¿Arhiantaskijtsï últimu rebistechani Aianhpiri? Exe je sintsï uá mókuantani arini kurhamarhikuechani:

¿Ambe tʼámu ambechi uá úni parachi sánderu sési pireni?

Sési anhaxurhitini jarhani ka karhakua pérani libruni pirekuecheri, kʼéri ma jirejtani, sési arhatani ka uinhachaparini pireni. Ísï úparini, sánderuchi uinhamu pireaka (w17.11-S, pájina 5).

¿Ambechi jorhenguarhisïni nani engaksï japka ima iretecha para kuájchakukuarhini engaksï Israeli japka ka na enga jándipka ima xanharuecha jimbo?

Seisi iretechaksï jarhaspti iámu paisi jimbo ka ima xanharuecha engaksï imani iretecha jimbo pájpenga, sésiksï jándespti. I ambe marhuasïrendi para kʼuiripu ma sóntku ka fásili niárani iretarhu ma (w17.11-S, pájina 14).

¿Andichisï uandajki eska Salmo 118:22 Jesusiri tsíntskueri ambe uandasïnga?

Jesusinksï no jaiapanhintaspti komu Mesiasi ka uándikusptiksï. Uétarhisïrendi eska tsíntapiringa para úni jindeni ima tsakapu enga eskinarhu anapu pítsekuepiringa (w17.12-S, pájina 9 ka 10).

Bibliaeri jurhiatikuecha jimbo, ¿uétarhinchasïreni nema orheta uájpeni para jindeni Mesiasiri ióntki anapu parienti ma?

Ménisï, sïrukua enga jimbo jupiringa Mesiasi, orheta uájpa ma jimboesïrendi, peru no méntkisï. Judiuechaksï mítitixapti ini ambe ka jiókuarhisïrendiksï jimbokaksï kurhangusïrenga eska Kristu Dabidi jimbo jupiringa, Jeseri uájpa enga sánderu sapichuepka (w17.12-S, pájina 14 ka 15).

¿Nénachi mítiski eska no no sési jarhaska uékakuarhini?

Jatsiskachi para uékaani máteruechani ísï eskachi juchajkumindu na uékakuarhijka (Mar. 12:31). Ka achatichajtuksï jatsisti para uékaani “imecheri uarhiitichani eska imechajkumindu na uékakuarhijka” (Efes. 5:28). Ísï jimbo, no no sési jarhasti uékakuarhini, peru no jukari (w18.01, pájina 23).

¿Ambechi uá úni parachi sánderu espiritualiini?

Jatsiskachi para sési estudiarini Bibliani, eratsintani ambe engachi arhintajka ka úni ambe engachi jorhenguarhijka. Ístu, jatsiskachi para úni ambe enga espiritu santu úrpijka ka agradeserini ka jiókuarhini máteruecheri jarhuajperata (w18.02, pájina 26).

¿Ambechi jatsiski para úni engachi jiókuarhiska pʼímarperakua ma?

Engachi jiókuarhiska pʼímarperakua ma, jatsiskachi para jánguarhintani kumplirini ambe engachi uandakia (Sal. 15:4). Nochi jatsiska para ísku jatini kanselarini. Seguru eska ima engajtsïni pʼímarhika, kánikua jánguarhintaka para tʼirekua ambe úmantani (w18.03, pájina 18).

¿Ambeksï úpirini jorhenguarhini erachi nombraduecha Timoteueri ambe?

Timoteu meru uandanhiasïrendi máteruecha jimbo ka orheta pérasïrendi eianhpikuani. Kánikua ánchikuarhispti para Jeobani marhuakuni ka úspti ambe enga jorhenguarhipka. Seguirispti sánderu jorhenguarhini ka mintsikaspti Jeobaeri espirituni. Ka nóksï solu orhejtsïkuticha uáti jorhenguarhini imeri ejemplueri, sino iámindu erachicha (w18.04, pájina 13 ka 14).