INTERU parhakpinirhu, orhejtsïkutichaksï kánikua jukaparharasïndi ánchikuarhitani engaksï Jeobaeri organisasionirhu újka. Ka iáminduechachi kánikua tsípisïnga jatsini imecheri jarhuajperata. Peru nótki xáni iónisti engaksï arhiaka orhejtsïkutichani engaksï jatirikia eskaksï jurajkukuauaka máru kʼérati responsabilidadichani erachichani engaksï sánderu sapichkueka.

Desdeka uénaka úkuarhini i ajusti, sirkuitueri orhejtsïkuticha ka instruktoricha eskuelecheri para sánderu jorhenguarhini Bibliaeri ambe, jurajkusïndiksï imecheri asignasionini engaksï na 70 jatirijkia. Ístu, orhejtsïkuticha engaksï na 80 jatirikia, jurajkukuasïndiksï responsabilidadichani erachichani engaksï sánderu sapichkueka paraksï jindeni kordinadori Komite de Sukursali ma jimbo o paraksï orhejtsïkutini enga orhekupajka orhejtsïkutichani. ¿Nénaksï exeski i ambakiti erachicha engaksï jatirikia ini ambe enga mójtakurhika? Xarhatastiksï eskaksï uékasïnga kurhajchani Jeobani ka imeri organisasionini.

Ken, enga sáno kuarentainuebi uéxurhini kordinadoripka Komite de Sukursali ma jimbo, miásïndi: “Engani mítipka ambe enga úkuarhipiringa, de akuerdu jarhaspka indeni ambe jingoni. Ima mismu tsípa jimbo, kómarhispka Jeobani eskachi uétarhinchaxapka kordinadori sánderu sapichku ma”. Iámu parhakpini jimbo, uánikua erachicha engaksï jatirikia májkuenksï eratsisïndi eska Ken. Ka iámindu i orhejtsïkutichaksï kánikua sési pʼikuarherasïrendi marhuakuani erachichani  ka jimbosï uénani jámani, máru orhejtsïkutichaksï sánisï no sési pʼikuarherapti.

Esperandio, enga imeri kúnguarhikuarhu anapu orhejtsïkutichani orhekupauenga, jiókuarhisïndi eska uénani jámani kómu pʼikuarheraspka sánisï. Peru ístu uandasïndi eska uénaspkia mámaru ambe pʼamenchani ka eska tiempu uétarhinchasïrengia para kuidarini imeri kuerpuni. Ka ísï eska na jatsika para úkuarhini, seguirixati sési marhuakuni Jeobani ka ambakiti jarhuajperata máeni para erachicha.

¿Ka ambechi uá uandani ima erachicheri engaksï ióni páni japkia komu sirkuitueri orhejtsïkuticha? Allan enga treitaiochu uéxurhini páni japkia komu sirkuitueri orhejtsïkuti, uandasïndi: “Tsʼitsʼirasï aparhespka engani mítipka notisiani”. Peru uandasïndi eska jorhendaani máteruechani engaksï sánderu sapichkueka kánikua sési jarhaska, ka Allan seguirixati sési marhuakuni Jeobani.

Russell, kuarenta uéxurhini marhuasti komu sirkuitueri orhejtsïkuti ka instruktori eskuelecheri para sánderu jorhenguarhini Bibliaeri ambe. Uandantasïndi eska uénani jámani ima ka témba kómu pʼikuarhespkaksï. Uandasïndi: “Kánikuachi jukaparharasïrenga juchari asignasionini ka ísïchi exesïrenga eskachi útasï uinhapikua jatsispka para seguirini”. Iásï, imani kúnguarhikuarhu engaksï marhuani jaka, tsimarhanksï seguirixati úrani imani ambe engaksï jorhenaka ka mítini, ka erachichaksï sési pʼikuarherasïndi jima jatsiani.

Jamberichi jucha no méni niáraka ísï pʼikuarherani eska i erachicha. Peru engachi ménderu exeska istoriani enga 2 Samuel jimbo jaka, jarhuatatijtsïni kurhangukuani i erachichani.

Ju je miántani imani xanhari enga Absaloni nóteru uékapkia kurhajchani rei Dabidini, imeri táti jembani. Dabidi, Jerusaleni uératini Maanaimi niraspti sïpakuarhini ríu Jordanirisï, imani ladu jimbo enga Jurhiata uérajka. Jima, Dabidi ka imeri soldaduecha, niárasptiksï uétarhinchani tʼirekua ambe paraksï no uarhini. ¿Ambe úkuarhispi jiáni?

Tanimu jimesï anapu achatichaksï sési káspti ka kamechanksï pákuaspti, tʼirekua ambe ka máteru ambe engaksï uétarhinchapiringa. Ma inde achati jindespti Barsilai (2 Sam. 17:27-29). Enga no úkuarhipkia ambe enga Absaloni uékenga, Dabidi úspti Jerusaleni kʼuanhatsintani Ka Barsilai kuidaripaspti asta Jordanirhu jamberi. Dabidi kurhakuspti Barsilaini eska imani jingoni nipiringa Jerusaleni ka arhispti eska Barsilai no kueratanchapiringa tʼirekua ambe, nájkiruka Barsilai no uétarhinchenga indeni ambe jimboka kánikua jatsikuarherispka (2 Sam. 19:31-33). Jamberi Dabidi jukaparharendi Barsilaini imeri kualidadicha jimbo ka konsejuecha jimbo enga úpiringa íntsaani, jimboka uánikua ambe mítispka. Para Barsilai, kʼéri pribilejiu máepirindi irekani ka ánchikuarhini reiri kʼumanchikuarhu.

Peru Barsilai kaxumbikua xarhataspti ka jiókuarhispti eska no úpiringa iámindu ambe úni ka arhispti Dabidini eska 80 jatirispkia ka eska nóteru úpiringia exeni ambe sésiski ka ambe nómbe. ¿Ambe arhikuekaxapi? Seguru eska i achamasï kánikua jánhaskatispka jimboka ióni irekaspkia. Ka útasï úpirindi ambakiti konsejuechani íntspiani májkueni eskaksï  achamasï jatiricha na íntsaapka ísï tátsekua rei Reoboamini (1 Rey. 12:6, 7; Sal. 92:12-14; Prov. 16:31). Jamberi Barsilai arhikuekani japti eska nóteru xáni uinhapispkia jimboka jatirispkia. Asta uandaspti eska tʼarhepikua jimbo, nóteru úsïrengia sési tsʼémuni ambe ma ni kurhaani (Ecl. 12:4, 5). Jimbosï arhipti Dabidini eska mejori Kimamini pápiringa Jerusaleni enga tumbi máepka ka jamberi Kimami imeri uájpepti (2 Sam. 19:35-40).

I ajusti engachi uénakuarhu uandaka i artikulueri, xarhatasïndi imani ambe enga Barsilai eratsenga. Ambe enga kʼóru ísïka, jindesti eska i Tata Diosïri jántspiriri situasioni, solu imeri ambejku uétarhisïrenga exeni, ambe enga nitamanchani japka ka ambe enga jorhenapka úni. Peru ini jurhiatikuechani jimbo, uétarhisti exeni ambe sánderu sésiski para uánikua ambakiti orhejtsïkuticha interu parhakpini anapuecha.

I orhejtsïkuticha engaksï jatirikia, xarhatastiksï kaxumbikua ka sóntkuksï kuenta íntskukuarhisti na enga xáni marhuaka i ajusti. Engaksï jurajkuska eskaksï erachicha engaksï sánderu sapichku jaka enkargarikuarhiaka ánchikuarhitecheri engaksï antesi imecha jatsiapka, organisasioni uáti orhepani petani ambe ma enga sánderu uáninhaakia. Sáno méntkisï, erachicha engaksï jatirikia jorhendasïndiksï imechani engaksï sánderu sapichku jaka, ísï eska na úpka jamberi Barsilai imeri uájpa jingoni o eska na úpka apostuli Pablu Timoteu jingoni (1 Kor. 4:17; Filip. 2:20-22). I erachicha engaksï sánderu sapichku jaka xarhatastiksï eskaksï jindeska “intsïmperakua” ma ka eskaksï úsïnga jarhuajpini paraksï tata Jesukristueri kúnguarhikuarhu anapuecha sési jarhani (Efes. 4:8-12, TNM; terokutanta je Números 11:16, 17, 29 jingoni).

Interu parhakpinirhu, uánikua erachicha engaksï jurajkukuakia máteruechani máru imecheri responsabilidadichani, aprobecharisïndiksïa paraksï ménderueni ánchikuarhikuni Jeobani.

Marco, enga diesinuebi uéxurhini marhuaka komu sirkuitueri orhejtsïkuti, uandasïndi: “Na engani marhuani jakaia iásï, jarhuatasïndirini parani úni kúnguarhikuarhu anapu pirenchicheri uámbechani andarheraani engaksï no Testigueka”.

Geraldo, enga beintiochu uéxurhini marhuaka komu sirkuitueri orhejtsïkuti, uandasïndi: “Juchiti uarhiiti ka ji, jimbanhi metechanchi jatsikukuarhiaska, ma jindesti jarhuataani imechani engaksï nóteru nirajkia eianhpini ka jatsiani sánderu estudiuechani”. Uandantasïndi eskaksï iáiasï kinse estudiuechani jatsiaska ka eskaksï sáni uánikua niraxakaia tánguarhikuecharhu imecha engaksï nóteru eianhpijkia.

Allan, engachi uénakuarhu uandaka, uandasïndi: “Iásïchi úsïngia sánderu eianhpini. Kánikuachi tsitisïnga eianhpini jimesï enga uánikua jánhajka, negosiuecharhu, ka jimesï engachi irekaka. Tsimani besinuechajtsïni pámbitastia Kʼumanchikua Reinuerirhu”.

¿Cha jindeski maisï i ambakiti erachicha engajtsï ióni marhuakia ka intsïnhantsï jimbanhi asignasioni ma? Jiájkani, máteru ambe jimbo engajtsï uáka Jeoba jingoni ánchikuarhini, jindesti jorhendaani imani jukaparhakua ambe enga cha mítika erachichani engaksï sánderu sapichkueka eska cha. Russell, engachi ístu antesi uandaka, uandasïndi: “Jeoba jorhendaaxati ka úraaxati ambakiti erachichani engaksï sánderu sapichku jaka ka engaksï uáka jorhenguarhini. Ka iámindu erachichaksï marhuanchasïndi na engaksï tsípikua jingoni jorhentpijka ka kuidariuani karichichani” (exe je rekuadruni “ Jarhuataa je erachichani engaksï sánderu sapichku jaka paraksï sánderu ambe jorhenguarhini”).

Enga nótki iónika engajtsï máteru asignasioni jatsikia, seguiri je tsípikua jingoni jámani. Ánchikuarhita engajtsï mintsita jingoni úkia, jarhuatastia uánikua kʼuiripuechani ka uákajtsï seguirini jarhuataani. Chájtsï jindeska ka seguirini jauakajtsï kʼuiripu máeni engaksïni kánikua xénchajka.

Ka sánderu jukaparhakua ambe, chájtsï úska ambe ma enga méntkisï Jeobaeri mintsitarhu jauaka. Ima aiatspesti eska no méni mirikurhiaka “chári úkuechani ka níjtu indeni ambe engajtsï úni jaka xarhataparini eskajtsï uékasïnga jimbokajtsï jarhuataaska  imeri míndakatechani ka útasïjtsï jarhuataaxaka” (Ebr. 6:10). I uandakuechajtsïni asegurarichisïndi eska Jeoba no solu miásïnga ambe engachi úkia. Komu Jeobaksïni kánikua jukaparharajka, ima no mirikurhisïndi ambe engajtsï úkia ka engajtsï seguirini jaka úni parajtsï sési pʼikuastani.

¿Ka engachi jucha no intsïnhakia jimbanhi asignasioni ma? Nájkiruka ísïka, i informasionijtsïni marhuachiati. ¿Andi?

Jimboka iásï, jamberichi mítika erachini ma enga jatirikia ka enga jimbanhi asignasioni ma intsïnhaka. Enga ísïka, uákachi jorhenguarhini na enga xáni jánhaskatika i erachi ka enga ióni marhuakukia Jeobani. Ju je kurhakuani konsejuechani ka eskajtsïni arhistachiaka. Ka ístu, ju je exeni néna úrasïni imeri jimbanhi asignasionirhu imani ambe enga xáni mítika.

Engachi erachi jatiri máeka enga jimbanhi asignasioni ma intsïnhaka o engachi erachi o pirenchi máeka engachi uáka jorhenguarhini ambe engaksï xáni mítika erachi jatiricha, ju je miáni eska Jeoba jukaparharaasïnga imechani engaksï desde iónisï marhuakukia ka engaksï seguirini jaka marhuakuni.