1, 2. a) ¿Ambe úxaki iásï eska kʼuiripu sánhani arhiaka no sési pájperani? b) ¿Náki kurhamarhikuechanchi mókuantaua?

PIRENCHI ma sur de Europa anapu, ióntki anapu ambe eratsintaparini, uandantasïndi: “Desdekani nanaka sapichu máepka, puru no sési kámberakua ambe exeska. Jimbosïni no méni jiókuarhika politikarhisï inchamukuni juchiti paisirhu ka mejori máteru ambe apoiarispka enga jindepka para no sési ambe niátani. Asta jamberini ióni nobiespka kʼuiripueri ma enga no sési úripka”. Sur de África anapu erachi ma, ístu sési exesïrendi eska atajperakua ambe japiringa, antesi de Jeobaeri testigueni. Ima uandasïndi: “Ísï exesïrenga eska juchiti tribu sánderu kʼéri ambespka eska máteruecha ka partidu politikeri ma jimbo inchamukuspka. Jimachi jorhendanhaspka lansecha jingoni uándikuani juchari enemiguechani politikeri, asta imechani engaksï juchari triburhu anapuepka”. Ka pirenchi ma enga Europa sentrali irekaka, uandasïndi: “Kánikua no sési kámpisïrenga ka kurhunhiasïrenga iámindu imani engaksï máteru paisi o relijioni anapuepiringa”.

² Íksï komentariuecha xarhatasïndi na enga xáni no sési jánhaskuarheni jaka iásï: uarhiperanhasïndi paraksï táchanisï juramukuarhini, politika ambe úsïndi eska kʼuiripu no uáka sési pájperani ka uánikua paisicharhu, imechani engaksï máteru paisirhu anapueka, sánderuksï nóteru  xénchaasïndia. Eska na uandapkia Biblia, ini últimu jurhiatikuecha jimbo, kʼuiripu no uékasïndi sési pájperani máteruecha jingoni (2 Tim. 3:1, 3). ¿Nénachi uá kristianuecha sési pájperani nájkiruka i parhakpinirhu sánhani arhini jaka no sési pájperanhani? Uákachi uánikua ambe jorhenguarhini imani amberi enga Jesusi úpka enga Echerirhu japka, jimboka nani enga ima irekani japka, ístu no sési jánhaskuarhexapti politika jimbo. Ini artikulurhu, mókuantauakachi tanimu kurhamarhikuechani: ¿Andisï Jesusi no uékapi apoiarini kʼuiripuecheri eratsikuani engaksï jandiajku uékenga juramukuarhini? ¿Néna xarhataspi Jesusi eska Tata Diosïri marhuaricha no jatsiska para politikarhisï inchamukuni? Ka ¿nénajtsïni xarhatachiski eskachi no méni jatsiska para uarhipeni?

3, 4. a) Jesusiri jurhiatikuechani jimbo, ¿ambeksï erokuarhixapi judiuecha politikeri ambe? b) ¿Ambeksï erokuarhixapi asta Jesusiri chúxapaticha?

³ Uánikua judiuecha enga Jesusi predikarikuapka, nóteruksï uékasïrendia eska Roma juramukuapiringa. Grupu ma judiuecheri engaksï selote arhinhenga, úsïrendiksï eska kʼuiripu indeni ambe eratsipiringa. Uánikua kʼuiripu i grupueri, imani ambeksï úsïrendi enga Judasï el Galileu uandenga, enga ísku jatini uandenga eska mesiasispka primeru siglurhu ka uánikuechani enganiariuaspti. Josefo, judiu ma enga istoria ambe exejka, uandasïndi eska Judasï “úspka eskaksï jima anapuecha úndapiringa nóteru kurhandirania, jimboka arhiasïrenga eskaksï no jatsispka para jiókuarhini eskaksï romanuecha kobrariuapiringa impuestu”. Peru romanuechaksï uándikuspti Judasïni (Uku. 5:37). Máru selotechaksï niáraspti uarhipeni paraksï konseguirini ambe engaksï uékenga.

⁴ Sáno iámindu judiuechaksï uékaxaptia eska Mesiasi janopiringa, jimbokaksï erokuarhisïrenga eska politikeri orhejtsïkuti máepiringa enga pʼímutantaapiringa Romaeri juramukuarhu ka eskaksï judiuecha úpiringa ménderu jandiajku juramukuarhini (Luk. 2:38; 3:15). Uánikuaksï eratsisïrendi eska Mesiasi uaxastapiringa juramukua ma Israeli. Enga inde ambe úkuarhipiringa, uánikua judiuecha engaksï máteru nanisï irekani japka, úpirindiksïa imecheri iretarhu níntani. Asta Juanu el Bautista kurhamarhispti ma xanhari Jesusini: “¿Tʼu jindeski ima enga jupiringa o erokaachi máteruni?” (Mat. 11:2, 3). Jamberi uékendi mítini sini máteru kʼuiripuepirini enga kumpliripiringa ambe engaksï judiuecha erokuarhini japka. Enga Jesusi tsíntapkia, tsimani imeri chúxapatichaksï exentaspti Jesusini xanharu jimbo engaksï Emaúsi nirani japka ka arhisptiksï eska Mesiasi no úspka ambe engaksï erokuarhini japka eska úpiringa (arhinta je Lukasʌ 24:21). Ka ísï tátsekua, apostulichaksï kurhamarhispti Jesusini: “Tata, ¿tʼuri iásïtki íntsantaua juramukua Israeli anapuechani?” (Uku. 1:6).

5. a) ¿Andiksïsï galileuecha uékeni eska Jesusi imecheri reipiringa? b) ¿Jesusi néna jurhimberantaaspi?

⁵ Seguru eska ima ambe engaksï erokuarhini japka eska Mesiasi úpiringa, úpka eskaksï galileuecha uékapiringa eska Jesusi imecheri reipiringa. Sési jimboksï ísï exesïrendi komu ambakiti juramuti ma, jimboka sési jorhentpisïrenga, uinhapikua jatsispka para tsinaani pʼamenchatichani ka asta tʼireraani imani engaksï no jatsikuarhipka. Enga na tʼireraapkia máru sinku mili achatichani, “Jesusi mítispti eska imecha jupiringa ka afuersasiksï páni paraksï rei úni, ísï jimbo ima mejori seguirispti késtakukuani ka niraspti juátarhu karhamani jandiajku” (Juanu 6:10-15). Ísï pauandikua, máteru ladurhu mari de Galilea, kʼuiripu ísku jarhasptia. Jimajkani, Jesusi arhispti kʼuiripuni eska jurhaspka Echerirhu para jorhendaani Tata Diosïri ambe ka no para jatsikuarhikua ambe íntsaani. Arhiaspti: “Ánchikuarhi je no para andani tʼirekua enga sóntku kʼamarajka, sino para andani indeni tʼirekuani enga jindeka para tsípikua méntkisï jatsini” (Juanu 6:25-27).

6. ¿Néna xarhataspi Jesusi eska no uékasïrenga ixú Echerirhu juramukua jatsini politikarhu? (Exe je orheta dibujuni enga uénakuarhu jaka).

⁶ Ante de uarhini, Jesusi kuenta íntskukuarhispti eskaksï máru chúxapaticha erokuarhixapka eska juramukua ma uaxastapiringa jini Jerusaleni. Para  xarhatani eska ima no úpiringa imani ambe, ilustrasioni ma úraspti minecheri. Ini ilustrasionirhu, Jesusi ísï terokutakuarhispti eska “ma achamasï enga kʼéri ambepka” enga jatsipiringa para ióni nirani iauanisï (Luk. 19:11-13, 15). Máteru uelta, Jesusi arhiaspti Roma anapu juramutichani eska ima no nema jingoni úkuarhipiringa. Juramuti Ponsiu Pilatu kurhamarhispti: “¿Tʼu jindeski Rei Israeli anapuecheri?” (Juanu 18:33). Mientrasi enga juramukuarhu japka, ma ambe enga sánderu uandanhiatenga Pilatuni, jindespti eska problema ambe japiringa politikarhu. Ísï jimbo, jamberi chéni japti eska Jesusi úpiringa eskaksï kʼuiripuecha nóteru kurhajchapiringia. Peru Jesusi arhispti: “Juchiti juramukua no ini parhakpini [anapuesti]” (Juanu 18:36). Jesusi no inchamukupirindi politikarhisï, jimboka imeri Reinu, auandarhu anapu gobiernu máepiringa. Ístu arhispti eska imeri ánchikuarhita ixú Parhakpinirhu jindespka “para uandantani ambe enga [jurhimbikueka]” (arhinta je Juanu 18:37).

7. ¿Andisï uá úkua jukani no apoiarini politika ambe?

⁷ Jesusi sési mítitixapti imani ánchikuarhitani enga úpiringa. Engachi juchajtu sési mítitini jaka imani ánchikuarhitani engachi jatsika para úni, nochi jámaaka politika ambe apoiarini, ni sikiera indeni ambe eratsini jarhani. Inde ambe uáti úkua jukani. Sirkuitueri orhejtsïkuti ma uandasïndi: “Kʼuiripu i lugari anapu engachi jaka, sánhani arhixati jandiajku uékani juramukuarhini. Ísï pʼikuarherasïndi enajki imeri paisi sánderu ambakiti, ka uánikuaksï eratsisïndi eska politika ambe uáka ambakiti irekua ma íntsaani. Peru diosmeiamu Tata Diosïni, erachichaksï májku kʼéri jarhasti jimbokaksï eianhpixaka ambakiti ambe Reinueri. Mintsikasïndiksï eska Jeoba kʼamajkuaka no jurhimbikua ambe ka máteru problemechani engachi jatsiajka”.

8. Primeru siglurhu, ¿judiuechaksï ambe jatsispi para tekantani?

⁸ Enga kʼuiripu exejka eska no jurhimbitku úkuarhixaka ambe ma, úsïndi eskaksï sánderu inchamukuaka politikarhu. Jesusiri jurhiatikuecha jimbo, impuestu meiampini kʼéri problema máespti. Ambe enga úpka eska Judasï el Galileu úndapiringa no kurhandirani, jindespti jimbokaksï romanuecha sensu ma úspka paraksï úni impuestu kobrarpini. Iámu ima kʼuiripu enga Romaeri gobiernu jimbo japka, asta Jesusiri chúxapaticha, jatsisptiksï para uánikua impuestuechani meiampiani, por ejemplu, echericheri ambe ka nani engaksï irekapka. Ka komu ima engaksï kontribusioni kobrarpenga nóksï jurhimbitku jámenga, kʼuiripu eratsisïrendi eska meiampini karga máespka. Ménisï, kontribusioni kobrarpitichaksï meiamuasïrendi gobiernueri ánchikuarhirichani paraksï puestu ma intsïnhani ka tátsekuaksï úrasïrendi imani juramukuani paraksï riku úkuarhini. Sakeu enga jefepka kontribusioni kobrarpiticheri Jeriko,  riku úkuarhispti jimboka tumina euakuarhisïrenga kʼuiripuni (Luk. 19:2, 8). Ka jamberi no imajkuepti enga imani ambe niátenga.

9, 10. a) ¿Ambeksï úspi Jesusiri enemiguecha para ima problemarhu ma inchamukuni politikeri? b) ¿Ambechi jorhenguarhisïni imani amberi enga Jesusi úpka? (Exe je segundu dibujuni enga uénakuarhu jaka).

⁹ Jesusiri enemiguechaksï uékasïrendi eska ima problemarhu ma inchamukupiringa enga impuestueri ambepka. Paraksï tsʼéjkuni, kurhamarhisptiksï ‘kontribusioniri’ ambe, impuestu ma engaksï jatsipka para ma denariu meiampini iámindu ima engaksï Romaeri gobiernu jimbo japka (arhinta je Mateu 22:16-18). I ambespti enga sánderu ikiatauenga judiuechani, jimboka xarhatasïrenga eskaksï Romaeri gobiernu jimbo jarhaspka. Trampa enga Erodesiri partidu úrapka, ariispti: enga Jesusi no sési uandapiringa impuestueri ambe, úpirindiksï Romaeri gobiernuni aianguni eska no respetarixapka, peru enga uandapiringa eska uétarhisïrenga íntspini, jamberiksï imeri disipuluecha jurajkupirindi.

¹⁰ Paraka Jesusi xarhatapiringa eska no nema jingoni úkuarhisïrenga, jingontku mókukuantaspti. Arhiaspti: “Íntskunta je Sésarini ambe enga Sésaririka ka Diosïni enga Diosïrika” (Mat. 22:21). Ísïspti, Jesusi mítispti eskaksï uánikua kontribusioni kobrarpiticha no jurhimbitku jámasïrenga. Peru no uékasïrendi eska ima ambe ójkutapiringa para xarhatani ambe ma enga sánderu jukaparhakueka: eska solu Tata Diosïri Reinu kʼamajkuaka kʼuiripueri problemechani. Ísï úparini xarhataspti ambe ma engachi iáminduecha jatsika para úni. Nájkiruka ambe ma ísï xarharaaka enajki ambakiti ambe, nochi méni jatsiska para politikarhisï inchamukuni. Enbesi dechi méntku eratsini jarhani ambe sési únhaxaki ka ambe nómbe, o no sési uandani jarhani, kristianuechachi orheta peerasïnga Jeobaeri Reinuni ka jurajkusïngachi eska ima jurhimberantaaka ambe ma (Mat. 6:33).

11. ¿Nénachi uá no xáni no sési pʼikuarherani imani ambe jimbo enga no sési úkuarhini jaka?

¹¹ Uánikua Jeobaeri testiguechaksï jurajkustia politika ambe engaksï xáni tsitienga. Pirenchi ma Gran Bretaña anapu, uandantasïndi: “Engani estudiaripkia unibersidadirhu Sociología, juchiti eratsikua kánikua mójtakurhispti. Uékasïrenga eskaksï negruecha kuentunhapiringa, jimbokaksï ióni no sési kánhaspkia. Sáno méntkisï, andasïrenga arhirperakua ambe, perurini kánikua kuatajkusïrendi. No kuenta íntskukuarhisïrenga eska ima ambe enga újka eska kʼuiripu no sési kámberaaka, jindeska jimbokaksï mintsitarhu uératinisï ísï pʼikuarhinhijka ka mintsitarhu uératinisï ma jatsiti para kénditani indeni ambe. Peru engani uénapka Bibliani estudiarini, kurhanguspka eskani jatsispka para ji uénani kénditani indeni ambe juchiti mintsitarhu. Ka pirenchi urapiti marini jarhuataspti parani indeni ambe úni. Iásï, prekursora regulariskia kúnguarhikuarhu ma enga lenguaje de seniasi jimboeka ka jorhenguarhixaka iámindu jásï kʼuiripuni predikarikuni”.

12. ¿Ambe arhikuekasïreni ima xarhipiti engaksï jingoni no jatsipka para jeuekuarhini Jesusiri chúxapaticha?

¹² Jesusiri jurhiatikuecha jimbo, relijioni kánikua jeuekuarhitixapti politika ambe jingoni. Libru La vida cotidiana en Palestina en tiempo de Jesús, arhisïndi eskaksï “ima relijionicha engaksï judiuecha grupuecha jimbo arhukurhitini japka”, sáno májkuenispkaksï “komu partiduecha politikeri”. Ísï jimbo, Jesusi juramukuaspti imeri chúxapatichani eskaksï xéparini jámapiringa “Fariseuecheri ka Erodesiri xarhipitini jingoni” (Mar. 8:15). Enga Erodesini uandapka, jamberi imeri partidurhu anapuechani arhikuekendi. Ka fariseuecha engaksï máteru grupuepka, de akuerduksï jarhaspti eska nóteru Roma juramukuapiringa judiuechani. Seguni Mateueri Ebanjeliu, Jesusi ístu uandaspti saduseucheri ambe. Saduseuechaksï kʼóru uékasïrendi eska Roma juramukuani japiringa, jimbokaksï uánikua saduseuecha jatsispka juramukua politikarhu. Jimbosï Jesusi juramukuapti imeri chúxapatichani eskaksï no jámapiringa jeuekuarhini i tanimu grupuecheri ‘xarhipiti jingoni’, o sea imecheri jorhentperakuecha jingoni (Mat. 16:6, 12). Ka jukaparhakuesti mítini eska Jesusi  arhiaspka ini ambe ísï tátsekua enga kʼuiripu uékapka rei úni.

13, 14. a) ¿Ambe úkuarhisïni enga relijioni jeuekuarhijka politika jingoni? b) Nájkirukachi no sési kánhaaka, ¿andichisï no jatsi para uarhipeni? (Exe je terseru dibujuni enga uénakuarhu jaka).

¹³ Enga relijioni jeuekuarhijka politika ambe jingoni, fásilisïndi eska no sési kámberanhaaka. Jesusi jorhendaaspti imeri chúxapatichani eska enga i ambe úkuarhipiringa nóksï jámapiringa nema jingoni úkuarhini. Jimboksïsï kʼérati saserdoticha ka fariseuecha úndapti eratsini néna uándikuni Jesusini. Ísïksï exesïrendi Jesusini komueska enemigu ma politikeri ka relijioniri ka enajki euantaapirini imecheri juramukua. Uandasïrendiksï: “Engachi jurajkuska, iáminduecha jakajkuati imani ka tátsekua juuatiksï Roma anapuecha ka xerentaatiksï juchari pímbinhasï iretani ka nasionini” (Juanu 11:48). Jimbosï Kaifási enga kʼéri saserdoti máepka, uénapti uandani paraksï Jesusini uándikuni (Juanu 11:49-53; 18:14).

¹⁴ Kaifási soldaduechani axaaspti paraksï chúrikua jupikani Jesusini. Peru ima tʼuini mítitixaptia imani ambe. Jimbosï últimu senarhu, arhiapti imeri apostulichani eskaksï jirinhaapiringa máru espadechani. Tsimani espadecha jingontku, ambakiti ambe jorhendaapirindi (Luk. 22:36-38). Ima mísmu chúrikua, Pedru kánikua no sési exespti ambe enga úkuarhini japka enga jamberi espada ma jingoni atapka soldaduni ma enga nípka Jesusini jupikani (Juanu 18:10). Peru Jesusi arhispti Pedruni: “Jatsiranta chíti espadani, jimboka iáminduecha engaksï espada jimbo atajpiaka, espada jimbo uarhiakaksï” (Mat. 26:52, 53). Ambe enga jorhentpipka jiáni, xarhataspti imani ambe enga Jesusi tʼuini uandapkia kómarhikuarhu: eskaksï imeri chúxapaticha no jatsispka para i parhakpini anapueni (arhinta je Juanu 17:16). Jatsisptiksï para jurajkuni eska Jeoba sési péntapiringa imani ambe.

15, 16. a) ¿Néna jarhuataaskia Biblia kristianuechani paraksï no inchamukuni enga atajperakua ambe jauaka? b) ¿Náki diferensia exexaki iásï Jeoba?

¹⁵ Erachicha engachi primeru párrafurhu uandaaka, jorhenguarhistiksï indeni ambe ka mójtakukuarhestiksï jimbokaksï uékasïnga ísïini eska tata Jesukristu. Pirenchi sur de Europa anapu uandasïndi: “Exeskia eska atajperani, no úsïnga eska jauaka jurhimbikua. Ima engaksï indeni ambe niátajka, sáno méntkisïksï uarhisïndi ka máteruksï nóteru felisisïndia. Jorhenguarhini Bibliarhu eska Jeobajkusï uáka eska jauaka jurhimbikua, ústi eskani felisiuaka. Í ambesti engani aianhpini jaka arini beintisinku uéxurhini jimbo”. Ka sur de África anapu erachi, mójtakusti lansani “Espiritu Santueri espadani” jimbo, o sea Biblia jimbo (Efes. 6:17). Iásï eianguasïndia pínandikueri ambe iámindu kʼuiripuechani, no arhiparini náki tribueski. Ka Europa sentrali anapu pirenchi, enga na Testigu úkuarhipkia, uambuchasti erachi ma jingoni enga jima anapueka nani enga ióntki pirenchi kurhunhiauenga.

¹⁶ ¡Xáni enga jukaparhakueka mójtakurhini! Biblia ísï terokutantasïndi parhakpini anapu kʼuiripuni mari jingoni enga méntku manakuarhini jarhajka (Is. 17:12; 57:20, 21; Jaŋ. 13:1). Kʼuiripu jurajkusïndi eska politika ambe uáka eska no sési pájperanhaaka ka uarhiperanhani. Peru juchachi úsïnga eskachi májku kʼéri jauaka ka pínandikua jingoni. Seguru eska Jeoba kánikua tsípisïnga exeni na enga imeri ireta májku kʼéri jaka ka no ísï eska parhakpini anapuecha engaksï no újka sési pájperani (arhinta je Sofonías 3:17).

17. a) ¿Ambe tanimu ambechi uá úni parachi májku kʼéri jarhani? b) ¿Ambechi exea máteru artikulurhu?

¹⁷ Ini artikulurhu, tanimu ambechi exeskia parachi kristianuecha jarhuajpini májku kʼéri jarhani. Primeru, mintsikani eska Tata Diosïri Reinujkusï kʼamajkuaka no jurhimbikuani. Segundu, no inchamukuni politikarhisï. Ka terseru, no jámani uarhipeni. Peru ménisï uáti úkua jukani uékaani iámindu jásï kʼuiripuechani ka i ambe uáti úni eska no fásiliuaka májku kʼéri jarhani. Máteru artikulurhuchi exeaka nénachi uá sési pájperani iámindu jásï kʼuiripuecha jingoni, ísï eskaksï na úpka primeru kristianuecha.