1, 2. a) ¿Ambeksï eratsisïni uánikua táticha engaksï uájpecha arhiajka eskaksï uékasïnguia itsï atakuarhini? b) ¿Andiksïsï kurhamarhiajki imechani engaksï itsï atakuarhiaka sinksï aiakukuarheskia Jeobani? (Exe je fotuni enga uénakuarhu jaka).

MARIA jauarasïndi imecha jingoni engaksï itsï atakuarhiaka, imeri tátichaksï exexati enga ima uinhachaparini mókuantani jaka tsimani kurhamarhikuechani enga erachi uájka. Ísï tátsekua, i iurhitskiri itsï atakuarhisïndi.

² Imeri tátichaksï sési pʼikuarheraxati enga ima erakuka aiakukuarheni Jeobani ka itsï atakuarhini. Peru ante de i ambe úkuarhini, amamba sánisï uandanhiaxapti. Kurhamarhikuarhisïrendi: “¿Jukari sapichue para itsï atakuarhini? ¿Kurhangusïni eska itsï atakuarhini jukaparhakua ambeska? ¿Sánderu sésipirini eska erokuarhipiringa?”. Uánikua tátichaksï ísï kurhamarhikuarhisïndi engaksï uájpecha arhiajka eskaksï uékasïnguia itsï atakuarhini (Ecl. 5:5). Ka normalisti, jimboka sánderu jukaparhakua ambe enga kristianu ma uáka úni, jindesti aiakukuarheni ka  itsï atakuarhini (exe je rekuadruni “ ¿Aiakuskijtsïa Jeobani chári tsípikua?”).

3, 4. a) ¿Náki ejemplu úraspi Pedru para jorhentpini eska jukaparhakueska itsï atakuarhini? b) ¿Andisï Pedru arka jingoni terokutantapi itsï atakuarhikuani?

³ Apostuli Pedru arkaeri ambe uandaspti enga Noe úpka ka uandaspti: “Inde ambe ísï terokuntasïndi eska bautismu iásï anapu, jimboka indejtsïni májku jásï pʼímutantasïnga” (arhinta je 1 Pedru 3:20, 21). Arka marhuaspti para Noe iáminduechani japarini xarhatani eska uékasïrenga úni ambe enga Jeoba uékenga. Mintsikasïrendi Jeobani ka úspti ambe enga ima arhipka. Ini ambe jimbo, Noe ka imeri familiaksï salbarikuarhespti Dilubiurhu. ¿Ambe uékaspi jorhentpini Pedru?

⁴ Enga kʼuiripu exenga arkani, kuenta íntskukuarhisïrendi eska Noe jakajkusïrenga Tata Diosïni. Sáno májkueni, enga kʼuiripu exejka eska nema itsï atakuarhixaka, kuenta íntskukuarhisïndi eska aiakukuarheskia Jeobani ka eska jakajkusïnga eska Jesusi uarhiska juchantsïni jimbo ka eska tsíntaska. Májkueni eska Noe, imecha engaksï itsï atakuarhikia, kurhajchasïndiksï Tata Diosïni ka úsïndiksï imani ánchikuarhitani enga ima íntsaaka. Jeoba pʼímutantaspti Noeni Dilubiurhu ka májkueni uáti imeri marhuaricha jingoni engaksï itsï atakuarhikia ka engaksï no jurajkujka, jiáni enga i parhakpini kʼamajkunhaaka (Mar. 13:10; Jaŋ. 7:9, 10). Ísï jimbo, kánikua jukaparhakuesti aiakukuarheni Jeobani ka itsï atakuarhini. Enga nema ísku jatini no itsï atakuarhini jaka, úpirindi tsïtani imeri erokuarhikua para irekani méntkisï.

5. ¿Ambechi exea ini artikulurhu?

⁵ Exeparini na enga xáni jukaparhakueka itsï atakuarhini, sési japirindi eskachi mókuantapiringa tanimu kurhamarhikuechani. Primeru, ¿ambe jorhentpisïni Biblia  itsï atakuarhikueri ambe? Segundu, ¿ambechi jatsiski para úni ante de itsï atakuarhini? Ka terseru, ¿andichisï jatsi para miáni eska itsï atakuarhini kánikua jukaparhakueska engachi estudiu íntsaajka juchari sapiichani o máteru nemani?

6, 7. a) ¿Ambe arhikuekasïreni bautismu enga Juanu uénga? b) ¿Náki bautismu no májkuenispi ka andi?

⁶ Primeru bautismuecheri enga Biblia uandajka, jindestiksï ima enga Juanu Bautista uáuenga (Mat. 3:1-6). Ima engaksï Juanu Bautistani andarherenga paraksï bautisarikuarhini, xarhatasïrendiksï eskaksï arrepentidu jarhasïrenga jimbokaksï no úsïrenga ambe enga Moisesiri Lei uandenga. Peru bautismu sánderu jukaparhakua enga Juanu úpka, no májkueni ambe jimboespti. Juanu intsïnhaspti pribilegiu para bautisarini Jesusini, Tata Diosïri uájpani (Mat. 3:13-17). Komu Jesusi perfektuepka, no uétarhisïrendi eska arrepentirikuarhipiringa pekadu ma jimbo (1 Ped. 2:22). Jesusi itsï atakuarhispti para xarhatani eska listu jarhaspkia para úni ambe enga Jeoba uékenga (Ebr. 10:7).

⁷ Enga Jesusi uénapkia eianhpini, imeri disipuluechajtuksï uénaspti bautisarpeni (Juanu 3:22; 4:1, 2). ¿Para ambeksï marhuasïreni i bautismuecha? Para xarhatani eskaksï arrepentidu jarhaspka jimbokaksï no úsïrenga ambe enga Lei uandenga, májkueni eskaksï ima enga Juanu bautisariuauenga. Peru enga Jesusi uarhipkia ka tsíntani, itsï atakuarhini máteru ambe arhikuekasïrendia para imecha engaksï uékenga imeri disipulueni.

8. a) ¿Ambe arhiaspi Jesusi imeri chúxapatichani enga tsíntapkia? b) ¿Andiksïsï kristianuecha jatsi para itsï atakuarhini?

⁸ Uéxurhini 33 jimbo, enga Jesusi tsíntapkia, jukari kinientu achatichani xarhakuaspti, uarhiitichani ka jamberi asta sapiichani. A lo mejori jiánipti enga uandapka: “Ni je jorhendaani iámindu kʼuiripuechani, ka bautisaria je Tátiri ka Uájperi ka Espiritu Santueri nombri jimbo, ka jorhendaani eskaksï patsaaka iámindu ambe engaksïni ji juramuchika” (Mat. 28:19, 20; 1 Kor. 15:6). Ísï jimbo, uánikua imeri chúxapatichaksï kurhaapti enga ima juramukuapka eskaksï jorhentpepiringa. Ístu, uandaspti eska ima enga uékenga páni imeri “uananchatarakuani” komu imeri chúxapati, jatsispka para itsï atakuarhini (Mat. 11:29, 30). Ima enga uékapiringa Jeobani jaiapanherantani, jatsispti para jiókuarhini eska Jeoba Jesusini úrapiringa para kumplirini imeri eratsikua. Solu ísï úpirindi itsï atakuarhini. Ka Jeoba ini bautismunkusï jiókuarhipirindi. Bibliarhu, uánikua pruebechaksï jarhasti eskaksï Kristueri chúxapaticha kurhangusïrenga ambe arhikuekasïreni itsï atakuarhini ka nóksï ísku jatini ióndasïrendi (Uku. 2:41; 9:18; 16:14, 15, 32, 33).

9, 10. ¿Ambejtsïni jorhendasïni itsï atakuarhikueri ambe, Etiopía anapu achamasïri ejemplu ka apostuli Pablueri?

⁹ (Arhinta je Ukuecha 8:35, 36). Ju je exeni ambe enga úkuarhinchapka Etiopía anapu kʼuiripu ma enga judiu úkuarhipka. Ima imeo kʼuanhatsintaxapti jimboka Jerusaleni niraspka kʼéri ambe arhini Tata Diosïni. Ánjili ma arhispti Felipini eska eiangupiringa ‘ambakiti eianhperakua Jesukristueri’. ¿Ambe úspi ima kʼuiripu Etiopía anapu? Kurhanguspti na enga xáni jukaparhakuepka jiókuarhini Jesusini komu Tata. Ka komu uékenga úni ambe enga Jeoba kurhakuajka kristianuechani, sóntku uékaspti itsï atakuarhini.

 ¹⁰ Iásï, ju je exeni ambe enga úkuarhinchapka achamasï ma enga no sési káuenga kristianuechani. Ima Juda anapuespti, ireta enga Jeoba erakupka. Peruksï judiuecha nóteru sési pájperasïrendia Jeoba jingoni jimbokaksï no kurhajchaspka. Ima achamasï chúngumaasïrendi judiuecheri pʼindekuechani. Peru Jesusi auandarhu uératini mensaji ma íntskuspti. Jimbosï i achamasï jurajkupti eska kristianu ma enga Ananiasi arhinhenga jarhuatapiringa, “jauaraspti ka seguirini bautisarikuarhini” (Uku. 9:17, 18; Gal. 1:14). Ima judiu niáraspti mítikateni komu apostuli Pablu. Ka seguirispti itsï atakuarhini enga kurhangupka eska Jeoba Jesusini úrapiringa para kumplirini imeri eratsikua (arhinta je Ukuecha 22:12-16).

11. a) ¿Ambe úsïni eskaksï Bibliaeri estudianticha uékaaka itsï atakuarhini? b) ¿Nénachi pʼikuarherasïni engachi exeajka imechani engaksï aiakukuarhekia Jeobani eskaksï itsï atakuarhixaka?

¹¹ Iásï, sáno májkueni úkuarhisïndi imecha jingoni engaksï Bibliani estudiarini jaka, ia seaksï tumbiini oksï kʼériinia. Imecha engaksï jakajkujka ka mintsita jingonksï jukaparharani ambe enga Biblia jorhentpejka, uékaxatiksïa aiakukuarheni Jeobani ka itsï atakuarhini. Iámindu kʼérati tánguarhikuecharhu, nitamataranhasïndi diskursu ma para imecha engaksï itsï atakuarhiaka. Jeobaeri testiguechachi tsípisïnga enga Bibliaeri estudianti ma niárajka itsï atakuarhini. Ka sánderuksïa táticha engaksï exejka eskaksï uájpecha itsï atakuarhixakaia. Aniu de serbisiuni 2017, jukari 284,000 kʼuiripuechaksï itsï atakuarhisti paraksï xarhatani eskaksï aiakukuarhespkia Jeobani (Uku. 13:48). Kurhangustiksï eska itsï atakuarhini ambe máeska engaksï kristianuecha jatsika para úni. Peru ¿ambe ka ambeksï úski paraksï úni itsï atakuarhini?

12. ¿Ambe jatsiski para úni estudianti ma ante de itsï atakuarhini?

¹² Ante de itsï atakuarhini, estudianti jatsisti para jorhenguarhini jurhimbikua ambe Tata Diosïri, ambe enga ima eratsitini jaka úni ka ambe enga úkia parajtsïni salbarini (1 Tim. 2:3-6). I ambe uáti eska kʼéri jakajkukua ma jatsiaka para nóteru únia imani ambe enga Jeoba no jaiapanhintajka ka kumpliriuani imeri prinsipiuechani (Uku. 3:19). Ísïsti, Tata Diosï no jiókuarhisïndi eska nema aiakukuarheaka ka jini no sési jásï ambe úni jarhani (1 Kor. 6:9, 10). Peru estudianti ma no solu jatsisti para kurhajchaani Jeobaeri juramukuechani. Ístu jatsisti para méntkisï nirani tánguarhikuecharhu, eianhpini ka jorhentpini. Jesusi uandaspti eskaksï ini ánchikuarhitani imeri chúxapaticha úpiringa (Uku. 1:8). Enga estudianti úkia ini ambe, uáti jandiajku kómarhini Jeobani para aiakuni imeri tsípikua ka tátsekua itsï atakuarhini máteruechani japarini.

13. Engachi estudiu íntspijka, ¿andichisï jatsi para miáni eska ima enga uéjka Kristueri chúxapatiini jatsiska para itsï atakuarhini?

¹³ Engachi jarhuataani jauaka juchari sapiichani ka máteruechani engaksï Bibliani estudiarini jaka paraksï úni itsï atakuarhini, jatsiskachi para miáni eska uétarhisïnga itsï atakuarhini para Kristueri chúxapatiini. Engachi ísï úska, jánguarhintaakachi uandontskuarhikuani na enga xáni jukaparhakueka aiakukuarheni Jeobani ka itsï atakuarhini. Ísïsti, uékasïngachi eskaksï orhepani uéraaka ka eskaksï niáraaka itsï atakuarhini.

14. ¿Andichisï no nemani obligarijki para itsï atakuarhini?

¹⁴ No nema jatsisti para obligarini estudiantini ma para itsï atakuarhini, niksï táticha, ni ima enga jorhendani jaka, ni máteru erachi kúnguarhikuarhu anapu. Ni sikiera Jeoba obligarpejki (1 Juanu 4:8). Sánderu sési, engachi jorhendani jauaka Bibliaeri  ambe, jatsiskachi para arhini eska kánikua jukaparhakueska eska Jeobaeri amigueuaka. Ambe enga jatsika para úni eska uékaaka itsï atakuarhini, jindesti meru xénchani jurhimbikuani ka uékani úni ambe engaksï kristianuecha újka (2 Kor. 5:14, 15).

15, 16. a) ¿Uáchi uandani na xáni jatiri ma uá itsï atakuarhini? Explikari je. b) Nájkiruka estudianti bautisarikuarhika máteru relijionirhu, ¿andisï jatsi para itsï atakuarhini komu Jeobaeri testigu?

¹⁵ ¿Na xáni jatsiski para jatiriini estudianti para úni itsï atakuarhini? Nochi uáka uandani meru na xáni jatiri, jimbokaksï máru sánderu kókuani progresarisïnga eska máteruecha. Uánikuaksï itsï atakuarhisïndi engaksï tumbiijka ka méntkisïksï marhuakuni Jeobani. Máteruksï kʼériitini mítisïndia Jeobani —máruksï jukari 100 jatirisïndia— ka jiájkanksï kurhangusïndia na enga xáni jukaparhakueka itsï atakuarhini.

¹⁶ Ima enga uéjka Jesusiri chúxapatiini, jatsisti para itsï atakuarhini komu Jeobaeri testigu, nájkiruka bautisarikuarhikia máteru relijionirhu. Jeoba jiántkusï jaiapanhintajti bautismuni enga kʼuiripu mítijkia ambemindusï uéjki Jeoba. I ambe úkuarhinchaspti uarhiiti ma enga sáno 80 jatiripka. I uarhiiti, uánikua relijionicharhu bautisarikuarhispti, jimbosï kurhamarhipti pirenchini enga jorhendani japka Bibliaeri ambe, sini uétarhisïreni eska ménderu itsï atakuarhipiringa. Pirenchi exeraaspti máru textuechani ka uarhiiti kurhanguspti ambe enga jorhentpejki Biblia bautismueri ambe ka ísï tátsekua, itsï atakuarhispti (arhinta je Ukuecha 19:3-5).

17. ¿Ambe jatsiski para eratsintani kʼuiripu ma jiáni enga itsï atakuarhiaka?

¹⁷ Kʼuiripu ma kánikua tsípini pʼikuarherasïndi ima jurhiatikua enga itsï atakuarhiaka. Peru ístu jatsisti para eratsintani na enga xáni jatsiaka para jánguarhintani para úni kumplirini ambe enga aiakukia Jeobani. Ima enga Jesusiri chúxapatiika, nóteru irekasïndia “para imajkumindu, sino para ima enga uarhika ka ménderu tsíntani imani jimbo” (2 Kor. 5:15; Mat. 16:24, TNM).

18. ¿Náki kurhamarhikuechanchi exeaua máteru artikulurhu?

¹⁸ Ini artikulurhuchi exeska na enga xáni jukaparhakueka itsï atakuarhini. Jimbosï Mariaueri amamba kurhamarhikuarhipti imani ambe engachi uénakuarhu exeka. Enga cha kaajka sapiichani, jamberijtsï kurhamarhikuarhika: “¿Listu jarhaskia juchiti sapi para itsï atakuarhini? ¿Sésku jakiia ambe enga mítika para Jeoba úni jiókuarhini imeri aiakukuarhekua? ¿Jatsipirini para karrera ma estudiarini ka ambakiti ánchikuarhita ma jirinhani ante de itsï atakuarhini? ¿Ka enga pekadu ma úskia enga na itsï atakuarhiakia?”. Ini ambechi exeaka máteru artikulurhu. Ístuchi exeaka nénaksï jatsiski para exeni táticha bautismuni.