INI parhakpinirhu enga xáni uáni problemecha jaka, no fásilisti pínandikua jingoni irekani. Ka nájkirukachi sánisï pínandikua jatsijka, no méntkisï fásilisïni ísï jarhani. ¿Náki Bibliaeri prinsipiuechajtsïni uá jarhuatani ambakiti pínandikua jatsini ka enga no kʼamakurhiaka? ¿Ka nénachi uá jarhuatani máteruechani paraksï imajtu pínandikua jatsini?

Parachi ambakiti pínandikua jatsini, uétarhisïndi pʼikuarherani eskachi seguru jarhaska ka agustu. Ístu, jukaparhakuesti jatsiani ambakiti amiguechani. Peru ambe enga sánderu jukaparhakueka, jindesti eska uétarhisïnga ambakiti pájperakua ma jatsini Jeoba jingoni parachi seguirini pínandikua jatsini. Ju je exeni nénachi uá ísï úni.

Engachi kumpliriska Jeobaeri juramukuechani ka imeri prinsipiuechani, xarhataakachi eskachi mintsikasïnga Jeobani ka eskachi uékasïnga sési jarhani ima jingoni (Jer. 17:7, 8; Sant. 2:22, 23). Ísï úparini, Jeobajtsïni andarheraati ka uáti eskachi sési pʼikuarhinhiaka. Isaías 32:17 arhisïndi: “Jurhimbikua jingoni úni ambe ma, pínandikua jarhasïndi; ka ambe enga jarhajka jurhimbikua jimbo, sési pʼikuarherakua ka seguridadi para méntkisï”. Ísï jimbo, engachi mintsita jingoni kurhajchaska Jeobani, jatsiakachi pínandikua (Is. 48:18, 19).

Parachi méntkisï pínandikua jatsini, Jeobajtsïni ístu aiachesïndi ambakiti regalu ma: espiritu santu (Uku. 9:31).

Enga apostuli Pablu uandapka ambe “enga Espiritu Santu úrpijka”, pínandikuani terseru lugarirhu karaspti (Gal. 5:22, 23). Ísï jimbo, engachi uéjka jatsini ambakiti pínandikua, jatsiskachi para jurajkuni eskajtsïni espiritu santu jarhuataaka. Ju je exeni tsimani ambe engachi uáka úni parajtsïni Jeobaeri espiritu jarhuatani.

 Primeru, jatsiskachi para p’indeni Bibliani arhintani (Sal. 1:2, 3). Engachi eratsintajka ambe enga Biblia arhijka, espiritu santujtsïni jarhuatasïndi kurhanguni néna exesïni Jeoba uánikua ambe. Por ejemplu, jorhenguarhisïngachi ambe úsïni para pínandikua jarhani ka andisï xáni jukaparhakue para Jeoba. Engachi uáka ambe engachi jorhenguarhijka Bibliarhu, sánderuchi pínandikua jatsiaka (Prov. 3:1, 2).

Segundu, jatsiskachi para kómarhini Jeobani ka kurhakuni eskajtsïni íntskuaka imeri espiritu (Luk. 11:13). Imecha engaksï jirinhajka imeri jarhuajperatani, Jeoba aiakuasïndi: “Diosïri pínandikua enga no nema újka jánhaskani, kuájpiauati chári mintsitechani ka chári eratsikuechani Kristu Jesusini jimbo” (Filip. 4:6, 7). Engachi someni kurhakuska Jeobani espiritu, ima uáti eskachi sési pʼikuarhinhiaka ka enga solu imechantku ísï pʼikuastajka engaksï imeri amigueka (Rom. 15:13).

Biblia jarhuataastia uánikua kʼuiripuechani paraksï mójtakuni imecheri irekuani ka únksï jatsini pínandikua para méntkisï, Jeoba jingoni, imecha mísmu ka imecha jingoni engaksï kúnguarhijka. Ju je exeani tsimani ejempluechani.

Iásï, jarhastiksï kúnguarhikuarhu kʼuiripuecha engaksï antesi sóntku ikiauenga, peru engaksï iásï kurhangutspijkia, tekantastiini, trankilueni ka sésiksï kámpini * (Prov. 29:22). Ju je exeni tsimani Testiguecheri experiensia engaksï jarhuajperata intsïnhapka paraksï kontrolarini imecheri ikiatapuni ka engaksï jorhenguarhikia sési káni máteruechani.

Na enga jásïpka David, úsïrendi eska no sési uandapiringa. Ante de aiakukuarheni Jeobani, pʼindespti uandatsini kʼuiripuni ka no respetarini imeri familiani. Ma jurhiatikua, kuenta íntskukuarhispti eska jatsispka para mójtakurhini. ¿Ambe jarhuataspi para nóteru kurhuraxenia? Ima uandantasïndi: “Uénaspka kumpliriuani Bibliaeri prinsipiuechani. Ka i ambe úspti eska juchiti familia ka ji, sánderuchi respetarperapiringuia”.

Na enga jásïka Rachel, jindesti jimboka ísï kʼuiriperanhaska. Uandasïndi: “Útasïni iásï jánguarhintaxaka no xáni ikiani, jimbokani familiarhu  ma tʼarhexeska engaksï chúskuenga uarhipeni”. ¿Néna úskia kʼuiripu máeni enga nóteru kurhuraxejkia? Ima uandasïndi: “Méntkisï Jeobani kurhakusïnga jarhuajperata”.

David ka Rachel, jindestiksï solu tsimani ejempluecha de na enga sési ambe jarhajka enga nema kumplirijka Bibliaeri prinsipiuechani ka jirinhani espiritu santueri jarhuajperata. Asta ini parhakpinirhu enga xáni no sési kámberanhajka, uákachi sési pʼikuarhinhini ka úni eskachi májku kʼéri jauaka familiarhu ka kúnguarhikuarhu. Peru ístu, Jeobajtsïni kurhachesïndi eskachi jánguarhintaaka “sési pájperani iámindu kʼuiripuechani jingoni” (Rom. 12:18). ¿Nénachi uá ísï úni? ¿Ka ambe úkuarhia engachi jánguarhintaska sési kámpini?

Engachi aianhpijka, pʼímarhisïngachi kʼuiripuni eska kurhauaka Tata Diosïri Reinueri ambe (Is. 9:6, 7; Mat. 24:14). Ka tsípisïngachi enga uánikua kʼuiripu jiókuarhijka ini mensaji pínandikueri. Ini ambe jimbo, nóteruksï xáni uandanhiasïndia o ikiani imani ambe jimbo enga xáni úkuarhini jaka. Iásïksï ambakiti erokuarhikua ma jatsistia para sánderu orhepani ka kumplirisïndiksï ini konsejuni: “Jánguarhi pínandikua jatsini ka seguiri inde ambe úni” (Sal. 34:14).

Ísïsti, uénani jámani no iámindu kʼuiripu uékasïndi kurhaani aianhperakuani (Juanu 3:19). Nájkiruka ísïka, Tata Diosïri espiritujtsïni jarhuatasïndi parachi respetu jingoni ka sési arhiaparini aianguani. Ísï jámani, úsïngachi arini instruksionichani enga Jesusi íntspipka para aianhpikuarhu: “Engajtsï inchaakuni jámaaka kʼumanchikuarhu, uandajpauakajtsï iáminduechani. Ka enga ima kʼumanchikuarhu anapuecha jukanchaaka pʼirani chári pínandikuani, jauati pínandikua imani kʼumanchikuarhu, peru enga no, chári pínandikua kʼuanhatsintaati chánksïni jingoni” (Mat. 10:11-13). Úni ambe enga Jesusi uandapka, úsïndi eskachi no ikiatku kéndikuaka kʼumanchikuarhu ka eskachi sánderu orhepani jamberi uáka jarhuatani imani kʼuiripuni.

Kristianuechachi ístu úsïnga eska pínandikua jauaka engachi respetu jingoni kájka gobiernueri ánchikuarhirichani, asta imechani engaksï no uéjka eska úkurhiaka juchari ánchikuarhita. Ju je ejemplu ma exeni. Gobiernu paisi afrikanueri ma, no sésijtsïni exesïrendi ka nójtsïni uékasïrendi sésikua íntskuni para uáni Kʼumanchikuechani Reinueri. Para úni sési peentani imani problemani, erachi ma axanhaspti enga ióntki jima misioneruepka, paraka explikarikupiringa juchari ánchikuarhiteri ambe embajadorini ima paisirini, jini Londres (Inglaterra). ¿Ambe úkuarhispi?

Erachi uandantasïndi: “Engani niárapka, exespka resepsionisteri xukuparhakuani ka kuenta íntskukuarhispka eska uandasïrenga tribueri idioma ma engani ji jorhenguarhipka. Jimbosïni imeri idioma jimbo uandajpapka. Ima ísku pakaraspti ka kurhamarhisptirini andisïni nípi. Kánikua respetu jingoni arhispka eskani uékasïrenga uandontskuarhini embajadori jingoni. Ima telefunu jimbo uandajpaspti ka ima uéraspti ka imeri idioma jimborini saludarispti. Tátsekua, jingontku kurhaspti engani explikarikupka ambe engaksï Testiguecha újka”.

Na enga erachi respetu jingoni explikarikupka i gobiernueri ánchikuarhirini, úspti eska nóteru xáni no sési exepiringuia juchari ánchikuarhitani. Ísï tátsekua, paisirhu anapu gobiernu uénaspti sésikua íntspeni paraksï únhani Kʼumanchikuecha Reinueri. ¡Kánikuaksï tsípispti erachicha! Ísïsti, respetu jingoni kaani máteruechani, úsïndi eska sési ambe jauaka ka eskachi pínandikua jatsiaka.

Iásï, Jeobaeri marhuarichachi sési pájperasïnga erachicha jingoni, jimbokachi pínandikua jatsiska. Ka uákachi eska i ambe jauaka engachi jánguarhintaska úni ambe enga espiritu santu úrpijka. Peru ambe enga sánderu jukaparhakueka, jindesti eskajtsïni Jeoba újchakuraaka ka pínandikua jingonchi irekaaka jimbanhi parhakpinirhu para méntkisï (2 Ped. 3:13, 14).