1, 2. a) ¿Jesusi náki ánchikuarhitani sánderu jukaparharaspi imeri irekuarhu, ka andi? b) ¿Ambechi jatsiski para úni parachi ambakiti jarhuajpirini Tata Diosïri?

TATA JESUKRISTU karpinteruespti ka ístu jorhentpisïrendi ambakiti eianhperakuani (Mar. 6:3; Rom. 15:8). Indeni tsimani ánchikuarhitechani kánikua sési uáspti. Ma parti jimbo, jorhenguarhispti sési úraani erramientechani engaksï karpinteruecha úraajka para úni ambe ma chkariri enga marhuapiringa. Peru ístu, sési jorhentpespti ambe enga mítipka Tata Diosïri Karakateri ambe para jarhuatani kʼuiripuni kurhanguni jurhimbikueri ambe (Mat. 7:28; Luk. 24:32, 45). Enga 30 jatiripkia, nóteru ánchikuarhisïrendia komu karpinteru para iásï úni Reinueri ambe uandantani. Mítispti eska inde ambe jindespka enga sánderu jukaparhakuepka, jimboka uandaspka eska jindespka ma rasoni enga jimbo Tata Diosï axapka Echerirhu (Mat. 20:28; Luk. 3:23; 4:43). Jesusi úspti eska eianhpikua jindepiringa ambe enga sánderu jukaparharapiringa imeri tsípikuarhu, ka uékasïrendi eskaksï máteruecha májkueni úpiringa (Mat. 9:35-38).

² Sáno iámindu juchachi no karpinterueska, peru iáminduechachi jorhentpesïnga ambakiti eianhperakuani. I ánchikuarhita xáni jukaparhakuesti enga asta Tata Diosï jamberi partisiparijka. Biblia arhisïndi eskachi jindeska “Tata Diosïri jarhuajpiricha” (1 Kor. 3:9; 2 Kor. 6:4). Mítiskachi eska jurhimbikua ambe máeska enga jukaparhakueka Tata Diosïri karakatarhu (Sal. 119:159, 160). Jimbochisï jánguarhintajka sési úrani eianhpikuarhu “uandakuani enga sési jimboeka” (arhinta je 2 Timoteo 2:15). Ka para ísï úni, jatsiskachi para jánguarhintani sánderu sési úrani  Bibliani enga jindeka erramienta engachi sánderu úrajka para jorhentpini Jeobaeri, Jesusiri ka Reinueri ambe. Para ambakiti ambe niárani úkuarhini, Jeobaeri organisasioni erakuasti máteru erramientechani engachi jatsika para sési mítiani ka engaksï partika erramientecheri para jorhentpini.

3. a) ¿Ambechi jatsiski para jánguarhintani úni ini tiempu jimbo enga útasï pakarani jaka parhakpinirhu? b) Seguni Ukuecha 13:48, ¿néchanchi jatsiski para jirinhaantani?

³ Jamberichi kurhamarhikuarhijka andisï arhinhajki erramientecha para jorhentpini ka no erramientecha para eianhpini. Jindesti jimboka engachi uandajka eianhpini, arhikuekasïngachi uandantani mensajini. Peru engachi uandajka jorhentpini, arhikuekasïngachi eksplikarini mensajini paraka kʼuiripu jorhenguarhiaka ka uékani úni imani ambe enga jorhenguarhiaka. Ini tiempu jimbo enga útasï pakarani jaka parhakpinirhu, jatsiskachi para jánguarhintani uénaani estudiuechani ka jorhentpini jurhimbikuani. I ambe arhikuekasïndi eskachi jánguarhintaaka jirinhaantani imechani engaksï sési jimbo uéjka jatsini tsípikua para méntkisï ka jarhuataani paraksï Jeobani marhuakuni (arhinta je Ukuecha 13:44-48).

4. ¿Nénachi uá exeantani imechani engaksï meru uéjka jatsini tsípikua para méntkisï?

⁴ ¿Nénachi uá exeantani imechani engaksï meru uéjka jatsini tsípikua para méntkisï? Májkueni eska primeru siglurhu, jindesti predikariparini. Ísï jimbo, jatsiskachi para seguirini úni ambe engajtsïni Jesusi arhika: “Engajtsï niáraaka ma ireta jimbo o ma ranchu jimbo, kurhanguarhi je aberi né jinde ambakiti kʼuiripu [ma]” (Mat. 10:11). Mítiskachi eskaksï no uékaaka kurhaani ambakiti eianhperakuani ima kʼuiripuecha engaksï no ambakiti mintsita ma jukaka, engaksï kʼéramakuarhijka o engaksï no interesi pájka Tata Diosïri ambe jimbo. Jirinhaantasïngachi imechani engaksï ambakiti mintsita ma jukaka ka kaxumbini, ka engaksï uéjka mítini jurhimbikueri ambe. Ju je exeni ejemplu ma. Enga Jesusi karpinteruepka, seguru eska ambakiti chkari jirinhenga para muebli uáni, puertechani ka uananchatarakuechani. Ka enga exentengia, sési úraasïrendi erramientechani para úratarani ambe ma. Buenu, juchajtuchi jatsiska para sáno májkueni úni: orhetachi jatsiska para jirinhaantani kʼuiripuechani engaksï ambakiti mintsita ma jukaka, ka iásï kʼória sési úraani erramientechani para disipulu uáni (Mat. 28:19, 20).

5. Ejemplu ma jingoni eksplikari je ambe engachi jatsika para mítini mándani arhini erramientecheri para jorhentpini (exea je fotuechani engaksï uénakuarhu jaka).

⁵ Ma erramienta jindesti para ma ambe úrani. Por ejemplu, ju je eranhaskaani imani erramientechani engaksï karpinteruecha úrajka ka enga a lo mejori Jesusi úraapka. * Máruksï marhuasïrendi para tsʼéritani o para markarini chkarini; máteruksï para kachukuni, jarhaakuni o para sési jájkuntani ka máteruechaksï jindespti para chkarini pareju pérani o para kúndantaani piesechani. Májkueni, mándani erramienta para jorhentpini jindesti para ma ambe úrani. Komu iáminduechaksï kánikua ambakitika, ju je exeni nénachi uá úraani.

6, 7. a) ¿Nénajtsï úraskia cha tarjetechani para jw.org inchani? b) ¿Para ambe tsimani ambe marhuasïni pʼímarperakua para tánguarhikuecha?

⁶ Tarjetecha para jw.org inchani. Íksï erramientecha sapirhasti, peruksï kánikua marhuasïndi engachi úraajka parachi arhini kʼuiripuni néskichi ka ístu paraka uáka inchani juchari pájina Internetirirhu. Pájinarhu, uátiksï exentani sánderu informasioni juchari ambe ka asta kurhajkuarhini estudiu bíbliku ma. Asta iásï jamberi, jukari kuatrosientusi mili kʼuiripuechaksï kurhajkuarhisti pájinarhu jw.org uératini paraksï intsïnhani estudiu bíbliku ma. ¡Ka pauani pauani uánikuaksï sánderu kurhajkuarhisïndi! ¿Úpirinchi méntkisï kaani jarhani máru tarjetechani? Ísïchi uáka aprobecharini para eianhpini nani uéjki engachi jámani jauaka.

⁷ Pʼímarperakua para tánguarhikuecha. Pʼímarperakuechaksï marhuasïndi para tsimani ambe. Uákajtsï arhini kʼuiripuni: “Pʼímarhisïngaksïni Bibliani  estudiarini Jeobaeri testiguecha jingoni”. Tátsekua, arhi je eska uáka jorhenguarhini tánguarhikuecharhu o estudiu bíbliku ma jingoni. Ísï jimbo, i erramienta no solu marhuasïndi parachi arhini kʼuiripuni néskichi, sino ístu para pʼímarhiani imechani “engaksï mítika eskaksï uétarhinchasïnga jorhenguarhini Tata Diosïri ambe” paraksï estudiarini Bibliani juchantsïni jingoni (Mat. 5:3, TNM). Ísïsti, iámindu kʼuiripuechanchi sési eroasïnga juchari tánguarhikuecharhu, nájkiruka no jiókuarhiaka estudiu bíbliku ma. Enga kʼuiripu niraska tánguarhikuarhu, uáti exeni na enga xáni uáka jorhenguarhini Bibliaeri ambe.

8. ¿Andisï xáni jukaparhakue eskaksï kʼuiripuecha sikiera ma xanhari niuaka juchari tánguarhikuecharhu? Jatsiku je ejemplu ma.

⁸ Jukaparhakuesti eskachi seguirini jauaka pʼímarhini kʼuiripuni para nirani tánguarhikuecharhu, sikiera ma xanhari. ¿Andi? Jimboka ísï exeaka eskachi Jeobaeri testiguecha kʼóru jorhentpesïnga Bibliaeri jurhimbikua ambe ka jarhuatani kʼuiripu mítini Tata Diosïni ka no ísï eska relijioni no jurhimbiticha (Is. 65:13). Máru uéxurhini ísïstia enga Ray ka Linda inde ambe úkuarhinchapka, Estados Unidos anapu temungurhiri ma. Jakajkusïrendiksï Tata Diosïni ka exesïrendiksï eskaksï jatsispka para iglesiarhu nirani paraksï sánderu sési mítini. Jiájkanksï eratsispti nirani iámindu iglesiaecharhu engaksï xáni imani siudadirhu japka. Uánikuaksï iglesiaecha jarhaspti ka uánikua relijionicha. Ante deksï ísï úni, uandasptiksï eska paraksï úni pakarani ma relijionirhu, jatsispkaksï para tsimani ambe exeni jima. Primeru, eskaksï jorhenguarhipiringa jimbanhi ambe mientrasi enga eksplikarinhani japiringa Bibliaeri ambe. Ka segundu, eskaksï relijionirhu anapuecha ísï xukuparhapiringa eska na jatsika para jindeni para ima enga Tata Diosïni marhuakujka. Iónksï jámaspti exeani iámindu iglesiaechani engaksï siudadirhu japka ka kánikuaksï no sési pʼikuarheraspti jimbokaksï no ma ambe jorhenguarhispka ka imecha engaksï imani relijionicha jimbo nirenga, nóksï sési xukuparhasïrendi. Engaksï uéntapka últimu iglesiarhu enga imecheri listarhu japka, Linda ánchikuarhini nirasptia ka Ray kʼumanchikuarhu níntaspti. Mientrasi enga níntani japkia, Kʼumanchikua Reinueri ma jimbo nitamaspti ka eratsispti: “¿Andisïni no inchajki ka exeni ambeksï úsïni?”. Ka eskachi na erokuarhijka, kánikua tsitispti. Iámindu imecha engaksï jima japka, sésiksï kámaspti ka ístuksï sési xukuparhatini jarhaspti. Ray primera filarhu uaxakaspti ka kánikua tsitispti ambe enga jorhenguarhipka. Ísïspti eska apostuli Pablu na uandapka ima kʼuiripueri enga primeru xanhari nirajka tánguarhikuarhu ma ka uandani: “Sési jimbo Tata Diosï chánksïni jingoni jarhasti” (1 Kor. 14:23-25). Jima para orhepatini, Ray uénaspti iámindu dominguechani nirani ka tátsekua tánguarhikuecharhu engaksï entre semana úkuarhijka. Linda uénaspti pámbini. Ka nájkirukaksï jukari 70 jatiripkia, tsimarhanksï jiókuarhispti Bibliani estudiarini ka itsï atakuarhestiksïa.

9, 10. a) ¿Andisï fásili úraani trataduechani? b) Eksplikari je nénachi uá úrani trataduni ¿Ambeski Tata Diosïri Reinu?

⁹ Trataduecha. Jatsiaskachi ochu trataduechani, engaksï fásilika para úraani ka engaksï kánikua marhuajka para uénani uandontskuarhini. Desdekaksï uénaka jarhani 2013 jimbo, ma sinku mili miionisïksï imprimirinhastia i trataduecha. Ambe enga sési jásïka i trataduecheri, jindesti eska engachi jorhenguarhijkia máechakua úrani, úsïngachia máteruechani úraani, jimbokaksï iáminduecha májkueni jásï forma jukaska. ¿Nénachi uá úraani para uénani kʼuiripu jingoni uandontskuarhini?

¹⁰ Ju je eranhaskani eskachi erakuska úrani trataduni ¿Ambeski Tata Diosïri Reinu? Uákachi kʼuiripuni exerani portada ka arhini: “¿Ménisïjtsï kurhamarhikuarhiski ambeski Tata Diosïri Reinu? ¿Náki i tanimu opsionicheri uandapirintsï eska jindeska mókuntskua?”. Sini arhini eska sési o no sési mókuntaska, exera je máteru pájinani, partirhu “Ambe enga Biblia uandajka” ka arhintani Daniel 2:44 ka Lukasʌ 1:32, 33 engaksï karakata jakaia tratadurhu. Engachi úska, ju je seguirini uandontskuarhini. Últimu, ju je exerani kurhamarhikuani enga tátsepani jaka, partirhu “Kurhamarhikuarhi je”: “¿Nénaeua irekua enga  Tata Diosïri Reinu juramuni jauakia?”. Ísïchi uáka ménderu pʼorhembintani. Engachi rebisita niuaka úni, uákachi exeni jorhenguarhikua 7 foietueri Ambakiti ambe enga Tata Diosïrika, enga jindeka erramienta ma para uénaani estudiuechani.

11. ¿Para ambe jimboksï únhasïni juchari rebistecha, ka ambechi jatsiski para mítini inde rebistecheri ambe?

¹¹ Rebistecha. La Atalaya ka ¡Despertad! jindestiksï engaksï sánderu tradusirikuarhijka ka engaksï sánderu etsakuarhijka parhakpinirhu. Komu uánikua paisicha jimboksï arhinhantajka, tema enga portadarhu uérajka erakunhasïndi paraksï interu parhakpini anapuecha tsitini arhiantani. Jatsiskachi para úraani paraka kʼuiripu uékaaka mítini imani ambe enga sési jimbo jukaparhakueka para iásï anapu irekua. Buenu, para úni jurajkukuni imani kʼuiripuni enga meru arhintaaka, jatsiskachi para mítini para né úkata jarhaski mándani rebista.

12. a) ¿Para na jásï kʼuiripu úkata jarhaski rebista ¡Despertad!, ka para ambe? b) Arini jurhiatikuecha jimbo, ¿náki ambakiti eksperiensia majtsï jatsiski ini rebista úraparini?

¹² Rebista ¡Despertad! úkata jarhasti para kʼuiripuecha engaksï sánisï mítika o no ma ambe Bibliaeri. Jamberiksï no mítiti Tata Diosïri ambe, nóksï káni mintsikani relijionini o nóksï mítini eska Biblia ambakiti konsejuechani uandaasïnga para imecheri irekuarhu. Ma ambe jimbo enga úkata jaka i rebista, jindesti eska ima enga arhintaaka exeaka eska jarhaska Tata Diosï (Rom. 1:20; Ebr. 11:6). Ístu, jarhuatasïndi para jakajkuni eska Biblia meru Tata Diosïri Karakateska (1 Tes. 2:13). Títuluecha engaksï tanimu portadarhu anapueka para 2018, jindestiksï “El camino de la felicidad”, “12 claves para una familia feliz” ka “Ayuda para quienes están de duelo”.

13. a) ¿Para na jásï kʼuiripu úkata jarhaski rebista La Atalaya enga jindeka para kʼuiripuni jurajkukuni? b) Arini jurhiatikuecha jimbo, ¿náki ambakiti eksperiensiechantsï jatsiaski ini rebista úraparini?

¹³ Rebista La Atalaya enga jindeka para kʼuiripuni jurajkukuni, eksplikarikuasïndi ambe enga jorhentpijka Biblia, imani kʼuiripuechani engaksï sánisï janhanharhijka Tata Diosïni ka imeri Karakatani. Jamberiksï mítiti sánisï Bibliaeri ambe, peruksï no úni sési kurhanguni ambe enga meru jorhentpijka (Rom. 10:2; 1 Tim. 2:3, 4). Títuluecha engaksï tanimu portadarhu anapueka para 2018 mókuantasïndiksï ini kurhamarhikuechani: “¿Sigue siendo útil la Biblia?”, “¿Qué encierra el futuro?” ka “¿Piensa Dios en usted?”.

14. a) ¿Para ambeksï marhuasïni tʼámu bideuecha engaksï partika erramientecheri para jorhentpini? b) ¿Náki ambakiti eksperiensiechantsï jatsiaski ini bideuechani úrapariani?

¹⁴ Bideuecha. Jesusiri jurhiatikuecha jimbo, karpinteruechaksï solu imani erramientechani jatsiaspti engaksï puru jájki jingoni úrauenga, peru iásïksï jatsiastia erramientechani engaksï lusi jingoni marhuajka, komu sierra sinteni jásï ambe, taladru, lijadora ka para chanharhitarani ambe ma. Májkueni, aparti de publikasionicha engaksï imprimirinhajka, iásïchi jatsiaskia ambakiti bideuechani. Tʼámu i bideuechaksï partisti erramientecheri para jorhentpini: ¿Andisï uétarhijki jorhenguarhini Bibliaeri ambe?, ¿Néna úkuarhisïni estudiu bíbliku ma?, ¿Nénaksï úkuarhisïni juchari tánguarhikuecha? ka ¿Néskichi Jeobaeri testiguecha? Bideuecha engaksï no jamberi tsimani minutu durarijka, uákachi úraani engachi primeru xanhari uandontskuarhiaka kʼuiripu jingoni. Ka engaksï sánderu durarijka, uákachi jiáni úraani engachi ménderu niuaka pʼorhembini kʼuiripuni ka para ima enga sánderu sáni tiempu jatsiaka. Íksï ambakiti erramientecha uáti jarhuataani kʼuiripuechani jiókuarhini estudiu bíbliku ma ka niranksï tánguarhikuecharhu.

15. Uanda je ejemplu ma enga xarhatajka na engaksï xáni marhuajka bideuecha engaksï kʼuiripuecha exeajka imecheri idioma jimbo.

¹⁵ Ju je exeni na engaksï xáni marhuakuajka i bideuecha kʼuiripuechani. Pirenchi ma uarhiitini ma exentaspti enga Micronesia uératini mótsipka ka exeraspti bideuni ¿Andisï uétarhijki jorhenguarhini Bibliaeri ambe? enga uarhiitiri idioma jimboepka, yapési. Enga uénapka bideu, uarhiiti uandaspti: “¡No úsïnga jakajkuni, juchiti idioma jimbo jarhasti! Achati  enga bideurhu uandani jaka, ísï uandasïndi eska juchari islarhu na uandanhajka. ¡Juchiti idioma uandasïndi¡”. Tátsekua, uandaspti eska arhintapiringa ka exeni ambe enga xáni jaka pájinarhu jw.org yapési jimbo (terokutanta je Ukuecha 2:8, 11 jingoni). Ístu jarhasti máteru eksperiensia Estados Unidos anapu pirenchiri ma enga axakupka imeri sobrinuni, enga máteru paisi jimbo irekaka, pájineri direksioni Internetiri para indeni mismu bideuni exeni imeri idioma jimbo. Enga sobrinu jemba exepkia, korreu elektroniku jimbo karakuspti: “Ambe engarini sánderu ísku pakataka, jindesti ima parti enga eksplikarijka eska parhakpinirhu juramuxaka nema enga uinhapika ka no sési úrini. Estudiu bíbliku ma kurhajkuarhiska”. Imeri sobrinu imani paisi jimbo irekasti engachi no újka eianhpini.

16. Eksplikari je para ambeksï marhuasïni i foietuecha: a) Kurhajcha je Tata Diosïni ka irekakajtsï para méntkisï. b) Ambakiti ambe enga Tata Diosïrika. c) ¿Néksï úxaki iásï ambe enga Jeoba uékajka?

¹⁶ Foietuecha. Enga kʼuiripu ma no jorhenaka arhintani o nóksï jarhani publikasionicha imeri idioma jimbo, ¿nénachi uá jorhendani jurhimbikuani? Jatsiskachi ambakiti erramienta ma para inde ambe: foietu Kurhajcha je Tata Diosïni ka irekakajtsï para méntkisï. * Máteru ambakiti erramienta ma para uénani jorhentpini Bibliaeri ambe jindesti foietu Ambakiti ambe enga Tata Diosïrika. Uákachi exerani kʼuiripuni 14 temechani engaksï últimu pájinarhu jaka, kurhamarhini náki temani sánderu tsitipirini jorhenguarhini ka imani jingonchi uénani estudiarini. ¿Ménisïchi úskia ini ambe engachi rebisitechani nirajka uáni? Terseru foietu erramientecheri para jorhentpini jindesti ¿Néksï úxaki iásï ambe enga Jeoba uékajka? I úkata jarhasti paraksï estudianticha mítini juchari organisasioniri ambe. Para mítini néna úrani, uákachi exeni Programa para ánchikuarhini tánguarhikuarhu Kristianuecheri Irekua ka Aianhpikua marsueri 2017 anapu.

17. a) ¿Para ambe marhuasïni mándani libru? b) ¿Ambeksï jatsiski para úni iáminduecha engaksï itsï atakuarhijka ka andi?

¹⁷ Libruecha. Engachi uénaska jorhentpini Bibliaeri ambe foietu ma jingoni, uákachi mójtakuni na uéjki jatini libru jingoni ¿Qué nos enseña la Biblia? * Ini erramienta jingoni, estudianti sánderu jorhenguarhiati ambe enga orheta uétarhijka mítini Bibliaeri ambe. Enga estudianti kʼamaraakia ini libruni ka jánguarhintani jarhani para sánderu mítini Tata Diosïri ambe, uénakachi libru jingoni Continúe en el amor de Dios. I libru jorhendaati Bibliaeri prinsipiuechani úraani imeri irekuarhu. Ju je no mirikurhini eskaksï estudianticha jatsiska para kʼamaraani estudiariuani ini tsimani libruechani nájkiruka itsï atakuarhiaka. Ísï úparini, imeri jakajkukua sési uaxastakata jauati jurhimbikua jimbo (arhinta je Kolosasi 2:6, 7).

18. a) Eska na arhijka 1 Timoteo 4:16, ¿ambechi jatsiski para úni ka eska ambe niáraka úkuarhini? b) ¿Náki propositu jingonchi jatsiski para úraani erramientechani para jorhentpini?

¹⁸ Jeobaeri testiguechachi jatsiska para eianhpini jurhimbikueri ambe, i ambe uáti úni eskaksï kʼuiripuecha niáraka jatsini tsípikua para méntkisï (Kol. 1:5; arhinta je 1 Timoteo 4:16). Parajtsïni jarhuatani ísï úni, intsïnhaaskachi erramientechani para jorhentpini, nani enga jaka iámindu ambe enga xáni uétarhijka (exe je rekuadruni “ Erramientecha para jorhentpini”). Ju je jánguarhintani úraani. Mándani publikadori uáti erakuni náki erramienta úraa ka na jatini. Peru ju je miáni eska no jindeska solu para publikasionichani íntspiani. Ni jurajkukuani imani kʼuiripuechani engaksï no interesi xarhatajka. Juchari propositu jindesti eska imecha engaksï uéjka jarhuajperata paraksï jatsini tsípikua para méntkisï, imecha engaksï ambakiti mintsita ma jukaka ka kaxumbini ka meruksï uékani mítini jurhimbikuani, niáraaka Kristueri chúxapatini (Uku. 13:48; Mat. 28:19, 20).