1. ¿Ambeksï nitamakuarhexapi primeru siglurhu anapu kristianuecha?

ENTRE uéxurhini 62 ka 64, apostuli Pedru karakuaspti imechani ‘engaksï iápuru estaduecharhisï etsakuarhitini japka, Pontu, ka Galasia, Kapadosia, Asia ka Bitinia ísï’ (1 Ped. 1:1). Ima erachichaksï mámaru járhati pʼindekuechani jatsiaspti. Ka uétarhinchasïrendiksï eskaksï uinhaperanhantapiringa ka arhinhanksï ambe úni, jimbokaksï kánikua no sési kánhaxapka. Ístu, jiánisï kánikua no sési jánhaskuarhexapti. Apostuli Pedru karaspti: “Nóteru ióniuati enga kʼamaraaka iámindu ambe”. Nóteru jamberi diesi uéxurhini nitamapirindia enga Jerusaleni kʼamajkunhapiringa. ¿Ambe jarhuataapirini jiánisï engaksï xáni úkua jukanchani japka? (1 Ped. 4:4, 7, 12).

2, 3. ¿Andisï Pedru uandapi eska uétarhisïrenga sési kámpini? (Exe je dibujuni enga uénakuarhu jaka).

² Konseju ma enga Pedru íntsaapka kristianuechani, ariispti: “Sési eroa je chári kʼumanchikuecharhu imechani engaksïni pʼorhembiaka” (1 Ped. 4:9). Pedru arhiaspti eskaksï sési kaapiringa ‘imechani engaksï pʼorhembiapiringa’, o sea imechani engaksï mítiapkia o engaksï jingoni kúnguarhienga. ¿Néna jarhuataapirini i ambe úni?

³ Jarhuataapirindi paraksï sánderu májku kʼéri jarhani. Ka májkuenisti  juchantsïni jingoni, por ejemplu, engajtsïni erachi ma pʼímarhipka imeo ¿no ísïski eskachi sési nitamakuarhispka? Ka engachi jucha pʼímarhipka erachini ma, ¿no ísïski eska ima ambe úspka eskachi sánderu sési pájperapiringa? Pʼímarpini, úsïndi eskachi sánderu sési mítpiaka. Pedrueri jurhiatikuechani, sánhani arhixapti no sési jánhaskuarheni, jimbosï sánderu uétarhiendi eskaksï kristianuecha májku kʼéri japiringa. Ka ini ‘últimu jurhiatikuechani’, uétarhisïndi eskachi májkueni uáka (2 Tim. 3:1).

4. ¿Náki kurhamarhikuechanchi mókuantaua ini artikulurhu?

⁴ ¿Na jatinchi uá sési kámpini? ¿Ambechi uá úni parajtsïni no ma ambe pʼínguni parachi sési kámpini? ¿Ambejtsïni jarhuataa xarhatani eskachi agradeserisïnga engajtsïni nema pʼímarhiaka?

5. ¿Nénachi uá sési kámpini tánguarhikuecharhu?

⁵ Tánguarhikuecharhu. Ima engajtsïni pʼímarhijka tánguarhikuecharhu, jindesti Jeoba ka imeri organisasioni. Ka juchachi uékasïnga eska iámindu engaksï niuaka, sésiksï pʼikuarheraaka (Rom. 15:7). Ka sánderia enga nema primeru uelta niuaka. Jeoba imantu pʼímarhisti jimbochisï jánguarhintaaka agustu pʼikuastani, néna uéjki jáxeni o xukuparhani (Sant. 2:1-4). Engachi exeska eska no ma erachi imani jingoni jarhaska, ¿úpirinchi pʼímarhini para juchantsïni jingoni uaxakani? Seguru eska agradeseriuaka engachi jarhuataska chúxapani programani ka textuechani jirinhantaani. Ini ambe úparini, arini ambechi úni jauaka: “Sési eroa je imechani engaksïni pʼorhembiaka” (Rom. 12:13).

6. ¿Néchanchi jatsiski para sánderu pʼímarhiani juchiniu?

⁶ Engachi pʼímarhijka nemani para tʼireni o arhani ambe ma. Bibliaeri tiempuechani, pʼindekua jarhaspti eska nema pʼímarhiapiringa tʼireni imecho máteru kʼuiripuechani para xarhatakuani eska uékasïrenga sési jarhani imecha jingoni ka imecheri amigueni (Gén. 18:1-8; Juec. 13:15; Luk. 24:28-30). Ka juchaia, ¿néchanchi jatsiski para sánderu pʼímarhiani? Juchari kúnguarhikuarhu anapu erachichani. Uétarhisïndi ambakiti amiguechani jatsiani ka sési pájperani iáminduecha jingoni, jimboka enga úkua jukani jauaka, juchajkuchisï uáka jarhuajperani. Uéxurhini 2011 jimbo, Grupu enga Orhejtsïkuajka iámindu kúnguarhikuechani, sánderu xarheni péntaspti Jorhenguarhikuani La Atalaya jingoni enga familia Beteli jatsijka Estados Unidos, de 6: 45 a 6:15, inchatirueri. ¿Andi? Anunsiu arhisïrendi eska jindespka paraksï sánderu betelitecha arhutani tiempu paraksï máteru betelitecha jingoni jarhani. Máteru sukursalichajtuksï májkueni úspti. I ambe jarhuajpisti paraksï betelitecha sánderu májku kʼéri jarhani.

7, 8. ¿Nénachi uá sési kaani erachichani engaksï jurhajka diskursarini juchari kúnguarhikuarhu?

⁷ Engaksï máteru kúnguarhikuarhu anapu erachicha jurhajka diskursarini o sirkuitueri orhejtsïkuti ka ménisï sukursaliri representanti ma, jatsisïngachi oportunidadi para sési kaani ini erachichani (arhinta je 3 Juanu 5-8). Por ejemplu pʼímarhiani tʼireni o arhani ambe ma. ¿Andichisï no ísï újki máteru jimbo?

⁸ Estados Unidos anapu pirenchi ma miásïndi: “Desde iónisïa, juchiti achati ka ji, pʼímarhiaskachi juchiniu erachichani engaksï diskursarini jurhenga ka imeri témbechani. Méntkisïchi sési nitamakuarheska, tsípikuarhiskachi ka sánderuchi andarheraska Jeobani. Nochi méni arrepentirikuarhiska engachi sési kaaka máteruechani”.

9, 10. a) ¿Néksï úpirini ióni uétarhinchani ospedaje? b) ¿Uáksï ospedarpeni imecha engaksï kʼumanchikua sapichu ma jatsika o arisku jásï ma? Jatsiku je ejemplu ma.

⁹ Enga nema sáni ióni pakaraaka. Bibliaeri tiempuechani, uánikuaksï imeri kʼumanchikuarhu pakataasïrendi imechani engaksï pʼorhembiauenga (Job 31:32; Filem. 22). Iásïjtu uétarhisïndi eskachi ísï uáka. Por ejemplu, kasi méntkisï, sirkuitueri orhejtsïkuti uétarhinchasïndi ospedaje enga pʼorhembiaka kúnguarhikuani ma. Ístuksï imecha engaksï nirajka  eskuelecharhu para sánderu jorhenguarhini Bibliaeri ambe ka erachicha engaksï konstruksionirhu jarhuajpijka. Ka enga desastre naturali ambe úkuarhejka, máru familiechaksï uétarhinchasïndi ospedaje astaka imecheri kʼumanchikua únhantaaka. Nochi jatsiska para eratsini eskaksï imajkusï uáka ospedarpeni engaksï kʼéri ma kʼumanchikua jatsika ka sési jásï. Jamberiksï uánikua uelta ísï útia. ¿Uáchi ospedarpeni juchari kʼumanchikuarhu nájkiruka arisku jáxeka o sapichueni?

¹⁰ Corea del Sur anapu erachi ma, tsípikua jingoni miásïndi enga imeo ospedariuauenga imechani engaksï nirenga eskuelecharhu para sánderu jorhenguarhini Bibliaeri ambe. Karasïndi: “Uénani jámani chésïrenga, jimbokachi apenasi tembuchaspka ka kʼumanchikua sapichurhuchi ma irekaspka. Peru kʼéri ma tsípikuarhitespti juchiniu jatsiani. Úspkachi exeni na engaksï xáni felisiika temungurhiricha engaksï tsimarhani marhuakujka Jeobani ka jánguarhintanksï sánderu ambe úni paraksï marhuakuni”.

11. ¿Andichisï jatsi para sési káani erachichani engaksï juchari kúnguarhikuarhu mótsijka?

¹¹ Engaksï erachicha juchari kúnguarhikuarhu mótsijka. Jamberiksï mótsiti para ixuisï irekani, para jarhuajpini eianhpikuarhu o jamberiksï prekursoriiti ka juchari kúnguarhikuarhuksï axanhani. Uénani jámanksï iáminduecha úkua jukanchasïndi, jimbokaksï jatsiska para pʼindeni máteru iretarhu irekani, máteru kúnguarhikuarhu jarhani ka a lo mejori máteru idioma jorhenguarhini o pʼindekua. Pʼímarhiani tʼireni, arhani ambe ma o eskajtsïni pámbitaaka nirani nani, jarhuatauati paraksï jatsiani amiguechani ka paraksï sánhani arhini pʼindeni.

12. ¿Náki experiensia xarhatasïni eska para pʼímarpini no uétarhisïnga uánikua ambe prepararini?

¹² Parachi pʼímarpini, no uétarhisïndi uánikua ambe prepararini (arhinta je Lukasʌ 10:41, 42). Erachi ma miásïndi eska ima ka imeri témba, sapirhaspkaksï engaksï uénapka marhuani komu misioneruecha ka eskaksï kánikua kómu pʼikuarherasïrenga. Uandantasïndi: “Xatini ma, juchiti uarhiiti kánikua kómu pʼikuarheraxapti ka ji no úsïrenga jarhuatani, peru komu a las 7:30 ísï, nema uámutaspti. Nanaka máespti enga Bibliani estudiarini japka, tanimu naraxejtsïni juáchiaspti parajtsïni sési janokua ma íntskuni. Pʼímarhispkachi para inchani ka ma basu itsïchi íntskuspka. Tátsekuachi té ma úspka ka chokolati. Jucha nótkini uandasïrenga suajili ka ima no uandasïrendi juchari idioma. Peru jima para orhepatini, úndaspkachi amigu úkuarhini paisirhu anapu erachicha jingoni ka sánderuchi felisi pʼikuarheraspka”.

13. ¿Andisï sésii eskachi sési kámpiaka?

¹³ ¿Úkua jukanchasïnchi sési kámpini? Enga ísïika, jamberichi uánikua ambe tsïtakuarhikia, komu sési nitamakuarhini máteruecha jingoni ka ambakiti amiguechani jatsiani. Sési kámpini, ambe máesti engajtsïni jarhuatajka no jandiajku pʼikuarherani. Peru ¿ambejtsïni úpirini pʼínguni parachi no niárani sési kaani máteruechani? Ju je exeni máru ambe.

14. ¿Ambechi uá úni engachi no tiempu jatsijka ka kuataratinchi jarhani para pʼímarpini o jiókuarhini pʼímarperakua ma?

¹⁴ Tiempu ka engachi kuataratini jarhajka. Jeobaeri marhuarichachi kánikua okupadu jarhasïnga ka uánikua responsabilidadichanchi jatsiaska. Jimboksïsï máru ísï pʼikuarherajti enajkiksï no tiempu jatsi ka enajkiksï kánikua kuataratini jaki para pʼímarpini. Engachi ísï pʼikuarherajka, jamberichi jatsika para mójtakuni máru ambe. ¿Uáchi mójtakuni ambe ma parachi tiempu jatsini ka pʼímarhiani erachichani ochi jiókuarhini pʼímarperakua ma? Biblia arhisïndi eskachi jatsiska para sési kámpini (Ebr. 13:2). Arhutani tiempu para erachicha jingoni jarhani, no no sési jarhasti, inde ambechisï jatsika para úni. Ísïsti, jamberi uétarhiati no xáni tiempu  úrani para máteru ambe úni enga no xáni jukaparhakueka.

15. ¿Andichisï úpirini eratsini eskachi no uáka pʼímarpini?

¹⁵ Na engachi exekuarhijka. ¿Ménisïchi uékaski pʼímarpini peruchi ísï pʼikuarheraski enajkichi no úpirini? Jamberichi no káni uandontskuarhijka ka ísïchi pʼikuarherani enajkiksï inbitaduecha sóntku kuatantaa. O jamberichi no xáni tumina jatsika ka eratsinchi eskachi no méni uáka májkueni ambe íntsaani eska máteru erachicha kúnguarhikuarhu anapu. Peruchi jatsiska para miáni eska juchari kʼumanchikua no jatsiska para xáni sési jáxeni, sino eska limpiu jauaka ka eskachi sési pʼikuastauaka inbitaduechani.

16, 17. ¿Ambejtsïni jarhuataa engachi chéjka inbitaduechani jatsiani?

¹⁶ Engachi chéjka inbitaduechani jatsiani, nochi juchajkueska. Gran Bretaña anapu orhejtsïkuti ma uandasïndi: “Uákachi sánisï chéni pʼikuarherani engachi prepararikuarhini jauaka para inbitaduechani eroani. Peru ísï eska na úkuarhijka engachi Jeobani marhuakuni jarhajka, sánderuchi tsípini pʼikuarherasïnga ka sánderuesïndiksï kóntperatecha eska uandanhiata. Uánikua uelta uaxakaspka erachicha jingoni uandontskuarhini ka kafe arhani ka inde amberini kánikua sési pʼikuastasïrendi”. Ju je miáni eska méntkisï uétarhisïnga pendienti jarhani inbitaduecha jingoni (Filip. 2:4). Ka ma ambe engachi uáka úni, jindesti kurhajchaani engachi májku kʼéri jauaka, jimbokaksï sáno iáminduecha tsitisïnga imecheri ambe uandani. Máteru orhejtsïkuti karasïndi: “Juchiniu pʼímarhiani kúnguarhikuarhu anapu erachichani, jarhuatasïndirini sánderu kurhangukuani ka sánderu sési mítini imecheri ambe, komu nénaksï niáraski mítini jurhimbikuani”. Engachi pendienti jarhaska inbitaduecha jingoni, uákachi seguru jarhani eskachi iáminduecha sési nitamakuarhiaka.

¹⁷ Prekursora ma enga ospedariuauenga imechani engaksï nirenga eskuelecharhu para sánderu jorhenguarhini Bibliaeri ambe, uandasïndi: “Uénani jámani uandanhiaxapka jimbokani arisku jásï ma kʼumanchikua jatsiska ka mueblichani engaksï úrakateka. Perurini instruktoriri témba ma kánikua sési pʼikuastantaspti. Arhisptirini eska engaksï kúnguarhikuechani pʼorhembiani jarhajka, jiánksï sánderu sési pʼikuarherasïnga engaksï kʼuiripu espirituali ma jingoni jarhajka nájkiruka no uánikua ambe jatsikuarhiaka, peru enga ístu jánguarhintani jaka marhuakuni Jeobani ka arisku sáni irekani. I amberini miátantaspti ambe engajtsïni nándi arhipka engachi sapirhapka: ‘Sánderu sésisti berdura arhani nani enga xénchperakua jarhajka’” (Prov. 15:17). Nochi jatsiska para uandanhiani jarhani, jimboka ambe enga sánderu jukaparhakueka, jindeska uékperakua xarhatakuani juchari inbitaduechani.

18, 19. ¿Nénajtsïni jarhuatasïni sési kámpini parachi sési pájperani máteruecha jingoni?

¹⁸ Na engachi exeajka máteruechani. ¿Jarhaski nema kúnguarhikuarhu engarini no sáni kaerichejka? Jamberichi no uéjka juchiniu pʼímarhini erachini ma engajtsïni no sési pʼikuastajka o engajtsïni ióntki ambe ma úchika engachi no újka mirikurhini. Peru engachi no ma ambe úska, seguiriuakachi májkueni pʼikuarherani imani jingoni.

¹⁹ Bibliajtsïni arhisïndi eska sési kámpini, uákajtsïni jarhuatani sési pájperani máteruecha jingoni, asta juchari enemiguecha jingoni (arhinta je Proverbios 25:21, 22). Pʼímarhini nemani, jarhuataatijtsïni parachi sánhani arhini sési pájperani ka mirikurhini arhirperata ambe. Ístu, uákachi sánhani arhini imani kualidadichani exekuani enga Jeoba exekuaka para imeri kúnguarhikuarhu andaparhaterani (Juanu 6:44). Enga uékperakuejka enga újka eskachi pʼímarhiaka erachini ma enga no erokuarhienga, uákachi sánhani arhini sési pájperani imani jingoni. ¿Nénachi uá asegurarikuarhini eskachi uékperakua jimbosï ísï úni jaka? Ma ambe  engachi uáka úni, jindesti ambe enga Filipusʌ 2:3 arhijka, eskachi jatsiska para kaxumbitiini ka ísï exeani máteruechani eskaksï sánderu kʼéri ambeska eska jucha. Ka ísïsti, iámindu erachichaksï sánderu kʼéri ambesti eska jucha ambe ma jimbo, ia sea jakajkukua jimbo, tekaantskua, balori o máteru kualidadi jimbo. Engachi exeska ambe jimbo sánderu kʼéri ambeski eska jucha, sánderuchi uékaaka ka sánderu fásiliuati sési kámani.

20. ¿Ambechi jatsiski para úni engachi jiókuarhiska pʼímarperakua ma, ka andi?

²⁰ Dabidi kurhamarhispti Jeobani náki kualidadichani jatsiski para xarhataani ima enga Jeobaeri inbitadueka (Sal. 15:1). Ma jindesti kumplirini ambe enga uandaka nájkiruka no konbenirikuaka (Sal. 15:4). Ísï jimbo, engachi jiókuarhiska pʼímarperakua ma, nochi jatsiska para ísku jatini kanselarini. Engachi karselariska, para no ma ambe marhuauati ambe enga xáni úkia ima engajtsïni pʼímarhika (Mat. 5:37). Máruksï jiókuarhisïndi pʼímarperakua ma, peruksï tátsekua kanselarisïndi paraksï jiókuarhini máteru engaksï seguni ima, sánderu sési jaka. ¿No ísïski eska i ambe no sáni uékperakua xarhatasïnga ni respetu? Ambe engachi jatsika para úni, jindesti jiókuarhini erachicheri pʼímarperakua ka agradeserini ambe engajtsïni aiachiaka (Luk. 10:7). Ka engachi ambe ma jimbo meru no uákia nirani, seguiriuakachi aianguni imani engajtsïni pʼímarhika, ísïchi xarhatani jauaka uékperakua ka respetu.

21. ¿Náki pʼindekuechanksï respetariuasïni imecha engaksï agradeserijka engaksï inbitarinhaka?

²¹ Ístu, jatsiskachi para respetariuani iretarhu anapu pʼindekuechani. Máru iretecharhu, no no sési jarhasti ísku jatini niárani máteru nemaeri kʼumanchikuarhu, peru nani sánderu sésisti uandantani orheta. Máru lugaricharhu, ima engaksï pʼímarpijka, inbitaduechanksï íntsaasïndi sánderu ambakiti tʼirekua, peru nani pareju jatsiranhasïndi para inbitaduecha ka para familia. Ka nani, inbitaduechaksï jatsisïndi para páni ambe ma para tʼirekua, peru nani nómbe. Jarhastiksï máru lugaricha nani engaksï inbitaduecha jatsika para ma o tsimani xanharisï no jiókuarhini pʼímarperakuani ante de uandani eska jo, peru i ambe no sési exenhasïndi nani. Peru náki uéjki ma pʼindekua jarhani, ju je úni ambe enga uétarhiaka parachi sési pʼikuastaani imecha engajtsïni pʼímarhika.

22. ¿Andisï xáni jukaparhakue eskachi sési kámpiaka?

²² Pedru uandaspti: “Nóteru ióniuati enga kʼamaraaka iámindu ambe” (1 Ped. 4:7). Ka iásï sánderu axuterku jarhastia i jurhiatikua. No ióni jimbo, úkuarhiati ambe ma enga no méni úkuarhika, grani tribulasioni. Eska na sánhani arhiaka no sési jánhaskuarheni, sánderu uétarhiati eskachi uékperaaka. Kánikua jukaparhakuesti eskachi uáka ambe enga Pedru uandapka: “Sési eroa je chári kʼumanchikuecharhu imechani engaksïni pʼorhembiaka” (1 Ped. 4:9). Ísïsti, kánikuajtsïni sési pʼikuastasïndi sési kámpini ka ambe máesti enga méntkisï uétarhiaka eskachi uáka.