1. ¿Nénachi uá mímixetiini ka nénajtsïni jarhuatasïni mímixekua?

MÍMIXEKUA Jeobaeristi ka imajtsïni tsípikua jingoni íntskusïndi. Santiagu 1:5 arhisïndi: “Enga nema kueratajka jánhaskani ambe, kómarhie Diosïni eska jánhastaaka ka ima ísï uáti, jimboka ima tsípekua jingoni jánhastaasïnga iáminduechani ka no nemani ikiakuni”. Ma ambe engajtsïni jarhuataaka mímixetiini, jindesti jurajkuni eskajtsïni Jeoba jurhimberantaaka. Mímixekuajtsïni jarhuataati no no sési ambe úni ka sánderu sési jásï ma pájperakua jatsini Jeoba jingoni (Prov. 2:10-12). Ka ístu jatsini erokuarhikua para irekani para méntkisï (Jud. 21).

2. ¿Ambejtsïni jarhuataa parachi jukaparharani Jeobaeri jurhimberantskuani?

² Jamberichi úkua jukanchajka jurajkuni eskachi jurhimberanhantaaka o ísï exeni komu ambe ma engajtsïni marhuachijka, jimbokachi no perfektueska, jimbokachi mámaru tʼarhexeranhaska o máteru ambe jimbo. Peru engachi exejka na engajtsïni xáni jarhuatajka juchari irekuarhu, sánderuchi jukaparharasïnga ka exesïngachi eskajtsïni Jeoba uékperakua xarhatacheni jarhasïnga. Proverbios 3:11, 12 arhisïndijtsïni: “Juchiti sapi, jurajku eskakini Jeoba jurhimberantaaka”. Ka ístu uandasïndi: “Jimboka Jeoba imechanisï jurhimberantaajka  enga xénchaajka”. Nochi méni mirikurhiaka eska Jeoba méntkisï uékasïnga eskachi sési jauaka (arhinta je Ebreu 12:5-11). Ka komujtsïni Jeoba sési mítika, imajtsïni jiáni jurhimberantasïndi engachi uétarhinchajka ka seguni eskachi na uétarhinchajka. Ini artikulurhuchi tʼámu ambe exeaka jurhimberantskueri: 1) jurhimberakuarhintani ka pʼíngukuarhini, 2) na engaksï jurhimberpintajka táticha, 3) jurhimberantskua kúnguarhikuarhu ka 4) ambe ma enga sánderu no sési pʼikuastpijka eska jurhimberantskua.

3. ¿Nénaksï uá táticha jarhuataani sapiichani paraksï úni jurhimberakuarhintani ka pʼíngukuarhini? Jatsiku je ejemplu ma.

³ Kʼuiripu ma enga jurhimberakuarhintajka ka pʼíngukuarhini, jorhenasïndi néna jámani ka eratsini. Peru uétarhisïndi jorhenguarhini ísï úni jimbokachi no ísï andajpenusïnga. Por ejemplu, enga sapi ma uénani jarhajka jorhenguarhini bisikleta jatani, tátemba o amamba, jupikakusïndi bisikletani para sapi no uekorhini. Peru enga sapi jorhenguarhini jarhajkia pʼíngukuarhini, tátemba sánhani arhisïndi jurajkuni. Ka enga seguru jarhajkia eska nóteru uekorhiakia, jurajkusïndi para nitsïkuarheni. Ka májkuenisti táticha jingoni, engaksï tekantskua jingoni jorhendaajka sapiichani “arhistakuaparini [o jurhimberantaaparini] juchari Tatani jimbo”, jarhuataanksï jarhasïndi paraksï mímixetiini ka paraksï úni jurhimberakuarhintani ka pʼíngukuarhini (Efes. 6:4).

4, 5. a) ¿Andisï uétarhijki jurhimberakuarhintani ka pʼíngukuarhini para jimbanhi kʼuiripu máeni? b) ¿Andichisï no jatsi para desanimarikuarhini engachi no sési újka ambe ma?

⁴ Májkueni úkuarhisïndi imecha jingoni engaksï kʼériitini mítijkia Jeobani. Nájkirukaksï újka sánisï jurhimberakuarhintani ka pʼíngukuarhini, nóksï kristianu jánhaskatichesïndi. Peru engaksï uénajkia jimbanhi kʼuiripu máeni ka jánguarhintanksï ísï eratsini eska Kristu, sánhani arhisïndiksï sánderu jánhaskatiini (Efes. 4:23, 24, Táta Diósïri Uandakua Tata Jesukristueri Aiatsperakua). Ka ambe ma enga jarhuatajka paraksï ísï úni, jindesti jurhimberakuarhintani ka pʼíngukuarhini, jimbokajtsïni i ambe jarhuatasïnga “jurajku[ni] pekaduni, ka indeni jásï ambe enga parhakpini anapuecha tsitijka, ka irekanchi iásï ini tiempu jimbo eska na jindeka para sési eratsini ka jurhimbitku jámani ka Diosïni janhanharhini” (Titu 2:12).

⁵ Peru no nema perfektuesti (Ecl. 7:20). Ísï jimbo, engachi ambe ma no sési újka, no arhikuekasïndi eskachi no úsïnga jurhimberakuarhintani ka pʼíngukuarhini. Proverbios 24:16 arhisïndi: “Ima enga jurhimbitiika, uáti asta sieti uelta kuarhatseni ka ménderu jauaraati”. ¿Ambe jarhuatasïni ísï úni? No imeri uinhapikuesïndi, sino Jeobaeri espiritu (arhinta je 2 Korintu 4:7). Ka ma ambe enga espiritu santu újka, jindesti jarhuatantsïni pʼíngukuarhini, enga sáno májkuenika eska jurhimberakuarhintani.

6. ¿Nénachi uá sánderu sési estudiarini Bibliani? (Exea je fotuechani engaksï uénakuarhu jaka).

⁶ Parachi jorhenguarhini jurhimberakuarhintani ka pʼíngukuarhini, ístuchi jatsiska para kómarhini, Bibliani estudiarini ka eratsintani. Peru, ¿ambejtsï uá úni engajtsï úkua jukanchajka Bibliani estudiarini ojtsï no tsitini? Asï desanimarikuarhi je. Engajtsï uékaaka, Jeobaksïni uáti jarhuatani parajtsï tsitini estudiarini Bibliani (1 Ped. 2:2, TNM). Orheta, kurhaku je Jeobani eskaksïni jarhuataaka parajtsï jorhenguarhini pʼíngukuarhini ka jurhimberakuarhintani ka ísï úparini, úntsï estudiarini Bibliani. Tátsekua, ísï ú je eskajtsï na kurhakukia. Uákajtsï sánhanitu uénani estudiarini. Sánhani arhiakajtsï nóteru xáni úkua jukanchania ka tsitintsï estudiarini. Ístu, sésijtsï pʼikuarheraaka eratsintani Jeobaeri ambe, enga xáni ambakiti ambeka (1 Tim. 4:15).

7. ¿Nénajtsïni jarhuatasïni jurhimberakuarhintani ka pʼíngukuarhini parachi sánderu marhuakuni Jeobani?

⁷ Jurhimberakuarhintani ka pʼíngukuarhini, ístujtsïni jarhuatasïndi sánderu marhuakuni  Jeobani. Ju je exeni ambe enga úkuarhinchapka familiaeri orhejtsïkuti ma enga exepka eska nóteru xáni tsitisïrenguia aianhpini. I ambe uandanhiataxapti, jimbosï eratsipti prekursori regulari úkuarhini. Para ísï úni, uénaspti arhiantani artikuluechani engaksï inderi ambe uandenga ka kómarhispti Jeobani. I ambe uinhaperantaspti ka úspti eska sánderu andarherapiringa Jeobani. Ístu, méntkisï enga úpka, prekursori auxiliari úkuarhispti. Jánguarhintaspti para no ma ambe ójkutani ka úspti ambe enga eratsitini japkia. Ka no ióni jimbo, niáraspti prekursori regulariini.

8-10. a) ¿Ambe jarhuataua tátichani paraksï ísï tʼarhexeraani sapiichani eska Jeoba na uandajka? b) ¿Ambeksï uá jorhenguarhini táticha Noeri ejemplueri?

⁸ Táticha engaksï kristianueka, jatsistiksï para kʼuiriperaani sapiichani “arhistakuaparini [o jurhimberantaaparini] juchari Tatani jimbo” (Efes. 6:4). I ambe úkua jukasti ka sánderia ini parhakpinirhu (2 Tim. 3:1-5). Sapiichaksï konsiensia jingoni andajpenusïndi, peru i no jorhendakata jarhasïndi, jimboksïsï táticha jatsiti para jorhendaani sapiichani néna úrani paraksï kʼériitini ambakiti kʼuiripueni (Rom. 2:14, 15).

⁹ Sapiichaksï kuájchakukata pʼikuarherasïndi engaksï táticha uékperakua jingoni jurhimberantaajka. Jorhenguarhisïndiksï eskaksï no méntkisï uáka úni ambe engaksï uéjka ka eska ambe engaksï erakujka úni, uáka eskaksï sési ambe úkuarhinchaaka o no sési ambe. Jimbosï jukaparhakueti eskaksï táticha jirinhaaka Jeobaeri jarhuajperata para tʼarhexeraani. Uétarhisïndi miáni eska tiempu jingoni, mójtakurhisïnga na engaksï tʼarhexeranhajka sapiicha ka eska mándani iretarhu, kʼuiripu mámaru tʼarhexeraasïnga. Peru engaksï táticha kurhajchajka Jeobani, nóksï jatsisïndi para kurhamarhikuarhini jarhani nénaksï tʼarhexeraua sapiichani ka níjtuksï mintsikani ambe enga i parhakpini jorhentpijka.

¹⁰ Ju je exeni Noeri ejemplu. Enga Jeoba arhipka eska arka ma úpiringa, Noe no jánhaskasïrendi néna úni jimboka no méni úspka ma, jimbosï jatsipti para Jeobani mintsikani ka ‘ísïmindu úni’, o sea, úni iámu ambe eska Jeoba na arhipka (Gén. 6:22). ¿Ambe niáraspi úkuarhini? Arka jimbo, Noe ka imeri familiaksï salbarikuarhispti. Ka mintsikani Jeobani, jarhuataspti Noeni para ambakiti táti máeni. Sési jorhendaaspti imeri uájpechani ka ambakiti ejemplu ma íntsaspti, i ambe no fásilispti imani tiempu jimbo ante de Dilubiu (Gén. 6:5).

11. ¿Andiksïsï táticha jatsi para jánguarhintani jorhendaani uájpechani?

¹¹ Engajtsï tátika, ¿nénajtsï uá ‘ísïmindu úni’? Kurhajcha je Jeobani. Jurajku je eskaksïni jarhuataaka tʼarhexeraani sapiichani úrapariani Bibliaeri ka kúnguarhikueri konsejuechani. Jamberi tiempu jingoni, chári sapiichaksïni agradesericheati. Erachi ma uandasïndi: “Kánikua agradeserisïnga na engajtsïni tʼarhexeraka juchiti táticha. Jánguarhintasptijtsïni mintsitarhu niárachini”. Ístu, erachi uandaspti eskaksï  tátembechasï jarhuatapka Jeobani andarherani. Peru ménisï, nájkirukaksï táticha jánguarhintajka jorhendaani uájpechani, máruksï niárasïndi jurajkuni Jeobani. Peru ima táticha engaksï meru jánguarhintaka mintsitarhu niárakuani uájpechani, uátiksï trankilu jarhani ka erokuarhinksï eska ma jurhiani uájpa andarhentaaka Jeobani.

12, 13. a) ¿Nénaksï xarhatasïni táticha eskaksï kurhajchasïnga Jeobani enga uájpa ma expulsarinhajka? b) ¿Ambe úkuarhispi familiarhu ma engaksï táticha kurhajchapka Jeobani?

¹² Ma ambe enga újka eskaksï táticha kánikua úkua jukanchaaka kurhajchani Jeobani, jindesti enga uájpa ma expulsarinhajka. Ju je exeni ambe enga úkuarhinchapka pirenchi ma enga imeri uájpa nanaka expulsarinhapka ka enga kéndikupka kʼumanchikuarhu. Pirenchi uandasïndi: “Jirinhantasïrenga ambe ma publikasionicharhu engani úpiringa arhiparhatani parani úni juchiti sapi jingoni jarhani ka imeri nanaka sapichu jingoni”. Pirenchiri uámba uékperakua jingoni jarhuataspti exeni eskaksï nóteru responsablespkia uájperi ka eskaksï jatsispka para Jeobani kurhajchani.

¹³ Máru uéxurhini tátsekua, imecheri uájpa sési niántaspti. Amamba uandasïndi: “Iásïrini pauani pauani uandajpasïndia orini mensaji axachiani. Ka kánikuajtsïni respetarisïndi, jimboka mítiska eskachi kurhajchaska Jeobani. Sésichi pájperasïnga”. Enga chári sapi ma expulsadu jaka, ¿mintsikaajtsï Jeobani iámu chári mintsita jingoni ojtsï cha mintsikakuarhea? (Prov. 3:5, 6). Miá je eskajtsïni Jeoba jurhimberantasïnga jimboka mímixetiska ka jimbokajtsïni xénchasïnga. Asï mirikurhi je eska Jeoba íntspiska Jesusini parachi iáminduecha salbarikuarhini, asta chári uájpa, ka eska no uékasïnga eska nema tsïnchiaka (arhinta je 2 Pedru 3:9). Ísï jimbo, táticha, seguiri je mintsikani Jeobaeri jurhimberantskuani ka ambe enga ima uandajka, asta jiáni enga úkua jukaaka kurhajchani. Jurajku eska Jeoba jurhimberantaaka chári sapini, asï kuájpi je.

14. ¿Nénajtsïni jarhuatasïni ambe engajtsïni Jeoba jorhendajka “jántspiri” jimbo enga mintsinharhikueka?

¹⁴ Jeoba aiatspesti eska kuidariuauaka imeri marhuarichani, eska kuájchakuauaka ka jorhendaani, ka mámaru ambe jimbo ísï úsïndi. Por ejemplu, imeri Uájpani erakusti para kuidarini kúnguarhikuani. Ka Jesusi jántspirini ma erakusti enga mintsinharhikueka para jorhendaani imeri marhuarichani jiáni engaksï uétarhinchajka (Luk. 12:42). I “jántspiri”, mámaru ambe úrasïndi parajtsïni jorhendani ka jurhimberantani. ¿Kurhaaskijtsï diskursu ma ojtsï artikulu ma arhintani rebistarhu ma engaksïni jarhuataka parajtsï mójtakuni chári eratsikuani o jánguani? Enga ísïika, uákajtsï sési pʼikuarherani jimboka inde ambe arhikuekasïnga eskajtsï jiókuarhixaka eskaksïni Jeoba jurhimberantaaka (Prov. 2:1-5).

15, 16. a) ¿Ambechi uá úni parajtsïni orhejtsïkuticheri ánchikuarhita marhuachini? b) ¿Ambechi uá úni paraksï orhejtsïkuticha tsípikua jingoni úni imecheri ánchikuarhita?

¹⁵ Ístu, Kristu erakuasti orhejtsïkutichani paraksï kuidarini kúnguarhikuani. Biblia arhisïndi eskaksï “intsïmperakua” máeska para jucha (Efes. 4:8, TNM, 11-13). ¿Ambechi uá úni parajtsïni imecheri ánchikuarhita marhuachini? Xásï ma jakajkukua jatsini eskaksï ima ka chúngumani imecheri ambakiti ejemplu ka kurhajchaani engajtsïni konseju íntskuaka Biblia jingoni (arhinta je Ebreu 13:7, 17). Nochi mirikurhiaka eskajtsïni orhejtsïkuticha xénchasïnga ka eskaksï uékasïnga eskachi ambakiti pájperakua ma jatsiaka Jeoba jingoni. Por ejemplu, engaksï exejka eskachi kueratasïnga tánguarhikuecharhu o eskachi nóteru xáni tsípini pʼikuarherasïnguia, jánguarhintaatijtsïni sóntku jarhuatani. Jingontkujtsïni kurhajchaati, uinhaperantaatijtsïni ka ambakiti konsejuechantsïni íntsauati engaksï Bibliarhu pʼitakateuaka. ¿Cha ísï exeasïni orhejtsïkutichani komueska ambe ma enga Jeoba úrajka paraksïni uékperakua xarhatacheni?

 ¹⁶ Jarhasïndi ménisï engajtsïni orhejtsïkuticha nona íntskuni jarhajka konseju. Por ejemplu, ju je eratsintani na xáni úkua jukanchapi Natani para Dabidi jingoni uandontskuarhini enga ima uékapka pekadu ma jískani (2 Sam. 12:1-14). Ístu, apostuli Pablu jatsispti para balori úkuarhintani jiáni enga xukapka apostuli Pedruni jimboka sánderu sési kaasïrenga kristianuechani engaksï judiuepka (Gal. 2:11-14). Jiájkani, ¿ambejtsï uá úni paraksï orhejtsïkuticha no úkua jukanchani úni imecheri ánchikuarhita? Kaxumbiti je, jingontku kurhajchaa je ka agradeserikua je. Ístu, ísï exe je imecheri jarhuajperatani komueska Jeobaeri uékperakua. Ísï úparini, sésiksïni nicheati ka orhejtsïkutichaksï tsípikua jingoni uáti imecheri ánchikuarhita.

17. ¿Nénaksï jarhuataspi orhejtsïkuticha pirenchini ma?

¹⁷ Pirenchi ma uandasïndi eska úkua jukanchasïrenga xénchani Jeobani imani ambe jimbo enga ióntki úkuarhinchapka, ka deprimida jarhaspti. Ima uandasïndi: “Mítispka eskani jatsispka para uandontskuarhini orhejtsïkuticha jingoni. Imajtsïni no xukaspti nijtsïni jusgaripi. Sánderu sési, uinhaperantasptijtsïni. Ka enga kʼamarenguia tánguarhikua, ma ísïrini kurhamarhisïrendi néna jarhaspi nájkirukaksï okupadu jarhenga. Imani ambe jimbo engani ióntki úkuarhinchapka, no úsïrenga jakajkuni eskarini Jeoba xénchasïrenga. Peru Jeoba uánikua uelta kúnguarhikuani úrastia ka orhejtsïkutichani pararini xarhatacheni eskarini xénchasïnga. Kurhakusïnga Jeobani eskarini jarhuataaka parani no méni jurajkuni”.

18, 19. ¿Ambe sánderu no sési pʼikuastpesïni eska jurhimberantskua? Jatsiku je ejemplu ma.

¹⁸ Ísïsti eskachi uáka no sési pʼikuarherani engachi jurhimberanhantaska, peru no jiókuarhini, uátijtsïni sánderu no sési pʼikuastani (Ebr. 12:11). Ju je exeani tsimani ejemplu: Kainiri ka rei Sedekiasiri. Enga Jeoba exepka eska Kaini kurhunhisïrenga imeri ermanuni ka eska uékasïrenga uándikuani, arhispti: “¿Andirisï xáni ikiani jaki ka no sési pʼikuarherani? Engari ambakiti ambe úska ¿nori kʼéri ambe exenhaa? Peru engari no niáraska sési ambe úni, pekadu listu jarhasti ka uékasïndikini no sési ambe úrani, ka ¿uári pʼínguni?” (Gén. 4:6, 7). Peru Kaini no kurhajchaspti Jeobani. Uándikuspti imeri ermanuni ka ini ambe jimbo, kánikua no sési úkuarhinchaspti (Gén. 4:11, 12). Enga Kaini kurhajchapiringa Jeobani, no no sési ambe úkuarhinchapirindi.

¹⁹ Sedekiasi rei máespti enga no sési úripka ka enga no sáni tsʼiuepka. Jiánisï juramuspti enga Jerusaleni kánikua no sési jánhaskuarhepka. Profeta Jeremiasi uánikua xanhari arhispti eska nóteru no sési ambe úpiringuia, peru Sedekiasi no jurajkuspti eska Jeoba jurhimberantapiringa ka no sési ambe úkuarhinchaspti (Jer. 52:8-11). Eskachi na exejka, Jeoba no uékasïndi eskachi ísku jatini sufririuaka (arhinta je Isaías 48:17, 18).

20. ¿Ambeksï úkuarhinchaa ima engaksï no jiókuarhijka eska Jeoba jurhimberantauaka, ka imechia engaksï jiókuarhijka?

²⁰ Iásï, uánikuaksï no uékasïndi eska Jeoba jurhimberantauaka. Peru no ióndani, i kʼuiripu kánikua no sési ambe úkuarhinchaati (Prov. 1:24-31). Ísï jimbo, ju je jurajkuni eskachi jurhimberanhantaaka ka mímixeti úkuarhini. Proverbios 4:13 arhisïndi ambe engachi jatsika para úni jurhimberantskua jingoni: “Asï jurajku. Sési patsa, jimboka chíti tsípikueska”.