1, 2. a) Seguni ambe enga Jesusi juramuka ixú Mateu 28:18-20 (TDU), ¿náki ánchikuarhita jindeski enga sánderu jukaparhakueka para Jeobaeri kúnguarhikua? b) ¿Náki kurhamarhikuechanchi mókuantaua?

APOSTULICHAKSÏ kánikua tsípini jápti engaksï tánguarhintapka terujkanikuarhu juáta ma jimbo. Enga Jesusi tsíntapkia arhiaspti eskaksï jima exejperantapiringa imani jingoni (Mat. 28:16). Jamberi jiánipti enga xarhakuapka jukari “kinientosi ermanuechani engaksï májku japka” (1 Kor. 15:6). ¿Andisï Jesusi úpi indeni tánguarhikuani? Para arini ambakiti ánchikuarhita íntsaani imeri chúxapatichani: “Ísï jimbo ni je ka iámindu iretechani jorhengorheri uá je” (arhinta je Mateu 28:18-20, TDU).

² Imecha engaksï kurhajchapka Jesusi, niárasptiksï kúnguarhikua jingoni kuenta úkuarhini primeru siglurhu. Ambe engaksï orheta jatsipka para úni, jindespti eskaksï jarhuataapiringa máteruechani paraksï Kristueri chúxapatiini. * Ini jurhiatikuecha jimbo, uánikua kúnguarhikuechaksï jarhasti interu parhakpinirhu engaksï jurhimbiti kristianuecherika ka seguirixatiksï úni indeni ánchikuarhitani enga xáni jukaparhakueka. Ini artikulu jimbochi tʼámu kurhamarhikuechani mókuantauaka: ¿Andisï xáni jukaparhakue Kristueri chúxapati úani? ¿Ambe xáni uétarhisïni úni ini ánchikuarhita jimbo? ¿Nénaksï úsïni jarhuajpeni iámindu kristianuecha? Ka ¿andisï uétarhijki tekantstiini para ini ánchikuarhitani úni?

3. Eska na arhijka Juanu 14:6 ka 17:3, ¿andisï xáni jukaparhakue ánchikuarhita para Kristueri chúxapati úani?

³ ¿Andisï xáni jukaparhakue ánchikuarhita para Kristueri chúxapati úani? Jimbokaksï solu Kristueri chúxapaticha úsïnga Tata Diosïri amigueni. Ístuksï iásï sánderu sési irekasïndi  ka jatsistiksï erokuarhikua ma para sánderu orhepani, irekani para méntkisï (arhinta je Juanu 14:6; 17:3). Ísïsti eskajtsïni Jesusi kʼéri ánchikuarhita ma íntskuska, peruchi no jandiajku jarhaska. Apostuli Pablu uandaspti eska ima ka máteru kristianuechaksï jindespka “Diosïri jarhuajpiricha” (1 Kor. 3:9). Ísïsti, Jeoba ka Kristujtsïni kʼéri kóntperata ma íntskusti juchantsïni engachi no perfektueka.

4. ¿Ambechi jorhenguarhisïni ambe engaksï nitamakuarhipka Iván ka Matilde?

⁴ Kánikuachi sési pʼikuarheraaka ánchikuarhini para kʼuiripu Kristueri chúxapatiini. Ju je exeni ambe enga nitamakuarhipka Iván ka Matilde, Colombia anapu temungurhiri ma. Tumbinksï ma predikarikuspti enga Davier arhinhajka, i arhiaspti: “Uékapiringa mójtakuni na engani irekani jaka, peruni no úsïnga”. Davier, bokseadori máespti enga droga ambe úrenga ka kánikua kauini. Ístu, Erika jingoni irekaxapti enga imeri nobiepka. Iván uandantasïndi: “Uénaspkachi pʼorhembini imeri iretarhu enga iauani japka. Jatsisïrengachi para bisikleta jingoni iauani nirani jimesïsï enga kánikua atsïmu japka. Enga Erika exepka eska Davier mójtakurhixapkia ka nóteru ísï jámania eska antesi, ístu uénaspti Bibliani estudiarini”. Tátsekua, i tumbi jurajkuspti droga ambe, kauikua ka bokseoni. Ístu sibilarikuarhispti Erika jingoni. Matilde uandantasïndi: “Engaksï Davier ka Erika itsï atakuarhipka 2016 jimbo, miántaspkachi enga Davier uandenga eska uékapiringa mójtakuni na enga irekani japka, peru eska no úsïrenga. Nóchi úspka pʼíngukuarhini ka ueraspkachi”. Meruchi kánikua tsípisïnga jarhuatani nemani Kristueri chúxapatiini.

5. ¿Ambechi orheta uá úni para jarhuatani kʼuiripuni Jesusiri chúxapatiini?

⁵ Ambe engachi orheta jatsika para úni, jindesti jirhinhataani imechani engaksï uékajka míteni Jeobani (Mat. 10:11). Xarhatasïngachi eskachi ambakiti Jeobaeri testiguecheska engachi iáminduecha jingoni uandontskuarhejka engachi xáni exeantajka. Ka xarhatasïngachi eskachi meru kristianueska engachi újka ambe engajtsïni Jesusi juramuchika, aianhpini.

6. ¿Ambejtsïni jarhuataa parajtsïni sési nicheni aianhpikuarhu?

⁶ Máruksï uékaxati míteni Bibliaeri ambe. Peruksï máteruecha no interesi xarhatasïndi uénani jámani ka jamberichi jatsiaka para jirhinhakuntani ambechi uá úni paraksï tsitini jorhenguarhini. Parajtsïni sési nicheni, jatsiskachi para sési míteni amberi uandontskuarhikuni kʼuiripuni. Ju je exeni ambeksï uékapirini kurhaani ka eratsini nénachi úpirini aianguani.

7. ¿Nénachi úpirini uénani uandontskuarheni kʼuiripuecha jingoni? b) ¿Andijtsïsï exejki eska jukaparhakueska jingontku kurhajchaani ka respetariuani kʼuiripuechani?

⁷ Por ejemplu, úpiringachi arhiani: “Uékapiringa míteni ambejtsï eratsisïni ariri ambe. Ini jurhiatikuecha jimbo iápurisïchi no sési nitamakuarhisïnga. ¿Exesïntsï eska uétarisïnga juramukua ma enga interu parhakpinirhu sési péntaaka ambe?”. Tátsekuachi úpiringa arhintani Daniel 2:44 ka uandani inderi ambe. Ochi jamberi úpiringa arhini: “Cha na exesïni, ¿néna uétarhijki jorhendaani sapiichani paraksï ambakiti kʼuiripuecheni?”. Jimajkani úpiringachi exerani Deuteronomio 6:6, 7. Náki uéjkichi tema erakuni, ju je eratsiani imani kʼuiripuechani engachi jingoni uandontskuarheaka. Ju je eranhaskani na enga xáni marhuakuauaka míteni ambe enga meru jorhentpijka Biblia. Engachi kʼuiripuecha jingoni uandontskuarheni jauaka, uétarhisïndi eskachi jingontku kurhajchauaka ka respetarini na engaksï eratsijka. Ini ambe úparini, sánderuchi sési kurhangukuauaka ka imechajtsïni sánderu uékaati kurhajchani.

8. ¿Andichisï jatsi para no kuatantani someni pʼorhembiantani kʼuiripuechani?

 ⁸ Antesi de kʼuiripu uékani Bibliaeri ambe jorhenguarhini, jamberichi jatsiaka para tiempu úrani ka jánguarhintani uánikua xanhari pʼorhembintani. ¿Andi? Uénani jámani, jimboka jamberi no jauaka imeo engachi niuaka pʼorhembintani o no úni uandontskuarhini juchantsïni jingoni. Ístu, jamberi uétarhiati eskachi uánikua xanhari pʼorhembintaaka paraka kʼuiripu agustu pʼikuarheraaka juchantsïni jingoni ka jiókuarhini Bibliaeri ambe jorhenguarhini. Ju je miáni eska tsïtsïki ma uáka kʼéni engachi someni jatsikuaka itsï. Májkueni, kʼuiripu sánderu xénchaati Jeobani ka Kristuni engachi someni uandontskuarhikuaka Tata Diosïri Karakateri ambe.

9, 10. ¿Andichisï uandajki eskachi iámindu aianhpiricha jarhuajpesïnga jirinhantaani kʼuiripuechani engaksï uéjka Jesusiri chúxapatiini?

⁹ Iámindu kristianuecha engachi aianhpirika, jarhuajpesïngachi exeantani imani kʼuiripuechani engaksï ambakiti mintsita ma jukaka. Úpiringachi ísï terukutantani juchari ánchikuarhitani komu tataka sapichuni ma jirinhantani enga tsinchitini jaka. ¿Andichisï úa ísï terukutantani? Ju je exeni ejemplu ma enga meru ísï úkuarhipka. Para tataka sapichuni ma jirinhatani enga tanimu uéxurhini jatiripka, ma kinientu kʼuiripu ísï jarhuajpespti. Beinte ora ísï nitamasptia enga tataka sapichu tsinchipka astaka kʼuiripu ma exentapka jima enga tsíri jatsinhajka. Ima kʼuiripu no uandaspti eska ima exentaspka, sino uandaspti: “Úskachi exentani uánikua kʼuiripuecheri jarhuajperata jingoni”.

¹⁰ Uánikua kʼuiripu májkueni tsinchikata pʼikuarherasïndi eska ima tataka sapichu. Nóksï mítisti eska sánderu orhepani ambakiti ambe jauaka, peruksï uékasïndi eskaksï jarhuatanhaaka (Efes. 2:12). Jukari ochu miioni Jeobaeri testiguechachi jámaxaka jirinhantaani indeni kʼuiripuechani. Jamberichi jaka aianhpiricha engachi no exeantajka kʼuiripuechani engaksï uékapiringa Bibliaeri ambe jorhenguarhini,  peru máteru aianhpiricha engaksï imani mismu territoriurhu aianhpijka, exeantasïndiksï. Enga erachi ma niárajka jarhuatani kʼuiripuni ma Kristueri chúxapati úkuarhini, iáminduechachi kánikua tsípisïnga.

11. ¿Nénachi uá jarhuataani máteruechani Kristueri chúxapatiini nájkirukachi no nemani jorhendani jauaka Bibliaeri ambe?

¹¹ Nájkirukachi iáiasï no nemani jorhendani jaka Bibliaeri ambe, uákachi máteru ambe úni para jarhuatani kʼuiripuni Kristueri chúxapatiini. Por ejemplu, enga ma kʼuiripu apenasi uénajka nirani Kʼumanchikua Reinuerirhu, uákachi sési uandajpani ka úni eska agustu pʼikuarheraaka. Engachi xarhatakuska uékperakua, jarhuataakachi seguru jarhani eskachi ambakiti kristianueska (Juanu 13:34, 35). Ka ístu, ambe engachi tánguarhikuecharhu mókuntajka nájkirukachi no uánikua ambe uandajka, jarhuataati eska mintsita ka janhanharhikua jingoni uandaaka ambe enga jakajkujka. Ístuchi uáka jimbanhi aianhpiri ma jingoni uérani aianhpini ka jarhuatani néna uá Biblia jingoni jorhentpini. Engachi ísï újka, jarhuatasïngachi úni ambe enga Kristu úpka (Luk. 10:25-28).

12. ¿Uétarhisïni eskachi uánikua ambe jorhenaaka úni para jarhuatani nemani Kristueri chúxapatiini? Íntspi je ejemplu ma.

¹² Nóchi jatsiska para eratsini eskachi uétarhinchasïnga uánikua ambe jorhenani úni para jarhuatani nemani Kristueri chúxapatiini. Faustinaeri ejemplu enga Bolivia irekaka, jarhuatasïndijtsïni exeni andichisï no jatsi para ísï eratsini. Enga Jeobaeri testiguechani míteapka, no jorhenaspti arhintani, peru sáni jorhenguarhistia. Iásï itsï atakuarhistia, ka kánikua tsitisïndi aianguani máteruechani jurhimbikueri ambe. Sáno méntkisï, mándani semana sinku kʼuiripuechani jorhendaasïndi Bibliaeri ambe. Nájkiruka Faustina no jorhenaka xáni sési arhintani eska sáno iámindu imeri estudianticha, seisi kʼuiripuni jarhuatastia paraksï itsï atakuarhini (Luk. 10:21).

13. Nájkirukachi uánikua ambe jatsijka para úni, ¿náki kóntperatechanchi jatsiaua engachi jarhuataska kʼuiripuni Kristueri chúxapatiini?

¹³ Uánikua erachichaksï kʼéri ánchikuarhita ambe úsïndi, jimboksïsï xáni okupadu jarhajti. Peru ístuksï jánguarhintasïndi arhutani tiempu para Bibliaeri ambe jorhentpini, ambe ma enga kánikua sési pʼikuastaajka. Ju je exeni Melanieri ambe. Jandiajku tʼarhexeraxapti imeri nanaka sapichuni enga ochu jatiripka. Ístu mándani semana ánchikuarhisïrendi ka jarhuajpesïrendi imeri táti jembani kuidarini enga kanseri kámenga. Ireta ma jimbo irekaspti enga iauanisï japka Alaska nani enga imajku Jeobaeri testiguepka. Méntku úndaspti kómarhini Jeobani eska íntskupiringa uinhapikua para úni nirani aianhpini nájkiruka tsʼirakuarhipiringa, jimboka uékasïrenga exentani nemani para Bibliaeri ambe jorhendani. Astaka exentapka Sarani, enga kánikua tsípipka mítini eska Tata Diosï jukaska nombri ma. Tátsekua, Sara uékaspti jorhenguarhini Bibliaeri  ambe. Melanie uandantasïndi: “Biernisï inchatiruechani, kánikua kuataratini jarhasïrenga. Peru juchiti nanaka sapichu ka ji nirasïrengachi Bibliaeri ambe jorhendani ka inde ambejtsïni kánikua marhuachisïrendi. Kánikuachi tsitisïrenga jirinhatani informasioni para mókuntani ambe engajtsïni Sara kurhamarhienga ka kánikuachi tsípispka exeni enga Sara niárapka Jeobaeri amiga úkuarhini”. Sara balori jingoni orhepani uéraspti enga no sési kánhapka, jurajkuspti imeri iglesiani ka itsï atakuarhisti.

14. a) ¿Néna sáno májkueniski kurucha pʼitamani ka Kristueri chúxapati úani? b) ¿Ambejtsïni jarhuatasïni úni Pablueri uandakuecha engaksï 2 Timoteo 4:1, 2 jaka?

¹⁴ Nájkiruka aianhpikuarhu ísï xarharajka enajki no nema uéjki Kristueri chúxapatiini, ju je seguirini jirinhantaani imechani engaksï uékapiringa ísï úni. Ju je no mirikurhini eska Jesusi ísï terukutantaspka ini ánchikuarhitani komu kurucha pʼitamani itsïrhu. Kurucha pʼitamatichaksï kánikua ánchikuarhisïndi ka nóksï ma kurucha pʼitamani. Uánikua xanhariksï chúrikuechani ánchikuarhisïndi o xarhintku ka astaksï jatsisïndi para iauani nirani marirhu (Luk. 5:5). Májkueni, máru Testiguechaksï uapurisï ka ióni jámasïndi tekantskua jingoni aianhpini. Ísïksï úsïndi paraksï úni sánderu kʼuiripuechani exeantani. Imecha engaksï jánguarhintajka ísï úni, sáno méntkisïksï úsïndi uandontskuarheni imani kʼuiripuechani jingoni engaksï uéjka míteni ambe engachi aianhpijka. ¿Úpirinchi ima jandora aianhpini o jimesïsï nani engachi sánderu úpiringa exentani kʼuiripuni? (Arhinta je 2 Timoteo 4:1, 2).

15. ¿Andisï uétarhijki tekantskua para Bibliaeri ambe jorhentpini?

 ¹⁵ ¿Andisï uétarhijki tekantskua para Bibliaeri ambe jorhentpini? Ma ambe jindesti jimboka no solu uétarhisïnga jarhuatani kʼuiripuni míteni ka tsitini ambe enga Biblia jorhentpijka. Ístuchi jatsiska para jarhuatani míteni ka xénchani Imani enga kararkuarhika Bibliani, Jeobani. Ka aparte de jorhendani ambe uékasïni Jesusi eska uáka imeri chúxapati, jatsiskachi para jarhuatani néna ambakiti kristianu máeni. Jatsiskachi para imani jingoni jarhani enga jánguarhintani jauaka úni ambe enga Bibliarhu jorhenguarhijka. Máru jorhenguarhirichaksï sóntku niárasïndi mójtakuni na engaksï eratsijka ka ambe engaksï pʼindepka úni, peruksï máteruecha sánderu tiempu uétarhinchasïndi.

16. ¿Ambechi jorhenguarhisïni Raúliri ambe?

¹⁶ Ambe enga nitamakuarhipka Perú anapu misioneru ma xarhatasïndi eska marhuasïnga tekantstiini. Ima uandantaspti: “Raúl enga Bibliaeri ambe jorhenguarhini japka, jorhenguarhiasptia tsimani libruechani. Peru seguirixapti kʼérati uandanhiatechani jatsiani. Imeri temungurhirikua kánikua no sési jarhaspti, no sési járhati uandakuechani úraasïrendi ka uájpechaksï úkua jukanchasïrendi janhanharhini. Peru, jimboka no kueratasïrenga tánguarhikuecharhu seguirispka pʼorhembini imani ka imeri familiani. Niáraspti itsï atakuarhini ísï tátsekua engani jukari tanimu uéxurhini páni japkia desdekani mítepka”.

17. ¿Ambechi exea máteru artikulu jimbo?

¹⁷ Jesusi uandaspti eskachi nipiringa ka “iámindu iretechani jorhengorheri” úani. Parachi úni ambe engajtsïni ima juramuchika, uánikua xanharichi imani kʼuiripuecha jingoni uandontskuarhisïnga engaksï méntku máteru ambe jakajkujka eska jucha, asta imecha jingoni engaksï no ma relijionirhu jaka oksï uandani eska Tata Diosï no jarhaska. Máteru artikulu jimbochi exeaka néna aianguani Reinueri ambe indeni kʼuiripuechani.