ANDAJPENUSPKA 1934. Juchiti táticha Fred ka Edna Molohan beinte uéxurhinisïksï páxaptia Bibliaeri Jorhenguarhiticha jingoni (Jeoaberi testiguecha). Kánikua agradesidu jarhaska engajtsïni jorhendaka Jeobaeri ambe, irekaxapkachi Parsons, ireta ma enga sureste ísï jaka jini estadu de Kansas. Kúnguarhikua ma jimbochi jarhaspka engaksï sáno iámindu erachicha erakukatepka. Iámindu tánguarhikuecha jimbochi nirasïrenga ka somenchi uérasïrenga eianhpini Tata Diosïri Karakateri ambe. Sáno méntkisï, sábaduechanchi xanharu jimbo eianhpisïrenga, enga iásï ísï mítikatekia komu jimesï eianhpini enga uánikua jánhajka. Ménisïchi kuatarasïrenga, peru papajtsïni méntkisï eladu piáchisïrendi.

Juchari kúnguarhikua kʼéri territoriu ma jatsipti engaksï jindepka uánikua ireta sapirhaticha ka uánikua granjecha munisipiuecheri engaksï no iauani japka. Engachi publikasionichani íntsaauenga, granjeruechajtsïni berdura ambe íntskusïrendi, blankiiuechani ka asta tsíkatechani. Komuchi no káni jatsipka tumina ka papa tʼuini íntspiengia para publikasionicha, imani ambe jingonchi andangutasïrenga para tʼireni engajtsïni granjeruecha íntskuenga.

Juchiti tátichaksï tokadisku ma konseguirispti para predikarini. Ji no úsïrenga úrani jimbokani útasï sapichuespka, peru engachi nirenga rebisita o estudiuechani uáni kánikua tsitisïrenga jatsikuantaani diskuechani engaksï erachi Rutherfordiri diskursuecha grabadu japka.

Papa karrurhu, Ford de 1936, karhakua péraspti kʼéri tokadisku ma. Ima karrujtsïni kánikua marhuachispti eianhpikuarhu. Sáno méntkisï, orhetachi musika jatsikuntasïrenga paraksï kʼuiripuecha uékani mítini ambespi ka tátsekuachi diskursu grabadu ma jatsikuntasïrengia. Enga diskursu na kʼamarengia, publikasionichanchi íntsaasïrenga imechani engaksï uékenga sánderu mítini.

Kansas anapu ireta ma enga Cherryvale arhinhajka, polisia no jurajkuspti eska papa diskursuechani jatsikuantapiringa parkirhu, jima enga uánikua kʼuiripu nirenga dominguechani mintsikuarhini. Peru arhispti eska parkirhu uérakua úpiringa jatsikuantani. Papa no ma ambe uandaspti ka seguirispti imani xanharu jimbo móskuni karruni enga parkirhu ísï nirenga. Ménderu jatsikuntaspti  grabasionini paraka kʼuiripu seguiripiringa kurhaani diskursuni. Ji kánikua tsípikuarhisïrenga engachi inde jásï ambe nitamakuarhenga papa ka Jerry jingoni, juchiti ermanu enga sánderu kʼéripka.

Ante de 1940, partisiparispkachi kampania ma jimbo enga jindepka para sóntku iápurisï eianhpini imani territoriuecha jimbo engachi no sési kánhenga. Komu Joplin (Misuri) anapu ambe uénapka uandantani, xarhintkuchi jauarasïrenga ka sïpatikuarkuchi jurajkuasïrenga kʼumanchikuecharhu trataduechani o foietuechani puertarhu kétsekua ísï. Tátsekua, iretarhuchi uéramani tánguarhintasïrenga parachi exeni sini polisia jupikasïreni erachini ma.

Ima uéxurhinicha jimbo, máteru ambe engachi uénga para eianhpini, jindesptiksï marchecha. Letreruechanchi máru jukasïrenga ka siudadicharhisï filecha jimbochi marcharisïrenga para Reinueri ambe eianhpini. Miásïnga enga inde jásï ma marcha úkuarhipka juchiti iretarhu. Erachichaksï karteli ma páxapti enga erhienga “Relijioni trampa máesti ka chkuanderakua ma”. Juchiniuksï uéraspti ka jukari ma kilometru ka terujkanksï xanharaspti ka ménderuksï kʼuanhatsintaspti. Xáni sési enga no nema no sési ambe uandapka, peru kʼóru uáni kʼuiripu exexapti enga uékenga sánderu ambe mítini.

Juchiti familia Kansas uératini biajarisïrendi asta Texas para kʼéri tánguarhikuarhu nirani. Komu papa empresa de ferrokarriliri ma jimbo ánchikuarhenga, enga imani xanharuni nirenga desde Misuri-Kansas-Texas, gratisichi biajariuenga engachi familiarichani nirenga pʼorhembiani ka kʼérati tánguarhikuecharhu. Mameri ermanu jemba enga kʼéripka, Fred Wismar ka imeri témba Eulalie, Temple (Texas) irekaxaptiksï. Tíu Fred jiáni jorhenguarhispti jurhimbikuani enga apenasi uénani japka siglu beinti, jiáni itsï atakuarhispti enga tumbi sapichuepka ka eianguaspti imeri pirembechani ambe enga jorhenguarhini japka, ma imeri piremba jindespti juchiti nándi, Sentru de Texas anapuechaksï sési mítispti juchiti tíuni, jima enga ima marhuapka komu siervo de zona o sirkuitueri orhejtsïkuti. Kánikuachi sési pʼikuarherasïrenga imani jingoni jarhani, jimboka sési kámpisïrenga ka tsípini. Tsitisïrendi Bibliaeri ambe eianhpini ka kánikuarini jarhuataspti engani sapichkuni japka.

Uéxurhini 1941, treni jimbochi biajarispka para nirani kʼéri tánguarhikuarhu ma jini San Luis (Misuri). Iámindu sapiicha ka tumbiichachi arhinhaspka eskachi imani lugarirhu uaxakapiringa enga arhutakata japka para jucha, parachi kurhaani erachi Rutherfordiri diskursu ma enga arhinhenga “Hijos del Rey”. Jukarichi kinse miliispka. Enga kʼamarapkia diskursuni, erachi Rutherford ka imeri jarhuajpirichajtsïni ambakiti regalu ma úchispti, iáminduechantsïni íntskuspti jimbanhi libruni enga arhinhenga Hijos.

Abrilini de 1943, kʼéri tánguarhikua ma úkuarhispti enga arhikuarhipka “Llamada a la Acción” jini Coffeyville (Kansas), no uáni ninhaspti peruchi kánikua tsitispka. Imani kʼéri tánguarhikua jimbo, anunsiarinhaspti eska iámindu kúnguarhikuecharhu uénapiringa jarhani parti ma enga arhinhenga Eskuela engajtsïni Jorhendajka Eianhpini. Ístu uéraspti foietu ma enga 52 leksionichani jukaapka ka indeni eskuelarhu úrakuarhipirindi. Ísï tátsekua imani mismu uéxurhini, uénaspka nitamatarani parti ma imani eskuelarhu. Imani kʼéri tánguarhikua jimbo, májku kʼérichi  itsï atakuarhispka máteruecha jingoni granjarhu ma enga no iauani japka, nani enga posu ma japka itsï jatarini. Ima jurhiatikua kánikua sési pʼikuarheraspka.

Engani kʼamarapkia eskuela sekundaria, uéxurhini 1951, jatsispka parani exeni ambe úpirini juchiti tsípikua jingoni. Ambe engani sánderu tsitienga, jindespti Beteli nirani, jima enga juchiti ermanu Jerry marhuapka. Jimbosïni sóntkuni axapka solisitudi Brooklyn. No ióndantsïni pʼímarhispti parani uénani Beteli marhuani 10 de marsuni de 1952. Ambe engani erakupka úni, kánikuarini marhuachispti parani sési marhuakuni Jeobani.

Erokuarhisïrenga imprentarhu ánchikuarhini parani jarhuajpini rebistechani imprimiriuani ka máteru publikasionichani. Peruni no méni úspka ísï úni jimbokani meseruespka ka tátsekua kosinarhu axanhaspka. Kánikua tsitisïrenga ambe engani jima uénga ka uánikua ambe jorhenguarhispka. Komuchi kosinarhu anapuecha orecha jimbo ánchikuarhienga, jurhiakua jatsisïrenga tiempu parani agustu estudiarini imani xáni kʼéri bibliotekarhu enga Beteli japka. Í ambe úspti eskani sánderu ambakiti pájperakua ma jatsipiringa Jeoba jingoni, eska juchiti jakajkukua sánderu kʼépiringa ka marhuani Beteli mientrasi engani jamberi úpiringa. Jerry 1949 uéntaspti Beteli ka tembuchaspti pirenchi ma jingoni enga arhinhenga Patricia, ka Brooklyn ísïksï pakaraspti irekani. Imani uéxurhinicha jimbo engani uénapka Beteli marhuani, imechajtsïni kánikua jarhuataspti ka uinhaperantani.

Ísï no ióni jimbo engani niárapka Beteli, erachichaksï uénaspti erakuani sánderu erachichani engaksï úpiringa nirani kʼérati tánguarhikuecharhu diskursarini. Paraksï úni erakuani, ma uéxurhinksï asignariuasïrendi paraksï kúnguarhikuechani pʼorhembiani engaksï sánderu iauani 322 kilometru ísï (200 millas) japiringa Brooklyn uératini. Arhijtsïkperataksï ma nitamatarasïrendi ma oreri ka erachicha jingonksï uérani eianhpini. Jatsispka indeni pribilejiuni jimbokani erakunhaspka. Engani uénapka pʼorhembiani kúnguarhikuechani ka diskursu nitamataraani, kánikua chéxapka. Sáno méntkisï, treni jimbo nirasïrenga. Sési miáxaka ambe enga domingu ma xatini jimbo úkuarhipka imani tiempisï enga iauajka 1954 jimbo. Treni jimbo níntaxapka Nueva York, ka jatsipiringa parani Beteli chúrikueri niántani. Peru xáni kʼéri ma iauaspti enga uinhamu tarhiapka ka tsʼirakuarhini engaksï jamberi treniri motoricha xerekuarhipka. Lunesï a las sinku de la manianisï niántaspka estasionirhu. Metruni jataspka enga Brooklyn ísï nirenga ka seguirispka kosinarhu nirani ánchikuarhini, sáni ióndaspka niárani ka kánikua kuataratini jimbokani no sáni kʼuíspka trenirhu ima chúri. Peru i ambe engani úkuarhinchapka no ma ambespti imani ambe jingoni engani xáni sési pʼikuarherenga marhuakuani erachichani ka exeantani xáni uáni amiguechani imani fin de semanecha jimbo engaksï xáni ambakitiuenga.

Imani uéxurhinichani jimbo engani uénapka Beteli marhuani, pʼímarhisptijtsïni parani jarhuajpini radiurhu WBBR, imani tiempu jimbo, kabinechaksï segundu pisurhu jarhaspti edifisiuerirhu 124, xanharu Columbia Heights jimbo. Mándani semana programa ma nitamataranhasïrendi enga xarhatenga grupuni ma kʼuiripuecheri engaksï májku kʼéri jorhenguarhienga Bibliaeri ambe. Ka ji partisiparisïrenga. Erachi A. H. Macmillan, engachi xénchani arhienga erachi Mac, partisiparisïrendi radiurhu WBBR. Erachi ióni marhuaspti Beteli ka para jucha engachi no ióni páni japka Beteli, ambakiti ejemplu máespti para tekantskua jingoni marhuakuni Jeobani.

Uéxurhini 1958 jimbo, pʼímarhisptijtsïni para jarhuajpini Eskuela Galaadirhu. Juchiti ánchikuarhita jindespti jarhuataani jimbanhi misioneruechani paraksï intsïnhaani bisechani ka prebenirini imecheri biaji. Imani tiempu jimbo kánikua jukaparhaspti abioni jimbo biajarini jimboksïsï no uáni graduaduecha uéndi abioni jimbo biajarini. Sánoksï iáminduecha engaksï África ka Lejano Oriente ísï axanhenga, barkuecha jimboksï nirasïrendi engaksï karga páni jarhenga. Engaksï boletuecha abioniri nóteru xáni jukaparhapkia, misioneruechaksï úsïrendia abioni jimbo nirani imecheri asignasionicharhu.

Juchiti ánchikuarhita sánderu kánisptia uéxurhini 1960 jimbo, iásï jatsipiringia para biajichani organisariuani enga jindepka para abionichani rentariuani de Estados Unidos a Europa para kʼérati  tánguarhikua internasionalicha uéxurhiniri 1961. Jíjtuni biajarispka abioni ma jimbo engachi rentaripka, enga Nueva York uérapka asta Hamburgo (Alemania). Enga na úkuarhipkia kʼéri tánguarhikua ini siudadirhu, tanimu betelitecha ka ji karruchi ma rentarispka ka niraspkachi Italia, ka sukursalirhuchi niraspka enga Roma jaka. Jima uératinchi Francia niraspka, engachi kʼérati juatecharhisï jimbo nitamapka ka niáraspkachi España, jima engachi no uénga eianhpini. Kánikuachi sési pʼikuarheraspka engachi Barcelona anapu erachichani mítiapka ka íntsaani máru publikasionichani engaksï ísï xarharenga enajkiksï regaluechepi. España uératinchi Ámsterdam niraspka ka jima uératinchi Nueva York kʼuanhatsintaspka.

Sáno ma uéxurhini tátsekua, arhinhaspka parani organisariuani biajichani para 583 representanticha interu parhakpini anapuecha, engaksï biajaripiringa para nirani kʼérati tánguarhikua internasionalicharhu engaksï úkuarhipiringa. Jindespti para kʼéri tánguarhikua enga arhinhenga “Buenas Nuevas Eternas”, engaksï 1963 jimbo úkuarhipka. Europa, Asia ka Pacífico sur jimboksï úkuarhipirindi, ka últimuechaksï úkuarhipirindi Honolulú (Hawái) ka Pasadena (California). Programarhu ístu arhisïrendi eskaksï niárapiringa Líbano ka Jordania para imani lugaricha jimbo miiuni enga Biblia uandaajka. Aparti de arhutaani boletuechani ka oteliri anapu kuartuechani, imani departamenturhu engani ji japka, ístuni jatsipiringa para konseguiriuani bisechani engaksï uánikua paisicha kurhajkuarhenga.

Uéxurhini 1963, ístu ambakiti uéxurhini máespti para ji máteru ambe jimbo. Jurhiatikua 29 de juniuni, tembuchaspka Lila Rogers jingoni enga Misuri anapueka, enga tanimu uéxurhini páni japkia beteli marhuani. Ma semana tátsekua enga boda nitamapkia, juchajtuchi uénaspka biajarini ka Grecia, Egipto ka Líbano niraspkachi. Nochi iauani biajarispka, niraspkachi de Beirut uératini asta Jordania enga aeropuertu sapichu ma japka. Komu imani paisi jimbo no sésikua japka para eianhpini, arhinhaspkachi eskaksï Jeobaeri testiguechani no íntsaasïrenga bisechani paraksï imani paisi jimbo nirani ka kurhamarhikuarhispkachi ambechi úpirini engachi niárapiringa. Ískuchi pakaraspka engachi exepka ma grupu erachicheri karteli ma jupikani enga arhienga “Sési jano je Jeobaeri testiguecha”, engaksï aeropuertueri koladurhu karhakua japka. Kánikuachi sési pʼikuarheraspka engachi exeapka imani lugarichani enga Biblia uandaajka: jima engaksï patriarkecha irekapka, nani engaksï Jesusi ka apostulicha eianhpipka, ka nani enga uénapka jarhani jurhimbikua “asta jima enga sánderu iauanika parhakpinirhu” (Uku. 13:47).

Arini sinkuentaisinku uéxurhini, Lila ambakiti pámpiri máesti engarini méntkisï apoiarika juchiti asignasionicharhu. Tsimarhanchi someni niraspka España ka Portugal, jima enga no sésikua japka para predikarini. Uinhaperantaaspkachi erachichani ka pákuaspkachi publikasionichani ka máteru ambe engaksï uétarhinchenga. Niraspkachi pʼorhembiani máru erachichani engaksï ónhakata japka jini Cádiz, España. Kánikuani sési pʼikuarheraspka engani úpka uinhaperantaani diskursu ma jingoni enga Bibliarhu pʼitakata japka.

Desde 1963, tsípikua jingoni jarhuajpiskia para  organisariuani biajichani para kʼérati tánguarhikua internasionalicha jini África, América Central ka Surirhu ísï, Australia, Europa, Hawái, Lejano Oriente ísï, Nueva Zelanda ka Puerto Rico. Lila ka ji uánikua kʼéri tánguarhikuecharhuchi niraska engachi no méni mirikurhiauaka, komu imani enga 1989 jimbo úkuarhipka jini Varsovia (Polonia). Uánikua erachi Rusia anapuechaksï niraspti ini kʼéri tánguarhikuarhu, engaksï i primeru xanhari uénapka nirani. Máru erachichani engachi jima mítiapka, ióniksï ónhakata jarhaspti kárselirhu imecheri jakajkukua jimbo, jini Unión Soviética.

Máteru ambakiti asignasioni engani jatsipka, jindespti pʼorhembiani máteru sukursalichani ka misioneruechani engaksï mámaru ísï anapuepka parani uinhaperantaani. Últimu bisita engachi úka, jindesti Corea del Sur ka 50 erachichanchi mítiaska engaksï ónhakata jaka kárseli ma jimbo jini siudadi Suwon. Iáminduechaksï kánikua tsípixapti ka uékanksï eskaksï petanhantapiringa kárselirhu paraksï ménderu úni Jeobani marhuakuni. Mítiani imani erachichani, kánikuarini uinhaperantaspti (Rom. 1:11, 12).

Desde enga xáni ióni nitamakia, exeska na enga niáraka sánderu uáninhani Jeobaeri iretarhu imeri jarhuajperata jimbo. Engani itsï atakuarhipka 1943, ma sieni mili eianhpirichespkachi. Iásï, jukari ochu miioniskachia engachi marhuakuni jaka Jeobani 240 paisi ka territoriuecha jimbo. Ka ístu, diosmeiamu imechani engaksï primeru graduarikuarhipka Galaadirhu paraksï úni ini ánchikuarhitani. Para ji kʼéri kóntperata máesti ini uéxurhinicha jimbo ánchikuarhini ka jarhuataani ini misioneruechani paraksï úni nirani imecheri asignasionicharhu.

Tsípisïnga engani erakupka sapichkuni uénani marhuakuni Jeobani ka engani uininharhitantapka solisitudini para Beteli marhuani. Desde jiáni uératini, Jeobarini seguirixati kánikua újchakurani. Aparti de ima tsípikuarhitecha engachi Beteli nitamakuarhiaka, Lila ka ji kánikuachi sési pʼikuarheraska ióni marhuani uánikua kúnguarhikuecha jimbo engaksï Brooklyn ísï jaka ka jatsiani ambakiti amiguechani para méntkisï.

Seguirixaka pauani pauani Beteli marhuani Lilaeri jarhuajperata jingoni. Jukarini 84 jatiriskia, peru útasïni ambakiti ánchikuarhita ma úsïnga enga jindeka atenderiuani korreuechani engaksï sukursalirhu niárajka.

Kʼéri tsípikuarhita máesti Jeobaeri organisasionirhu jarhani ka exeni na enga kumplirikuarhini jaka ambe enga arhijka Malaquías 3:18: “Chájtsï ménderu exeaka eska no májkueniska jurhimbiti ma ka no sési úri ma, ima enga Tata Diosïni marhuakujka ka ima enga no marhuakujka”. Enga méni nitamajka ma jurhiatikua, exesïngachi eska Satanasiri parhakpini sánhani arhixaka kʼamakurhini ka eska kʼuiripu no ma esperansa jatsiska níteru irenchania. Peru jucha engachi marhuakujka ka xénchani Jeobani, felisiskachi, asta jiáni enga úkua jukajka, jimbokachi sési mítitixaka ambe enga úkurhiaka sánderu orhepani. Xáni sési engachi intsïnhaka ini kʼéri pribilejiu enga jindeka para eianhpini ambakiti ambe Reinueri (Mat. 24:14). I gobiernu sóntku kʼamajkuati ini parhakpinini ka uáti eska jauaka paraisu ma. ¡Uékaxakachia eska niáraaka ima jurhiatikua! Jiájkani, ambakiti Tata Diosïri marhuarichachi nóteru pʼamenchaakia ka irekakachi Echerirhu para méntkisï.