¿AMBECHI úsïni engachi uéjka mítini na jandoreskia? Jamberichi exejka relojini engachi jukajkurhatini jaka o reloji ma enga paredirhu jaka. Engajtsïni nema kurhamarhijka na jandoreskia, ¿ambechi mókukuntasïni? Uákachi mámaru mókukuntani.

Por ejemplu, ju je eranhaskani eska ma ora ka kuarentaisinku minutu nitamaskia desde teruxutini uératini. Úpiringachi arhini eska xatiniskia, a la una kuarentaisinku, eska kinse minutu kueratasïnga para a las dosini o eska a las dosiskia menusi kinse minutu. O, engachi jima anapueka nani enga beintikuatru ora kuenta únhajka, úpiringachi arhini eska a las 13:45 jandoreskia.

Bibliani arhintaparini, jamberichi kurhamarhikuarhipka: “Bibliaeri jurhiatikuecha jimbo, ¿kʼuiripu néna uandasïreni na jandorespia?”. Ísï eska jucha, mámaru jásï jimbo. Karakata Ebreaechaksï úrasïndi “tsípa”, “teruxutini”, “inchatiru” ka “chúrikua” (Gén. 8:11; 19:27; 43:16; Juec. 19:9). Peru ménisï Biblia úraasïndi máteru uandakuechani.

Bibliaeri tiempuecha jimbo, kuárichaksï jarhasïrendi, ka sánderuksï chúrikuechani jimbo uétarhisïrendi. Uánikua uéxurhini ante de Jesusi andajpenuni, israelitechaksï tanimu tiempuecha jimbo arhukusïrendi chúrekuani engaksï “bigiliauecha” arhinhenga (Sal. 63:6). Por ejemplu, Jueces 7:19 úrasïndi “bijilia terujkani chúri”. Jesusiri jurhiatikuecha jimbo, judiuechaksï uénaspti májkueni úni eskaksï grieguecha ka romanuecha engaksï tʼápuru arhukuenga chúrikuani.

Ebanjeliuechaksï uánikua xanhari úraasïndi ini tʼámu tiempuechani. Por ejemplu, uandasïndi eska ‘xarhetkuespka’ enga Jesusi itsïrhu xanharapka para disipuluechani adarheraani engaksï barkurhu japka (Mat. 14:25). Ka ma xanhari Jesusi uandaspti: “Enga ma achati mítipiringa na enga jatini [o “náki bijilia jimbo”, TNM] jupiringa kuárhukpiti, sési jimbo ima jingontku japiringa, ka no jurajkutakuarhipirindi eskaksï inchaakupiringa imeri kʼumanchikuarhu” (Mat. 24:43).

Jesusi úraaspti ini tʼámu bijiliauechani enga arhiapka imeri disipuluechani: “Jingontku ja je jimbokajtsï no mítiska káni enga junguaka kʼumanchikueri dueniuemba, sieka inchatirueri o terojkani chúrikua ísï o jini ma tʼarhechu uekuarhisï [o sea pireni] o jini erandupakisï” (Mar. 13:35). Primeru bijilia, jindespti “inchatirueri” ka ima jandora uénasïrendi desde enga Jurhiata inchajtsïkuengia asta antesi de las nuebi chúrikueri. Segunda bijilia, jindespti “terojkani chúrikua” enga uénaenga desde las nuebi asta dose jamberi chúrikueri. Ka tersera bijilia jindespti “tʼarhechu uekuarhisï”, o enga uénenga pireni, ka terojkani chúrikua uénasïrendi asta las tresi de la maniana ísï. Jamberi ini bijiliarhuepti enga tʼarhechu pirepka, imani chúri engaksï Jesusini jupikapka (Mar. 14:72). Ka kuarta bijilia jindespti “erandupakisï”, o xarhintku, enga a las tresi de la maniana ísï uénenga astaka Jurhiata uérapiringa.

Eskachi na exekia, nájkirukaksï Bibliaeri tiempuecha jimbo no japka relojicha ísï eska iásï, kʼuiripu úsïrendi mítini na jandoresïreni.