1, 2. a) ¿Andichisï jatsika para Jeobani andarherani? b) ¿Ambechi exea ini artikulurhu?

NO NEMA jarhasti enga sánderu uinhapika, janhaskatiini ka uékpitiini eska juchari Tata Diosï. Jimbochisï jatsika para imani andarherani o no jurajkuni ka eskachi imeri parti jimbo jauaka (Sal. 96:4-6). Peru nájkiruka ísïka, máru Jeobaeri marhuarichaksï jurajkusti, jiáni enga sánderu uétarhenga eskaksï no jurajkupiringa Jeobani.

² Ini artikulurhuchi exeni jauaka máru kʼuiripuecheri ejempluechani engaksï uandenga eskaksï Jeoba jingoni jarhaspka, peru ístuksï imani ambe úni jarhani enga no sési pʼikuastenga Jeobani. I istoriechajtsïni uáti ambakiti ambe jorhendani parachi no méni jurajkuni Jeobani.

3. ¿Andisï Jeoba jatsipi para adbertensia ma íntskuni Kainini ka ístu ambe arhispi?

³ Ju je exeni Kainiri ambe. Ima ísï exesïrendi eska solu Jeobantku kómarhisïrenga ka no máteru diosïni. Peru Jeoba no jaiapanhintasïrendi Kainiri kómarhikuani, jimboka exesïrenga eska Kainiri mintsitarhu no sési jásï ambe jarhaspka (1 Juanu 3:12). Jimbosï arhipti Kainini eska ima jaiapanhintapiringa enga mójtakurhipiringa ka  imani ambe úni enga sési japka. Peru adbertirikuspti eska enga no mójtakurhipiringa, pekadu seguirini japiringa no sési ambe uékani úrani. Tátsekua kurhamarhispti: ‘¿Uári pʼíngukuarhini?’ (Gén. 4:6, 7). O sea, Jeoba arhixapti eska enga moantapiringa ka imeri parti jimbo jarhani, Jeobajtu Kainini jingoni japiringa.

4. ¿Ambe úspi Kaini enga sésikua jatsipka para xarhatani eska Jeobaeri parti jimbo jarhaspka?

⁴ Jeoba solu jiáni jaiapanhintapirindi Kainini enga mójtakupiringa imani ambe enga eratsenga. Peru Kaini no kurhajchaspti Jeobani. Ima no sési jásï ambe enga Kaini eratsenga ka no uandanhiani máteruechani, úspti eska no sési jásï ambe úpiringa (Sant. 1:14, 15). Enga Kaini sapichuepka, ¿eranhaskapi eska ma jurhiani no kurhajchapiringa Jeobani? Jamberi nómbe. Peru tiempu jingoni ísï úspti, no kurhajchaspti Jeobani ka uándikuspti imeri ermanuni.

5. ¿Ambe uá úni eskajtsïni Jeoba nóteru jeiapanhintaakia?

⁵ Májkueni eska Kaini, kristianu ma jamberi uandaati eska Jeobani marhuakuxaka peru no sési jásï ambe úni jarhani (Jud. 11). Jamberi méntku predikarini jarhajti ka méntkisï nirani tánguarhikuecharhu, peru ístu, ísku jándikueri ambe eratsini jarhani, jatsikuarhikua ambe tsitini o asta kurhunhini erachini ma (1 Juanu 2:15-17; 3:15). I ambe uáti úni eska pekariuaka. Jamberiksï máteruecha no mítijti ambechisï eratsijki o úni, peru Jeoba kʼóru iámindu ambe exesïndi ka mítisïndi sinchi kʼamakʼamasï imani jingoni jarhaski o nómbe (arhinta je Jeremías 17:9, 10).

6. ¿Nénajtsïni jarhuatasïni Jeoba parachi pʼíngukuarhini para no pekarini?

⁶ Nájkirukachi no sési jásï ambe újka, Jeobajtsïni no seguirisïndi jurajkuni. Enga ima exejka eskachi jarharixakaia, arhisïndijtsïni: “Andarhentajtsïni je ka jíjtuksïni meru andarhentaaka chánksïni” (Mal. 3:7). Ima uékasïndi eskachi kurhunhiaka no sési jásï ambe, ka sánderu jiáni engachi jánguarhintani jauaka orhepani uérakuni tsʼéjkukua ma (Is. 55:7). Engachi ísï úska, imajtsïni aiachesïndi eskajtsïni íntskuaka jarhuajperata engachi uétarhinchajka para orhepani uérakuni tsʼéjkukua ma (Gén. 4:7).

7. ¿Néna no jukaparharaspi Salomoni ambakiti pájperakuani Jeoba jingoni?

⁷ Uákachi uánikua ambe jorhenguarhini imani amberi enga rei Salomoni nitamanchapka. Enga sapichku japka, jirinhaspti Jeobaeri jarhuajperata ka ima íntskuspti jánhaskakua ka enkargarispti para Jerusaleni anapu kʼéri templuni úni. Peru Salomoni no jukaparharaspti imeri sési pájperakua Jeoba jingoni (1 Rey. 3:12; 11:1, 2). Tata Diosïri Lei arhiasïrendi rei ebreuechani eskaksï no jámapiringa tembuchani uánikua uátsïcha jingoni, paraka imecheri mintsita no niárapiringa jurajkuni Jeobani (Deut. 17:17). Peru Salomoni no kurhandiraspti ka tiempu jingoni niáraspti 700 témbechani jatsiani ka ístu 300 uátsïchani (1 Rey. 11:3). Uánikuaksï no israelitespti ka diosï úkatechanksï kómarhiasïrendi. Ísï jimbo, Salomoni ístu no kumplirispti leini enga uandenga eskaksï israelitecha no jatsispka para tembuchani nanakecha jingoni engaksï no israelitepka (Deut. 7:3, 4).

8. ¿Asta nani jamberi niáraspi Salomoni no sési pʼikuastani Jeobani?

⁸ Salomoni sánhani arhispti nóteru jukaparharaania Jeobaeri leichani ka kánikua no sési jásï ambe úspti. Altari ma úspti para diosa Astoreti ka máteru para diosï úkata Kemósi. Jima, imeri témbecha jingoni kómarhiaspti diosï úkatechani. Tekaaspti imani altarichani juátarhu ma jimbo uáni, meru jima orhepani enga Jerusaleni japka, nani enga Jeobaeri templuni úpka (1 Rey. 11:5-8; 2 Rey. 23:13). Jamberi jandiajku enganiarikuarhepti eratsiparini eska Jeoba no ma ambe arhipiringa mientrasi enga seguirini japiringa kéjtsïtakua ambe úkuni templurhu.

9. ¿Ambe úkuarhispi enga Salomoni ísï no kurhajchapka Jeobani?

⁹ Peru Jeoba no ísku pakarasïndi enga pekadu  ambe úkuarhiaka. Bibliarhu arhisïndi: “Jeoba niáraspti ikiani Salomoni jingoni, jimboka imeri mintsita sánhani arhispka jurajkuni Jeobani [...], imani enga tsimani uelta xarhakupka. Ka ini ambe jimbo, juramukuspti eska no jámapiringa máteru diosï úkatechani kómarhiani; peru ima no kumplirispti ambe enga Jeoba juramukupka”. Ini ambe jimbo, Jeoba nóteru jarhuatasptia níteru jeiapanhintani. Israeli anapu juramukua tsimapuru arhukurhispti, jimboksïsï Salomoniri desendienticha nóteru juramuptia iámu nasionirhu ka problemechanksï jatsiaspti uánikua uéxurhini jimbo (1 Rey. 11:9-13).

10. ¿Ambe uá no sési úkuni juchari ambakiti pájperakua Jeoba jingoni?

¹⁰ Májkueni eska Salomoni, sánderu kʼéri peligru ma enga uáka no sési úkuni juchari ambakiti pájperakuani Jeoba jingoni, jindesti kúrhiani imechani engaksï no kumpliriuajka oksï no respetariuani Jeobaeri leichani. Jamberiksï máru kúnguarhikuarhu anapueti engaksï no uinhapiti jaka espiritualmenti. Ístuksï uáti jindeni familiarhu anapuecha, besinuecha, ánchikuarhitarhu anapu kompanieruecha o eskueleri engaksï no marhuakujka Jeobani. Jo, engaksï juchari amiguecha no respetariuajka Tata Diosïri juramukuechani, tiempu jingonchi uáka no sési úkuni juchari ambakiti pájperakuani Jeoba jingoni.

11. ¿Ambejtsïni jarhuata exeni sinchi nóteru jatsiskia para kúrhini nemani?

¹¹ (Arhinta je 1 Korintu 15:33). Sáno iámindu kʼuiripu ambakiti kualidadichani jatsiasti ka no iámindu imecha engaksï no Testigueka no sési jásï ambe úni jarhasïndi. Engachi jatsiaka i járhati amiguechani, ¿arhikuekasïni eska no no sési jarhaska imechani kúrhiani? Uétarhisïndi kurhamarhikuarhini sini imecha jingoni jarhani úsïni eskachi sánderu sési pájperaaka Jeoba jingoni. Ju je eratsini ambe enga imecheri mintsitarhu jaka. Por ejemplu, ¿sáno méntkisïksï puru moderi ambe uandontskuarhini jarhasïni, tumineri, komputadorecheri, telefonuecheri, tabletecheri, tsípikuarhiteri ambe o máteru i jásï ambe? ¿Tsitisïnksï máteruechani uandatsiani o chiste ambe uandantaani engaksï no sési jaka? Kánikua sésisti enga Jesusi arini adbertensia íntspipka: “Jimboka inde ambesï uandanhajka enga mintsitarhu uinirini jarhajka” (Mat. 12:34). Ísï jimbo, engachi kuenta íntskukurhiska eska kúrhini nemani peligru máeska para juchari pájperakua Jeoba jingoni, ju je sóntku úni ambe ma ka nóteru xáni ióni jarhania imani jingoni o méntku nóteru kúrhinia (Prov. 13:20).

12. a) ¿Ambe arhiaspi Jeoba israelitechani ísï tátsekua engaksï uéakuntapkia Ejiptu? b) ¿Ambeksï uandaspi israelitecha enga Jeoba kurhakuapka paraksï imantku marhuakuni?

¹² Ístuchi uáka uánikua ambe jorhenguarhini ambe enga úkuarhipka ísï tátsekua engaksï israelitecha uéakuntapkia Ejiptu. Engaksï Sinairi juátarhu orhepatini niárapkia, Jeoba  milagru ma úparini, xarhataspti eska imecha jingoni jarhaspka: nube turhipiti ma úkuarhispti, charanchixapti, piritani, sïraani ka uinhamu kurhaakuarhixapti ruidu ma enga no anhaxurhienga ísï komueska sïuangua ma (Éx. 19:16-19). Jima, Jeoba arhiaspti israelitechani eska ima ‘Tata Diosï máeska enga kurhajkuarhijka eskaksï solu jatsiska para imantku marhuakuni’. Ístu asegurarikuaspti eska no méni jurajkuapiringa imechani engaksï xénchapiringa ka kumpliriuanksï imeri juramukuechani (arhinta je Éxodo 20:1-6). Ambe enga arhiani japka, jindespti eska engaksï imeri parti jimbo japiringa, Jeobajtu imechani jingoni japiringa. Engachi jucha jima japiringa, ¿ambechi úpirini ini aiatsperakua jingoni? Jamberi májkueni eskaksï israelitecha. Biblia arhisïndi: “Iámu ireta májku kʼéri mókuntaspti ka uandani: ‘Iámindu ambe enga Jeoba uandaka uékasïngachi kumplirini’” (Éx. 24:3). Peru ísï no ióni jimbo, nóksï erokuarhisïrendi eskaksï tsʼéjkunhapiringa paraksï xarhatani sinksï no méni jurajkupirini Jeobani.

13. ¿Náki tsʼéjkukuaksï jatsispi israelitecha paraksï xarhatani na engaksï xáni jakajkuenga Jeobani?

¹³ Israelitechaksï chéspti engaksï exepka nube turhipitini, piritakuani ka ístu máteru ambe enga xarhatapka Jeobaeri uinhapikuani. Ísï jimbo, arhisptiksï Moisesini eska ima nipiringa Jeoba jingoni uandontskuarhini (Éx. 20:18-21). Jimbosï Moisesi nípti karhamani Sinai juáta jimbo ka ióni pakaraspti jima. Jimboka Moisesi, orhejtsïkuti engaksï israelitecha xáni mintsikenga no imecha jingoni japka, ¿jandiajkuksï japi desierturhu? Peeka imecheri jakajkukua uinhapiti japka nomasi jimbokaksï Moisesini exeni jarhasïrenga. Ísï jimbo, nóteruksï úsptia aguantarini ka arhisptiksï Aaronini: “Úchejtsïni diosï úkatani ma enga juchari orhepani niuaka, jimboka achamasï Moisesi engajtsïni petantaka Ejiptu, sési jimbochi no mítiska ambe úkuarhincha” (Éx. 32:1, 2).

14. a) ¿Nénaksï enganiarikuarhispi israelitecha? b) ¿Néna exespi Jeoba imani ambe?

¹⁴ Israelitechaksï mítispti eska kómarhiani diosï úkatechani kʼéri pekadu máespka para Jeoba (Éx. 20:3-5). Nájkirukaksï mítipka, nóksï ióndaspti beserru oruerini ma kómarhini. Mítitixaptiksï eska ini ambe jingoni, nóksï kurhajchaxapka Tata Diosïni, peruksï jandiajku enganiarikuarhispti ka eratsini eskaksï útasï Jeoba jingoni jarhaspka. Aaroni asta uandaspti eska kʼuínchikua máespka para Jeoba. Peru Tata Diosï kánikua no sési pʼikuarheraspti. Arhispti Moisesini eskaksï israelitecha no sési ambe úspka ka eskaksï nóteru seguirixapkia imani ambe úni enga Jeoba juramukuapka. Jeoba kánikua ikiaspti imecha jingoni ka asta eratsispti kʼamajkuani (Éx. 32:5-10).

15, 16. ¿Nénaksï xarhataspi Moisesi ka Aaroni eskaksï meru Jeobaeri parti jimbo jarhaspka? (Exe je dibujuni enga uénakuarhu jaka).

¹⁵ Komu Jeoba kánikua pʼamojpitiika, no kʼamajkuaspti israelitechani. Imechani engaksï ambakiti kʼuiripuepka, íntsaaspti sésikua paraksï meru xarhatani eskaksï Jeobaeri parti jimbo jarhaspka (Éx. 32:14). Enga Moisesi exepka eskaksï israelitecha nanderkueni uarhaxapka, pireni ka uinhachani beserru orueri orhepani jimbo, purundurhintaspti beserruni astaka tʼupuri úntapka. Tátsekua uandaspti: “¿Né Jeoba jingoni jarhaski? ¡Andarheraerini!”. Ka “iámindu Lebiri uájpechaksï úndaspti andarherani” (Éx. 32:17-20, 26).

¹⁶ Nájkiruka Aaroni úpka beserruni, moantaspti ka lebitecha jingoni niáraspti engaksï xarhatapka eskaksï Jeoba jingoni jarhaspka. Íksï kʼuiripuecha no solu xarhataspti eskaksï Jeobaeri parti jimbo jarhaspka, sino ístu jarhariasptiksï israelita no kurhandirechani. Kánikua sési jarhaspti engaksï ísï úpka, jimbokaksï imani mísmu jurhiatikua jimbo uánikua israelitecha uándikunhaspka engaksï diosï úkatani ma kómarhipka. Peru imecha engaksï Jeobaeri parti jimbo japka aiaminhasptiksï eskaksï újchakuranhapiringa (Éx. 32:27-29).

17. ¿Ambejtsïni jorhendasïni Pablueri uandakuecha de ambe enga úkuarhipka beserru orueri jingoni?

¹⁷ Apostuli Pablu uandaspti ambe enga úkuarhipka  beserru orueri jingoni ka arini adbertensia íntspespti: “I ambe ísï úkuarhispti para ma ejemplu [...] para eska juchajtu no jámaaka tsitini ambe enga no sésiika ísï eska imecha ka níjtuchi idoluechani kómarhiani ísï eska máru imecha”. Ka tátsekua uandaspti: “Karakata jarhasti parajtsïni arhistachini juchantsïni engachi andajkuarhika irekani jarhani ini últimu tiempuechani jimbo”, ka ístu uandaspti: “Ísï jimbo enga nema tantiarijka eska uinhamu anhaxurhitixaka, jatsikuarhie kuidadu para eska no kuarhatsiaka” (1 Kor. 10:6, 7, 11, 12). Eska Pablu na uandapka, asta imecha engaksï Tata Diosïni marhuakujka, uátiksï no sési ambe úni. Imecha engaksï no sési ambe niátajka, jamberiksï eratsijti eskaksï útasï seguirixaka ambakiti pájperakua ma jatsini Jeoba jingoni. Peru enga kʼuiripu ma uéjka Tata Diosïri amigueni o uandani eska sési marhuakuxaka, no méntkisï arhikuekasïndi eska Jeoba meru jeiapanhintasïnga (1 Kor. 10:1-5).

18. ¿Ambe úpirini úni eskachi jarharepiringa Jeobani ka ambe úpirini úkuarhini?

¹⁸ Eskachi na exekia, israelitechaksï no aguantarispti enga Moisesi ióndani japka kʼuanhatsitani Sinai uératini. Sáno májkueni, kristianuechachi úpiringa kuatantani jimbokachi úpiringa eratsini eska ima jurhiatikua enga Jeoba jusgarpiaka ka jimbanhi parhakpini ióndaxakia janoni. Jamberichi uáka eratsini eska útasï kánikua kuerataxaka para inde ambe kumplirikuarhini o eska jukari ambakiti ambeska komu para niárani ísï úkuarhini. Engachi no jingontku jámaska, ísï eratsini, uáti eskachi orheta péraaka parhakpinirhu anapu ambe, enbesi de imani ambe enga Jeoba uéjka. Tiempu jingoni, úpiringachi jarharini Tata Diosïni ka imani ambe úni engachi no méni eranhaskapka eskachi úpiringa.

19. ¿Ambe jukaparhakua ambechi no méni jatsiski para mirikurhini ka andi?

¹⁹ Nochi méni jatsiska para mirikurhini eska Jeoba uékasïnga eskachi kʼamakʼamasï kurhajchaaka ka imantku marhuakuni (Éx. 20:5). Engachi no imani ambe úni jarhajka ambe enga Jeoba uéjka, imani ambechi úni jarhasïnga enga Satanasi uéjka ka inde ambe uáti eskajtsïni no sési nicheaka. Jimbojtsïnisï Pablu miátantajti: “Chájt[sï] no uáka itsïmani juchari Tateeri itsïmakuani ka Noambakitiri espirituecheri itsïmakuani, ka níjtujtsï uá arhani juchari Tateeri tʼirekuani ka ístu Noambakitiri espirituecheri tʼirekuani” (1 Kor. 10:21).

20. ¿Nénajtsïni jarhuatasïni Jeoba asta engachi no sési ambe újka?

²⁰ Ambe enga Biblia arhijka Kainiri, Salomoniri ka israelitecheri, xarhatasïndi eskaksï sésikua jatsispka paraksï jukaparhakua ambe úni. Táchanisïksï sésikua jatsispti para moantani ka mójtakurhini (Uku. 3:19). Ísïsti, Jeobajtsïni no seguirisïndi jurajkuni engachi no sési ambe újka. Ju je miántani eska puákuntaspka Aaronini. Iásï, parajtsïni Jeoba arhistachini, uáti úraani Bibliaeri istoriechani, publikasionichani o imani konsejuechani engajtsïni erachi ma uékperakua jingoni íntsaajka. Engachi kurhajchajka ambe engajtsïni ima arhijka, seguruchi jarhasïnga eskajtsïni Jeoba niáraaka pʼamojkuni.

21. ¿Ambechi jatsiski para úni engachi tsʼéjkunhaaka de no méni jurajkuni Jeobani?

²¹ Engajtsïni Jeoba xarhatachijka ambakiti uékperakua, ambe ma jimboesti (2 Kor. 6:1). Sésikuajtsïni íntskusïndi “eskachi méntku jurajkuaka pekaduni, ka indeni jásï ambe enga parhakpini anapuecha tsitijka” (arhinta je Titu 2:11-14). Mientrasi engachi “iásï ini tiempu jimbo” irekani jauaka, niáraakachi tsʼéjkunhani sinchi Tata Diosïntku marhuakuxaki o nómbe. Ju je jánguarhintani méntkisï preparadu jarhani parachi xarhatani eskachi Jeobani jingoni jarhaska, jimbokachi imanisï jatsika para janhanharhini, marhuakuni ka andarherani (Deut. 10:20).