1. ¿Ambe jimbochi xáni tsípisïni?

KÁNIKUACHI tsípisïnga mítini na enga xáni uánenhani jaka Jeobaeri iretarhu. I ambe xarhatasïndi eskaksï Jeobaeri marhuaricha, meremerejkuxaka imecheri tʼíntskua. Uéxurhini, uáskachi jukari diesi miioni estudiu bíblikuechani. Ka ístu, miioni kʼuiripu niraspti Konmemorasionirhu ka jorhenguarhispti na enga Jeoba xarhatapka uékperakua enga axapka imeri Uájpani parajtsïni pʼímutantani (1 Juanu 4:9).

2, 3. a) ¿Ambejtsïni no úsïni pʼínguni parachi meremerejkuni juchari tʼíntskua? b) ¿Ambechi exea ini artikulurhu?

² Jeobaeri iretarhu, uánikua idiomecha uandanhasïndi. Peru inde ambejtsïni no pʼíngusïndi parachi no úni májku kʼéri kómarhini Jeobani (Jaŋ. 7:9). No arhiparini náki idiomachi uandasïni ochi nani irekaski, uákachi meremerejkuni komu tʼíntskua enga “erajkutarpijka parhakpinirhu” (Filip. 2:15).

³ Na engachi sánderu uánini jaka, na engachi májku kʼéri jaka  ka jingontku, úsïndi eskachi kʼéri ambe arhiaka Jeobani ka eskaksï máteruecha andaparhakueraaka jurhimbikuarhu. Ini artikulurhu, exeakachi néna meremerejkuni juchari tʼíntskua ini tanimu ambe jimbo (arhinta je Mateu 5:14-16).

4, 5. a) Aparti de predikarini, ¿nénachi uá meremerejkuni juchari tʼíntskua? b) ¿Néna jarhuajpisïni engachi sési uandajpaajka kʼuiripuechani? (Exe je fotuni enga uénakuarhu jaka).

⁴ I rebista inglesi jimbo 1 de juniueri de 1925, artikulu “Luz en la oscuridad”, arini ambe uandasïrendi: “No nema uáti méntkisï ka jurhimbikua jingoni marhuakuni Tatani ini últimu jurhiatikuecha jimbo [...] solu ima enga jurajkuska eska imeri tʼíntskua meremerejkuaka”. Ka seguirisïndi arhini: “Para ini ambe úni, jatsisti para Echerirhu anapu iretechani eianguani ambakiti ambe ka ísï irekani eska Jeobaeri juramukuecha na uandajka”. Ísïsti, Reinueri ambe eianhpini ka disipulu uáni, ambe máesti enga újka eska meremerejkuaka juchari tʼíntskua (Mat. 28:19, 20). Ístu, juchari ambakiti jángua jingonchi úsïnga kʼéri ambe arhini Jeobani. Engachi predikarini jarhajka, kʼuiripu exesïndi na engachi jámajka. Engachi tsípikuauaka ka sési uandajpaani, sési ambeksï uandaati juchari ambe ka imani Tata Diosïri engachi marhuakujka.

⁵ Jesusi arhiaspti imeri chúxapatichani: “Engajtsï inchaakuni jámaaka kʼumanchikuarhu, uandajpauakajtsï iáminduechani” (Mat. 10:12). Jimesïsï engaksï imecha predikariuenga, normalispti eska kʼuiripu pʼímarhipiringa inchaakuni kʼumanchikuarhu nemani enga no mítipiringa. Jamberi jimesïsï engachi jucha irekaka, no jati i pʼindekua. Ka uánikua kʼuiripu chésïndi o asta ikiani enga nema engaksï no mítika, kústajka imecheri puertarhu. Peru engachi sési uandajpauaka, jamberiksï nóteru xáni chéatia. Uánikua xanhari, kánikua jarhuajpesïndi tsípikuani. Ka májkuenisti engachi xanharu jimbo eianhpini jauaka karrituecha jingoni. Seguru eskaksï imecha engaksï karrituecharhu jarhajka, exejka na enga jarhuajpijka sési uandajpaani kʼuiripuechani ka tsípikuani. Máruksï asta andarherasïndi karrituni, publikasioni ma pʼikuni ka astaksï uandontskuarhini juchantsïni jingoni.

6. ¿Ambe úski temungurhiri ma enga jatirikia para imecheri tʼíntskua seguirini meremerejkuni?

⁶ Inglaterra anapu temungurhiri ma enga jatirikia, nóteruksï káni úsïndia eianhpini kʼumanchikuecharhu jimbokaksï pʼamenchasïnga. Peruksï no uékasïndi eska imecheri tʼíntskua nóteru meremerejkuakia jimboksïsï uénati eianhpini imecho jamokutini. Ka para ísï úni, mesaksï ma pérasïndi uánikua publikasionicha jingoni, ima jandora engaksï táticha uájpechani nirajka pʼiuantani eskuelarhu ma enga jima no iauani jaka. Uánikuaksï uékasïndi sánderu mítini ka pásïndiksï tsimani bolumenichani librueri Los jóvenes preguntan ka ístu máru foietuechani. Kúnguarhikuarhu anapu prekursora ma uénasti imecha jingoni eianhpini. Pirenchiri ambakiti jángua jimbo ka na enga i temungurhiri jánguarhintajka, ústi eska táti ma jiókuarhipiringa Bibliani estudiarini.

7. ¿Nénachi uá jarhuataani refujiaduechani?

⁷ Arini últimu uéxurhinicha jimbo, uánikua refujiaduechaksï niárasïndi máteru paisicharhu. ¿Nénachi uá jarhuataani paraksï mítini Jeobani ka ambe enga ima uéjka úni? Orheta, uákachi jorhenguarhini néna saludariuani imecheri idioma jimbo. Ka jamberijtsïni kánikua marhuachiati aplikasioni JW Language. Ístuchi uáka jorhenguarhiani máru uandakuechani parachi úni eskaksï uékaaka juchantsïni jingoni uandontskuarhini. Tátsekuachi uáka arhiani pájineri ambe jw.org ka exeraani bideuechani ka publikasionichani engaksï imecheri idioma jimbo jaka (Deut. 10:19).

8, 9. a) ¿Nénajtsïni jarhuatasïni tánguarhikua enga entre semana jarhajka? b) ¿Nénaksï uá táticha jarhuataani uájpechani komentarini tánguarhikuecharhu?

⁸ Jeobajtsïni íntskusti tánguarhikua Irekua  ka Aianhpikua parachi sánderu sési predikarini. Ambe engachi ini tánguarhikuarhu jorhenguarhijka, jarhuatasïndijtsïni parachi sánderu seguru pʼikuarherani engachi rebisitechani uáuaka ka estudiuechani.

⁹ Uánikua kʼuiripu enga jurhajka Kʼumanchikua Reinuerirhu, ísku pakarasïndi enga exejka eskaksï sapiicha komentarisïnga tánguarhikuecharhu. Ísï jimbo, tátichaksï sési úsïndi engaksï jorhendaajka uájpechani paraksï no solu arhintani ambe enga publikasioni ma arhijka oksï repetirini ambe engaksï arhiauaka, ísï úparini, meremerejkusïndiksï uájpecheri tʼíntskua. Ménisïksï sapiicheri komentariuecha, úsïndi eska kʼuiripu kuenta íntskukuarhiaka eska exentaskia jurhimbikuani (1 Kor. 14:25).

10. ¿Ambechi uá úni para juchari familia májku kʼéri jarhani?

¹⁰ Máteru ambe engachi uáka úni para meremerejkuni juchari tʼíntskua, jindesti jarhuajpini parachi májku kʼéri jarhani kúnguarhikuarhu ka familiarhu. Por ejemplu, kánikua jukaparhakuesti eskaksï táticha méntkisï jatsiaka familiaeri jorhenguarhikua. Uánikuaksï exesïndi programani mándani kutsïri de JW Broadcasting. Engajtsï na exeakia programani, uákajtsï iáminduecha uandani néna úni imani ambe engajtsï jorhenguarhika. Ima enga orhejtsïkujka familieri jorhenguarhikua, jatsisti para miáni eskaksï sapiicha ka tumbiicha nóksï májkueni ambe uétarhinchasïnga, jimbosï jatsiti para asegurarikuarhini eska ambe enga jorhentpiaka iámu familiani marhuakuaka (Sal. 148:12, 13).

11-13. ¿Nénachi uá jarhuajpini para kúnguarhikua májku kʼéri jarhani ka paraksï erachicha meremerejkuni imecheri tʼíntskua?

¹¹ Iáminduecha, asta tumbiicha, uákachi jarhuajpini para kúnguarhikua májku kʼéri jarhani ka ísï, jarhuataani máteruechani paraksï meremerejkuni imecheri tʼíntskua. Por ejemplu, tumbichaksï uáti jánguarhintani pendienti jarhani erachicha jimbo engaksï jatirikia. Uátiksï arhiani eskaksï aianguauaka experiensiauechani. Ini ambe jingoni, tumbiicha ka erachicha engaksï jatirikia, sésiksï pʼikuarheraati ka jánguarhintaatiksï meremerejkuni jurhimbikueri tʼíntskua. Ístu, iáminduechachi uáka jánguarhintani sési erokaani imechani engaksï Kʼumanchikua Reinuerirhu jurhajka. Uákachi tsípikuani, exeraani naniksï uá uaxakani ka presentarikuani máteru erachichani. Ísï úparini, agustuksï pʼikuarheraati.

 ¹² Ima engaksï orhejtsïkuajka tánguarhikuechani para uérani eianhpini, uátiksï jarhuajpini paraksï erachicha engaksï jatirikia, seguiriuaka meremerejkuni imecheri tʼíntskua. Jatsistiksï para asegurarikuarhini eskaksï territoriu ma jatsiaka nani engaksï imecha uáka jámani. Ménisïksï uáti kurhakuni nemani enga sánderu sapichku jaka eska imecha jingoni uéraaka ka eska jarhuatauaka. Ístu, jatsistiksï para kurhangukuani imechani engaksï no káni újka eianhpini, jimbokaksï pʼamenchasïnga o máteru problema ma jimbo. Engaksï pʼamojpitiuaka, jarhuajpeatiksï para iáminduecha tsípikua jingoni eianhpini, ia seaksï, tumbiini oksï jatirinia, jimbanhini oksï ióni marhuakunia Jeobani (Lev. 19:32).

¹³ Salmueri karari ma uandaspti: “¡Na enga xáni sésiika ka sési pʼikuarherakuarhini eskaksï erachicha májku kʼéri jauaka!” (arhinta je Salmo 133:1, 2). Israelitechani kánikua marhuakuasïrendi májku kʼéri kómarhini Jeobani. Salmista ísï terokutantaspti eska májku kʼéri jarhani, ísïspka komueska aseiti ma enga sési jájkundenga ka enga tsʼiraperpentenga. Iásï, ¿andichisï no jánguarhintajki jarhuajpini para kúnguarhikua májku kʼéri jarhani? Engachi ísï úni jakaia, kánikua sési jarhasti. Peru ¿úpirinchi sánderu sési mítiani erachichani? (2 Kor. 6:11-13).

14. ¿Ambechi uá úni para juchari tʼíntskua meremerejkuni jimesïsï engachi irekaka?

¹⁴ ¿Uáchi sánderu jánguarhintani para meremerejkuni Bibliaeri jurhimbikua jimesïsï engachi irekaka? Engachi sési uandajpauaka besinuechani, jamberiksï uékaati mítini jurhimbikuani. Ju je kurhamarhikuarhini: “¿Ambeksï eratsisïni besinuecha juchiti ambe? ¿Néna xarharasïni juchiti kʼumanchikua ka iámu terrenu? ¿Úsïni eska kasïpeaka jimesïsï engani irekaka? ¿Jarhuataasïni máteruechani?”. Engachi uandontskuarhiaka erachicha jingoni, ju je kurhamarhiani néna jarhuataaskia imecheri ambakiti jángua besinuechani, familiarichani ka kompanieruechani ánchikuarhitarhu anapu o eskueleri. Seguruchi jarhaska eskajtsïni ambakiti experiensiechani aianguauaka (Efes. 5:9).

15. ¿Andisï uétarhijki eskachi jingontku jauaka?

¹⁵ Engachi uéjka eska juchari tʼíntskua seguiriuaka meremerejkuni, jatsiskachi para no mirikurhini náki jurhiatikuecha jimbochi irekaxaki. Jesusi méntku úndaspti arhiani imeri chúxapatichani: “Jingontku ja je” (Mat. 24:42; 25:13; 26:41). Peru engachi eratsiska eska útasï kuerataxaka para “grani tribulasioni”, nochi jánguarhintaaka eianhpini Jeobaeri ambe (Mat. 24:21). Ka juchari tʼíntskua nóteru xáni meremerejkuatia o asta uáti pátakuarhini.

16, 17. ¿Ambechi uá úni parachi jingontku jarhani?

¹⁶ Eska na sánderu no sési jánhaskuarheni jauaka, jatsiakachi para sánderu jingontku jarhani. Peruchi mítiska eska Tata Diosï kʼamajkuaka ini parhakpinini jiáni enga ima eratsitini jakaia (Mat. 24:42-44). Mientrasi, jatsiskachi para tekaantani ka méntkisï jingontku jarhani. Ju je pauani pauani arhintani Tata Diosïri Karakatani ka méntku jauenani kómarhini (1 Ped. 4:7). Ju je exeani imani ambakiti ejempluechani erachicheri engaksï jingontku jaka ka engaksï meremerejkuni jaka imecheri tʼíntskua. Ambakiti experiensia ma jarhasti artikulurhu “Siete décadas aferrado a la falda de un judío” enga rebistarhu La Atalaya jaka 15 de abriliri de 2012, pájina 18 a 21.

¹⁷ Ju je méntkisï marhuakuni Jeobani, ambakiti ambe úni máteruecha jimbo ka arhutani tiempu para juchari erachicha jingoni jarhani. Ísï úparini, sánderuchi felisiuaka ka tiempu sánderu arisku niuati (Efes. 5:16). Sieni uéxurhini nitamastia engaksï juchari erachicha kánikua ambe úka para Jeobani marhuakuni. Peru iásï, Jeobaeri jarhuajperata jimbo, uánikua máteru ambechi úsïngia úni. Juchari tʼíntskua uinhamu meremerejkuxati.

18, 19. ¿Nénajtsïni uá jarhuatani orhejtsïkuticha parachi jingontku jarhani ka seguirini jarhani ánchikuarhini? Jatsiku je ejemplu ma.

 ¹⁸ Nájkirukachi uánikua ambe no sési újka, Jeoba jurajkusïndi eskachi seguiriuaka marhuakuni. Ka parajtsïni jarhuatani jingontku jarhani ka seguirini ánchikuarhini, íntsaasïndijtsïni kúnguarhikuarhu anapu orhejtsïkutichani (arhinta je Efesu 4:11, 12). Ísï jimbo, máteru jimbo engajtsïni orhejtsïkuti ma pʼorhembiaka, ju je aprobecharini ambe enga xáni mítika ima erachi.

¹⁹ Inglaterra anapu temungurhiri ma, problemechanksï máru jatsiaspti ka jarhuajperataksï kurhakuaspti tsimani orhejtsïkutichani. Pirenchi arhiaspti eska uámba no jarhuataaxapka paraksï sánderu marhuakuni Jeobani. Ka erachi uandaspti eska no jorhendaxapka sési imeri familiani ka eska no méntkisï jatsisïrenga familiaeri jorhenguarhikuani. Orhejtsïkutichaksï Jesusiri ambe uandontskuarhikuaspti, eska Jesusi kuidariuasïrenga imeri chúxapatichani ka eska méntkisï exesïrenga ambe engaksï uétarhinchenga. Erachinksï arhispti eska májkueni úpiringa eska Jesusi ka pirenchinksï arhispti eska tekantapiringa. Ístu, íntsaasptiksï máru konsejuechani paraksï jatsini familiaeri jorhenguarhikua imecheri tsimani uájpechani jingoni (Efes. 5:21-29). Ísï tátsekua, felisitarisptiksï erachini imani ambe jimbo enga úpka. Pʼímarhisptiksï seguirini ísï úni ka mintsikani eska espiritu santu jarhuatapiringa ambakiti familiaeri orhejtsïkuti máeni. I orhejtsïkuticheri uékperakua jimbo, na engaksï pendienti japka ka imecheri jarhuajperata, úspti eska i familia meremerejkupiringa imecheri tʼíntskua.

20. ¿Ambe úkuarhia engachi meremerejkuska juchari tʼíntskua?

²⁰ Salmo 128:1 arhisïndi: “Felisisti ima enga janhanharhijka Jeobani, enga imeri xanharuecharhu jámajka”. Ini artikulurhu, mámaru ambechi exeska para meremerejkuni juchari tʼíntskua: pʼímarhianchi máteruechani paraksï Jeobani marhuakuni, jánguarhintanchi májku kʼéri jarhani ka jingontku. Engachi ísï úska, sánderuchi felisiuaka, máteruechaksï exeati juchari ambakiti jángua ka uánikua kʼuiripu uékaati kʼéri ambe arhini juchari Tatani enga auandarhu jaka (Mat. 5:16).