, ka ima exespti Diosïri Espirituni kétsini jarhani ísï jásï komueska ma palomasï, ka andajtsïkuerani imani. Ka luejku kurhaakuarhispti ma uandakua auandarhu uératini enga arhienga: ‘I jindesti juchiti Uátsï engani ji xáni uékajka ka engani jimbo xáni tsípikuarhijka’” (Mat. 3:16, 17). Jeoba kánikua tsípispti enga imeri Uájpa aiakukuarhepka imantku marhuakuni nájkiruka Jeobaeripkia. Májkueni, Jeoba kánikua tsípikua jingoni jiókuarhisïndi engachi aiakukuarhejka ka újchakuraatijtsïni (Sal. 149:4).

⁶ Ju je ejemplu ma exeni engajtsïni jarhuataaka sánderu sési kurhanguni néna pʼikuarherasïni Jeoba engachi aiakukuarhejka. Ju je eranhaskani eska táti ma uánikua tsïtsïki sési járhatichani ikaraasïnga jardinirhu. Ma jurhiani, imeri nanaka sapichu pʼikusïndi tsïtsïki ma ka intsïkuarhini. Nájkirukaksï iámindu tsïtsïkicha tátemberipka, kánikua tsípisïndi enga imeri nanaka sapichu intsïkuarhijka ma para uékperakua xarhatakuni tátembani. Seguru eska para tátemba, ima tsïtsïki sánderu sési jáxeka. Májkueni, Jeoba kánikua tsípisïndi engachi aiakukuarhejka imantku marhuakuni (Éx. 34:14).

7. ¿Nénajtsïni jarhuasïni Malakiasi kurhanguni na enga pʼikuarherajka Jeoba imechani jimbo engaksï tsípikua jingoni marhuakujka?

⁷ (Arhinta je Malaquías 3:16). Imecha engaksï nótki aiakukuarhejka ni itsï atakuarhini, jatsistiksï para sési eratsintani na jatinksï uá ini ambe. Ísïsti, juchachi Jeobaerisïnga desdekachi uénajka matrisirhu úkuarhini ka ístu máteru kʼuiripuecha. Peru ju je eranhaskani na enga xáni tsípijka Jeoba engachi jiókuarhijka komueska juchari Juramuti ka eskachi jimbosï aiakukuarhejka imani ka úni ambe enga ima uéjka (Prov. 23:15). Ka Jeoba, imeri parti jimbo, jiókuarhiasïndi imechani engaksï tsípikua jingoni marhuakujka ka karasïndi imecheri nombri imeri ‘libru miántskuerirhu’.

8, 9. ¿Ambe kurhajkuarhisïni Jeoba kʼuiripuecheri engaksï imecheri nombricha karakata jaka ‘libru miántskuerirhu’?

⁸ Peru paraka Jeoba no borrariuaka juchari nombri imeri ‘libru miántskuerirhu’,  uétarhisïndi úni máru ambe. Malakiasi uandaspti eskachi jatsiska para janhanharhini Tata Diosïni ka eratsintani imeri nombrini. Engachi kómarhiska ambe ma o nemani enga no Jeobaeuaka, ima borrariuati juchari nombrini jima enga ísïika komueska libru ma tsípikueri (Éx. 32:33; Sal. 69:28).

⁹ Ísï jimbo, aiakukuarheni Jeobani no solu arhikuekasïndi aiakuni eskachi imani ambe uáka enga ima uéjka ka itsï atakuarhini. Ma xanharkuchisï aiakukuarhejka ka itsï atakuarhini ka inde ambe sóntku tátsepani pakarasïndi. Parachi Jeobaeri parti jimbo jarhani ka imantku marhuakuni, arhikuekasïndi eskachi jatsiska para pauani pauani xarhatakuni úkuecha jingoni eskachi kurhajchasïnga (1 Ped. 4:1, 2).

10. ¿Ambe diferensia jatsiski para jarhani entre imecha engaksï Jeobani marhuakujka ka engaksï no marhuakujka?

¹⁰ Máteru artikulurhuchi exeskia Kainiri, Salomoniri ka israelitecheri ambe. Imechaksï uandasïrendi eskaksï marhuakusïrenga Jeobani, peru nóksï kʼamakʼamasï marhuakuspti. I ambe xarhatasïndi eska imecha engaksï Jeobaerika, jatsiskaksï para kʼamakʼamasï apoiarini Jeobaeri jurhimbikuani ka no jiókuarhini no sési jásï ambe (Rom. 12:9). Enga Malakiasi na uandapkia ‘libru miántskuerini’, Jeoba uandaspti eska xarharapiringa “eska no májkueniska jurhimbiti ma ka no sési úri ma, ima enga Tata Diosïni marhuakujka ka ima enga no marhuakujka” (Malaquías 3:18).

11. ¿Andiksïsï jatsipirini paraksï máteruecha kuenta íntskukuarhini eskachi Jeobantku marhuakusïnga?

¹¹ Máteru ambe engachi uáka úni para xarhatakuni Jeobani eskachi agradesidu jarhaska jimbokajtsïni erakuska para imani marhuakuni, jindesti eskaksï máteruecha exeaka eskachi progresarixaka espiritualmenti (1 Tim. 4:15; Mat. 5:16). Ju je kurhamarhikuarhini: “¿Kuentaksï íntskukuarhisïni máteruecha eskani kʼamakʼamasï marhuakusïnga Jeobani? ¿Jánguarhisïni jirinhaani oportunidadichani parani xarhatani eskani Jeobaeri testigueska?”. Jeoba kánikua kómu pʼikuarherapirindi exeni eska ima kʼuiripu enga ima erakukia para imeri ireta jingoni úkuarhini, dudaripiringa arhiani máteruechani eska Jeobaeriska (Sal. 119:46; arhinta je Markusʌ 8:38).

12, 13. ¿Andisï úkua jukani jarhajki mítiantani máru Testiguechani eskaksï Jeobani marhuakusïnga?

 ¹² Kánikua no sésisti, peru máru Testiguechaksï imani ambe úsïndi enga ‘parhakpini anapu espiritu’ úrpijka ka jimboksïsï sáno májkueni jámajti eska imecha engaksï no marhuakujka Jeobani (1 Kor. 2:12). Imecha engaksï parhakpinirhu anapu jángua xarhatajka, nóksï uandanhiasïndi máteruecha jimbo (Efes. 2:3). Por ejemplu, nájkirukachi xáni uáni konsejuechani intsïnhaakia, máruksï seguirixati imani ambe jukani ka ísï arreglarikuarhini enga no sési xarharajka. Imani takusïksï jukasïndi engaksï jukari márhekuarhiaka ka engaksï jukari xarhatajka ma parti kuerpurhu, asta engaksï tánguarhikuecharhu nirajka. Máteruksï kánikua no sési kuinakuarhisïndi, oksï no nani máru újtsïntani (1 Tim. 2:9, 10). Ka inde ambe úsïndi eska engaksï máteru kʼuiripuecha jingoni jauaka, úkua jukaaka mítini nésï parhakpinirhu anapue (Sant. 4:4).

¹³ Máru Testiguechaksï máteru úkuecha jingoni xarhatasïndi eskaksï útasï jiókuarhisïnga parhakpini anapu ambe. Por ejemplu, engaksï nirajka kʼuinchikuecharhu, uarhasïndiksï ka ísïksï jámani enga no sési jaka para kristianu ma. Imecheri fotuechanksï redesi sosialicharhu karhataasïndi ka komentariuechanksï uáni engaksï xarhatajka eskaksï no espiritualiska. Ísïti, jamberiksï kúnguarhikuarhu no niárani jati jurhimberanhantani kʼéri pekadu ma jimbo, peruksï no jindesti ambakiti pájperakua ma para imecha engaksï jánguarhintani jaka ambakiti jángua ma jatsini (arhinta je 1 Pedru 2:11, 12).

14. ¿Ambechi jatsiski para úni parachi kuájchakuni juchari ambakiti pájperakua Jeoba jingoni?

¹⁴ Iámindu ambe enga xáni parhakpinirhu jaka, puru ima ambesti “enga mintsita tamapu tsitijka, ka engaksï kʼuiripuecha xáni exenchajka, ka teparakuarhikua ambe o jatsikuarhikua ambe” (1 Juanu 2:16). Peru juchachi Jeobaeriska, imajtsïni jimbosï arhijti eskachi “méntku jurajkuaka pekaduni, ka indeni jásï ambe enga parhakpini anapuecha tsitijka, ka irekanchi iásï ini tiempu jimbo eska na jindeka para sési eratsini ka jurhimbitku jámani ka Diosïni janhanharhini” (Titu 2:12). Iámindu ambe juchari irekuarhu —na engachi uandajka, na engachi tʼirejka ka binu ambe arhani, xukuparhakua ambe ka na engachi arreglarikuarhijka ka na engachi ánchikuarhijka— jatsisti para xarhatani eskachi  kʼamakʼamasï marhuakusïnga Jeobani (arhinta je 1 Korintu 10:31, 32).

15. ¿Andichisï jatsi para juchari erachichani sési kaani ka uékperakua jingoni?

¹⁵ Na engachi kaajka juchari erachichani, xarhatasïndi eskachi agradesidu jarhaska engachi ambakiti pájperakua ma jatsika Jeoba jingoni. Imechajtuksï Jeobaeristi. Engachi no méni mirikurhiska ini ambe, méntkisïchi sési kaauaka ka uékperakua jingoni (1 Tes. 5:15). Jesusi arhiaspti imeri chúxapatichani: “Ka ini jimboksï mítiati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35).

16. ¿Náki ejemplu enga Moisesiri Leirhu pʼitakata jaka xarhatasïni na enga pʼikuarherajka Jeoba imeri marhuaricha jimbo?

¹⁶ Ju je ejemplu ma exeni engajtsïni jarhuataaka kurhanguni na engachi jatsika para kámberani kúnguarhikuarhu. Ima ambe enga Jeobaeri templurhu japka, arhutakataksï jarhaspti solu paraksï jurhimbiti kómarhikuarhu úrakuarhini. Moisesiri Lei arhisïrendi na engaksï jatsipka para indeni ambe kuidarini ka jatsipirindiksï para uándikuni imani enga no ísï úpiringa (Núm. 1:50, 51). Enga Jeoba ísï kuájchakuenga imani ambe enga templurhu úrakuarhenga, na xáni sánderu kuájchakuaua imeri marhuarichani engaksï aiakukuarhekia ka engaksï no méni jurajkujka. Ma xanhari arhispti imeri iretani eska né uéjki enga uékapiringa no sési ambe úkuni, ísïpiringa komueska imani pʼonharhikuni jarhani (Zac. 2:8).

17. ¿Ambe ka amberi pendienti jarhasïni Jeoba?

¹⁷ Jukaparhakuesti exeni eska Malakiasi uandasïnga eska Jeoba pendienti jarhasïnga ka kurhaani engaksï imeri marhuaricha sési pájperajka máteru ka máteruni jingoni (Mal. 3:16). Tata Diosï “mítiasti imerichani” (2 Tim. 2:19). Kánikua pendienti jarhasïndi iámindu ambe jimbo engachi uandajka ka úni (Ebr. 4:13). Engachi no sési káuaka juchari erachichani, Jeoba kuenta íntskukuarhisïndi. Peru ístuchi uáka seguru jarhani eska Jeoba kuenta íntskukuarhisïnga engachi puátsperantajka ka engachi sési kámpiaka, intsïmpitiini ka engachi uékperakua jingoni kámberaaka (Ebr. 13:16; 1 Ped. 4:8, 9).

18. ¿Nénachi xarhatasïni eskachi agradeserikusïnga Jeobani engachi jatsika kóntperatani para imeri iretarhu jarhani?

¹⁸ Ísïsti, kánikuachi uékasïnga xarhatani eskachi agradesidu jarhaska Jeoba jingoni engachi jatsika kóntperata para imeri iretarhu jarhani. Mítiskachi eska sánderu ambakiti ambe engachi erakuka úni, jindeska aiakuni imani juchari tsípikua. Nájkirukachi irekani jaka “kʼuiripuechani japarini engaksï xáni malueka”, uékasïngachi eskajtsïni máteruecha sési exeaka ka pímbinharhati ka eskachi meremerejkusïnga “komueska jóskuecha engaksï erajkutarpijka parhakpinirhu” (Filip. 2:15). Meruchi no jiókuarhisïnga no sési jásï ambe (Sant. 4:7). Ka uékaasïngachi ka respetariuani juchari erachichani, jimbokaksï imechajtu Jeobaeriska (Rom. 12:10).

19. ¿Néna kóndiantaasïni Jeoba imerichani?

¹⁹ Bibliajtsïni asegurarichisïndi: “Jeoba no jurajkuati imeri iretani” (Sal. 94:14). I aiatsperakua kumplirikuarhiati ambe uéjkichi úkuarhinchani. Ni sikiera uarhikua uá úni eskajtsïni Jeoba nóteru uékaakia (Rom. 8:38, 39). “Engachi irekani jaka, irekaxakachi para juchari Juramuti. Ka engachi uarhiska, ístuchi uarhiska para ima. Ísï jimbo, engachi irekaaka o engachi uarhiska”, juchachi Jeobaeriska (Rom. 14:8). Uékaxakachia eska Jeoba tsítantaauaka iámindu imeri ambakiti amiguechani (Mat. 22:32). Asta ini tiempu jimbo, uánikua kóntperatechanchi jatsiaska. Eska Biblia na arhijka, “tsípisïndi nasioni enga imeri Tata Diosï jindeka Jeoba, ireta enga ima erakuka para imeri erensia máeni” (Sal. 33:12).