BIBLIARHU, arhintasïngachi na engaksï pʼikuarherenga ambakiti kʼuiripuecha engaksï “májku jásïpka eska jucha” (Sant. 5:17). Por ejemplu, apostuli Pablu mintsita jingoni uandaspti: “Engani uékani jarhajka úni ambakiti ambe, jandiajkuni jánhaskasïnga eska solu no sési jásï ambe jarhaska juchiti mintsitarhu. [...] Lastima jíndeni” (Rom. 7:21-24). Seguru eskachi juchajtu májkueni pʼikuarherajka eska ima. Engachi jánguarhintani jarhajka orhepani uérani jimbokachi no perfektueska, sésichi pʼikuarherasïnga míteni eska ístu Pablu májkueni pʼikuarherasïrenga.

Peru ístu Pablu uandaspti na enga pʼikuarherenga Jesusiri uarhikua jimbo. Galasia 2:20 jimbo uandaspti: “Diosïri Uájpa engarini [...] uékajka ka enga tsípikua íntspika jíndeni jimbo”. Apostuli seguru jarhaspti eska ísïspka. ¿Májkuenchi eratsisïni eska ima? Jamberichi ménisï no xáni seguru jarhajka.

Engachi útasï no sési pʼikuarherajka jimbokachi ióntki pekadu ambe úska, jamberichi úkua jukanchajka eratsini eskajtsïni Jeoba uékasïnga ka eskajtsïni puáchintaskia. Ka sánderuchi úkua jukanchani kurhanguni eska Jesusi mándani arhini juchantsïni jimbo uarhiska. ¿Meru uékasïni Jesusi eskachi ísï exeaka? Enga ísïka, ¿ambejtsïni jarhuataa ísï exeni? Ju je mókuantani ini tsimani kurhamarhikuechani.

Jesusi uékasïndi eskachi ísï exeaka imeri uarhikuani komu intsïmperakua ma enga mándani kʼuiripuni íntskuka. ¿Andichisï seguru jaki eska ísïska? Ju je eranhaskani ambe enga arhijka Lukasʌ 23:39-43 (TNM). Kʼuiripu ma enga Jesusiri ma ladu jimbo tirhipakuarhetini jaka chkarirhu, jiókuarhisïndi eska no sési ambe úska. Kánikua no sési jásï ambe úpti, jimboka ísï eska na xáni no sési kastigarinhani japka solu imechaksï indeni ambe úminhasïrendi engaksï sánderu no sési ambe niátenga. Kánikua uandanhiaparini indeni ambe jimbo enga nitamakuarhini jaka, kómarhisïndi Jesusini: “Miárini engari chíti Reinurhu inchaaka”.

¿Ambe mókukusïni Jesusi? Ju je eranhaskani na enga xáni no sési pʼikuarheraparini eraapka jimesïsï enga no sési úri japka para eratini. Nájkiruka xáni no sési pʼikuarherani japka, jánguarhintasïndi para uékperakua jingoni tsípikuni ka arhini: “Sési jimbomindukinisï arhini jaka iásï, jíndeni jingoniri jauaka Paraisurhu”. Jesusi solu úpirindi arhini eska Uájpa acheetiri jurhaspka para “íntspini imeri tsípikuani para uánikuechani euajpiantani” (Mat. 20:28). Peru jarhuataspti kurhanguni no sési úrini eska Jesusiri uarhikua jindespka para ima. Uékperakua jingoni arhispti “jíndeni jingoniri jauaka” ka arhispti ambe ma enga kánikua marhuakupiringa no sési úrini Jesusiri uarhikua jimbo: úpirindi irekani Paraisurhu ixú Echerirhu.

Ima no sési úri no jamberi úspti marhuakuni Jeobani. Peru seguruchi jarhaska eska Jesusi uékasïrenga eska kurhangupiringa eska imeri uarhikua intsïmperakua máespka para ima. Jimajkani, enga Jesusi uékenga eska ima kʼuiripu kurhangupiringa indeni ambe, ístu uékasïndi eska kurhanguaka kristianu ma enga itsï atakuarhikia ka enga Jeobani marhuakujka. Jiájkani, ¿ambejtsïni jarhuataa exeni eskajtsïni Jesusiri uarhikua marhuachisïnga mándani arhini juchantsïni nájkirukachi ióntki pekadu ambe úka?

Apostuli Pablu kurhangusïrendi eska Jesusi imani jimbo uarhispka jimboka íntskuspka ánchikuarhita para aianhpini. Pablu uandaspti: “Diosmaiamukua arhisïnga juchari tata Jesukristuni engarini  uinhaperantajka, ka exendini eskani mintsinharhikueska, ka marhuatandini para ini úkuani jimbo, nájkirukani orheta no sési arhienga Diosïni, ka no sési kaani jakajkutichani, ka xukajchaani” (1 Tim. 1:12-14). Enga ini ánchikuarhitani intsïnhapka, úspti eska seguru japiringa eska Jesusi pʼamojkusïrenga, xénchani ka mintsinharhini. Jesusijtsïni mándani arhini íntskusti ini ánchikuarhitani parachi aianhpini Reinueri ambe (Mat. 28:19, 20). ¿I ambejtsïni májkueni jarhuatasïni eska Pabluni?

Ju je exeni ambe enga nitamakuarhipka Albert, andarhientasti Jeobani enga sáno treintaikuatru uéxurhini nóteru Jeobaeri testiguepkia. Ima uandantasïndi: “Méntkuni miáni jarhasïnga imani ambe engani no sési úka. Peru engani nirajka aianhpini, ísï pʼikuarherasïnga eskarini Jesusi jíndeni íntskuska ánchikuarhitani parani aianhpini, ísï eska Pabluni. I ambe úsïndi eskani sánderu sési pʼikuarheraaka ka jarhuatasïndini parani ambakiti ambe eratsini juchiti ambe, ambe engani újka ka ambe engani erokuarhini jaka para sánderu orhepani” (Sal. 51:3).

Allan, acheeti máespti enga no sési kámpienga ante de jorhenguarhini jurhimbikuani. Ima uandantasïndi: “Útasïni miásïnga na engani xáni no sési útspika. Ménisï kómu pʼikuarherasïnga. Peruni jaiapanhikuntasïnga Jeobani enga jurajkujka eska pekadori ma komu ji, niuaka ambakiti ambe aianguani máteruechani. Exeni na enga kʼuiripu jiókuarhijka imani ambe engachi aianguajka, miátantasïndini na enga xáni ambakitika ka uékpitiini Jeoba. Exesïnga eskarini Jeobani úraxaka para jarhuataani imechani engaksï antesi májkueni ambe úka eska ji”.

Predikarini, úsïndi eskachi úraaka juchari uinhapikuani para ambakiti ambe úni ka para sési jásï ambe eratsini. Úsïndi eskachi seguru jauaka eskajtsïni Jesusi pʼamojkusïnga, uékani ka mintsikani.

Jamberichi seguirini jauaka no sési pʼikuarherani imani ambe jimbo engachi no sési úka astaka Noambakitiri parhakpini kʼamajkunhaaka. ¿Ambejtsïni jarhuataa nóteru ísï pʼikuarherania?

Jean jánguarhintaxati nóteru no sési pʼikuarherania jimboka jiáni enga uátsïpka no sési ambe úsïrenga enga no táti jembecha jingoni jarhenga o Kʼumanchikua Reinuerirhu. Peru uandasïndi: “Kánikua sési pʼikuarherasïnga míteni eska Tata Diosï sánderu kʼériska eska juchari mintsita” (1 Juanu 3:19, 20). Juchajtuchi kánikua sési pʼikuarherasïnga míteni eska Jeoba ka Jesusi kurhangusïnga eskachi no perfektueska. Ju je miáni eska uékperakuasï manataapka paraksï pʼímutantaani imechani engaksï no perfektueka ka moántanksï, no para imecha engaksï perfektueka (1 Tim. 1:15).

Seguruchi jauaka eska Jesusiri uarhikua intsïmperakua máeska para mándani arhini jucha engachi tsimani ambe úska: sési eratsintani na enga Jesusi kaaka kʼuiripuechani engaksï no perfektueka ka jánguarhintanchi imani ánchikuarhitani úni engajtsïni Jesusi íntskuka. Engachi ísï úska uákachi ísï uandani eska Pablu: Jesusi engarini “uékajka ka enga tsípikua íntspika jíndeni jimbo”.