GRAZ (Austria) tʼarhexespka. Engani sieti jatiripkia, eskuelarhu ma axanhaspka enga relijioniri ambe jorhentpienga. Jimarini kánikua no sési pʼikuastaspti exeni eskaksï saserdoticha ka monjaecha ísku jándikua ambe úsïrenga. Jimbosïni arhipka mamani eskarini petantapiringa ka no jamberi ma uéxurhini jimbo uéntaspka.

Tátsekua, internadurhu ma inchaspka. Ma chúri, paparini jurhaspti jirinhantani pararini páni nani enga seguruepiringa, jimbokaksï bombardearixapka Graz. Ka Schladming sïpakuarhispkachi. Engachi niárapka, puentinchi ma parhikuspka, ka engachi nitamapkia, kʼuanindurhisptiksï. Máteru uelta, abionichaksï máru kétsekua káraxapti ka kʼuanirasptijtsïni nanitani ka jíndini engachi jardinirhu japka. Enga guerra kʼamarani jámenguia, ísïchi pʼikuarherasïrenga enajkijtsïni gobiernu ka iglesia jurajkupi.

Jeobaeri testigu ma uénaspti Bibliaeri ambe uandaxekuni mamani 1950 jimbo. Ji kurhaasïrenga ambe engaksï uandaxenga ka astani nirasïrenga máru tánguarhikuecharhu mama jingoni. Ima seguru jarhaspti eskaksï Jeobaeri testiguecha jurhimbikua ambe jorhentpesïrenga, jimbosï 1952 itsï atakuarhipti.

Ji ísï exesïrenga imani kúnguarhikuani engachi nirenga komueska kúnguarhikua ma para uarhiiti kʼératicha. Peru tátsekuachi kúnguarhikuarhu ma niraspka engaksï uánikua tumbiicha japka. ¡Ima kʼóru no ísï xarharasïrendi komueska kúnguarhikua ma para uarhiiti kʼératicha! Engachi Graz kʼuanhatsintapka, uénaspka méntkisï tánguarhini ka jíjtuni no ióndaspka segura jarhani eska imasï jindepka jurhimbikua. Exespka eska Jeoba Tata Diosï máeska enga no jurajkuajka imeri marhuarichani. Nájkirukachi jandiajku pʼikuarherajka uandanhiatecha jimbo, ima méntkisï juchantsïni jingoni jarhasïndi (Sal. 3:5, 6).

 Uékasïrenga aianhpini ambe engani jorhenguarhipka ka juchiti ermanuecha jingoni uénaspka. Tʼámu juchiti jingonikuecha engaksï sánderu kʼéripka, nóteruksï juchini irekasptia ka maestresptiksï. Niraspka exeani ka pʼímarhiaspka paraksï jorhenguarhini Bibliaeri ambe. Tátsekua, iámu juchiti ermanuechaksï Testigu úkuarhispti.

Nótkini tsimani semana páxapka aianhpini kʼumanchikuecharhu, engani uarhiitini ma uandaxekupka jukari treinta jatirini ma ka uénaspkachi estudiarini. Ima estudiarispti astaka itsï atakuarhipka. Tátsekua, uámba ka uájpechajtuksï ísï úspti. Jorhendani imani uarhiitini, uinhaperaspti juchiti jakajkukuani. ¿Andi? Jimbokani ji no méni jorhendanhaspka ka jatsisïrenga parani sési prepararikuarhini. Parani úni jorhendani, orhetani jatsisïrenga para ji kurhanguni. I amberini jarhuataspti sánderu sési kurhanguni jurhimbikuani. Aiakukuarhespka Jeobani ka abrilini de 1954 itsï atakuarhispka.

Niraspka kʼéri tánguarhikua internasionalicharhu 1955, Alemania, Francia ka Inglaterra. Engani Londres japka, mítispka Albert Schroederini enga instruktoripka Galaadi ka enga niárapka Grupurhu jarhani enga Orhejtsïkuajka iámindu kúnguarhikuechani. Museo Británico jimbo ísïchi niraspka ka erachi Schroeder exeraasptijtsïni máru karakatechani Bibliaeri engaksï ióntki anapuepka. Arhisptijtsïni eskaksï jukanharhiaspka letrechani ebreu jimbo Tata Diosïri nombriiri ka eskaksï kánikua jukaparhakuespka. Ima amberini mintsitarhu niárachespti ka uinhaperantaspti juchiti jakajkukuani. Iásï sánderuni segura jarhaskia eskani uékasïnga mítitarpini jurhimbikuani enga Bibliarhu jaka.

Uénaspka marhuani tiempu kompletueri 1 de eneruni de 1956. Tʼámu kutsï tátsekua, pʼímarhinhaspka parani prekursora espesialiini Austria ka jima axanhaspka engaksï no japka Testiguecha, Mistelbach. Peru jarhaspti máteru ambe enga úkua jukapka: juchiti pámpiri ka jí, méntkuchi ménderueni járhatispka. Ji 19 jatiripiringuia ka ima 25 jatirisptia. Ji siudadirhu anapuespka ka ima ireta sapichurhu ma. Ji ióndakuarhu jauaranhchasïrenga ka ima xarhintku. Ka chúrikua, ji nótkini kʼuínchani jarhasïrenga ka ima uékasïrendia kʼuíni. Peruchi úspka terokutani jimbokachi úspka ambe enga Biblia arhijka ka tsitispkachi tsimarhani marhuani komu prekursorecha.

Ka ístuchi jatsiaspka máteru tsʼéjkukuechani. Úpiringachi uandani eskachi no sési kánhaspka, perujtsïni Jeoba no méni jurajkuspti (2 Kor. 4:7-9). Miásïnga ma xanhari engachi aianhpini japka ireta sapichurhu ma ka kʼuiripu jurajkuaaspti uíchuechani parajtsïni katsarhini, kánikuaksï kʼéraspti ka niraxaptijtsïnia katsarhini. Jupijperaspkachi ka ji arhispka Jeobani: “Jimboetakua, eskajtsïni uíchuecha sóntku uándikuaka”. Peru no jamberi ma metru iauani, uíchuechaksï anhaxurhispti, uénasptiksï chʼéti manatani ka kéndikusptiksï. Pʼikuarheraspkachi eskajtsïni Jeoba kuájchakuspka. Ísï tátsekua, eianhpispkachi iámu iretarhu ka sésichi pʼikuarheraspka jimboka kʼuiripu sési kurhaspka. A lo mejori jimbokajtsïni uíchuecha no ma ambe úchipka o jimbokachi tekaantapka ini ambe. Máru besinuechaksï niáraspti Testigu úkuarhini.

Ka ma jurhiani, úkuarhinchaspkachi máteru ambe. Dueniu kʼumanchikueri nani engachi irekani  japka, kauirini niántaspti uandaparini eskajtsïni uándikupiringa jimbokachi molestarpesïrenga. Témba jámaspti pʼínguni, peru no úspti. Jucha karhakua jarhaspka ka iámu ambechi kurhaaxapka kuarturhu uératini. Sóntkuchi tanhaparhakuspka siiecha jingoni ka jatsirakuarhintaspkachi ambe ma. Engachi mítapka puertani, exespkachi eska achati karharaaspkia eskalerechani kʼéri ma kuchiiu jupikatini. Tátsepanisïchi uéraspka ka kánikuachi xanharaspka jardinirhu juchari ambe jingoni, mítiparini eskachi no méni kʼuanhatsintapiringa.

Otelirhuchi ma niraspka ka kuartuchi ma kurhajkuarhispka. Sáno ma uéxurhinichi jima pakaraspka ka i ambejtsïni jarhuataspti aianhpikuarhu. Oteli sentrurhu jarhaspti ka máru jorhenguarhirichaksï jima uékasïrendi estudiarini. No ióni jimbo, uénaspkachi jatsini librueri jorhenguarhikuani ka jorhenguarhikuani La Atalaya jingoni juchari kuarturhu. Kinse ísïchi tánguarhisïrenga.

Jukari ma uéxurhinchi jarhaspka Mistelbach. Tátsekuajtsïni jíndeni Feldbach axaspti, suresterhu de Graz. Jimbanhi kompanierani ma jatsispka enga ístu prekursorepka, peru jimajtu no jarhaspti kúnguarhikua. Kuartu sapichurhuchi ma irekaspka enga segundu pisurhu japka kabanieri ma. Tarhiata trosuecharhisï inchasïrendi, jimbochisï periodiku inchanharhitapka. Ka ístuchi posurhu ma pʼitasïrenga itsï. Peru iámindu i ambe marhuaspti. Máru kutsï tátsekua, grupu ma úkuarhispti. Ka tátsekua, 30 kʼuiripu ísï familieri ma engachi jorhendaapka, jiókuarhisptiksï jurhimbikuani.

I amberini sánderu jukaparharataraspti na enga Jeoba no méni jurajkujka imani enga orhetku peerajka Reinuni. Nájkirukachi eratsiaka eskajtsïni no nema uáka jarhuatani, Jeoba méntkisï jima jarhasïndi (Sal. 121:1-3).

Kʼéri tánguarhikua internasionali ma japirindi 1958 jini Nueva York, Estadio de los Yankees jimbo ka el Polo Grounds. Uininharhitaspka solisitudi ma parani nirani ka Austria anapu sukursalirini kurhamarhispti sini uékapirini nirani Eskuela Galaadiri klase 32. ¿Néna úpirini no jiókuarhini indeni pribilegiuni? Sóntkuni arhiaspka: “¡Jo!”.

Klaserhu, Martin Poetzinger juchiti ma ladu uaxakasïrendi. Ima no sési ambe nitamakuarhispti nasicheri kampu de konsentrasionicharhu. Tátsekua, Grupurhu jarhasptia enga Orhejtsïkuajka iámindu kúnguarhikuechani. Klasechaksï inglesi jimboesïrendi ka komuchi tsimarhani  alemán uandenga, ménisïrini sïpatikuarku arhisïrendi: “Erika, ¿ambe arhikuekasïni inde ambe?”.

Engachi terujkani nirani japkia jorhenguarhini, erachi Nathan Knorr eianhpispti nanichi axanhapirini. Ji Paraguay axanhaspka. Ka komuni útasï sapichuepka, paperi sésikua uétarhinchasïrenga para úni inchani paisirhu. Íntskusptirini, ka marsuni de 1959 niáraspka Paraguay. Asunción irekapiringa misioneruecheri kʼumanchikuarhu ka jimbanhi kompaniera ma jingoni.

Ísï no ióni jimbo, mítispka Walter Brightini, misioneru ma Galaadiri klase 30. Tembuperaspkachi ka jima para orhepanchi márku uérakuaspka uandanhiatechani. Engachi no sési nitamakuarheni jarhenga, arhintasïrengachi Isaías 41:10 enga arhijka: “Asï ché, jimbokani ji tʼungini jingoni jarhaska. Asï uápurisï eraa, jimbokani ji chíti Tata Diosïska. Jíkini uinhaperantaaka”. Íjtsïni miátantasïrendi eska engachi jánguarhintapiringa no jurajkuni Jeobani ka orheta peerani Reinuni, imajtsïni no méni jurajkupiringa.

Ísï tátsekua, fronterarhu no iauanchi axanhaspka enga Brasilini píretini jaka. Jima, relijioniri orhejtsïkutichaksï arhiaspti tumbichani eskaksï tsakapu kʼuanirapiringa misioneruecheri kʼumanchikuani, enga no káni sési japka. Enga Walter uénapka jorhendani Bibliaeri ambe polisiecheri jefeni ma, i arhiaspti polisiechani eskaksï ma semana kuidaripiringa juchari kʼumanchikuani. Jiáni uératintsïni nóteru nema molestarisptia. Ísï tátsekua, sánderu sési jásï ma kʼumanchikuarhujtsïni axaspti enga fronterarhu parhikutini japka. I ambe kánikua marhuaspti, jimbokachi úsïrenguia jatsiani tánguarhikuechani Paraguay ka Brasil. Ante dechi jurajkuni imani asignasionini, tsimani kúnguarhikua sapirhatichaksï jarhasptia.

Doktorichajtsïni arhispti eskani no méni úpiringa sapi kaani, ísï jimbo, eranhaska je na engachi pʼikuarherapka engani 1962 mítipka eskani embarasada jarhaspka. Niraspkachi irekani Hollywood, Florida (Estados Unidos), jima no iauani enga Walteriri familia irekapka. Nóteruchi úspkia prekursoriini máru uéxurhini jimbokachi jatsipka para familiani atenderini. Peruchi seguirispka orheta peerani Reinuni (Mat. 6:33).

Engachi Florida niárapka nobiembrini 1962, exespkachi ambe ma engajtsïni ísku pakatapka. Jima anapuechaksï rasistespti jimboksïsï erachicha engaksï urapepka, nóksï májku kʼéri tánguarhiendi erachi negrituecha jingoni ka ístuksï táchani aianhpisïrendi. Peru Jeoba no nema jingoni kʼuetsapisïndi ka kúnguarhikuechaksï no ióndaspti jurajkuni indeni pʼindekuani. Luejku xarharaspti eska Jeobasï úpka eska i ambe mójtakurhipiringa, jimbokaksï iásï uánikua kúnguarhikuecha jarhaskia jimesïsï.

No sési ambe úkuarhispti 2015 enga Walter uarhipka kánseri jimbo enga éjpurhu exeminhantapka. Ima ambakiti achatini máespti ka sinkuentaisinku uéxurhinchi márku irekaspka, xénchasïrendi Jeobani ka uánikua erachichani jarhuataaspti. Uékaxakaia eska niáraaka ima jurhiatikua engani exentaaka ka nóteru pʼamenchakua jingonia (Uku. 24:15).

Agradesida jarhaska engani úka jukari kuarenta uéxurhini marhuani tiempu kompletueri ka xáni uáni kóntperatecha jimbo. Por ejemplu, Walter ka ji, úspkachi exeni na engaksï 136 juchari estudianticha itsï atakuarhipka. Ísïsti, ménisï úkua jukasïrendi, peruchi no méni eratsispka nóteru marhuakunia Jeobani, Tata Diosïni enga no jurajpejka. Sánderu sési, jiánchi sánderu andarherasïrenga ka mintsikanchi eska ima sési péntaapiringa juchari problemechani jiáni enga uétarhipiringa ka néna enga uétarhipiringa. Ka méntkisï ísï ústi (2 Tim. 4:16, 17).

Kánikua jirinhantasïnga Walterini, peru prekursoreni, jarhuatasïndirini no xáni no sési pʼikuarherani. Exeskia eskarini sési úchesïnga jorhentpini jurhimbikua ambe ka sánderia tsíntskueri ambe. Jo ísïsti, Jeobarini no méni jurajkusti. No jamberini úsïnga kuenta úni néna ka nénarini kuidariski. Ísï eska na aiatspika, jarhuatastirini ka uinhaperantani ka jupijtastirini imeri “jájki jurhijkandani jimbo, enga jurhimbikuerika” (Is. 41:10).