1. ¿Ambe mójtakurhiski máru lugaricharhu iásï no ióni?

UÁNIKUA uéxurhinicha jimbo, sáno iámindu kʼuiripuechaksï jatsispti imecheri relijioni. Peru nótki xáni iónisïndi enga kánikua mójtakurhika inde ambe. Sánderuksï uánixati engaksï no tsitijka relijioniri ambe. * Asta máru paisicha jimbo, sáno iámindu kʼuiripuechaksï uandasïndi eskaksï no ma relijionirhu jarhaska * (Mat. 24:12).

2. ¿Andisï sánderu uániini jaki kʼuiripu enga no tsitijka relijioniri ambe?

² ¿Andisï sánderu uániini jaki kʼuiripu enga no tsitijka relijioniri ambe? Jamberi máruksï solu uékajti tsípikuarhini o imecheri problema ambe jámani sési péntani (Luk. 8:14). Máteruksï nóteru jakajkusïndia Tata Diosïni. Ka ístuksï jarhasti engaksï jakajkujka Tata Diosïni, peruksï eratsini eska relijioni iásï nóteru jarhuajpesïnguia, no marhuasïnga ka eska no terukuntasïnga siensia jingoni ni na enga kʼuiripu eratsijka. Jamberiksï notisiecharhu ísï kurhaajti eska kʼuiripuni no nema kueraska ka ístuksï ísï kurhajchaasïndi imecheri amiguechani ka maestruechani. Peruksï no káni kurhaasïndi ambakiti ambe paraksï úni jakajkuni Tata Diosïni. Máteruechaksï kánikua ikiasïndi exeni eskaksï relijioniri orhejtsïkuticha kánikua tsitisïnga juramukua ka tumina jatsini. Ka máteru nani ísï, juramutichaksï no káni jurajpesïndi para relijioniri ambe úni.

3. ¿Ambe jimbo úkata jarhaski i artikulu?

³ Jesusijtsïni juramuchisti parachi nirani ka “iámindu iretechani jorhengorheri” úani (Mat. 28:19, Táta Diósïri Uandakua  Tata Jesukristueri Aiatsperakua). ¿Nénachi uá jarhuataani imechani engaksï no tsitijka relijioniri ambe paraksï xénchani Tata Diosïni ka Kristueri chúxapatiini? Jatsiskachi para mítetini jarhani eska kʼuiripu ma uáka ísï jiókuarhini ambe engachi aianguaka seguni nani enga kʼuiripeka. Por ejemplu, Asia anapu ma no májkueni uékaati kurhaani ambe engachi aianguaka eska Europa anapu ma. Europa, uánikua kʼuiripu mítesti sánisï Bibliaeri ambe ka kurhaasïndiksï eska Tata Diosï kueraaska iámindu ambe. Peru Asia, sáno iámindu kʼuiripu no ma ambe o kasi no ma ambe mítesti Bibliaeri ka jamberi no jakajkuni eska jarhaska Kuerajpiri ma. I artikulu úkata jarhasti parajtsïni jarhuatani kʼuiripuni mintsitarhu niárakuni no arhiparini nani anapueski o ambe jakajkusïni.

4. ¿Andichisï jatsi para ambakiti ambe eratsini?

⁴ Ambakiti ambe eratsini. Mándani uéxurhini, uánikua kʼuiripuecha Jeobaeri testigu úkuarhisïndi engaksï antesi no ma relijionirhu japka. Uánikuechaksï ambakiti jángua ma xarhatasïrendia, peru máteruechaksï no sési jásï ambe úsïrendi. Uánikua inde kʼuiripuechaksï jatsispti para imecheri pʼindekuechani jurajkuani. Jeobaeri jarhuajperata jingoni, uákachi exeantani imechani engaksï uéjka jatsini tsípikua para méntkisï (Uku. 13:48; 1 Tim. 2:3, 4).

5. ¿Ambe úsïni eskaksï máru uékaaka kurhaani ambe engachi aianguajka?

⁵ Ju je sési kámpeni ka iatsitakuarhu uandani. Uánikua xanhari, kʼuiripuechajtsïni kurhajchasïndi no imani ambe jimbo engachi aianguajka, sino na engachi aianguajka. Tsitisïndiksï eskachi sési káuaka, iatsitakuarhu uandontskurhekuani ka mintsita jingoni uékani jarhuataani. Nóchi afuersa uékasïnga eskajtsïni kurhajchaaka. Sánderu sési, jánguarhintasïngachi kurhangukuani na engaksï eratsijka ka andiksïsï ísï eratsijki. Máruksï no uékasïndi relijioniri ambe uandontskuarheni imecha jingoni engaksï no míteajka. Jarhastiksï kʼuiripuecha engaksï eratsijka eska no sési jarhaska nemani kurhamarhini ambe eratsisïni Tata Diosïri ambe. Ka máteruechaksï kʼuratsesïndi engaksï exenhaaka Bibliani arhintani jarhani ka sánderia Jeobaeri testigu ma jingoni. Náki uéjki kʼuiripu jingonchi uandontskuarheni, nóchi uékasïnga no sési pʼikuastani (2 Tim. 2:24).

6. ¿Néna xarhataspi Pablu eska mítespka iámindu jásï kʼuiripu jingoni uandontskuarheni ka nénachi uá májkueni úni?

⁶ ¿Ambechi uá engachi ísï exejka enajki nema no tsitijki kurhaani engachi Bibliaeri ambe uandajka, kueraakateri ambe, Tata Diosïri o relijioniri ambe? Ju je májkueni úni eska apostuli Pablu ka máteru amberi uandontskuarhikuani. Enga Pablu judiuechani predikarikuapka, Bibliani úraspti. Peru enga Grecia anapu kʼérati jorhenaticha jingoni japka Areopagurhu, no uandaspti eska karakatecharhu ísï uandasïrenga (Uku. 17:2, 3, 22-31). ¿Nénachi uá májkueni úni? Engachi uandontskuarheaka nema jingoni enga no jakajkujka Bibliaeri ambe, jamberi sánderu sésiuati eskachi no úraaka Bibliani. Engachi exeaka eska kʼuiripu no uékasïnga eska exenhaaka juchantsïni jingoni Bibliani arhintani jarhani, ju je exeraani karakatechani enga no xáni xarharaaka, por ejemplu, tableta o selulari ma úraparini.

7. Exeparini ambe enga arhijka 1 Korintu 9:20-23, ¿jamberichi ambe uá para májkueni úni eska apostuli Pablu?

⁷ Ju je kurhangutspini ka jingontku kurhajchpeni. Jatsiskachi para jánguarhintani kurhanguni andisï kʼuiripu ísï eratsijki (Prov. 20:5). Ju je exeni ménderu Pablueri ejemplu. Ima judiuespti, ísï jimbo, jatsipti para exeni néna predikarikuani no judiuechani engaksï no ma ambe o kasi no ma ambe mítipka Jeobaeri ni Karakatecheri ambe. Engachi uéjka kurhangukuani na engaksï eratsijka ka pʼikuarherani juchari territoriurhu anapu kʼuiripuechani, jamberichi jatsiaka para informasioni jirinhantani juchari publikasionicharhu o ambakiti erachini ma kurhakuni jarhuajperata (arhinta je 1 Korintu 9:20-23).

8. ¿Nénachi úpirini uénani uandontskuarheni Bibliaeri ambe?

 ⁸ Ambe engachi uéjka úni, jindesti exeantani imani kʼuiripuechani engaksï jukanchaka kurhaani ambe engachi aianhpijka (Mat. 10:11). Para ísï úni, jatsiskachi para jarhuatani kʼuiripuni uandani ambe enga eratsijka ka jingontku kurhajchani. Inglaterra anapu erachi ma kurhamarhiasïndi kʼuiripuechani ambe uétarhijki úni para temungurhiri ma sési irekani, sési tʼarhexeraani sapiichani o néna orhepani uérani engachi no jurhimbikua jingoni kánhajka. Enga kʼuiripu na mókuntajkia, ima kurhamarhisïndi: “¿Nájtsï exesïni arini konsejuni enga jukari dos mili uéxurhinikia enga karanhaka?”. Jiájkani, no uandaparini eska Bibliarhu ísï arhisïnga, imeri telefonurhu uératini exeraasïndi máru karakatechani.

9. ¿Nénachi uá jarhuataani imechani engaksï kasi no uéjka uandontskuarheni Tata Diosïri ambe?

⁹ ¿Nénachi uá mintsitarhu niárakuani imechani engaksï kasi no uéjka Tata Diosïri ambe uandontskuarheni? Imeri ambe uandontskuarhiparini engaksï míteka. Por ejemplu, uánikuechaksï tsitisïndi naturaleseri ambe. Ísï jimbo, jamberichi úpiringa arhiani: “Jamberijtsï míteka eska uánikua ambe engaksï sientifikuecha újka naturalesaruksï pʼitasïnga. Por ejemplu, imecha engaksï mikrofonuechani uájka, exesïndiksï na enga úkata jaka kutsïkua ka imecha engaksï kamarechani uájka exesïndiksï na enga úkata jaka éskua. ¿Ambejtsï eranhaskasïni engajtsï naturaleseri ambe eratsijka? ¿Exesïntsï eska kʼéri uinhapikua máeska, kʼuiripu ma o máteru ambe?”. Engachi jingontku kurhajchaakia, ístuchi úpiringa arhini: “Engaksï injenieruecha exejkia na enga úkata jaka éskua ka kutsïkua, jamberichi kurhamarhikurhipiringa néri ambeksï jorhenguarhixaki. Kánikua tsitiska enga ióntki anapu poeta ma kurhanguarhipiringa sini újki kurhaani ima enga úka kutsïkuani ka sini újki exeni ima enga úka éskuani. Tátsekua, poeta uandaspti eska ima enga ini ambe úka, jindeska enga jorhendajka kʼuiripuni. Máru sientifikuechaksï niárasti májkueni ambe eratsini” (Sal. 94:9, 10). Jimajkani úpiringachi kʼuiripuni bideu ma exerani enga jw.org® jaka, “Ambe engaksï uandajka máru tsípikueri ambe”, partirhu “Entrebistecha ka experiensiecha” (exe je PUBLIKASIONICHA >BIDEUECHA). Ochi jamberi úpiringa arini foietuni aiakuni ¿Es la vida obra de un Creador? o arini El origen de la vida. Cinco cuestiones dignas de análisis.

10. ¿Ístuchi néna uá uénani uandontskuarheni kʼuiripu ma jingoni enga no uéjka Tata Diosïri ambe uandani?

¹⁰ Sáno iámindu kʼuiripuechaksï uékasïndi sánderu sési irekani sánderu orhepani. Peruksï uánikuecha chésïndi eska parhakpini kʼamajkunhaaka o eska nóteru nema irekaakia. Noruega anapu erachi ma enga sirkuitueri orhejtsïkutika uandasïndi eska imecha engaksï no uéjka Tata Diosïri  ambe uandontskuarheni, sáno méntkisïksï imeri ambe uékasïnga uandani enga parhakpinirhu úkuarhini jaka. Enga erachi na saludarijkia kʼuiripuni, kurhamarhisïndi: “¿Exesïntsï eska sánderu orhepani sési jánhaskuarhintaaka? ¿Ne uá ísï úni? ¿Politikuecha, sientifikuecha o máteru nema?”. Enga kurhajchaajkia, arhintasïndi o uandani karakata ma enga imani xáni sési jásï amberi uandajka enga sánderu orhepani úkuarhiaka. Máruksï kánikua tsitisïndi kurhaani aiatsperakuani eska Echeri no kʼamajkunhaaka ka eskaksï ambakiti kʼuiripuecha irekaaka ixú para méntkisï (Sal. 37:29; Ecl. 1:4).

11. a) ¿Andichisï no jatsi para májkueni uénani uandontskuarheni iáminduecha jingoni? b) Exeparini ambe enga Pablu uandapka ixú Roma 1:14-16, ¿ambechi jatsiski para úni?

¹¹ Sésichi úsïnga engachi no májkueni uénajka uandontskuarheni iáminduecha jingoni. No iámindu kʼuiripu májkuenisti. Ambe enga ma kʼuiripu tsitipiringa kurhaani, máteru no uékapirindi. Máruksï uékasïndi uandontskuarheni Tata Diosïri ambe o Bibliaeri. Peruksï máteruecha uékasïndi Bibliaeri ambe kurhaani engachi orheta máteru amberi uandontskuarhikuajka. No arhiparini na engachi uénaaka uandontskuarheni, jatsiskachi para jánguarhintani iáminduechani predikarikuani (arhinta je Roma 1:14-16). Ka nóchi meni mirikurhiaka eska Jeobasï újka eska imecha engaksï uéjka jurhimbikuani, mintsitarhu niárakuauaka ima ambe enga ísïka (1 Kor. 3:6, 7).

12. ¿Ambechi uá úni parachi Asia anapuecha jingoni uandontskuarheni engaksï no méni eratsika sini jarhaski Kuerajpiri ma o nómbe?

¹² Interu parhakpinirhu, uánikua aianhpirichaksï exeantasïndi kʼuiripuechani engaksï Asia anapueka. Máru inde kʼuiripuechaksï jimesïsï anapuesti nani engaksï juramuticha no jurajpejka para relijioniri ambe úni. Uánikua Asia anapu paisicharhu, uánikuechaksï no méni eratsisti sini jarhaski Kuerajpiri ma o nómbe. Máruksï uékasïndi míteni sánderu ambe ka jiókuarhini Bibliani estudiarini engaksï aiaminhajka. Peru máteruechaksï jamberi uénani jámani no xáni seguru jarhasïndi para máteru ambe jorhenguarhini. ¿Ambechi uá úni parachi aianguani jurhimbikueri ambe? Máru ambakiti aianhpirichani kánikua marhuakuasïndi ambe máeri uénani uandontskuarheni kʼuiripu jingoni, uandanhiani imecha jimbo ka tátsekua, engaksï exejka eska sési jarhaska ísï úni, exerani na enga xáni marhuakuakia úni ambe enga Bibliaeri karakata ma uandajka.

13. ¿Ambe jarhuataa kʼuiripuni para uékani míteni Bibliaeri ambe? (Exe je fotuni enga uénakuarhu jaka).

¹³ Ambe engaksï kʼuiripuecha sánderu tsitijka, jindestiksï Bibliaeri ambakiti konsejuecha (Ecl. 7:12). Jini Nueva York, pirenchi ma enga imechani pʼorhembiajka engaksï chino mandarín uandajka, uandantasïndi: “Jánguarhintasïnga kurhajchaani ka jingontku jarhani kʼuiripuecha jimbo. Engani mítejka eskaksï apenasi niáraska paisirhu, arini ambe kurhamarhiasïnga, náksïni nichexaki, exentaskijtsïa ánchikuarhita ka nénaksïni kámasïni kʼuiripuecha”. Ménisï i ambe úsïndi para uénani Bibliaeri ambe uandontskuarheni. Enga pirenchi exejka eska uáka ísï úni, ístu arhiasïndi: “Nájtsï exesïni, ¿ambe uétarhijki parachi iáminduecha sési pájperani? ¿Uáksïni exerani karakata ma enga Bibliarhu jaka? Arhisïndi: ‘Uénani arhijperani, ísïsti komu kʼéri ma puerta mítani; ante de uénani uarhiperakua, kéndikukuarhi’. ¿Exesïntsï eskajtsïni i konseju jarhuataaka parachi sési pájperani máteruecha jingoni?” (Prov. 17:14). Ísï uandontskuarhikuani kʼuiripuechani, jarhuataatijtsïni míteni néjtsïni uékaa kurhajchani máteru jimbo.

14. ¿Ambe úsïni Lejano Oriente anapu erachi ma para jarhuataani imechani engaksï uandajka eskaksï no jakajkusïnga Tata Diosïni?

¹⁴ ¿Ambechi uá arhiani imechani engaksï uandajka eskaksï no jakajkusïnga Tata Diosïni? Lejano Oriente anapu erachi ma enga ióni páni jakaia predikarikuani imechani engaksï no tsitijka relijioniri ambe, uandantasïndi: “Sáno méntkisï enga ixú nema uandajka eska no jakajkusïnga Tata Diosïni, arhikuekasïndi  eska no uétarhisïnga kómarhiani imecheri diosïchani. Kasi méntkisï arhiasïnga eskani jíjtuni májkueni eratsisïnga, eskaksï sáno iámindu diosïcha no jurhimbitiska, sino eskaksï kʼuiripuecha uáska. Arhikuantasïnga Jeremías 16:20 enga arhijka: ‘¿Úsïni kʼuiripu ma diosïchani úkuarhiani, nájkirukaksï no meru diosïcheeka?’. Tátsekua kurhamarhiasïnga nénachi úpirini míteni nákiski Tata Diosï jurhimbiti ka nákiskiksï diosïcha enga kʼuiripu uáka. Jingontkuni kurhajchaasïnga ambe engaksï uandaaka ka arhikuantasïnga Isaías 41:23: ‘Aiangujtsïni je ambe úkuarhia sánderu orhepani parachi úni míteni eskajtsï cha diosïska’. Tátsekua exerasïnga ambe enga uandakia Jeoba eska uáka sánderu orhepani”.

15. ¿Ambechi jorhenguarhisïni Asia esterisï anapu erachiri ma?

¹⁵ Ju je exeni ambe enga újka Asia esterisï anapu erachi ma enga ménderu pʼorhembiantajka kʼuiripuechani. Ima uandasïndi: “Exeraasïnga ejempluechani na enga xáni marhuajka Biblia, profesiauechani engaksï kumplirikuarhikia ka ístuni uandontskuarhikuasïnga echeriri ambe, parhakpiniri ka joskuecheri ambe. Tátsekua, jarhuataasïnga kurhanguni eska iámindu i ambe xarhatasïnga eska jarhaska Kuerajpiri ma enga tsípitiika ka jánhastiini. Enga kʼuiripu uénani jarhajkia jakajkuni eska Tata Diosï jarhaska, jiájkani exerasïnga ambe enga Biblia uandajka Jeobaeri ambe”.

16. Eska na arhijka Ebreu 11:6, ¿andiksïsï jorhenguarhiricha uétarhinchajki mintsikani Tata Diosïni ka Bibliani ka nénachi uá jarhuataani paraksï ísï úni?

¹⁶ Engachi imani kʼuiripuechani jorhendani jaka engaksï no jatsika relijioni ma, jatsiskachi para seguirini jarhani jarhuataani jakajkuni eska Tata Diosï jarhaska (arhinta je Ebreu 11:6). Ístuchi jatsiska para jarhuataani mintsikani ambe enga Biblia arhijka. Para ísï úni, uétarhiati eskachi uánikua xanhari jorhendauaka májku ambe. Méni engachi jorhendaaka Bibliaeri ambe, jamberichi jatsiaka para exeni máru ambe enga xarhatajka eska Biblia Tata Diosïri Karakateska. Por ejemplu, uákachi exeani máru profesiauechani engaksï kumplirikuarhikia, na enga xáni sési terukuntajka Biblia siensia ka istoria jingoni o ambakiti konsejuechani engaksï jimini jaka.

17. ¿Ambe niáraa úkuarhini engachi xénchaska kʼuiripuni?

¹⁷ Engachi xénchaajka kʼuiripuechani, ia seaksï tsitini relijioniri ambe o nómbe, jarhuataasïngachi Kristueri chúxapatiini (1 Kor. 13:1). Ambe engachi uéjka engachi jorhendajka Bibliaeri jurhimbikueri ambe, jindesti eskaksï niáraaka kurhanguni eskajtsïni Tata Diosï xénchaasïnga ka eska uékasïnga eskachi xénchaaka. Mándani uéxurhini, uánikua kʼuiripu itsï atakuarhisïndi engaksï antesi no o kasi no sáni uékenga relijioniri ambe peruksï niárasti xénchani Tata Diosïni. Ísï jimbo, ju je ambakiti ambe eratsini, uékperakua xarhatakuani ka eskachi meru uandanhiasïnga iámindu jásï kʼuiripu jimbo. Ju je jingontku kurhajchaani ka jánguarhintani kurhangukuani. Ju je juchari ejemplu jingoni jorhendaani imani ambe úni enga Kristu úka.