1. ¿Amberiksï uékasïni seguru jarhani táticha ante deksï uájpecha itsï atakuarhini?

“IÓNI arhiaspkia juchiti tátichani eskani uékasïrenguia itsï atakuarhini ka imajtujtsïni uánikua uelta uandontskuarhichespti inderi ambe. Uékasïrendiksï seguru jarhani eskani kurhangusïrenga ambe engani uékenga úni. Ka ima jurhiatikua enga xáni jukaparhakuepka para ji, niáraspti 31 de disiembrini de 1934”. Ísï uandantasïndi pirenchi Blossom Brandt ambe enga úkuarhipka enga eratsipka itsï atakuarhini. Iásïjtu, táticha engaksï kristianueka, uékasïndiksï jarhuataani uájpechani paraksï ambakiti ambe erakuni úni. Ísku jatini pʼínguani uájpechani paraksï no itsï atakuarhini, uáti no sési úkuani sapiicheri sési pájperakuani Jeoba jingoni (Sant. 4:17). Ísïsti, tátichaksï uékasïndi seguru jarhani eska sapi preparadu jarhaskia para úni Kristueri chúxapatiini ante de itsï atakuarhini.

2. a) ¿Ambe uandanhiataasïni máru sirkuitueri orhejtsïkutichani? b) ¿Ambechi exea ini artikulurhu?

 ² Máru sirkuitueri orhejtsïkutichaksï uandanhiasïndi jimbokaksï mítiaska tumbiichani engaksï 20 uéxurhinisï jatirikia ka engaksï nótki itsï atakuarhijka nájkirukaksï jurhimbikuarhu tʼarhexeka. Sáno iáminduksï nirasïndi tánguarhikuecharhu ka eianhpini ka uandasïndiksï eskaksï Jeobaeri testigueska. ¿Peru andiksïsï nótki aiakukuarhejki Jeobani ka itsï atakuarhini? Ménisï jimbokaksï táticha arhiasïnga eskaksï erokuarhiaka. ¿Ambe úsïni eskaksï máru táticha no jurajkuauaka uájpechani paraksï progresarini ka itsï atakuarhinksï? Ini artikulurhuchi exeaka tʼámu ambe enga uandanhiatajka tátichani.

3. ¿Ambeksï kurhamarhikuarhisïreni Blossomiri táticha?

³ Blossomiri táti jembechaksï kurhamarhikuarhisïrendi sini uájpa jatiripia para kurhanguni ambe arhikuekasïni itsï atakuarhini ka andisï xáni jukaparhakue. ¿Nénaksï uá táticha mítini sini uájpa listu jarhaskia para aiakukuarheni Jeobani?

4. ¿Néna jarhuataasïni tátichani Jesusiri juramukua enga Mateu 28:19, 20 jaka?

⁴ (Arhinta je Mateu 28:19, 20). Eskachi na exekia máteru artikulurhu, Biblia no arhisïndi na xáni uétarhisïni jatiriini para itsï atakuarhini. Peru uétarhisïndi eskaksï táticha eratsintaaka ambe enga Mateu 28:19 arhijka. Ixú Jesusi juramuspti “ni je jorhendaani”. I ambe arhikuekasïndi jorhendani nemani para jarhuatani disipulu úkuarhini. Jesusiri disipulu imesti enga jorhenguarhijka ka kurhanguni imeri jorhentperakuani ka uékani ísï úni. Ísï jimbo, ambe engaksï táti Testiguecha jatsika para úni, jindesti jorhendaani uájpechani desdekaksï charhakuejka paraksï niárani itsï atakuarhini ka Kristueri disipulueni. Ísïsti, charhaku ma no kumpliriuasïndi rekisituechani para itsï atakuarhini. Peru Biblia arhisïndi eskaksï asta sapiicha uáka kurhanguni ka jukaparharani ambe enga Biblia arhijka.

5, 6. a) Imani ambe jimbo enga Biblia arhijka Timoteueri, ¿ambechi niárasïni kurhanguni imeri bautismueri? b) ¿Nénaksï uá táticha sánderu sési jarhuataani uájpechani?

⁵ Timoteu erakuspti Jeobani marhuakuni enga útasï tumbipka. Pablu uandaspti eska Timoteu “desde sapichutki” jorhenguarhispka Tata Diosïri Karakatani, o sea desdeka charhakuepka. Timoteueri táti no Jeobaeri marhuarispti, peruksï imeri amamba ka imeri abuela jorhendaspti xénchani Jeobaeri Karakatani. I ambe jarhuataspti kʼéri ma jakajkukua jatsini (2 Tim. 1:5; 3:14, 15). Enga 20 ísï jatiripkia, Pablu erakuspti para pámbitani biajicharhu para eianhpini (Uku. 16:1-3).

⁶ Ísïsti, nóksï iámindu sapiicha májkuenisti. Máruksï sánderu kókuani jánhaskasïndi eska máteruecha. Ka máruksï sapirhatku uandasïndi eskaksï uékasïnguia itsï atakuarhini, jimbokaksï kurhangusïnguia ambe ma ka miákua jukarinksïa. Peru máteruksï sánderu ióndasïndi listu jarhani para itsï atakuarhini. Táticha engaksï kurhangujka ini ambe, nóksï obligariuasïndi uájpechani paraksï itsï atakuarhini, sinoksï jarhuataasïndi paraksï sánhani arhini jánhaskani. Kánikuaksï tsípisïndi engaksï uájpecha újka ambe enga arhijka Proverbios 27:11 (arhinta je). Peruksï no jatsisti para mirikurhini eskaksï jatsiska para jarhuataani sapiichani paraksï Kristueri disipulueni. Uátiksï kurhamarhikuarhini: “¿Sésku jakiia ambe enga mítika juchiti sapi para aiakukuarhenia Jeobani ka itsï atakuarhini?”.

7. ¿Uétarhisïni mítini ambe enga xáni arhijka Biblia para úni itsï atakuarhini? Explikari je.

⁷ Tátichaksï jorhendaasïndi uájpechani jimbokaksï uékasïnga eskaksï sési mítiaka jurhimbikua ambe. I ambesï uáti eskaksï sapiicha uékaaka aiakukuarheni Jeobani. Peru ¿arhikuekasïni i ambe eska sapi ma jatsiska para mítitini jarhania ambe enga xáni arhijka Biblia ante de aiakukuarheni Jeobani ka itsï atakuarhini? Nómbe. Iámindu engaksï itsï atakuarhijka, jatsistiksï para seguirini jorhenguarhini (arhinta je Kolosasi 1:9, 10). Jimajkani, ¿na xáni uétarhisïni mítini ante de itsï atakuarhini?

8, 9. ¿Ambe úkuarhinchaspi kárseliri kuári ma Filipusi ka ambechi jorhenguarhisïni ima amberi?

⁸ Ambe enga úkuarhinchapka ióntki anapu familia ma, uáti jarhuataani tátichani iásï (Uku. 16:25-33). Uéxurhini 50 jimbo ísï, Pablu niraspti Filipusi enga úpka imeri segundu biajini para eianhpini. Jima, ima ka imeri kompanieru Silasi, jupikanhasptiksï ka ónhanhanksï jimboka kʼuiripu chkuanderakua ambe uandaspka imecheri. Ima chúri kʼéri ma jenchespti ka kárseliri puertechaksï mítakuarhispti. Kárseliri kuári eratsispti eskaksï ima engaksï ónhakata japka, sïpakuarhispka, jimbosï uékendi uándikukuarhini. Peru Pablu pʼínguspti. Tátsekua, Pablu ka Silasiksï predikarikuspti imani ka imeri familiani. Íksï niáraspti kánikua jukaparharani ambe engaksï jorhenguarhipka Jesusiri ambe ka seguirisptiksï itsï atakuarhini. ¿Ambejtsïni jorhendasïni i ambe?

⁹ Jamberi kárseliri kuári Roma anapu soldadu máepti antesi ka no mítispti Tata Diosïri Karakateri ambe. Ka para kristianu úkuarhini, jatsispti para jorhenguarhini ambe enga orheta uétarhijka mítini Tata Diosïri Karakateri, kurhanguni ambe arhikuekasïni Jeobaeri marhuariini ka uékani úni ambe enga Jesusi jorhentpipka. Ambe enga jorhenguarhipka imani sánititu tiempu jimbo, jarhuataspti para itsï atakuarhini. Peru jatsispti para seguirini jarhani jorhenguarhini. Jimajkani, ¿ambeksï uá úni táticha enga uájpa ma arhiauaka eska uékasïnguia itsï atakuarhini jimboka xénchasïnga Jeobani ka jimboka uékasïnga kurhajchani? Uátiksï arhini eska kúnguarhikueri orhejtsïkuticha jingoni uandontskuarhiaka paraksï ima exeni sini uáia itsï atakuarhini. * Ísï eska máteru erachicha engaksï itsï atakuarhijka, ima no méni kʼamaraati jorhenguarhini ambe enga Tata Diosï eratsijka (Rom. 11:33, 34).

10, 11. a) ¿Ambeksï eratsisïni máru táticha? b) ¿Ambeksï jatsipirini para sánderu jukaparharani táticha?

¹⁰ Máru tátichaksï eratsisïndi eska sánderu sésiska para uájpa, orheta karrera ma estudiarini ka ambakiti ánchikuarhita ma jirinhani ante de itsï atakuarhini. Ka jamberiksï sési ambe uéjti para uájpecha. Peru ísï úparini, ¿jarhuataanksï jaki uájpechani paraksï felisiini? ¿Inde ambesï jorhentpejki Biblia? ¿Ambe uékasïni Jeoba eskachi uáka juchari tsípikua jingoni? (Arhinta je Eclesiastés 12:1).

¹¹ Uétarhisïndi miáni eska i parhakpini ka ambe enga ixú jaka, no terokuntasïnga imani ambe jingoni enga Jeoba uéjka ka eratsini (Sant. 4:7, 8; 1 Juanu 2:15-17; 5:19). Ambe enga sánderu sési kuájchakuaka  sapini ma para Satanasi no no sési úkuni ni imeri parhakpini ka ni ambe enga kʼuiripu eratsijka, jindesti Jeobaeri amigueni. Engaksï táticha jatsikuarhikua ambe sánderu jukaparharaska, jamberi uájpa eratsiati eska parhakpini anapu ambe sánderu jukaparhakueska eska imeri pájperakua Jeoba jingoni. Ka no ma táti Testigu uékasïndi eska i parhakpini támisï páka imeri uájpani, jimboka ma ambejkusï jarhuataaka felisiini, orheta pérani Jeobani imeri irekuarhu (arhinta je Salmo 1:2, 3).

12. ¿Andiksïsï máru táticha arhiajki uájpechani eskaksï nótki itsï atakuarhiaka?

¹² Pirenchi ma arhispti imeri nanakani eska nótki itsï atakuarhipiringa. ¿Andi? Pirenchi uandasïndi: “Kʼuratsesïnga jiókuarhini eskani no uékasïrenga eska itsï atakuarhipiringa para no expulsarinhani”. Uánikua tátichaksï májkueni eratsisïndi eska inde pirenchi, eska sánderu sésiska eska uájpa asta jiáni itsï atakuarhiaka enga jorhenaakia ambakiti ambe erakuni úni (Gén. 8:21; Prov. 22:15). Jamberiksï eratsijti eska uájpa no uáka expulsarinhani enga no itsï atakuarhitini jauaka. Peruksï jandiajku enganiarikuarhexati. ¿Andi? (Sant. 1:22).

13. ¿Arhikuekasïni eska enga nema no itsï atakuarhitini jaka no jatsiska para kuenta íntskuntani Jeobani? Explikari je.

¹³ Kurhangusïngachi eskaksï táticha uékasïnga eska uájpa asta jiáni aiakukuarheakia Jeobani ka itsï atakuarhini enga listu jauakia. Peru no sési japirindi eratsini eska Jeoba no kuenta kurhakuntaaka jimboka no itsï atakuarhitixaka. Sapi ma desde jiáni responsablisïndi ante Jeoba enga mítijka ambe sési jarhaski ka ambe nómbe (arhinta je Santiagu 4:17). Ísï jimbo, enbesi deksï pʼínguni para no itsï atakuarhini, tátichaksï jánguarhintasïndi ejemplu jingoni jorhendani uájpani. Jánguarhintasïndiksï desde sapichu jorhendani jukaparharaani Jeobaeri juramukuechani (Luk. 6:40). Í ambe jindesti enga sánderu kuájchakuaka, jimboka jarhuataaka úni ambe enga Jeoba uandajka eska sési jarhaska (Is. 35:8).

14. ¿Nénaksï uá orhejtsïkuticha jarhuataani tátichani?

¹⁴ ¿Nénaksï uá orhejtsïkuticha jarhuataani tátichani? Sési ambe uandaparini metecheri para sánderu marhuakuni Jeobani. Pirenchi ma miásïndi eska enga seisi jatiripka, erachi Russell kinse minutu uandontskuarhikuspka ka kurhamarhini ambe uékasïreni úni para sánderu marhuakuni Jeobani. I pirenchi jukari setenta uéxurhini marhuaspti komu prekursora. I ambejtsïni xarhatachisïndi na enga xáni jarhuatajka nemani engachi animarijka ka ambakiti ambe uandontskuarhikuni (Prov. 25:11). Máteru ambe engaksï uáka úni orhejtsïkuticha, jindesti kurhakuani tátichani ka sapiichani eskaksï jarhuajpiaka ánchikuarhitecha jingoni Kʼumanchikua Reinuerirhu. Uátiksï imani ambe úraani sapiichani engaksï uáka úni.

15. ¿Nénaksï uá máteru erachicha jarhuataani tumbiichani?

¹⁵ Ka ¿nénaksï uá jarhuajpini máteru erachicha? Uandanhiaparini tumbiicha jimbo. Ma ambe engaksï uáka úni, jindesti pendienti jarhani imani ambe jingoni enga xarhatajka eskaksï progresarixaka. Por ejemplu, ¿ambakiti komentariu ma íntspeski tánguarhikuarhu? ¿Nitamataraski parti ma tánguarhikuarhu enga semanarhu jarhajka? ¿Orhepani uérakuski tsʼéjkukuani ma? ¿Jánguarhintaski eianhpini eskuelarhu? Enga ísï úka,  ju je seguirini felisitarini. Uétarhisïndi uandontskuarhini tumbicha jingoni ante de uénani tánguarhikua o enga kʼamaraakia. I ambe jarhuataasïndi paraksï pʼikuarherani eskaksï kuenta úkuarhisïnga kúnguarhikua jingoni (Sal. 35:18).

16, 17. a) ¿Andisï uétarhijki eskaksï uátsïticha itsï atakuarhiaka? b) ¿Ambeksï uá niárani pʼikuarherani táticha engaksï Jeobani marhuakujka? (Exe je fotuni enga uénakuarhu jaka).

¹⁶ Kʼuiriperaani sapiichani “arhistakuaparini juchari Tatani jimbo”, jindesti sánderu kʼéri ánchikuarhita enga táti kristianu ma jatsika (Efes. 6:4; Sal. 127:3). Enga israelita uájpa ma andajpenuenga, imani ireta jingoni kuenta úkuarhisïrendia enga aiakukuarhetini japka Tata Diosïni. Peru sapiicha engaksï jurhimbikuarhu andajpenujka, nómbe. Ka tátichaksï no úsïndi eredarikuani uájpechani, uékperakua Jeoba jimbo ka jurhimbikua jimbo. Desdeka sapi ma andajpenujka, tátichaksï jatsisti para exeni nénaksï uá jarhuatani para Kristueri disipulueni, aiakukuarheni Jeobani ka itsï atakuarhini. I jindesti sánderu jukaparhakua ambe. ¿Andi? Jimboka aiakukuarheni, itsï atakuarhini ka sési marhuakuni Jeobani, jindeska ambe enga salbariuaka grani tribulasionirhu enga axuterku jakaia (Mat. 24:13).

¹⁷ Enga Blossom Brandt arhiapka táti jembechani eska uékasïrenga itsï atakuarhini, imaksï uékaspti asegurarikuarhini eska lista jarhaspkia para úni ambe enga xáni jukaparhakueka. Engaksï asegurarikuarhipkia, apoiarisptiksï para ísï úni. Ma chúri ante de itsï atakuarhini, imeri táti sési jásï ambe úspti. Blossom uandantaspti: “Kurhachesptijtsïni eskachi iáminduecha tinguixurhipiringa ka tátsekua kómarhikua ma úspti. Arhispti Jeobani eska kánikua tsípixapka enga imeri nanaka sapichu eratsipkia imani marhuakuni para méntkisï”. Jukari sesenta uéxurhini tátsekua, ima uandaspti: “No méni mirikurhiaka ima chúri”. Táticha, uékasïngachi eskajtsï chájtu májkueni tsípiaka ka sési pʼikuarherani engajtsï exeaka eskaksï chári sapiicha aiakukuarheskia Jeobani ka itsï atakuarhini.