1, 2. Engachi sánderu jorhenguarhini jauaka Jeobaeri ambe, ¿ambechi jorhenguarhisïni úni? Jatsiku je ejemplu ma.

ENGA sapi ma regalu ma intsïnhajka, tátembechaksï miátantasïndi eska diosmeiamukua íntspiaka, nájkiruka ísï újka solu jimbokaksï tátembecha arhisïnga. Enga sánderu kʼéni jarhajkia, uénasïndi kurhanguni andiksïsï tátembecha exejki eska jatsiska para agradesidueni. Tátsekua, nóteru nema arhiatia eska diosmeiamukua íntspiaka. ¿Andi? Jimboka jorhenguarhiskia ísï eratsini eska tátembecha ka agradesidueni.

² Sáno májkuenisti engachi jorhenguarhijka Bibliaeri ambe kurhangusïngachi na enga xáni jukaparhakueka kumplirini ambe engajtsïni Tata Diosï juramuchijka. Peru, engachi sánderu jorhenguarhini jarhajkia Jeobaeri ambe, sánderuchi jorhenguarhisïnga na enga eratsijka ima: ambe enga tsitijka ka ambe nómbe, ka na exesïni máru ambe. Engachi jorhenguarhijkia sáno májkueni eratsini eska Jeoba ka jurajkuni eskajtsïni inde ambe jarhuataaka ambe ma úni o erakuni ambe ma, xarhatasïngachi eskachi májkueni exesïnga ambe ma eska Jeoba.

3. ¿Andisï uá úkua jukani ísï eratsini eska Jeoba?

³ Nájkirukachi sési pʼikuarherajka jorhenguarhini ísï eratsini eska Jeoba, ménisï úkua jukasïndi ísï úni jimbokachi no perfektueska.  Por ejemplu, jamberichi úkua jukanchajka kurhanguni na exesïni Tata Diosï arini ambe komu ambakiti jángua ma jatsini, jatsikuarhikueri ambe, aianhpikueri ambe ka iurhiriri ambe. ¿Ambejtsïni jarhuata parachi seguirini jarhani ísï eratsini eska Jeoba? Ka ¿nénajtsïni jarhuata i ambe engachi erakuaka ambe ma úni iásï ka sánderu orhepani?

4. ¿Ambe arhikuekasïni jimbanherantani juchari eratsikuani?

⁴ (Arhinta je Roma 12:2). Apostuli Pablu ixú eksplikarisïndi ambe engachi jatsika para úni parachi jorhenguarhini ísï eratsini eska Jeoba. Máteru artikulujtsïni jarhuatasti exeni eska parachi nóteru terokukuantania imechani engaksï no marhuakujka Jeobani, jatsiskachi para no jiókuarhini na engaksï ima eratsijka ka jámani. Peru ístu Pablu uandaspti eska uétarhisïnga jimbanherantani juchari eratsikuani. Ka para ísï úni, jatsiskachi para Bibliani estudiarini parachi kurhanguni na enga eratsijka Tata Diosï, eratsintani indeni ambe ka jánguarhintani ísï exeni ambe ma eska Jeoba.

5. ¿Andisï no májkuenii estudiarini ka eska solu arhintani?

⁵ Estudiarini, sánderu ambe arhikuekasïndi eska solu arhintani ambe ma ka exeantani mókuntskuechani máru kurhamarhikuecheri. Engachi estudiarijka jorhenguarhisïngachi ambe enga uandajka informasioni Jeobaeri ambe ka na enga eratsijka ka úni ambe ma. Jánguarhintasïngachi kurhanguni andisï uandajki eskachi uáka máru ambe ka máteru ambe nómbe. Ístuchi eratsintasïnga ambe engachi jatsika para mójtakuni juchari eratsikuarhu ka irekuarhu. Ísïsti, engachi méni estudiariuaka jamberichi no uáka iámindu ini ambe eratsintani. Peru sésiisti eskachi eratsintaaka ma ratu imani amberi engachi arhintaaka, jamberi terujkani imani tiempueri engachi úrajka para estudiarini (Sal. 119:97; 1 Tim. 4:15).

6. ¿Ambe úkuarhisïni engachi eratsintajka na enga exejka ambe ma Jeoba?

⁶ Engachi pʼindeka eratsintani ambe enga arhijka Tata Diosïri Karakata, ambakiti ambe úkuarhisïndi. Kuenta íntskukuarhisïngachi eska ambe enga Jeoba eratsijka méntkisï sési jarhasïnga. Uénasïngachi kurhanguni na enga exejka ambe ma ka juchajtuchi niárasïnga májkueni úni. Engachi jimbanherantajka juchari eratsikuani, méntkuchi ménderueni eratsisïngia. Sánhani arhisïngachi niárani ísï eratsini eska Jeoba.

7, 8. a) ¿Na exesïni Jeoba jatsikuarhikua ambe? (Exea je dibujuechani engaksï uénakuarhu jaka). b) Engachi ísï eratsiska eska Jeoba, ¿ambechi orheta péraa méntkisï?

⁷ Ambe engachi eratsijka, nójtsïni solu pʼikuastasïndi ambe ma, sino ístujtsïni úrasïndi ambe ma (Mar. 7:21-23; Sant. 2:17). Parachi sánderu sési kurhanguni, ju je exeani máru ejempluechani. Orheta, na exesïni Jeoba jatsikuarhikueri ambe. Ebanjeliuechaksï sési xarhatasïndi na enga exejka Jeoba indeni ambe. Ima sési erakuaspti Jesusiri táti jembechani paraksï tʼarhexerani ixú Echerirhu, temungurhirini ma engaksï no káni jatsikuarhiripka (Lev. 12:8; Luk. 2:24). Biblia arhisïndi eska enga Jesusi andajpenupka, Maria apontskaspti chekakuarhu ma jimboka nóteru jarhaspkia lugari paraksï imecha pakarani (Luk. 2:7). Enga Jeoba uékapiringa, úpirindi ambakiti lugari ma íntsaani para imeri Uájpa andajpenuni. Peru ambe enga ima sánderu uékenga, jindespti eska imeri Uájpa familiarhu ma tʼarhexepiringa enga orheta pérapiringa Tata Diosïri ambe.

⁸ Engachi jorhenguarhijka ini istorieri ambe, kuenta íntskukuarhisïngachi na enga exejka Jeoba jatsikuarhikua ambe. Máru tátichaksï kánikua jánguarhintasïndi ambakiti ambe íntsani uájpechani, nájkiruka inde ambe uáka eskaksï nóteru jatsiakia ambakiti pájperakua ma Jeoba jingoni.  Peru ambe enga sánderu jukaparhakueka para Jeoba, jindesti eskachi ambakiti pájperakua ma jatsiaka imani jingoni. ¿Ka juchachi niáraskia ísï eratsini eska Jeoba? ¿Ambeksï xarhatasïni juchari úkuecha? (Arhinta je Ebreu 13:5).

9, 10. Parachi no úni eska nema pekariuaka, ¿nénachi xarhatasïni eskachi májkueni eratsisïnga eska Jeoba?

⁹ Segundu ejemplu jindesti úni eska nema no sési ambe uáka, o sea, eska nema pekadu ma uáka o nóteru marhuakunia Jeobani. ¿Ambe eratsisïni Tata Diosï íri ambe? Jesusi uandaspti: “Nákinterku nema enga pekadu úraaka ma ini jásï sapichuni enga jíndini jakajkujka, sánderu sési japirindi eska jojchakunhapiringa ma molinurhu anapu tsakapuni, ka japondarhu kʼuanimanhani” (Mar. 9:42). Jesusi kánikua no sési exesïrendi ini ambe. Ka komu ima sési xarhatajka na enga eratsijka imeri Tátemba, uákachi seguru jarhani eska Jeoba májkueni no sési exesïnga enga nema no eratsintajka eskaksï imeri úkuecha uáka eska nema nóteru marhuakuakia Jeobani (Juanu 14:9).

¹⁰ ¿Juchajtuchi májkueni eratsisïni eska Jeoba ka Jesusi? ¿Ambeksï xarhatasïni juchari úkuecha? Ju je eranhaskani eskachi pʼindeska arreglarikuarhini o imani xukuparhakua ambe jukani engachi tsitijka, peruchi kuenta íntskukuarhisïnga eska ísï arreglarikuarhini no sési pʼikuastaasïnga máru erachichani o eskaksï uáka ikichakueni jásï ambe eratsini. ¿Ambechi uá? Ima uékperakua engachi pʼikuarherajka erachichani jimbo, ¿uá eskachi nóteru ísï xukuparhakia o arreglarikuarhini? (1 Tim. 2:9, 10).

11, 12. Kurhunhini no sési jásï ambe eska Jeoba ka pʼíngukuarhini, ¿nénajtsïni kuájchakusïni parachi no pekadu ambe úni?

¹¹ Ju je exeni terseru ejempluni: Jeoba kurhunhisïndi no sési jásï ambe ka no jurhimbikuani (Is. 61:8). Nájkiruka mítika eskachi ménisï no sési úsïnga ambe ma jimbokachi no perfektueska, arhisïndijtsïni eskachi májkueni kurhunhiaka no sési jásï ambe ísï eska ima (arhinta je Salmo 97:10). Eratsintani andisï Jeoba kurhunhijki no sési jásï ambe, jarhuatatijtsïni parachi juchajtu májkueni úni ka meru no jiókuarhini no sési jásï ambe.

¹² Májkueni exeni eska Jeoba imani ambe enga no sési jaka, ístujtsïni jarhuataati máteru ambe jimbo. Kurhanguakachi eskaksï máru úkuecha no sési jarhaska, nájkiruka Bibliarhu no uandaaka meru inderi ambe. Por ejemplu, parhakpinirhu sánderu etsakurhixati ikichakueni jásïka ma uarhakua enga arhinhajka lap dance. Máruksï eratsisïndi eska i ambe no májkueniska eska relasioni sexuali jatsini ka eska jimbosï no no sési jaka. * ¿Peru na exesïni Jeoba? Ju je miáni eska ima kurhunhisïnga iámindu no sési jásï ambe. Jimajkani, ju je jánguarhintani no pekadu ambe niátani pʼíngukuarhiparini ka kurhunhini imani ambe enga Jeoba kurhunhijka (Rom. 12:9).

13. ¿Andichisï jatsi para antesi mítitini jarhania na exeni Jeoba ambe ma?

¹³ Engachi estudiarini jauaka, marhuasïndi eratsintani na exesïni Jeoba ambe ma, jimbokajtsïni jarhuataaka sánderu orhepani ambakiti ambe erakuni úni. Ísï úparini, mítiakachi ambechi jatsiski para úni engachi situasioni ma jimbo jauaka enga uétarhiaka sóntku erakuni ambe ma (Prov. 22:3). Ju je exeani máru Bibliaeri ejempluechani.

14. ¿Ambechi jorhenguarhisïni Joseri ambe enga Potifariri témba uékenga imani jingoni apondini?

¹⁴ Ju je eranhaskani ambe enga nitamanchapka Jose. Potifariri témba afuersa uékasïrendi eska Jose imani jingoni apondipiringa, peru Jose  jirejiresï kéndikukuspti. Ísï xarhataspti eska eratsintaspka ambe enga Jeoba uandajka eskaksï temungurhiricha no jatsiska para enganiarperani (arhinta je Génesis 39:8, 9). Ístu, ju je miántani ambe enga arhipka imani uarhiitini: “¿Néna úpirini ji ini ambe úni, ka ini ambe jimbo kʼéri pekadu ma úni Tata Diosïri orhepatini?”. I ambe xarhatasïndi eska Jose ísï exesïrengia ambe ma eska Jeoba na exejka. Iásï ju je juchari ambe exeni, eranhaska je eska ánchikuarhitarhu anapu ma kompanierujtsïni uénasïnga koketearichini o eskajtsïni telefonurhu mensaji ma o fotu ma niárachisïnga enga ísku jándikueri ambeka. * Engachi antesi eratsintaska na exesïni Jeoba ini ambe, ísï eratsini eska ima ka mítitini jarhania ambe úni, sánderu fásiliuati eskachi kurhajchaaka Jeobani.

15. ¿Nénachi uá méntkisï kurhajchani Jeobani ísï eskaksï tanimu ebreuecha?

¹⁵ Iásï, ju je exeni tanimu ebreuecheri ejemplu, engaksï mítikateka komu Sadraki, Mesaki ka Abednegu. Rei Nabukodonosori imajeni orueri ma úspti ka juramuspti paraksï kʼéri ambe arhini. Peru ima tanimu ebreuechaksï méntku no uékaspti inde ambe úni. Na engaksï mókukupka reini, xarhataspti eskaksï sési mítispka ambe enga arhikuekajka Jeobantku kʼéri ambe arhini (Éx. 20:4, 5; Dan. 3:4-6, 12, 16-18). Ju je eranhaskani eskajtsïni juchari jefi arhisïnga eskachi tumina íntspiaka para kʼuínchikua ma úni enga relijioni no jurhimbitirhu anapueka. ¿Ambechi úpirini? Enbesi de erokuarhini astaka niáraka i ambe úkuarhini, ¿andichisï no eratsintajki desde iásï na exesïni Jeoba indeni ambe? Engachi ísï úska, sánderu fásiliuati imani ambe úni ka uandani enga sési jaka, ísï eskaksï na úpka tanimu ebreuecha.

16. Kurhanguni na exesïni ambe ma Jeoba, ¿nénajtsïni prepararisïni para emerjensia ma?

¹⁶ Antesi eratsintani eska jukaparhakueska kurhajchani Jeobani, uátijtsïni jarhuatani para enga ma repentku uétarhiaka doktori jingoni nirani. Ísïsti eskachi no jiókuarhisïnga iurhiri jatantani o ma ima tʼámu amberi enga iurhirirhu petanhajka (Uku. 15:28, 29). Peruksï jarhasti máteru tratamientuecha enga mándani kristianu jatsi para exeni sini jiókuarhia o nómbe, sapichu ambe ima tʼámu amberi enga iurhirirhu petanhajka. Para inde ambe úni jatsiskachi para Bibliaeri prinsipiuechani exeani engaksï xarhatajka na enga exejka Jeoba inderi ambe. Peru para indeni ambe exeni no jiánisti engachi ospitalirhu  jauakia, jamberichi no sési pʼikuarherani jauaka ka arhinhanchi jarhani eskachi sóntku erakuaka ambe ma úni. Iáiasïsï uétarhijti inbestigarini inderi ambe, karani ambe engachi uéjka dokumentu médiku legali ma jimbo ka doktorini jingoni uandontskuarhini. *

17-19. ¿Andisï jukaparhakueka desde iásï jorhenguarhini na enga eratsijka Jeoba? Jatsiku je ejemplu ma nani engachi uétarhinchapiringa preparadu jarhania.

¹⁷ Últimu, ju je eratsintani ambe enga Jesusi mókukuntapka Pedruni enga ima arini ambe arhipka: “Pʼamojkukuarhi Tata”. Ambe enga mókukuntapka xarhatasïndi eska Jesusi sési eratsintaspka ambe enga Tata Diosï uékenga eska úpiringa ka profesiechani engaksï imeri ambe uandenga ka imeri uarhikueri ixú Echerirhu. I ambe jarhuataspti paraka ima no méni jurajkupiringa Jeobani ka uarhini kʼuiripuecha jimbo no sáni chéparini (arhinta je Mateu 16:21-23).

¹⁸ Ini jurhiatikuecha jimbo, Jeoba uékasïndi eskachi imeri amigueuaka ka jánguarhintanchi eianhpini xáni eskachi na xáni uáka (Mat. 6:33; 28:19, 20; Sant. 4:8). Peru, uákachi ísï úkuarhinchani eska Jesusi, eska nema sési ambe uékaparini úni, arhiakajtsïni parachi máteru ambe úni. Por ejemplu, ju je eranhaskani eskajtsïni juchari jefi aiachesïnga ambakiti ánchikuarhita ma engachi sánderu meiamunhaaka. Peru iásï problema jindeuati eskajtsïni inde ánchikuarhita ójkutaaka parachi sési marhuakuni Jeobani. O engari tumbi máeka, eranhaska eskari intsïnhasïnga oportunidadi ma parari seguirini estudiarini. Peru parari ísï úni, jatsiakari para máteru nani ísï nirani irekani. ¿Jiániua parachi Jeobani kurhakuni jarhuajperata, inbestigarini publikasionicharhu inderi ambe ka uandontskuarhini familia ka orhejtsïkuticha jingoni parachi erakuni ambe úni? ¿No sánderu sésipirini desde iásï exeni na eratsisïni Jeoba inderi ambe ka jánguarhintanchi juchajtu májkueni eratsini? Ísï jimbo, enga sánderu orhepani i ambe úkuarhiaka, no jindeuati tsʼéjkukua ma para jucha. Sésichi mítitini jauaka eskachi uékasïnga sánderu marhuakuni Jeobani ka seguru jarhani eskachi uékasïnga ísï úni. Ka últimu, imani ambechi uáka engachi mítika eska sési jarhaska.

¹⁹ Jamberiksï jati máteru situasionicha engaksï ma repentku úpiringa jarhani. Buenu, nochi uáka iámindu ambe eranhaskani enga úpiringa úkuarhini. Peru engachi úraska juchari estudiuni para mítini na eratsisïni Jeoba, jiáni enga niáraka jarhani ambe ma, sánderu fásiliuati parachi miáni ambe engachi jorhenguarhika ka ísï úni. Ísï jimbo, ju je jánguarhintani mítini na enga eratsijka Jeoba, ísï exeni ambe ma eska ima, ka ju je eratsintani ambe úkuarhia imani ambe jimbo engachi erakuaka úni iásï ka sánderu orhepani.

20, 21. a) ¿Andisïchi Paraisurhu no sésikua intsïnhaa parachi méntku iámindu ambe úni? b) ¿Nénachi uá tsípikua jingoni irekani asta ini jurhiatikuecha jimbo?

²⁰ Uékaxakachia eska janoakia jimbanhi parhakpini. Sáno iáminduechachi erokuarhixaka Paraisurhu irekani ixú Echerirhu para méntkisï. Tata Diosïri Reinu, kénditauati iámindu juchari uandanhiatechani engachi iásï jatsiaka. Ísïsti, jimbanhi parhakpinirhu, ístuchi jatsiaka sésikua para erakukuarheni ambe úni ka imani ambechi erakuaka úni seguni ambe engachi tsitiaka ka uékani.

²¹ Peru nochi sésikua intsïnhaaka parachi méntku iámindu ambe úni. Ambakiti kʼuiripuecha engaksï jiáni irekaaka, jatsiatiksï para exeni sinksï ambakiti ambe erakua úni o nómbe, jupindaskuarhiparini Jeobaeri juramukuechani jimbo ka na enga eratsijka ima. Engachi i ambe úska, kánikua tsípikuarhita ka pínandikua jauati (Sal. 37:11). Peru asta ini jurhiatikuecha jimbo, uákachi tsípikua jingoni irekani engachi ísï eratsiska eska Jeoba.