Rebista The Watch Tower 1 enerueri de 1918, uénaspti ini kurhamarhikua jingoni: “¿Ambechi úkuarhinchaa uéxurhini 1918 jimbo?”. Kʼéri Guerra jimbo, seguirixapti no sési jásï ambe úkuarhini Europa, peru máru ambe jimbo enga úkuarhini japka jiáni enga uénani japka uéxurhini, ísï xarharasïrendi enajki sési ambe jurhani japi para Bibliaeri Jorhenguarhiticha ka para interu parhakpini.

Jurhiatikua 8 de eneru de 1918, Estados Unidos anapu presidenti Woodrow Wilson, arhijtsïkperata ma nitamataraspti para imecha engaksï Kongresurhu japka imeri paisirhu ka uandaspti eska katorse ambe uétarhisïrenga úni para niárani iápurisï “pínandikua jarhani ka para ióni durarini”. Ma ambe enga uandapka, jindespti eska sési japiringa ambe ma úni máteru paisicha jingoni, eskaksï nóteru xáni armechani uápiringia ka eska “únhapiringa ambe ma paraksï iámindu nasionicha májku kʼéri jarhani” ka i ambe marhuakuapirindi “kʼérati gobiernuechani ka ístu sapirhatichani”. Katorse puntuechaksï marhuaspti para uénani uaxastani organisasionini enga arhinhajka Sociedad de Naciones ka para exenhani Tratado de Versalles, enga úpka eska Kʼéri Guerra kʼamarhupiringa.

Bibliaeri Jorhenguarhitichaksï ístu úkua jukanchaspti ma uéxurhini antesi. * Peru ambe enga úkuarhipka tánguarhikuarhu organisasioniri Watch Tower Bible and Tract Society enga mándani uéxurhini úkuarhienga, xarhatasïrendi eskaksï imechajtu pínandikua jatsipiringa ma tiempu.

Ima tánguarhikua 5 de eneruni de 1918 jimbo úkuarhispti. Tánguarhikuarhu, uánikua achaticha engaksï mítikatepka ka engaksï Beteli petanhantapka, uékasptiksï orhejtsïkuni organisasionini. Richard Barber, ambakiti erachi ma enga sirkuitueri orhejtsïkutipka, uénaspti tánguarhikuani kómarhikua jingoni. Íntspinhaspti informi ma de ambe enga úkuarhipka ma uéxurhini antesi ka tátsekuaksï erakuaspti imechani engaksï orhejtsïkupiringa organisasionini, ísï eska mándani uéxurhini. Erachi Barber uandaspti eska Joseph Rutherford ka máteru seisi erachichaksï úpiringa orhejtsïkuni. Jimajkani, abogadu ma enga enemiguechani apoiariuauega, erakuaspti máteru sieti achatichani, máruksï imespti engaksï Beteli petanhantapka. Peruksï tsïtaspti, jimbokaksï sáno iámindu erachicha erakuspka erachi Rutherfordini ka máteru seisi ambakiti erachichani.

Uánikua erachicha engaksï jima japka, uandasptiksï eskaksï kánikua tsípixapka jimboka ima “sánderu sési jásï tánguarhikuespka engaksï nípka”. Peru inde tsípikuarhita no ióni durarispti.

Máru kutsï nitamasptia desdekaksï Bibliaeri Jorhenguarhiticha uénapka etsakuni libruni The Finished Mystery (El misterio terminado). Ima kʼuiripuecha engaksï ambakiti mintsita ma jatapka, sésiksï jiókuarhispti Bibliaeri jorhenguarhikuechani enga i libru jorhentpiauenga.

Canadá anapu sirkuitueri orhejtsïkuti ma enga Edward Crist arhinhenga, uandaspti temungurhiriri ma enga arhintapka ini libruni ka sinku semanajkusï nitamapti engaksï jamberi jiókuarhipka jurhimbikuani. Uandaspti: “Tsimarhanksï aiakukuarhestia para Tata Diosïni marhuakuni ka sésiksï progresarixati”.

Achamasï ma enga arhintapka ini libruni, sóntku aianguaspti amigu jembechani ambe enga jorhenguarhipka. Úpiringachi uandani eska “ísku pakataspka” ambe enga libru arhienga, jimboka uandantasïnga: “Tercera Avenida jimbo ísï nitamaxapka engani ma repentku ísï pʼikuarherapka enajkijtsïni tabiki ma jimbo  atapi. ¡Peru nómbe! Jindespti libru El misterio terminado. Pákuarhispka juchiniu ka iámu arhintaspka. [...] Ísï tátsekua mítispka eska predikadori máespka [...] enga bentanarhisï kʼuanikupka jimboka kánikua ikiaxapka. Seguru jarhaska eska indeni ambe jimbo enga úpka, sánderu uánikua kʼuiripuni jarhuataspka erokuarhikua ma jatsini ka eska ambe uéjki máteru ambe jimbo enga úpiringa. [...] Indeni ambe jimbo enga xáni uinhamu ikiapka predikadori, iásïchi kʼéri ambe arhixakaia Tata Diosïni”.

No solu ima predikadori no sési exespti indeni libruni. Canadá, juramutichaksï proibirispti libruni 12 de febreruni de 1918, jimbokaksï uandasïrenga eska libru no apoiarisïrenga guerrani ka eska no respetarisïrenga juramukuani. Ísï no ióni jimbo, Estados Unidos anapu juramutichaksï májkueni úspti. Máru kʼuiripuecha engaksï gobiernueri ánchikuarhiripka nirasptiksï Beteli ka ofisinecharhu engaksï Nueva York, Pensilvania ka California japka paraksï jirinhantani ambe ma enga xarhatapiringa eskaksï kulpablispka ima erachicha engaksï orhejtsïkuenga organisasionini. Jurhiatikua 14 de marsu de 1918, Estados Unidos anapu Departamento de Justicia, proibirispti libruni. Uandasïrendi eska inde publikasioni ka enga etsakunhenga, no respetarixapka ley de Espionajeni, jimboka no jurajpisïrenga para guerrani apoiarini.

Jurhiatikua 7 de maiu de 1918, Departamento de Justicia juramuminhaspti para jupikaani erachichani Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William van Amburgh ka Clayton Woodworth. Uandasïrendiksï eskaksï kulpablispka jimbokaksï “úsïrenga eska kʼuiripu no respetaripiringa leini, eska kánikua no sési ambe úpiringa ka eskaksï uékantku úsïrenga eska kʼuiripu no kurhandirapiringa ka eska nóteru uékapiringia serbisiu militari ni nabali úni Estados Unidos”. Juisiu uénaspti 5 de juniuni de 1918, ka iámu ambe xarhatasïrendi eskaksï arhiapiringa eskaksï kulpablispka. ¿Andi?

Estados Unidos anapu fiskali, uandaspti eska ley de Espionaje “kánikua marhuasïrenga para kénditani iámu imani informasionini” enga no apoiariuenga gobiernuni. Jurhiatikua 16 de maiuni de 1918, Kongresu no jaiapanhintaspti leini ma enga kuájchakuapiringa imechani engaksï etsakupiringa informasioni “enga ísïpiringa, enga sési ambe eratsiparini etsakunhapiringa ka enga ambakiti rasonichani jatsiapiringa para etsakurhini”. Ima tánguarhikuarhu, sánderu librueri ambe uandanhaspti El misterio terminado. Sïrandecha engaksï Estados Unidos anapu Kongresurhu jaka, arhisïndiksï: “Ma ejemplu i jásï informasioniri enga sánderu peligrosueka, jindesti ambe enga libru El misterio terminado arhinhajka”. Ka ístu arhisïndi: “Para ambe enga jimbojku marhuajka, jindesti paraksï soldaduecha nóteru apoiarinia ambe engachi jucha eratsitini jaka úni ka ístu eskaksï nóteru uékaakia apuntarikuarhini para soldadueni”.

Jurhiatikua 20 de juniu de 1918, juesichaksï uandaspti eskaksï ima ochu erachicha kulpablispka iámu amberi engaksï arhinhapka. Pauandikua, juesi uandaspti eskaksï ónhaapiringa. Uandaspti: “Relijioniri informasioni engaksï xáni jánguarhintajka i kʼuiripuecha kuájpini ka etsakuni [...] sánderu peligrosuesti ka eska enga ejersitu alemani arhukurhipiringa”. Ka kʼamarhukuni jámani, uandaspti: “Jatsistiksï para uinhamu kastigarinhani”. Tsimani semana tátsekua, ónhaasptiksï imani ochu erachichani jini Penitenciaría Federal de Atlanta (Georgia) ka jimaksï japirindi entre diesi a beinti uéxurhini.

Jiánisï, Bibliaeri Jorhenguarhitichaksï kánikua  no sési kánhaspti. FBI (Oficina Federal de Investigación) kánikua ánchikuarhispti para sési inbestigarini. Ini inbestigasioni jimbo, uánikua dokumentuechaksï jarhasti engaksï xarhatajka eskaksï erachicha eratsitixapka seguirini aianhpini.

Jini Orlando (Florida), jefe ofisineri engaksï korreuechani axauenga, karakuspti FBI Bibliaeri Jorhenguarhiticheri ambe: “Iámu siudadirhuksï jámaxati iámindu kʼumanchikuecharhu, ka sánderia chúrikuechani. [...] Indeni ambe jimbo engaksï úni jaka, xarharasïndi eskaksï eratsitixaka seguirini predikarini nájkirukaksï no sési kánhaaka”.

Koroneli ma Departamento de Guerra anapu, karakuspti FBI para aianguni ambe enga úni japka Frederick Franz, enga ísï tátsekua niárapka jarhani Grupurhu enga Orhejtsïkuajka iámindu kúnguarhikuechani. Koroneli uandaspti eska erachi Franz “sési inchamukutixapka para íntspikuarhiani uánikua libruechani, El misterio terminado”.

Charles Fekel enga ístu niárapka jarhani Grupurhu enga Orhejtsïkuajka iámindu kúnguarhikuechani, kánikua no sési kánhaspti. Polisiechaksï jupikaspti jimboka etsakuasïrenga libruechani El misterio terminado ka exekuasptiksï imeri korreuechani. Ma kutsï ónhakata jarhaspti jini Baltimore (Maryland) ka arhisïrendiksï “Austria anapu enemigu”. Enga balori jingoni predikarikuani japka imechani engaksï kurhamarhini japka, miántaspti ambe enga 1 Korintu 9:16 arhijka, jimini Pablu uandaspti: “Lastima jindeni engani no eianhpiska ambakiti aianhperakuani”. *

Aparti de tsípikua jingoni aianhpini, Bibliaeri Jorhenguarhitichaksï uénaspti kurhajkuarhini eskaksï jurajkuapiringa imani erachichani engaksï Atlanta ónhakata japka. Pirenchi Anna Gardner arini ambe miántaspti: “Méntkisïchi úni jarhasïrenga ambe ma. Engaksï ónhaapka erachichani, ambe engachi úpka, jindespti nirani kʼumanchikuecharhu parachi firmechani tánaani. Uánikuachi tánaaspka. Arhisïrengachi kʼuiripuni eskaksï ima achamasïcha jurhimbiti kristianuespka ka eska no sési jarhaspka engaksï ónhaapka”.

Jiánisï enga xáni úkua jukapka, uánikua kʼéri tánguarhikuechaksï únhaspti paraksï uinhaperantani erachicheri jakajkukuani. Seguni i rebista inglés jimbo, ima uéxurhini jukari kuarenta kʼéri tánguarhikuechaksï úkuarhispti. Arhisïrendi: “Ambakiti informichaksï niáraxati iámindu kʼéri tánguarhikuecheri. Antesi, kʼéri tánguarhikuechaksï jiáni úkuarhisïrendi enga kʼamarani jámengia beranu ka enga uénani jámenga otoniu, peru iásï, interu uéxurhinksï jarhaxati kʼéri tánguarhikuecha”.

Kʼuiripu enga ambakiti mintsita ma jatapka, seguirixapti jiókuarhini ambe engachi aianhpienga. Jini Cleveland (Ohio), úkuarhispti ma kʼéri tánguarhikua nani engaksï 1,200 kʼuiripuecha nípka ka 42 erachichaksï itsï atakuarhispti. Uandasïrendiksï eska tumbi ma enga apenasi itsï atakuarhipka “kánikua agradesidu jarhaspka mítini Tata Diosïni ka enga aiakukuarhepkia imani, enga ísku pakataapka máteru kʼuiripuechani engaksï sánderu jatiripka”.

Sánderkusï kueratani japtia para kʼamarani uéxurhini 1918 ka Bibliaeri Jorhenguarhitichaksï no mítispti ambeksï úkuarhinchapirini. Íntspikuarhiasptiksï máru ofisinechani engaksï Brooklyn japka ka mótsisptiksï Pittsburgh (Pensilvania). Mientrasi erachicha engaksï orhejtsïkuenga organisasionini kárselirhu japka, uandanhaspti eska 4 de eneruni de 1919 úkuarhipiringa tánguarhikua organisasioniri enga mándani uéxurhini úkuarhenga. ¿Ambe úkuarhipirini?

Juchari erachichaksï seguirispti imecheri ánchikuarhita jingoni. Seguruksï jarhaspti eska iámu ambe sési uérapiringa jimboksïsï erakupti Isaías 54:17 para jindeni textu 1919 anapu: “No ma arma enga únhaaka parakini no sési úcheni, uáti ísï úni”. No ióni jimbo, iámu ambe mójtakurhipirindi ka i ambe úpirindi eskaksï erachicha uinhaperantapiringa imecheri jakajkukuani ka eskaksï úpiringa imani ánchikuarhita engaksï jatsipiringa.