IMANI libruechanksï seti arkoirisi arhiasïrendi. Ima xáni sési járhati dibujuechaksï úspti eskani mámaru ambe jánhaskapiringa. Ísï jimbo, sapichkuni uékaspka jorhenguarhini Bibliaeri ambe, ísï eskaksï na explikariuenga ima libruecha.

Enga Segunda Guerra Mundiali niárani japkia India, juchiti irekua mójtakurhispti. Tátichaksï jurajperaspti ka diborsiarikuarhini. No kurhangusïrenga andiksïsï tsimani kʼuiripuecha engani ji xáni uéauenga, nóksï uékeni márku jarhani. Jandiajkuni pʼikuarherasïrenga ka enajkirini no nema kasu uéni. Familiarhu jíjkuespka ka no sési pʼikuarherasïrenga, ístu, norini nema jarhuatasïrendi ísï eskani ji na uékenga.

Mama ka ji, Karachi irekaspkachi, estadueri kapitali. Ma jurhiani, Fred Hardaker kústaspti puertarhu, ima doktori máespti enga jatiripkia ka enga Jeobaeri testiguepka. Ima mismu relijionirispti eska ima misioneru enga libruechani íntsaapka juchiti familiani. Aiakuspti mamani Bibliaeri jorhenguarhikua ma. Ima no jiókuarhispti, peru arhispti eska jamberi ji jo. Ísï jimbo, máteru semanarhu, erachi Hardaker uénasptirini jorhendani Bibliaeri ambe.

 Máru semana tátsekua, úndaspka tánguarhini erachi Hardakeriri klinikarhu. Jimaksï tánguarhisïrendi ma dose Testiguecha ísï engaksï jatiripkia, imajtsïni sési pʼikuastantaspti ka kuidarisptijtsïni komu uájpani ma. Miásïnga na engaksï uaxakenga jíndeni jingoni ka kʼutitsenksï parajtsïni eratini ka ísïjtsïni uandajpani komu ambakiti amiguecha. Imani ambesïni uétarhinchenga.

No ióni jimbo, erachi Hardaker pʼímarhisptirini nirani aianhpini. Jorhendasptirini tokadisku portatili ma úrani para diskursu sapirhatichani kurhandiani. Ménisïksï diskursuecha jukari klaruespti, jimboksïsï máru no tsitiauendi. Peruni ji tsitisïrenga aianhpini. Tsitisïrenga mítini jurhimbikuani ka máteruechani aianguani.

Enga ejersitu japonesi prepararikuarhini japka para India inchaakuni, gobiernu britaniku uénaspti sánderu no sési kaani Jeobaeri testiguechani. Ka juliuni de 1943, jíjtuni úndaspka no sési kánhani. Eskuelarhu anapu direktori, enga saserdoti anglikanuepka, petantasptirini eskuelarhu uératini, jimboka eratsisïrenga eskani “no marhuapiringa”. Arhispti mamani eskani no ejemplu máespka para máteru alumnuecha jimbokaninha Testiguechani kúrhiasïrenga. Ima ambe ikiataspti mamani ka nóterurini jurajkustia seguirini Testiguecha jingoni. Tátsekuarini táti jingoni axaspti Peshawar, ireta ma enga 1,370 kilometru ísï iauani jaka (850 millas) norterhisï. Jima, chkespka jimboka nóteruni estudiarisïrengia ni tánguarhini.

Kʼuanhatsintaspka Karachi 1947, parani ánchikuarhita jirinhani. Engani jima japkia, niraspka doktoriri Hardaker klinikarhu ka imarini tsípikua jingoni erokaspti.

—Jiájkani, ¿amberi pʼamerasïni? —ísïrini kurhamarhispti eratsiparini eskani niraspka exeni jimbokani pʼamenchaxapka.

—Doktori, no pʼamenchaxaka —mókukuspka—. Peruni no sési pʼikuarheraxaka espiritualmenti. Uétarhinchasïnga Bibliaeri ambe jorhenguarhini.

—¿Ka nari jatini uékasïni uénani?

—Enga uáka, iáiasï mismu.

Ima xatinchi sési nitamakuarhispka Bibliaeri ambe jorhenguarhini. Ísï pʼikuarheraspka enajkini juchiti familia espirituali jingoni kʼuanhatsintapi. Mama jánguarhintaspti parani nóteruni kúrhiania Testiguechani, peruni ji eratsitixapkia Jeobani marhuakuni. Itsï atakuarhispka 31 de agostu de 1947 ka ísï tátsekua, engani 17 jatiripkia, prekursori regulari úkuarhispka.

Juchiti orheta asignasioni komu prekursori jinispti Quetta, nani engaksï ióntki soldadu britanikuecha japka. Ka 1947, paisi arhukurhispti para iásï Indiaenia ka Pakistán. * I ambe úspti eska no sési kámberanhapiringa relijioni jimbo ka eska jiáni sánderu uáni sïpakuarhinhapiringa máteru paisirhu. Ma 14 miioni ísïksï sïpakuarhispti. India anapu musulmanichaksï Pakistán niraspti ka Pakistán anapuecha hindúes ka sijesicha, Indiaksï niraspti. Jiáni enga sánderu no sési jánhaskuarhepkia, úspka trenirhu ma jatani Karachi enga uinirini nirani japka ka sáno iámu xanharu asta Quetta, jupikuarhipaspka tiámurhu ma enga trenirhu uérakua jukarini japka.

Quetta, mítispka George Singh, prekursori espesiali ma enga beinti ísï jatiripka. George bisikletarini ma íntskuspti enga nóteru sési marhuauengia parani imani territoriuecharhu jámani engaksï juátecha jaka, nájkirukani ménisï pʼákajchukupenga. Sáno méntkisï jandiajkuni jámasïrenga aianhpeni. Seisi kutsï jimbo, 17 kʼuiripuni jorhendasïrengia Bibliaeri ambe ka máruksï Testigu úkuarhispti. Ma jindespti ejersitueri ofisiali ma enga Sadiq Masih arhinhenga. Imajtsïni jarhuataspti George ka jíndini, tradusirini máru publikasionichani urdu jimbo, idioma enga Pakistán uandanhajka. Ísï tátsekua, Sadiq niáraspti publikadorini máeni enga tsípikua jingoni aianhpienga.

Ísï tátsekua, Karachi kʼuanhatsintaspka ka Henry Finch ka Harry Forrest jingoni marhuaspka, misioneruecha máru engaksï apenasi niárapka Eskuela Galaadiri uératini. ¡Kánikua jukaparharasïnga na engajtsïni xáni jorhendapka! Ma uelta, aianhpini niraspka erachi Finch jingoni nortirhisï de Pakistán. Imani xáni kʼérati juátecharhu jandukutini, exentaspkachi uánikua kʼuiripu kaxumbitini enga urdu uandenga ka enga uékani japka mítini jurhimbikuani. Tsimani uéxurhini tátsekua, jíjtuni niraspka Eskuela Galaadiri ka Pakistán kʼuanhatsintaspka parani ma tiempu marhuani komu  sirkuitueri orhejtsïkuti. Kʼumanchikuarhu ma irekaspka tanimu misioneruecha jingoni jini Lahore.

Uéxurhini 1954, misioneruecha engaksï Lahore irekapka, nóksï úspti kurhangutsperani ka sukursali, máru misioneruechani móskuaspti paraksï máteru nanisï marhuani. Jíjtuni no sési úspka ka inchaakuspka arhirperatarhu, jimbosïni jurhimberanhantapka. No sési pʼikuarheraspka, eratsispka eskani nóteru sési jarhaspkia espiritualmenti. Karachi kʼuanhatsintaspka ka tátsekua Londres niraspka (Inglaterra) parani uénani ménderu marhuakuni Jeobani.

Ima kúnguarhikuarhu engani japka, uánikua Londres anapu betelitechaksï jarhaspti. Pryce Hughes, enga orhejtsïkuenga sukursalini, erachi máespti enga uékpitipka ka uandanhiaspti jíndeni jimbo. Ma jurhiani, aiangusptirini eska Joseph Rutherford, erachi enga orhejtsïkuenga interu parhakpini anapu eianhpikuani, jurhimberantaspka. Erachi Hughes uékaspti kuájpikuarhini peru erachi Rutherford uinhamu xukaspti. Ískuni pakaraspka enga erachi Hughes tsípikua jingoni miántapka imani ambe. Ima jiókuarhispti eska ikiaspka peru tátsekua exespti eska uétarhinchasïrenga imani konsejuni ka eska Jeobaeri uékperakua jimboespka (Ebr. 12:6). Imeri uandakuechajtsïni mintsitarhu niárachespti ka jarhuatasptijtsïni parani ménderu tsípikua jingoni marhuakuni Jeobani.

Jiánisï, mama Londres mótsispti ka jiókuarhispti Bibliaeri jorhenguarhikua ma enga Jonh Barr aiakupka, ima erachi niáraspti marhuani Grupurhu enga Orhejtsïkuajka iámindu kúnguarhikuechani. Mama sóntku progresarispti ka itsï atakuarhispti 1957. Ísï tátsekua mítispka eska tátijtu jorhenguarhispka Bibliaeri ambe Testiguechani jingoni ante de uarhini.

Uéxurhini 1958, tembuchaspka Lene jingoni, pirenchi ma Dinamarca anapu enga Londres irekapka. Ma uéxurhini tátsekua, andajpenuspti Jane, ima primerespti juchari sinku uájpecheri. Ístu, intsïnhaaspka máru responsabilidadichani kúnguarhikuarhu Fulham anapu. Peru Lene pʼamenchaspti ka jatsipkachi para máteru nanisï mótsini enga sánderu jorhepekuarhipiringa. Ísï jimbo, 1967, niraspkachi Adelaida (Australia).

Adelaida anapu kúnguarhikuarhuksï 12 erachicha jarhaspti engaksï jatiripkia, íksï erachicha erakukatespti ka ambakiti ejempluksï máespti para aianhpikuarhu. Sóntkuchi uénaspka sési marhuakuni Jeobani.

Uéxurhini 1979 andajpenuspti Daniel, ini jingoniksï sinkuepirindia. Ima síndrome de Down *  jingoni andajpenuspti ka mámaru jásï pʼamenchakuecha jingoni, ísï jimbo, doktorichaksï uandasïrendi eska no ióni irekapiringa. Iásï jamberini úkua jukanchasïnga inderi ambe uandani. Jánguarhintaspkachi sési atenderini no mirikurhipariani máteru juchari sapiichani. Daniel tsimapuru pʼorhonhaspti mintsitarhu; ménisï iámu moradu úkuarhini jarhasïrendia jimboka nóteru úsïrengia jirejtani ka jatsisïrengachi para uiriipani ospitalirhu. Nájtuka xáni no sési pʼamenchenga, tataka sapichu máespti enga intelijentipka, uékpiti ka espirituali. Engachi kómarhikua uénga para tʼireni, ima kúndantaasïrendi jájkichani, tʼenksatani éjpuni ka mintsita jingoni uandani “eska ísï úkuarhiaka”. Solu jiáni uénasïrendia tʼireni.

Enga Daniel 4 jatiripkia, leucemia pʼiraspti. Lene ka ji kuatantaspkachia. Ísï pʼikuarherasïrenga enajkini nerbiu ambe pʼamenchapirinia. Engachi sánderu no sési nitamakuarhini japka, Neville Bromwich, juchari sirkuitueri orhejtsïkuti, nirasptijtsïni exeni. Ima chúri, kamajchakusptijtsïni ueparini. Márkuchi ueraspka. Imeri uandakuechajtsïni sési pʼikuastantaspti ka a la una de la maniana ísï níntaspti. Ísï tátsekua, Daniel uarhispti. Uarhirani Danielini, jindesti sánderu no sési jásï ambe engachi úkuarhinchaka. Peruchi úska aguantarini imani no sési jásï ambe ka seguruchi jarhaska eska no ma ambe —ni sikiera uarhikua— uáka úni eska Jeoba nóteru uékakia Danielini (Rom. 8:38, 39). ¡Uékaxakachi ménderu exentani enga tsíntaaka jimbanhi parhakpinirhu! (Juanu 5:28, 29).

Nájkirukani tsimani uelta pʼikaia derrame serebrali, seguirixaka kúnguarhikuarhu anapu orhejtsïkutini. Ambe engani nitamakuarhika, jarhuatasïndirini sánderu kurhangukuani máteruechani ka pʼamojkuani ka sánderu imechani engaksï no sési nitamakuarhini jaka. Jánguarhisïnga no jusgariuani. Eratsisïnga: “¿Ambeksï nitamakuarhiski ióntki enga újka eskaksï ísï eratsiaka ka pʼikuarherani? ¿Néna uá xarhatakuani eskani uandanhiasïnga imecha jimbo? ¿Néna uá jarhuataani paraksï kurhajchani Jeobani?”. Kánikua tsitisïnga pʼorhembiani erachichani parani jarhuataani espiritualmenti. Engani sési pʼikuastantaajka máteruechani ka uinhaperantaani, jíjtuni sési pʼikuarherantasïnga.

Ísï pʼikuarherasïnga komueska salmuecheri karari, enga arhipka Jeobani: “Engani uánikua uandanhiatechani jatsiapka, uinhaperantaspkarini ka sésirini pʼikuastantani” (Sal. 94:19). Jeobarini kuidarispti engani problemechani jatsiapka familiarhu, engajtsïni relijioni jimbo no sési kámapka, engani eratsipka eskani nóteru sési jarhaspkia espiritualmenti ka engani deprimirikuarhipka. Ísïsti, para ji, Jeoba sési jimbo Táti máesti.