1. ¿Nénachi xarhatatsperasïni uékperakua Tata Diosïri marhuaricha?

TATA DIOSÏRI marhuarichachi familia espirituali ma jingoni kuenta úkuarhisïnga enga mítikateka jimbokachi uékperasïnga (1 Juanu 4:16, 21). Sáno méntkisï, inde uékperakua no solu jiáni xarharasïndi engachi jatsiaka para kuájchakuni nemani ambe ma jimbo, sino someni úkuecha jimbo engaksï sapichitu ambeka, komu uékperakua jingoni uandajpini ka sési kámpini. Engachi sési kaaska máteruechani ka kurhangukuani, ‘terokukuntasïngachi Diosïni komueska imeri uájpecha enga ima xáni uéajka’ (Efes. 5:1).

2. ¿Jesusi néna májkueni xarhataspi uékperakua eska imeri Táti?

² Jesusi májkueni jámaspti eska imeri Táti. Méntkisï uékperakua jingoni kámaspti kʼuiripuni. Uandaspti: “Ju jejtsïni andarhierani cha engajtsï xáni kuatarajka ka mískuarhintsï, ka jíksïni mintsikuastaaka” ka ístu uandaspti: ‘Kaxumbitiska ka no teparakuarhini juchiti mintsitarhu’ (Mat. 11:28, 29). Engachi Jesusiri ejempluni seguirijka ka kurhangukuni “imani enga no xáni jatsikuarherika”, juchari Táti auandarhu anapu jaiapanhintasïndijtsïni ka felisisïngachi (Sal. 41:1). Ju je exeni nénachi uá  kurhangukuni familiani, kúnguarhikuani ka engachi aianhpikuarhu jámani jauaka.

3. ¿Néna jatsiski para kámani uámba ma imeri témbani? (Exea je fotuechani engaksï uénakuarhu jaka).

³ Familiarhu, imecha engaksï jatsika para orheta uénani xarhatani eskaksï kurhangutspitiska, jindestiksï uámbecha (Efes. 5:25; 6:4). Por ejemplu, Biblia arhiasïndi eskaksï uámbecha jatsiska para kurhangukuani imeri témbechani (1 Ped. 3:7). Parachi úni sési kámani nemani, jatsiskachi para kurhangukuni. Uámba ma enga kurhangutspitika, mítisti eska imeri témba imeri jarhuajpiriska ka eskaksï uánikua ambe jimbo no májkueniska, peru mítisti eska inde ambe no arhikuekasïnga eska témba menosiska (Gén. 2:18). Ísï jimbo, uámba ma exesïndi na enga pʼikuarherani jarhajka imeri témba ka sési kámasïndi ka respetu jingoni. Canadá anapu pirenchi ma uandaspti: “Juchiti achati no méni ísku exesïndi na engani pʼikuarherani jarhajka, nirini arhijki: ‘Nori jatsiska para ísï pʼikuarherani’. Ístu, méntkisïrini kurhajchasïndi. Engarini jarhuatajka parani ménderueni exeni ambe ma, uékperakua jingoni úsïndi”.

4. ¿Néna jatsiski para uámba ma xarhatani eska kurhangukusïnga imeri témbani na enga káuaka máteru nanakechani?

⁴ Uámba ma enga kurhangutspitika, ístu no uékasïndi no sési pʼikuastani imeri témbani, jimbosï no méni koketearijti máteru nanakecha jingoni ni interesi ma xarhatakuani enga no sési jaka. Ni redesi sosialicharhu ni Internetirhu (Job 31:1). No enganiarisïndi imeri témbani ka no solu jimboka jukaparharasïnga, sino jimboka xénchasïnga Jeobani ka kurhunhesïnga no sési jásï ambeni (arhinta je Salmo 19:14; 97:10).

5. ¿Néna uá témba ma xarhatani eska kurhangukusïnga imeri uámbani?

⁵ Enga uámba ma seguiriska Jesusiri ejempluni, úsïndi eska témba uáka kánikua janhanharhini (Efes. 5:22-25, 33). Jiájkani, témbajtu xarhatakuati eska kurhangukusïnga, por ejemplu enga jatsiaka para sánderu tiempu arhutani para kúnguarhikuarhu anapu ambe úni o enga problema ambe kánikua uandanhiatani jauaka. Gran Bretaña anapu erachi ma, uandantasïndi: “Iauani méni, juchiti uarhiiti kuenta íntskukuarhisïndi engarini ambe ma uandanhiatani jarhajka, jimbokarini ménderuni exesïnga. Jimajkani, úsïndi ambe enga Proverbios 20:5 arhijka, nájkiruka indeni ambe jimbo, jatsiaka para erokuarhini para exeni na jatini sánderu sésiua parani aianguni ambe engani eratsini jaka, mientrasi enga no ima ambeuaka engani no uáka aianguni”.

6. ¿Nénachi uá iáminduecha jorhendaani sapiichani paraksï interesi páni máteruecha jimbo, ka néna jarhuataua i ambe?

⁶ Engaksï táticha kurhangutsperajka, ambakiti ejempluesïndiksï para uájpecha. Peru ístu, jatsistiksï para jorhendaani nénaksï jatsiska para kurhangukuani máteruechani. Por ejemplu, úpirindiksï arhiani eskaksï no uiriauaka Kʼumanchikua Reinuerirhu o eskaksï konbibiuecharhu, jatsiska para jurajkuni eskaksï kʼératicha orheta jatsirakuarhiaka tʼirekua. Buenu, iámindu kúnguarhikuarhu anapu erachichachi uáka jarhuataani tátichani. Por ejemplu, enga sapi ma sési ambe uáka juchantsïni jimbo, komu mítachintsïni puerta, jatsiskachi para felisitarini. I ambe kánikua jarhuataati ka uáti eska no méni mirikurhiaka eska ‘sánderu sésiska intsïmpini, ka eska intsïmbinhani’ (Uku. 20:35).

7. ¿Néna xarhataspi Jesusi eska kurhangukuspka imani kʼuiripuni enga kándipka, ka ambechi jorhenguarhisïni Jesusiri ejemplueri?

⁷ Ma xanhari enga Jesusi Dekapolisi ísï jámani japka, kʼuiripu “pérakuspti ma pʼamenchatini enga no uénga kurhandini ka ni uandani” (Mar. 7:31-35). Jesusi támu péraspti ka tsinaspti. ¿Andisï no tsinapi kʼuiripu japarini? Jamberi kuenta íntskukuarhipti eska komu no uénga kurhandini, no agustu pʼikuarherendi kʼuiripu japarini. Ísïsti, juchachi no úsïnga milagruechani uáni, peruchi úsïnga ka jatsiskachi para pendienti jarhani ambe engaksï uétarhinchajka erachicha ka na engaksï  pʼikuarherajka. Apostuli Pablu karaspti: “Jaue jirinhatsperantani modu nani engachi na uáka jarhuajperani parachi úni uékperani ka ambakiti ambe úni” (Ebr. 10:24). ¿Nénachi uá májkueni úni eska Jesusi enga kurhangukupka imani kʼuiripuni enga no uénga kurhandini?

8, 9. ¿Nénachi uá interesi xarhatakuani imechani engaksï jatirikia ka engaksï pʼamenchani jaka? Uandaa je máru ejempluechani.

⁸ Ju je pendienti jarhani imecha jimbo engaksï jatirika ka engaksï pʼamenchani jaka. Ambe engachi jimbo mítinhantajka kristianuecha, jindesti uékperakua jimbo, ka no jimbokachi sési ánchikuarhisïnga (Juanu 13:34, 35). Inde uékperakua úsïndi eskachi jánguarhintaaka xáni eskachi xáni uáka para jarhuataani jatirichani ka imechani engaksï pʼamenchani jaka paraksï úni tánguarhikuecharhu nirani ka aianhpikuarhu. Ka úsïngachi indeni ambe nájkirukaksï imecha no uáka xáni úni eskaksï na uékapiringa (Mat. 13:23). Michael, enga siia de ruedasi jimbo jámajka, kánikua agradeserisïndi na enga imeri familia jarhuatajka ka ístu erachicha engaksï imeri grupurhu jaka aianhpikueri. Uandasïndi: “Imecheri jarhuajperata jimbo, sáno méntkisï úsïnga nirani tánguarhikuecharhu ka aianhpikuarhu. Ambe engani sánderu tsitijka, jindesti jimesï aianhpini enga kʼuiripu jarhajka”.

⁹ Uánikua Betelicharhu, jarhastiksï erachicha engaksï jatirikia ka engaksï pʼamenchani jaka. Beteli anapu departamentueri orhejtsïkuticha, ¿nénaksï xarhatakuasïni uékperakua ka eskaksï kurhangukuasïnga? Exeparini eskaksï uáka aianhpini karta ka telefonu jimbo. Bill, erachi ma enga 86 jatirika, karakuasïndi imani kʼuiripuechani engaksï iauanisï irekaka, uandasïndi: “Agradeserisïngachi engajtsïni íntskujka sésikua para kartechani uáni”. Nancy, enga sáno 90 jatirika, uandasïndi: “Para ji, kartechani uáni, no solu jindesti sïranda jatsiraani sobrecharhu, sino predikarini. Kʼuiripu jatsisti para mítini jurhimbikuani”. Ethel, enga 1921 andajpenuka, uandasïndi: “Méntkisï pʼamerhekuarhini jarhasïnga. Ménisï astani úkua jukanchasïnga mórhekuarhini”. Peru nájkiruka ísïka, kánikua tsitisïndi telefonu jimbo predikarini ka ambakiti rebisitechani máru jatsiasti. Ka Barbara, enga 85 jatirika, uandasïndi: “Jimbokani pʼamenchasïnga, no fásilisti para ji someni uérani aianhpini. Peru úsïnga máteru kʼuiripuechani jingoni uandontskuarhini telefonu jimbo. ¡Diosmeiamu, Jeoba!”. No jamberi ma uéxurhini jimbo, grupu ma juchari erachicheri engaksï jatirikia, aianhpisptiksï 1,228 ora, 6,265 kartechanksï uáspti, jukari 2,000 iamadechanksï uáspti ka 6,315 publikasionichanksï íntspiaspti. ¡Na xáni tsípini jaki Jeoba! (Prov. 27:11).

10. ¿Ambechi uá úni parachi jarhuataani erachichani paraksï sési aprobechariuani tánguarhikuechani?

¹⁰ Ju je interesi xarhatani tánguarhikuecharhu. Engachi interesi xarhataska erachichani jimbo, jarhuatauakachi paraksï sési aprobechariuani tánguarhikuechani. ¿Néna? Ma ambe engachi uáka úni jindesti xarheni niárani parachi no ísku jatini ójkutaani erachichani. Ísïsti, iauani méni jauati ambe ma engajtsïni ióndachiaka. Peru engachi pʼindeka ióndani niárani, jatsipiringachi para exeni ambechi uá mójtakuni parachi xarhatani eskachi jukaparharaasïnga juchari erachichani. Ístuchi miáuaka eskajtsïni Jeoba ka imeri Uájpasï pʼímarhijka (Mat. 18:20). Ka imaksï jukanchasti eskachi kánikua respetariuauaka.

11. ¿Andiksïsï erachicha engaksï parti ma jatsiaka tánguarhikuarhu jatsi para úni ambe enga arhijka 1 Korintu 14:40?

¹¹ Máteru ambe engachi uáka úni para interesi xarhatani kúnguarhikuarhu, jindesti úni ambe enga i juramukua uandajka: “Ú je iámindu ambe eska na terokuntajka ka eska námindu jindeka”, o sea respetu ka ordeni jingoni (1 Kor. 14:40). Por ejemplu, ima erachicha engaksï parti ma jatsiaka tánguarhikuarhu, jatsistiksï para asegurarikuarhini eskaksï no nitamaaka imani tiempuni engaksï intsïnhaka. Ísï úparini, respetuksï xarhatakusïndi imani erachini enga tátsekua pasariuaka ka ístu iámu kúnguarhikuani. ¿Andi? Jimbokaksï jamberi máru erachicha iauani irekaka salonirhu uératini, máteruksï jatsiti para biajarini ka máruksï uámba o témbani ma jatsiti enga no Testigueka ka enga uéjka eska sóntku niántaaka.

12. ¿Andiksïsï orhejtsïkuticha jukancha parachi respetariuani ka uékaani? (Exe je rekuadruni “ Ju je respetariuani erachichani engaksï orhejtsïkujka organisasionini”).

 ¹² Kúnguarhikuarhu anapu orhejtsïkutichaksï kánikua ánchikuarhisïndi ka ambakiti ejempluestiksï jimbokaksï tsípikua jingoni eianhpisïnga, jimboksïsï jukanchati eskachi kánikua uékauaka (arhinta je 1 Tesalonika 5:12, 13). Seguru eskachi agradeserisïnga iámindu ambe engaksï xáni újka juchantsïni jimbo. Ísï jimbo, ju je jarhuataani ka apoiariuani. Jimbokaksï “imecha jindeska engaksï kuidadu pájka chári almechani jimbo mítiparini eskaksï jatsiska paraksï kuenta íntspintani chári ambe” (Ebr. 13:7, 17).

13. ¿Ambechi jorhenguarhisïni de na enga Jesusi kámapka kʼuiripuni?

¹³ Profeta Isaiasi uandaspti Jesusiri ambe: “No ma arhóni kʼamatakuati enga kuarhakurhitini jakia; ka no pátaati mecha linuerini ma enga sánderku etskurhini jakaia” (Is. 42:3). Jesusi xénchaasïrendi kʼuiripuechani ka imecheri lugari jimbo niárasïrendi. Kurhangusïrendi na engaksï pʼikuarherenga imecha engaksï ísïpka komu arhó ma enga kuarhakurhitini jakia o komu mecha ma enga lámpara aseitiri jimbo jaka enga sánderku etskurhini jakaia. Jimbosï kurhangukuauendi, sési kaani ka tekantskua jingoni. Astaksï sapiicha uékasïrendi imani jingoni jarhani (Mar. 10:14). Ísïsti, jucha no úsïnga májkueni kurhangukuani ka jorhendaani kʼuiripuechani eska Jesusi. Peruchi úsïnga ka jatsiskachi para kurhangukuni imani kʼuiripuni engachi predikarikujka. Ju je exeni néna marhuasïni i ambe parachi mítini néna uandontskuarhini kʼuiripu jingoni, na jatinchi pʼorhembia ka na xáni ióni.

14. ¿Andichisï jatsi para sési eratsintani na engachi uandontskuarhikuaka kʼuiripuni?

¹⁴ Nénachi jatsiski para uandontskuarhini kʼuiripu  jingoni. Iásï, uánikua kʼuiripuechaksï ísï pʼikuarherasïndi eskaksï no sési kánhasïnga ka eskaksï no kuenta únhasïnga imani kʼuiripuecha jimbo engaksï kʼérati negosiuechani jatsiaka, politikuecha ka relijioniri orhejtsïkuticha jimbo engaksï no jurhimbikua jingoni jámajka ka no sésiksï kámpini (Mat. 9:36). Uánikuaksï no nemani mintsinharhisïndi ka nóksï ma erokuarhikua jatsisti. Jimbosï xáni jukaparhakueti eskaksï juchari uandakuecha ka na engachi uandontskuarhikuauaka, xarhataaka eskachi uékaasïnga ka kurhangukuani. Uánikua xanhari, kʼuiripu kurhaasïndi mensajini no solu jimbokachi mítiska Bibliaeri ambe o jimbokachi sési eksplikarikuasïnga, sino jimbokachi respetu jingoni kásïnga ka interesi xarhatakuani.

15. ¿Nénachi úpirini xarhatani eskachi kurhangukusïnga imani kʼuiripuni engachi predikarikujka?

¹⁵ Uánikua ambechi uáka úni para xarhatani eskachi kurhangukusïnga imani kʼuiripuni engachi predikarikujka. Por ejemplu, ísïsti eskaksï kurhamarhikuecha kánikua marhuasïnga para jorhentpini, peruchi respetu jingoni jatsiska para uáni ka uékperakua jingoni. Prekursori ma, jimesï marhuaxapti nani enga kʼuiripu no káni uandontskuarhijka. Ísï jimbo, kuenta íntskukuarhispti eska no jatsispka para imani ambe kurhanguarhini enga úpiringa kʼuratsekua jingoni pakatani kʼuiripuni, jimboka no mítipiringa mókuntskua. No méni kurhamarhiaspti sinksï mítispi néna arhinhasïni Tata Diosï o ambeski Tata Diosïri Reinu. Sánderu sési, ari ambe arhiasïrendi: “Bibliarini jorhendasti eska Tata Diosï jatsikuarhiska nombri ma. ¿Úpirinksïni exerani?”. Uánikua pʼindekuechaksï jarhasti ka mándani kʼuiripu ménderuenisti, jimbochisï no uáka uandani nénamindusï jatsi para úkuarhini ambe ma. Peruchi méntkisï jatsiska para kurhangukuani kʼuiripuechani ka respetu jingoni káni, ka parachi indeni ambe úni, jatsiskachi para sési mítini na jásïski kʼuiripu jima engachi jucha irekaka.

16, 17. Engachi uékajka xarhatani eskachi kurhangukusïnga kʼuiripuni, a) ¿nachi jatini pʼorhembia? b) ¿Nachi xáni ióni uandontskuarhikua?

¹⁶ Na jatinchi jatsiski para pʼorhembini kʼuiripuni. Engachi kʼumanchikuecharhu predikarijka, kʼuiripuechajtsïni no erokani jarhasïndi, jimbokajtsïni no pʼímarhiska. Jimbosï kánikua jukaparhakueti eskachi ima jandora niuaka enga kʼuiripu uékaaka uandontskuarhini (Mat. 7:12). Por ejemplu, ¿juchari territoriurhu anapu kʼuiripu sánderu ióndasïni jauarani fin de semana? Enga ísïka, jamberichi úpiringa xanhari jimbo uénani aianhpini o karrituecharhu, o úpiringachi pʼorhembiantani imechani engachi mítika eskaksï tsínharhiskia.

¹⁷ Nachi xáni ióni jatsiski para uandontskuarhikuani. Kʼuiripu méntkisï okupadu jarhasïndi, ísï jimbo, sánderu sésipirindi eskachi no ióni uandontskuarhikuapiringa, sikiera jiáni engachi apenasi úndaaka pʼorhembiani. Sánderu sésisti no ióni uandontskuarhini ka eska jukari jamberi (1 Kor. 9:20-23). Enga kʼuiripu exeaka eskachi kurhangusïnga eska kánikua okupadu jarhaska, máteru jimbojtsïni jiókaati. Engachi imani kualidadichani xarhatauaka enga espiritu santu úrpijka, jindeuakachi “[Tata] Diosïri jarhuajpiricha”. Astajtsïni jamberi Jeoba uáti úrani para andaparhaterani nemani jurhimbikuarhu (1 Kor. 3:6, 7, 9).

18. ¿Náki kóntperatechanchi intsïnhaua engachi kurhangukuaska máteruechani?

¹⁸ Jiájkani, ju je méntkisï jánguarhintani kurhangukuni familiani, kúnguarhikuarhu anapuechani ka engachi aianhpikuarhu jámani jauaka. Ísï úparini, uánikua kóntperatechanchi intsïnhauaka, iásï ka sánderu orhepani. Salmo 41:1, 2 arhisïndi: “Felisisti ima enga kurhangukujka imani enga no xáni jatsikuarherika; Jeoba pʼímutantaati jiáni enga no sési nitamakuarhini jauaka”. Ístu “niáraati arhinhani parhakpinirhu eska felisiska”.