1, 2. a) ¿Ambechi jatsiski enga sánderu jukaparhaka? b) ¿Náki jorhentperakuechanchi kánikua jukaparharaasïni ka andi? (Exe je dibujuni enga uénakuarhu jaka).

¿AMBECHI jatsiski enga sánderu jukaparhaka? ¿Uékapirinchi mójtakuni ambe ma jingoni enga no xáni jukaparhapiringa? Para Tata Diosïri marhuaricha fásilisti mókuantaani ini kurhamarhikuechani. Sánderu jukaparhakua ambe engachi jatsika, jindesti ambakiti pájperakua ma Jeoba jingoni ka no ma ambe jimbochi mójtakupiringa. Ístuchi kánikua jukaparharasïnga Bibliaeri jurhimbikua ambe, jimboka úsïnga eskachi uáka amigueni juchari Táti auandarhu anapueri (Kol. 1:9, 10).

² Ju je eratsintani ambe engajtsïni jorhendajka Ambakiti Jorhentpiri, imeri Karakatarhu enga jindeka Biblia. Arhisïndijtsïni nákiski imeri nombri ka ambe enga arhikuekajka ka xarhatachiasïndijtsïni imeri ambakiti kualidadichani. Eiangusïndijtsïni andijtsïnisï pʼímutantsï, enga íntspipka imeri Uájpa Jesusini. Ístujtsïni aiangusïndi Mesiasiri Reinueri ambe ka erakukatechani aiakuasïndi eskaksï uáka auandarhu irekani ka “máteru karichichani” eskaksï Paraisurhu irekaaka, ixú Echerirhu (Juanu 10:16). Ístujtsïni arhisïndi nénachi uá sánderu sési irekani ka na engachi jatsika para jámani. Iámindu i jorhentperakuechaksï kánikua  jukaparhakuesti para jucha, jimbokajtsïni jarhuatasïnga andarherani Kuerajpirini ka tsípikua jingoni irekani.

3. ¿Ambe no arhikuekasïni uandakua: “Piá jurhimbikuani”?

³ Enga Biblia arhijka eskachi piáka jurhimbikuani, ¿arhikuekasïni eskachi jatsiska para tumina jingoni meiampini? Nómbe. Jeoba xáni intsïmpitisti enga asta íntspika imeri Uájpani no ma tumina jimbo. Enga ima exejka eska nema uékaxaka jorhenguarhini jurhimbikuani, ima jarhuatasïndi ka no ma tumina kurhakusïndi indeni ambe jimbo. Por ejemplu, enga achati ma enga Simoni arhinhenga, tumina aiakupka apostuli Pedruni para ima íntskuni sésikua para pʼamenchatichani tsinaani, Pedru arhispti eska no sési jarhaspka ambe enga eratsienga ka arhispti: “Tsïnchie chíti tumina tʼungini jingoni. ¿Andi tʼuri tantiarisïni eska Diosïri intsïmperakua úsïnga piánhani tumina jimbo? (Uku. 8:18-20). Jiájkani, ¿ambe arhikuekasïni uandakua: “Piá jurhimbikuani”?

4. Ini artikulurhu, ¿ambechi jorhenguarhia jurhimbikueri ambe?

⁴ (Arhinta je Proverbios 23:23). Para Tata Diosïri Karakateri ambe jorhenguarhini, uétarhisïndi kánikua jánguarhintani. Jatsiskachi para jurajkuni ambe enga xáni uétarhiaka. Ísï eska na uandapka ima enga Proberbiuechani karaapka, engachi na jorhenguarhiska jurhimbikuani, jatsiskachi para jingontku jámani para no íntspikuarhini o jurajkuni. Ju je exeni ambe arhikuekasïni piáni jurhimbikuani ka jamberichi “ambe xáni” jatsia para úni parachi konseguirini. Inde ambejtsïni jarhuataati sánderu jukaparharani ka uáti eskachi no méni eratsiaka íntspikuarhini o jurajkuni. Eskachi na exeaka, uétarhisïndi úni náki uéjki sakrifisiu ma parachi piáni jurhimbikuani enga xáni ambakiti ambeka.

5, 6. a) ¿Nénachi uá jurhimbikuani piáni no ma tumina jingoni? b) ¿Nénajtsïni marhuachisïni piáni jurhimbikuani?

⁵ Asta engachi gratisi aiaminhajka ambe ma, jamberichi jatsiaka para úni o íntspini ambe ma. Ixú Proverbios 23:23 jimbo uandakua ebreu enga tradusirikuarhika “piá”, ístu uáti arhikuekani “pʼi” o “konseguiri”. Iámindu i uandakuechaksï arhikuekasïndi jatsini ambe ma, jánguarhintaparini o mójtakuni ambe ma jingoni enga jukaparhaka. Por ejemplu, ju je eranhaskani eska merkadu ma jimbo letreru ma arhisïnga eska fruta gratisiska. ¿Jandiajku niáraa fruta juchari mesarhu? Nómbe. Nájkiruka gratisika, jatsiskachi para jánguarhintani ka tiempu úrani parachi merkadurhu nirani ka konseguirini. Májkueni, parachi piáni jurhimbikuani nochi jatsiska para tumina íntspini, peru kʼóruchi jatsiska para úni ambe ma para konseguirini.

⁶ (Arhinta je Isaías 55:1-3). Ambe enga Jeoba uandapka libru de Isaías jimbo, jarhuatasïndijtsïni kurhanguni ambe enga arhikuekajka piáni jurhimbikuani. Ini karakatarhu, Tata Diosï terokutantaasïndi imeri uandakuechani itsï, lechi ka binu jingoni. Bibliaeri jurhimbikua ambe, xánksï sési pʼikuastpisïndi komueska ma basu itsï enga pímbinhanharhika ka tsʼirapini. Ístu, ísï eska lechi na jindeka para arhani ka jarhuatantsïni kʼuiripeni engachi sapijka, Tata Diosïri karakatajtsïni sési úchesïndi ka jarhuatasïndijtsïni parachi sánderu jorhenguarhini Jeobaeri ambe. Ka ¿néna jimbo Jeobaeri uandakuechaksï ísïski komueska binu? Biblia arhisïndi eska binu sési pʼikuastpisïnga (Sal. 104:15). Ísï jimbo, engajtsïni Jeoba arhijka eskachi piáka binu, aiachisïndijtsïni eska engachi ísï irekaaka eskajtsïni ima na juramuchijka, tsípikua jingonchi irekaaka (Sal. 19:8). Ini ilustrasionicha jingoni, Jeobajtsïni jarhuatasïndi kurhanguni na engajtsïni marhuachijka mítini jurhimbikuani ka úni ambe engachi jorhenguarhijka. Ísï jimbo, ju je exeni sinku ambe engachi jurajkujka parachi úni konseguirini jurhimbikuani.

7, 8. a) ¿Andichisï jatsi para úrani tiempu parachi jorhenguarhini jurhimbikuani? b) Uátsï ma enga eskuela estudiarini japka, ¿ambe jurajkuspi ka néna marhuakuspi ísï úni?

⁷ Tiempu. Ambe máesti engachi iáminduecha  jatsijka para úrani parachi konseguirini jurhimbikuani. Tiempu uétarhisïndi para Reinueri ambe kurhaani, Bibliani arhintani ka publikasionichani, para jatsini estudiu personali, prepararikuarhini para tánguarhikuecha ka para nirani. Para indeni ambe úni, jatsiskachi para máteru ambe jurajkuni enga no xáni jukaparhakueka (arhinta je Efesu 5:15, 16). ¿Na xáni tiempu uétarhisïni para jorhenguarhini ambe enga orheta uétarhijka mítini Bibliaeri ambe? Seguni na enga xáni uétarhinchaaka nema. Pero nochi méni uáka kʼamarani jorhenguarhini Jeobaeri mímixekueri ambe, na enga jásïka ka ambe enga xáni úkia (Rom. 11:33). Primeru i rebisteri inglesi jimbo, terokutantaspti jurhimbikuani komu “tsïtsïki sapichu ma” ka arhisïrendi: “Asï konformarikuarhi je májku tsïtsïki jurhimbikueri jingoni. Enga májku uétarhipiringa, Tata Diosïjtsïni no xáni uáni íntsaapirindi. Seguiri je konseguiriuani, seguiri je jirinhantaani”. Asta jiáni engachi irekani jauakia para méntkisï, uákachi seguirini jarhani sánderu jorhenguarhini Jeobaeri ambe. Ambe enga sánderu jukaparhakueka iásï, jindesti eskachi sési úraaka juchari tiempuni para jorhenguarhini iámindu imani ambe engachi xáni uáka jurhimbikueri ambe. Ju je exeni eksperiensia ma nemaeri enga uékenga mítini jurhimbikuani.

⁸ Japón anapu uátsï ma enga Noriko arhinhajka, * Nueva York (Estados Unidos) mótsispti para eskuela nirani. Jiánisï, ima Japón anapu relijionirhu ma jimbo jarhaspti. Ka pirenchi ma predikarikuspti nani enga ima irekani japka. Enga Noriko uénapka jorhenguarhini jurhimbikueri ambe, xáni tsitispti enga arhipka pirenchini eska ma semana jimbo tsimani xanhari nipiringa jorhendani Bibliaeri ambe. Nájkiruka kánikua okupada jarhenga imeri eskuela jimbo ka ánchikuarhita mediu tiempueri jingoni, sóntku uénaspti nirani tánguarhikuecharhu. Ístu, para jatsini sánderu tiempu para jorhenguarhini jurhimbikueri ambe, nóteru xáni nirasïrendia jimesïsï para tsípikuarhini. Jurajkuni ini ambe, jarhuataspti para sánderu sóntku jorhenguarhini Jeobaeri ambe. No jamberi ma uéxurhini jimbo, itsï atakuarhispti. Seisi mesi tátsekua, prekursora úkuarhispti 2006 jimbo, ka seguirixati prekursoreni.

9, 10. a) ¿Nénachi niárasïni ménderueni exeni jatsikuarhikua ambe engachi jorhenguarhijka jurhimbikuani? b) ¿Ambe jurajkuski uátsï ma ka na pʼikuarherasïni indeni ambe jimbo?

⁹ Jatsikuarhikua ambe. Para piáni o jorhenguarhini jurhimbikuani, jamberichi jatsiaka para jurajkuni ánchikuarhita o profesioni ma nani engachi kánikua tumina andajka. Ju je eranhaskani Pedru ka Andresini engaksï kurucha pʼímatipka. Enga Jesusi pʼímarhiapka paraksï kʼuiripuechani nirani jorhendaani, jurajkuasptiksï kurucha pʼímatarakuechani ka nirasptiksï imani jingoni (Mat. 4:18-20). Buenu, i ambe no arhikuekasïndi eskaksï iáminduecha engaksï jorhenguarhijka jurhimbikuani, jatsiaka para jurajkuni imecheri ánchikuarhitani, jimbokaksï jatsiska para ánchikuarhini para úni irekani ka para kuidarini imecheri familiani (1 Tim. 5:8). Peru jamberiksï jatsiati para exeni ambe enga sánderu jukaparhakueka ka nóteru májkueni exenia jatsikuarhikua ambe. Jesusi sési jorhentpespti ini ambe enga uandapka eskachi nóteru patsapiringia jatsikuarhikua ambe parhakpinirhu ka eskachi patsapiringa juchari jatsikuarhikua ambe auandarhu (Mat. 6:19, 20). Ju je exeni uátsïri eksperiensia ma.

¹⁰ Maria, ante de jatirini para nirani eskuela, uénaspti golf chʼanani. Enga sekundariarhu jámani japka, kánikua jorhenaspti chʼanani enga asta intsïnhapka beka ma para unibersidadirhu nirani. Meru kánikua tsitisïrendi golf chʼanani ka uékasïrendi ambakiti chʼanari máeni ka kánikua tumina andani. Jiájkani, uénaspti Bibliani estudiarini. Kánikua tsitisïrendi imani jurhimbikua ambe enga jorhenguarhienga ka na enga inde ambe jarhuatenga para jurajkuni ambe enga antesi uénga. Uandaspti: “Engani sánderuni úrauenga Bibliaeri juramukuechani para mójtakuni juchiti irekuani ka jánguani, sánderuni  sési pʼikuarherasïrenga”. Kurhanguspti eska kánikua úkua jukapiringa para jatsikuarhikua ambe uékani jatsini ka ístu uékani Jeobani marhuakuni (Mat. 6:24). Ísï jimbo, niáraspti jurajkuni imani ambe enga xáni tsitienga, ambakiti chʼanari máeni enga kánikua jatsikuarhiripiringa ka mítikateni. Iásï prekursorestia ka uandasïndi eska agustu irekaxaka ka kánikua tsípikua jingoni.

11. Engachi jorhenguarhijka jurhimbikuani, ¿ambe uá úkuarhini juchari pájperakua amiguecha ka familiaricha jingoni?

¹¹ Juchari pájperakua amiguecha jingoni ka familiaricha. Engachi erakujka úni ambe engajtsïni Biblia juramuchijka, pájperakua máru juchari familiaricha ka amiguecha jingoni uáti mójtakurhini. ¿Andi? Jesusi kómarhispti Jeobani imeri chúxapaticha jimbo: “Pímbinhajkuanta indeni jimbo enga ísïka, chíti uandakua ísïsti” (Juanu 17:17). “Pímbinhajkuanta”, ístu úpirindi arhikuekani “támu péraa” o “jarharitaa”. Engachi jorhenguarhijka jurhimbikuani, nóteruchi parhakpini jingonisïngia jimbokachi nóteru májkueni ambe úsïngia. Kʼuiripujtsïni ménderueni exesïndia jimbokachi nóteru májkueni jámasïngia ka úsïngachi ambe enga Biblia uandajka. Nochi uékasïnga jarharperani, peru máru amiguecha o familiarichajtsïni jamberi jarhariati oksï no uékani eskachi jorhenguarhiaka jurhimbikuani. I ambejtsïni no ísku pakatasïndi, jimboka Jesusi uandaspka: “Kʼuiripuecheri ikiatspiticha jindeuatiksï mismu imecheri kʼumanchikuarhu anapuecha” (Mat. 10:36). Peru uandaspti eska engachi jurajkuska ambe uéjki jurhimbikua jimbo, kóntperatechani engachi intsïnhauaka sánderuksï ambakitiuati ka eska ima ambe engachi jurajkuaka (arhinta je Markusʌ 10:28-30).

12. ¿Ambe niáraspi jurajkuni empresariu judiu ma jurhimbikua jimbo?

¹² Aaroni enga judiuepka ka empresarhu ma ánchikuarhini, desde sapichu jorhenguarhispti eska no jatsispka para úrani Tata Diosïri nombrini. Peru ima meru uékasïrendi jurhimbitku mítini Tata Diosïri ambe. Ma jurhiatikua, Testigu ma jorhendaspti eska engaksï tʼámu letrechani enga Tata Diosïri nombrini arhikuekajka ebreu jimbo, jatsikuapiringa máru bokalichani, úsïnga arhikuarhintani “Jeoba”. Xáni tsípispti enga nípka sinagogarhu relijioniri jorhentpirichani aianguani ambakiti ambe enga jorhenguarhipka. Peruksï imecha no ísï jiókuarhispti eska ima na erokuarhienga. Enbesdeksï tsípini enga ima jorhenguarhipka Tata Diosïri nombrini, tʼuárhisptiksï ka chúntani. Ístu, imeri familia uénaspti no sési kámani. Peru no jurajkuspti eska inde ambe úpiringa eska nóteru jorhenguarhipiringia Jeobaeri ambe. Itsï atakuarhispti ka sési marhuakuspti Jeobani astaka uarhipka. Májkueni eska Aaronini jingoni, parachi úni jurhimbikuarhu jarhani, juchari irekua uáti mójtakurhini juchari familiaricha jingoni o jatsikuarhikua ambe jimbo.

13, 14. Para úni konseguirini jurhimbikuani, ¿jamberichi ambe jatsia para mójtakuni de na engachi eratsijka ka jámani? Íntspi je ejemplu ma.

¹³ No sési jásï ambe eratsini ka úni. Engachi uéjka jiókuarhini jurhimbikuani ka úni ambe engachi jorhenguarhiaka, jatsiskachi para uékani mójtakuni na engachi eratsijka ka jámani. Pedru arhini konseju íntspespti: “Jáma je eska Diosïri uájpecha engaksï sési jimbo janhanharhijka imani, ka asteru jáma je tsitini úni indeni ambe engajtsï úkuekenga engajtsï nótki ambe mítienga”. Ka seguirispti uandani: “Sino pímbinhasïnta je iámindu ambe jimbo” (1 Ped. 1:14, 15). Por ejemplu, ireta Korintu engaksï xáni no sési ambe uénga ka ísku jándikua ambe, kʼuiripuecha engaksï jiókuarhipka jurhimbikuani jatsisptiksï para uánikua ambe mójtakuni imecheri irekuarhu (1 Kor. 6:9-11). Májkueni, iásïksï uánikuecha jatsisti para jurajkuni no sési jásï jánguani para úni jurhimbikuarhu jarhani. Ístu, Pedru arhiaspti kristianuechani imeri jurhiatikuecha jimbo: “Asteru indeni ambe úia je eska parhakpini anapuecha na újka, jimbokajtsï tsitisïrenga ikichakueni jásï ambe úni, ísku jándikua ambe niátani, kauintsï, nanderkuentsï tsípikuarhini, tánguarhintani  solu para kauikua ambe arhani ka idoluechantsï kómarhiani enga xáni no sésika” (1 Ped. 4:3, TNM).

¹⁴ Desde iónisïa, Devynn ka Jasmine kánikuaksï alkoli arhasïrendi. Devynn sési mítikuspti kontabilidadiri ambe, peru enga xáni kauienga sóntku tsïtasïrendi ánchikuarhita ma. Jasmine ísï mítikatespti eska no ambakispka ka uarhipeni jámani. Ma jurhiani, enga Jasmine kauirini karreterarhisï xanharani japka, temungurhirini ma jingoni uandontskuarhispti engaksï misioneruepka. Imechaksï arhispti eskaksï jorhendapiringa Bibliaeri ambe. Peru engaksï misioneruecha nípka pʼorhembini máteru semana jimbo, Devynn ka Jasmine kauirixaptiksï. Imechaksï no erokuarhisïrendi eskaksï misioneruecha nipiringa pʼorhembiani. Engaksï ménderu nípka, nóteruksï kauirixaptia. Desde engaksï uénapka estudiarini, tsimarhanksï kánikua jukaparharaspti jorhenguarhini Bibliaeri ambe ka uénasptiksï úni ambe engaksï jorhenguarhienga. No jamberi tanimu kutsï jimbo, nóteruksï kauisïrendia, ka ísï tátsekuaksï sibilarikuarhispti. Imecheri iretarhu, iáminduechaksï mítispti na engaksï mójtakurhipkia ka inde ambe úspti eskaksï uánikuecha uékapiringa jorhenguarhini Bibliaeri ambe.

15. ¿Ambechi úpirini sánderu úkua jukanchani mójtakuni parachi úni konseguirini jurhimbikuani ka andi?

¹⁵ Pʼindekuecha engaksï no terokuntajka Biblia jingoni. Para máru kʼuiripuecha, fásilisti jurajkuani pʼindekuechani engaksï na mítijkia eska Tata Diosï no jeiapanhiantasïnga. Para máteruecha uáti jindeni ambe ma enga kánikua úkua jukaaka jurajkuani paraksï úni konseguirini jurhimbikuani. Jamberiksï no uékani jauati jurajkuani pʼindekuechani jimbokaksï imecheri familiaricha, ánchikuarhitarhu anapu kompanieruecha ka amiguecha niáraaka no sési kaani. Ka uáti sánderu úkua jukani enga pʼindekua jindeka para kʼuínchikua úkuantani uarhirichani (Deut. 14:1). Máteru erachicheri ejemplu engaksï balori xarhataka, uátijtsïni jarhuatani parachi mójtakuni ambe enga xáni uétarhiaka. Ju je exeni ambe engaksï úpka máru Éfesu anapuecha primeru siglurhu.

16. ¿Ambeksï úspi máru Éfesu anapuecha para konseguirini jurhimbikuani?

¹⁶ Ireta Éfesu kánikua mítikatespti jimbokaksï sïkuamikua ambe úrasïrenga. ¿Ambeksï úspi jima anapuecha engaksï kristianu úkuarhipka? Biblia arhisïndi: “Ístu uánikua engaksï ikichakueni jásï ambe uénga sïkuamikueri ambe, juásptiksï imecheri libruechani ka kurhiraanksï iámindu kʼuiripuechani japarini, ka kuenta pʼikuntasptiksï imani libruecheri, sinkuenta mili pesu [“piesa plateri”, TNM]. Ka ísïsï juchari Tateeri uandakua sánderu uinhapikua jingoni etsakunhapti ka jakajkunhani” (Uku. 19:19, 20). Imaksï kristianuecha uékaspti kurhiraani imani libruechani engaksï xáni jukaparhapka, peruksï kóntperatechani intsïnhaaspti engaksï kánikua sánderu jukaparhaka eska ambe uéjki.

17. a) ¿Jamberichi ambe jurajkuskia jurhimbikua jimbo? b) ¿Náki kurhamarhikuechanchi mókuantaua máteru artikulurhu?

¹⁷ ¿Cha ambe jurajkuski jurhimbikua jimbo? Iáminduechachi úraska juchari tiempu para jorhenguarhini jurhimbikuani. Máruksï ístu jatsisïndi para jurajkuni jatsikuarhikua ambe ka orhepani uérani engaksï imecheri familiaricha ka amiguecha nóteru uéjkia pájperani imecha jingoni. Uánikuechaksï ístu jatsiati para ménderueni eratsini ka jámani ka jamberiksï jurajkuani pʼindekuechani engaksï no terokuntajka Biblia jingoni. Ambe uéjki engachi jurajkuaka, seguruchi jarhaska eska jurhimbikua jimbo, uétarhisïnga ambe uéjki sakrifisiu úni. Indeni ambe úparini, jatsisïngachi ambe ma enga sánderu jukaparhaka, ambakiti pájperakua ma Jeoba jingoni. Engachi eratsintajka na enga xáni marhuajka mítini jurhimbikuani, nochi úsïnga eranhaskani andisï nema uékapiringa jurajkuni o atarantani. ¿Néna úpirini inde ambe úkuarhini? ¿Ka ambejtsïni jarhuataa parachi no niárani indeni ambe úni enga xáni no sésika? Máteru artikulu jimbochi mókuantauaka indeni kurhamarhikuechani.