1, 2. a) ¿Andiksïsï úni jaki orhepani uérakuni tumbi kristianuecha Satanasini ka demoniuechani? (Exe dibujuni enga uénakuarhu jaka). b) ¿Ambechi exea ini artikulurhu?

APOSTULI Pablu uandaspti eska kristianu ísïska eska soldadu ma enga uarhipejka. Ísïsti, juchachi no kʼuiripuecha jingonisï uarhipejka sino espirituecha jingoni. Juchari enemiguechaksï jindesti Satanasi ka demoniuecha. Nájkirukachi no exeajka, imaksï meru jarhasti, kánikuaksï jorhenasti uarhipeni ka iónisïksï inde ambe ústia. Ísï xarharasïndi enajkichi no uá andaani ka sánderia tumbiicha. Peru ¿ísïski? ¿Uáksï tumbiicha andaani ini espiritu no sési úrichani? Jo, uátiksï ka ísïksï úxatiia. ¿Nénaksï úxaki ísï úni? Jimboka Jeoba íntsaaxa uinhapikua. Ka ístu, komu ambakiti soldaduecha, jukantastiksï “uarhipetaraku[eri] xukuparhakuani enga Diosïrika” (arhinta je Efesu 6:10-12).

² Enga Pablu uandapka ini xukuparhakueri ambe o armadurani, jamberi imani eranhaskani japti engaksï soldadu romanuecha jukenga (Uku. 28:16). Mientrasi engachi exeni jauaka ini ambakiti ilustrasionini, ju je exeni ambe engaksï uandajka máru tumbiicha engaksï ójkutakuechani jatsiajka ka na enga marhuakuajka jukarini jarhani uarhipetarakuarhu anapu xukuparhakuani enga Tata Diosïrika.

3, 4. ¿Néna sáno májkueniski Bibliaeri jurhimbikua soldadu romanueri sinturoni jingoni?

³ (Arhinta Efesu 6:14, TNM). Enga Pablu uandapka eska uétarhisïnga sési jónguarhitini jarhani jurhimbikuani, imani sinturonini arhikuekaxapti engaksï soldadu romanuecha jukenga. I sinturoni plakechani máru jukaspti engaksï tiámueripka para kuájchakuni soldadueri sinturani ka úkata jarhaspti paraka korasa no xáni kʼuetsapikupiringa. Ka ístu ganchuechani máru jukaspti enga marhuakuenga para espada ma páni ka nabaja ma. Sési jónguarhitini jarhani sinturonini, úsïrendi eska soldadu seguru pʼikuarherapiringa enga nirenga uarhipeni.

⁴ Sáno májkueni, jurhimbikua ambe engachi jorhenguarhijka Bibliarhu, kuájchakusïndijtsïni jorhentperakuecheri engaksï chkuanderakua ambeka (Juanu 8:31, 32; 1 Juanu 4:1). Engachi sánderu jukaparharaska jurhimbikuani, sánderu fásiliuati jukani korasa jurhimbikuerini, o sea ísï irekani eskaksï na arhijka Tata Diosïri juramukuecha (Sal. 111:7, 8; 1 Juanu 5:3). Ístu, engachi sési kurhanguska jurhimbikuani, sánderuchi seguru pʼikuarheraaka kuájpini jurhimbikuani imechani japarini engajtsïni ikiachijka (1 Ped. 3:15).

5. ¿Andichisï jatsi para no chkuanderani?

⁵ Engachi sési jónguarhintatini jauaka Bibliaeri jurhimbikuani, imani ambechi uáka engachi jorhenguarhijka ka méntkisïchi jurhimbitku ambe uandaaka. ¿Andichisï no jatsi para chkuanderani? Jimboka ma ambeska enga Satanasi sánderu úrajka. Ima enga chkuanderajka, jandiajku no sési úkuarhisïndi ka ístu máteruechani (Juanu 8:44). Ísï jimbo, nájkirukachi no perfektueka, jánguarhisïngachi para no méni chkuanderani (Efes. 4:25). Ísïsti, ménisï úkua jukasïndi. Abigaili * enga 18 jatirika, uandasïndi: “Ménisï ísï xarharasïndi eska no uétarhisïnga méntkisï jurhimbitku uandantani ka sánderia engari ísï úparini, uáka orhepani uérakuni problemani ma”. Jimajkani, ¿andisï jánguarhintajki para no chkuanderani? Ima uandasïndi: “Jimboka engani no chkuanderaska, juchiti konsiensia trankilu jarhasïndi Jeoba jingoni ka juchiti táticha ka amiguechaksï mítisti eskajtsïni uáka mintsikani”. Ka Biktoria enga 23 jatirika, uandasïndi: “Engari no chkuanderaska ka kuájpindi ambe engari jakajkujka, uátiksïni bullying úcheni. Peruri uánikua kóntperatechani jatsiauaka: sánderuri segura pʼikuarheraaka, sánderuri andarheraaka Jeobani ka eskakini respetariuaka ima kʼuiripu engakini uékajka”. Ísï jimbo, jukaparhakuesti eskari méntkisï jurhimbitku ambe uandaaka.

6, 7. ¿Néna terokuntasïni jurhimbikua korasa ma jingoni?

⁶ Primeru siglurhu, ma jásï korasa engaksï soldadu romanuecha jukenga, lámina tiámueri jingoni úkata jarhaspti. Máruksï iórhati jurajkuasïrendi paraksï úni kʼuntsïkuani para soldadueri kuerpurhu ajustarikuarini ka máteruechanksï jini jatsixukuasïrendi. Lámina tiámuerichaksï jokukata jarhaspti sïkuiri jingoni, úrapariani ganchuechani ka brochechani tiámueri. Ísïsti, korasa ójkutasïrendi sánisï soldaduni para manakuarhini, peru ístu úsïrendi eska espada ka flechechaksï no atapiringa mintsitarhu o máteru nani ísï enga jimbo úpiringa uarhini. Jimbosï xáni jukaparhakuepti eska seguidu exeni japiringa eska korasa sési japiringa.

⁷ Tata Diosïri juramukuechaksï sési terokuntasïndi korasa jingoni, na engaksï kuájchakujka imani ambe enga juchari mintsitarhu jaka (Prov. 4:23). Ísï eska soldadu ma na no mójtakupiringa korasa tiámuerini ma, imani korasa jingoni enga no xáni ambakiti materiali jingoni úkata japiringa, juchajtuchi no jatsiska para mójtakuani Tata Diosïri juramukuechani, imani ambe jingoni engachi jucha eratsijka. Nochi xáni jánhaskatiska para úni kuájchakuni juchari mintsitani (Prov. 3:5, 6). Jimbosï xáni jukaparhakueti eskachi méntku exeni jauaka eskaksï Jeobaeri juramukuecha, kuájchakuaka imani ambe enga juchari mintsitarhu jaka.

8. ¿Andisï jukaparhakue kumpliriuani Jeobaeri juramukuechani?

 ⁸ ¿Ménisïri ísï pʼikuarherasïni eskaksï Tata Diosïri juramukuecha karga máeska o eskari no libreuaka? Danieli enga 21 jatirika, uandantasïndi: “Juchiti maestruecha ka kompanieruechajtsïni teresmarhusïndi, jimbokani imani ambe úsïnga enga Biblia arhijka. Jarhaspti ma tiempu engani nóteruni xáni seguru pʼikuarherenguia ka deprimirikuarhispka”. ¿Ambe jarhuataspi paraka sési pʼikuarherantapiringa? Ima uandantasïndi: “Tiempu jingoni, exespka eskaksï jarhaspka kóntperatecha engani úpka ambe engaksï arhijka Jeobaeri juramukuecha. Máru ‘amiguechaksï’ uénaspti droga úrani ka máteruksï jurajkuspti eskuelani. Kánikua no sési nikuaspti. Jeobajtsïni meru kuájchakusïndi”. Madisoni enga 15 jatirika, uandasïndi: “Kánikua úkua jukanchasïnga kurhajchani Jeobani ka no úni imani ambe enga juchiti kompanieruechani dibertiriuajka o eska inde ambesï uétarhijka úni”. ¿Ambe úsïni para orhepani uérakuni inde tsʼéjkukuani? Ima mókuntasïndi: “Ji mísmuni miákuarhitasïnga eskani Jeobaeri nombrini representarisïnga ka eskaksï tsʼéjkukuecha jindeska ima ambe enga Satanasi úrajka pararini no sési úcheni. Engani orhepani uérakujka tsʼéjkukua ma, agustu pʼikuarherasïnga”.

9-11. a) ¿Kristianuechachi na jásï sapatuechani jukariaxaki? b) ¿Ambechi uá úni parachi sánderu agustu predikarini?

⁹ (Arhinta Efesu 6:15, TNM). Enga soldadu ma no jukantenga sapatuechani, no listu jarhasïrendi para uarhipeni nirani. Sapatuechaksï xarhaspti eska kuarhachicha engaksï úkata japka tanimu kapecha sïkuiriri jingoni engaksï tepekukata japka paraksï ajustarikuarhini jantsirirhu. Na engaksï úkata japka, úsïrendi eskaksï ióni marhuapiringa ka komoduenksï.

¹⁰ Soldadu romanuechaksï ini sapatuechani úraasïrendi para uarhipeni nirani, peru kristianuechachi ísï úsïnga enajkichi jukandurhantaajki sapatuechani para eianhpini mensaji pínandikuerini (Is. 52:7; Rom. 10:15). Peru ístuchi balori uétarhinchasïnga para eianhpini enga jauaka oportunidadi. Robertu enga 20 jatirika, uandasïndi: “Antesi chésïrenga predikarikuani juchiti eskuelarhu anapu kompanieruechani. Peekani kʼuratsenga. Sési jimbo no mítispka andisïni ísï pʼikuarhereni. Iásï, tsitisïnguia predikarikuani máteru tumbiichani”.

¹¹ Uánikua tumbiichaksï sánderu sési pʼikuarherasïndi predikarini engaksï sési prepararikuarhijka. ¿Tʼu ambe uá parari ísï úni? Julia enga 16 jatirika, uandasïndi: “Engani eskuela nirajka, méntkisï pásïnga mochilarhu publikasionichani ka kurhaasïnga ambe engaksï eratsijka ka ambe engaksï jakajkujka juchiti kompanieruecha. Inde ambe úsïndi parani exeni ambe uá jarhuaatani. Engani sési prepararikuarhijka, imani ambe eianguasïnga enga jarhuatauaka”. Maria enga 23 jatirika, uandasïndi: “Engari uékpitiika ka jorhenaniri kurhaani, uákari sánisï jánhaskani ambe engaksï nitamakuarhini jarhajka chíti kompanieruecha. Asegurarikuarhisïnga arhintani iámu ambe enga uerajka para tumbiicha. Ísï úparini, úsïnga ambakiti ambe exeraani Bibliarhu o enga jw.org jaka”. Eskachi na exekia, sési preparadu jarhani para eianhpini, ísïsti eska sapatuechani jukariani jarhani engari sésku jukajka.

12, 13. ¿Nákiskiksï máru Noambakitiri lansecha engaksï chpiririka?

¹² (Arhinta Efesu 6:16, TNM). Soldadu romanuechaksï úrasïrendi eskudu ma enga ióskapka ka xáni kʼéspti enga kuájchakuenga anhanchakuarhu uératini asta jurhintskuarhu. Marhuakuasïrendi paraksï no ataani espada jingoni, lansa ka máteru armecha jingoni.

¹³ Máru “Noambakitiri lansecha[...] engaksï chpiririka” uátiksï jindeni chkuanderakua ambe Jeobaeri, komu eskakini no jukaparharasïnga ka eskakini no uékasïnga. Aida enga 19 jatirika, uandasïndi: “Sáno méntkisï, ísï pʼikuarherasïnga eska  Jeoba iauani jarhaska ka eska no uékasïnga juchiti Amigueni”. ¿Néna úsïni orhepani uérakuni ambe enga pʼikuarherajka? Ima uandasïndi: “Tánguarhikuechaksï kánikua uinhaperantasïndi juchiti jakajkukuani. Antesi, solu uaxakasïrenga ka no méni tarhatani jájki. Ísï eratsisïrenga eska no nema jukaparharaasïrenga juchiti komentariuechani. Peru iásï prepararikuarhisïnguia para tánguarhikuecha ka jánguarhintasïnga tsimani o tanimu mókuntskuechani íntspiani. Sánisï úkua jukanchasïnga, peru engani ísï újka, sési pʼikuarherasïnga. Ístu, erachichajtsïni kánikua uinhaperantasïndi. Mándani tánguarhikuecharhu, segura jarhasïnga eskarini Jeoba xénchasïnga”.

14. ¿Ambe jukaparhakua ambe xarhatasïni Aideri experiensia?

¹⁴ Aideri experiensia jukaparhakua ambe xarhatasïndi. Eska eskudu engaksï soldadu romanuecha úrenga májku medida ma jukaspka, peru juchari jakajkukua úsïndi sánderu kʼéni o sánderu sapichu úkuarhintani. Na enga xáni kʼéaka, juchari jimbo pakarasïndi (Mat. 14:31; 2 Tes. 1:3). Jimbosï xáni jukaparhakueti eskachi uáka eska juchari jakajkukua sánderu kʼéaka.

15, 16. ¿Néna úsïni ísï terokuntani juchari erokuarhikua eska kasku ma?

¹⁵ (Arhinta Efesu 6:17). Kájtsïkua tiámueri o kasku engaksï soldadu romanuecha úrenga, úkataksï jarhaspti para kuájchakuni éjpuni, anhanchakuani ka kánharhikuani. Máru kaskuechaksï jupikatarakua ma jukasïrendi para úni jájkirhu paani.

¹⁶ Ísï eska kasku na kuájchakuenga soldadueri éjpuni, ístu “méntku erokani jarhani [...] pʼímutantskuani”,  kuájchakusïndi juchari eratsikuani, o sea ambe engachi eratsini jarhajka (1 Tes. 5:8; Prov. 3:21). Erokuarhikua engachi jatsika, úsïndi eskachi Jeobaeri eiatsperakuani eratsini jauaka ka no jukari pendienti páni problemecha ambe jimbo (Sal. 27:1, 14; Uku. 24:15). Peru parakajtsïni kasku kuájchakuaka, jatsiskachi para éjpurhu páni, no tirhijkupani. O sea, jatsiskachi para eratsini jarhani eska úkuarhiaka ambe engachi erokuarhini jaka.

17, 18. a) ¿Néna jánguarhintasïni Satanasi úni eskachi tsïtaaka juchari erokuarhikuani? b) ¿Nénachi uá xarhatani eskachi no jurajkusïnga eskajtsïni Noambakiti enganiariuaka?

¹⁷ Satanasi jánguarhintaati eskachi tsïtaaka juchari erokuarhikuani. ¿Néna? Eratsi ambe enga úkupka Jesusini. Seguru eska mítipka eska Jesusi erokuarhixapka kʼuiripuni juramukuni sánderu orhepani. Peru antesi jatsipirindi para sufririni ka uarhini ka tátsekua erokuarhini imani tiempuni enga Jeoba uandarini japkia. Ísï jimbo, Noambakiti tsʼéjkuspti aiakuparini eska úpiringa sánderu kókuani íntskuni ambe enga Jesusi erokuarhini japka. Arhispti eska enga kómarhipiringa ma ratu, úpiringa jirejiresï jatsini iámu ambe (Luk. 4:5-7). Májkueni, Satanasi mítisti eskajtsïni Jeoba aiachiska íntskuni jatsikuarhikua ambe jimbanhi parhakpinirhu. Peru antesichi jatsika para erokuarhini ka jamberi problemechani jatsiani. Jimbojtsïnisï Noambakiti tsʼéjkujti aiachiparini eskachi uáka sési irekani ixú ka ini tiempuni. Uékasïndi eskachi orheta péraaka jatsikuarhikua ambe ka tátsekia Reinueri ambe (Mat. 6:31-33, Táta Diósïri Uandakua Tata Jesukristueri Aiatsperakua).

¹⁸ Uánikua tumbi kristianuecha, nóksï jurajkutakuarhixati eska Noambakiti enganiariauaka. Karina enga 20 jatirika, uandasïndi: “Mítiska eska Tata Diosïri Reinujkusï uáka kénditaani iámindu juchari problemechani”. ¿Néna jarhuatasïni inde erokuarhikua de na enga jatsika para eratsini ka jámani? Ima mókuntasïndi: “Erokuarhikua paraisueri, jarhuatasïndirini parani exeni ambe uá juchiti metechani jingoni. No aprobecharisïnga imani ambe engani jorhenaka úni parani tumina andani o parani kʼéri ambeni empresarhu ma. Sánderu sési, úrasïnga juchiti tiempu ka uinhapikua parani Jeobani marhuakuni”.

19, 20. ¿Nénachi uá sánderu sési úrani Tata Diosïri Karakatani?

¹⁹ Enga Pablu karta ma úkuapka Efesu anapuechani, soldadu romanuechaksï espada ma úrasïrendi enga 50 sentimetru ióskapka (20 pulgada) paraksï uarhipeni nirani. Ma rasoni engaksï jimbo soldaduecha xáni sési úrauenga uarhipetarakuechani, jindespti jimbokaksï pauani pauani ensaiarisïrenga.

²⁰ Pablu ísï terokutantaspti Tata Diosïri Karakatani eska espada ma engajtsïni Jeoba íntskuka. Jimajkani, jatsiskachi para sési úrani engachi kuájpini jámaaka juchari jakajkukuani o engachi uékaka mójtakuni juchari eratsikuani (2 Kor. 10:4, 5; 2 Tim. 2:15). ¿Nénari uá sánderu sési úrani? Sebastiani enga 20 jatirika, uandantasïndi: “Engani arhintajka Bibliani, ma bersikulu karasïnga mándani kapitulueri. Lista ma úxaka textuecheri engani sánderu tsitiajka. Ísï úparini, úsïnga sánderu ísï exeni ambe ma eska Jeoba na exejka”. Danieli engachi párrafu 8 exeka, uandantasïndi: “Engani arhintani jarhajka Biblia, erakupaani jarhasïnga bersikuluechani enga uáka jarhuatani kʼuiripuni eianhpikuarhu. Kuenta íntskukuarhiska eskaksï sési kurhaasïnga engaksïni exejka eskari tsitisïnga Bibliaeri ambe ka eskari jánguarhintasïnga jarhuataani”.

21. ¿Andichisï no jatsi para chérhini Satanasini ni demoniuechani?

²¹ Ambe engaksï uandajka tumbiicha engachi ini artikulurhu exeakia, xarhatasïndi eskachi no jatsiska para chérhini Satanasini ni demoniuechani. Uinhapitistiksï, peruchi uáka andaani. Ka aparti, niáraatiksï uarhini. Nóteru ióndani enga Kristu juramuni jauakia mili uéxurhini, ónhakataksï jauati ka méntkuksï no ma ambe uáti úni. Ka tátsekuaksï kʼamajkunhaati (Jaŋ. 20:1-3, 7-10). Mítiskachia juchari enemiguni, imeri trampechani ka ambe enga uékajka úni. Jeobaeri jarhuajperata jingoni uákachi uinhamu anhatsekutini jarhani Noambakitini.