1. Últimu chúri enga Jesusi imeri disipuluecha jingoni japka, ¿náki temeri ambe uandaspi enga jukaparhakueka?

ÚLTIMU chúri enga Jesusi imeri disipuluecha jingoni japka, sáno treinta xanhari úraspti uandakuani uékperakua. Arhiaspti eskaksï jatsispka para uékperani máteru ka máteruni jingoni (Juanu 15:12, 17). Inde uékperakua jatsipirindi para kánikua xarharani engaksï máteruecha exepiringa eskaksï meru Jesusiri chúxapatispka (Juanu 13:34, 35). Inde jásï uékperakua enga Jesusi uandapka no solu pʼikuarherakua máesti, sino ambakiti kualidadi ma enga úkuecha jingoni xarharajka no ma ambe erokuarhiparini. Uandaspti: “No nema jarhasti enga sánderu uékpijka ka eska ima enga tsípikua íntspiaka imeri amigu jembechani jimbo. Chájtsï jindeska juchiti amiguecha engajtsï úska ambe engaksïni ji juramuchijka” (Juanu 15:13, 14).

2. a) ¿Ambe úsïni eskaksï Tata Diosïri marhuaricha ménderueniuaka? b) ¿Nákichi kurhamarhikuechani mókuantaua ini artikulurhu?

² Iásï, imecha engaksï Tata Diosïni marhuakuni jaka, ménderuenistiksï jimbokaksï ambakiti uékperakua xarhatasïnga no ma ambe erokuarhiparini ka engaksï xáni sési májku kʼéri jaka (1 Juanu 3:10, 11). Jánguarhintasïngachi inde jásï uékperakua xarhatani no arhiparini nanichi  anapueski, nákichi idioma uandasïni, o na engachi kʼuiriperanhaka. Peru jamberichi kurhamarhikuarhijka: “Iásï, ¿andisï xáni jukaparhakue uékperakua xarhatani? ¿Nénajtsïni uinhaperantasïni Jeoba ka Jesusi? Ka ¿nénachi uá Jesusiri ejempluni seguirini ka xarhatani ima jásï uékperakua enga jarhuatpiaka?” (1 Kor. 8:1).

3. Ini jurhiatikuechani jimbo enga “peligru” jaka, ¿néna no sési úkuaxaki kʼuiripuechani?

³ Jimbokachi pauani pauani “kánikua uandanhiasïnga ka no sési ambe nitamanchani” jarhani ini jurhiatikuechani jimbo enga “peligru” jaka, uánikua kʼuiripuechaksï kánikua kómu pʼikuarherasïndi (Sal. 90:10; 2 Tim. 3:1-5). Uánikuaksï nóteru uékasïndia irekani. Uandanhasïndi eska mándani uéxurhini jukari 800,000 kʼuiripuechaksï uándikukuarhisïnga, o sea 1 kada 40 segundu. Astaksï máru erachicha ka pirenchicha niárasti ísï pʼikuarherani ka uandikukuarhinksï, xáni no sési ambe.

4. ¿Náki Bibliaeri personajichaksï uandaspi eskaksï uékasïrengia uarhini?

⁴ Bibliaeri tiempuecha jimbo, máru ambakiti Tata Diosïri marhuarichaksï xáni no sési pʼikuarheraspti engaksï nóteru uékengia irekani. Por ejemplu, xáni no sési pʼikuarheraparini, Jobu uandaspti eska niáchaspkia irekani ka eska uékaxapkia uarhini (Job 7:16; 14:13). Komu Jonasini no ísï nikupka eska ima na erokuarhini japka imeri asignasionirhu, kánikua no sési pʼikuarheraspti ka uandaspti: “Ka iásï, o Jeoba, jimboetakua, ú eskani uarhiaka, jimboka para ji sánderu sésiuaka eskani uarhiaka ka eska tsípiti jarhani” (Jon. 4:3). Ka profeta Elíasi, ma xanhari xáni no sési pʼikuarheraxapti enga kurhakupka Tata Diosïni eska jurajkupiringa uarhini. Uandaspti: “¡Nóteruni uákia! Oh Jeoba, euantarini tsípikua, ji no sánderu ambakitiska eska juchiti ióntki anapu parienticha” (1 Rey. 19:4). Peru Jeoba kánikua jukaparharaasïrendi imani ambakiti marhuarichani ka uékasïrendi eskaksï irekapiringa. No kastigariuaspti imani ambe jimbo engaksï pʼikuarherenga, sino uékperakua jingoni uinhaperantaaspti ka jarhuataaspti paraksï seguirini uékani irekani ka seguirinksï sési marhuakuni.

5. Iásï, ¿andisïksï uétarhinchajki juchari erachicha ka pirenchicha eskachi xénchauaka?

⁵ Nájkirukaksï sánderu uáni juchari erachicha ka pirenchicha seguirini jaka orhepani uérani, uánikuaksï jatsisti para imani ambe nitamanchani enga no sési pʼikuastajka ka uétarhinchanksï eskachi xénchauaka ka uinhaperantaani. Máruksï no sési kánhasïndi ka teresmarhunhanksï. Máteruksï jatsisti para tekantani eskaksï imeri ánchikuarhitarhu anapu kompanieruecha no sési uandaaka imecheri ambe. O jamberiksï kuataratini jarhani jimbokaksï jatsiska para sánderu ánchikuarhini o jimboka imecheri ánchikuarhita jukari kuatajpisïnga. Ka máruksï kʼérati problemechani jatsiasïndi familiarhu, jamberiksï kánguarhijti témbani o uámbani ma enga no jakajkutika enga méntku no sési arhiani jarhajka. Ini uandanhiatechani jimbo ka máteruecha, úsïndi eskaksï uánikua kristianuecha kuataraaka ka no sésiksï pʼikuarherani. ¿Né uá jarhuataanri paraksï seguirini jarhani orhepani uérani?

6. ¿Néna uinhaperantaasïni Jeoba imeri marhuarichani?

⁶ ¿Néna uinhaperantaasïni Tata Diosï imeri marhuarichani? Ma ambe jindesti eska asegurarikuasïnga eska no méni jurajkuaka xénchaani. Ireta Israeli kánikua sési pʼikuarherapti enga kurhaapka Jeobaeri uandakuechani: “Juchiti éskuechaksïni niárasti sési jásï exeni, niáraskari kʼéri ambe exenhani, ka ji mismukini xénchaska”. Ístu arhispti: “Asï ché, jimbokani ji tʼunguini jingoni jarhaska” (Is. 43:4, 5). Chájtsï uáka seguru jarhani eskaksïni Tata Diosï xénchasïnga ka eskaksïni kánikua jukaparharasïnga. * Jeoba aiakusïndi imeri iretani: “Komu Uiuinhasï ma, salbarpiati. Sési pʼikuarheraati tʼungini jimbo tsípikua jingoni” (Sof. 3:16, 17).

7. ¿Néna terokuntasïni Jeobaeri uékperakua imani uékperakua jingoni enga nándi ma pʼikuarherajka imeri charhaku jimbo? (Exe je dibujuni enga uénakuarhu jaka).

 ⁷ No arhiparini náki uéjki tsʼéjkukuechanksï nitamanchaani Tata Diosïri marhuaricha, ima aiakuasïndi jarhuataani ka uinhaperantaani. Libru de Isaías jimbo uandaspti: “Ka chájtsï mismu tʼireaka. Kʼiraxurhatinksïni paaka, ka uaxanharhiakaksïni paraksïni pʼarhipʼarhitani. Ísï komueska nándi ma na uinhaperantajka imeri sapini, májkueni, ísïksïni uinhaperantaaka ji chánksïni” (Is. 66:12, 13). Íksï uandakuecha kánikua sési jásï ambe xarhatasïndi: nándini ma enga kamanharhitini jaka imeri sapini o enga sapini chʼanarani jaka. Ini ejemplu jingoni Jeoba xarhatasïndi na enga xáni xénchaajka imeri marhuarichani. Ju je no méni dudarini eskajtsïni Jeoba kánikua jukaparharasïnga (Jer. 31:3).

8, 9. ¿Nénajtsïni balori íntskusïni Jesusiri uékperakua?

⁸ Jurhimbiti kristianuechachi jatsiska máteru rasoni parachi seguru jarhani eskajtsïni Jeoba xénchasïnga. Juanu 3:16 arhisïndi: “Diosï xáni uéasti parhakpini anapuechani, ísï jimbosï íntspiti imeri máechakua Uájpani paraka nákinterku nema enga imani jakajkuaka, no tsïnchiaka sino jatsini tsípikua para méntkisï”. Ka xáni engajtsïni kʼéri uékperakua xarhatachika Jesusi enga ísï íntspika imeri tsípikuani juchantsïni jimbo. Tata Diosïri Karakatajtsïni aiachesïndi eskaksï ni sikiera problemecha o uandanhiata ambe, uáka ‘eskajtsïni Kristu nóteru uékaakia’ (Rom. 8:35, 38, 39). ¿A no eska i jásï uékperakuajtsïni jarhuatasïnga parachi orhepani uérani?

⁹ Engachi problemechani ambe jatsiajka engajtsïni niárajka kuatajkuni, kómu pʼikuastani o eskachi nóteru tsípikua jingoni marhuakuakia Jeobani, miántani na engajtsïni xáni uéjka Kristu, uátijtsïni balori íntskuni parachi úni aguantarini (arhinta je 2 Korintu 5:14, 15). Jesusiri uékperakua, jarhuatasïndijtsïni parachi tsípikua jingoni irekani ka seguirinchi marhuakuni Jeobani. Úsïndi eskachi no kuatantaaka nájkirukachi no sési kánhaaka, no úkuarhini ambe ma engachi erokuarhini jauaka, uandanhiani jarhani o desastre naturali ambe úkuarhini.

10, 11. ¿Néchaksï jatsiski responsabilidadi para uinhaperantaani imechani engaksï desanimadu jaka? Eksplikari je.

¹⁰ Máteru ambe enga Jeoba úrajka parajtsïni uékperakua jingoni uinhaperantani, jindesti kúnguarhikua. Engachi xénchaajka erachichani, xarhatasïngachi eskachi xénchasïnga Tata Diosïni. Jánguarhintasïngachi jarhuataani xáni eskachi na  xáni uáka paraksï exeni eska Jeoba kánikua jukaparharaasïnga ka eska xénchaasïnga (1 Juanu 4:19-21). Apostuli Pablu arhiaspti kristianuechani: “Mintsita jatsikpera je, ka uinhaperperantani máteru ka máteruni jingoni ísï eskajtsï na úni jaka” (1 Tes. 5:11). Jiájkani, no solu orhejtsïkuticha, sino iáminduechachi uáka uinhaperantaani ka animariuani erachichani, ísï eskaksï na újka Jeoba ka Jesusi (arhinta je Roma 15:1, 2).

¹¹ Máru erachicha engaksï pʼamenchakua ma kámajka éjpurhu, jamberiksï uétarhinchajti ambakiti jarhuajperata ka medisina ambe (Luk. 5:31). Orhejtsïkuticha ka ístu máteru erachicha kúnguarhikuarhu anapuecha, mítistiksï eskaksï no doktoricheska engaksï kánikua jorhenaka. Peruksï mítisti na enga xáni jukaparhakueka kumplirini arini juramukuani: “Uinhaperaantani [ja je] imechani engaksï kuatantani jaka, ka mintsita jatsikuantani imechani engaksï debiliika [o engaksï kómu pʼikuarherajka], ka ísï tekaantani jarhani iáminduechani jingoni” (1 Tes. 5:14). Iáminduechachi jatsiska para xarhatakuani uékperakua, tekantskua ka kurhangukuani imechani engaksï kómu pʼikuarherani jaka, ka eskachi xénchperakua jingoni uandontskuarhikuauaka para uinhaperantaani. Ju je kurhamarhikuarhini: “¿Uinhaperpentasïni ka animariuani máteruechani? ¿Ambe uá úni parani sánderu sési jarhuataani erachichani?”.

12. Jatsiku je ejemplu ma néna jarhuataski pirenchini ma kúnguarhikuarhu anapu erachicheri xénchperakua.

¹² ¿Néna uá jarhuataani imechani engaksï pʼamenchakua ma kámajka éjpurhu engachi xénchperakua xarhatakuaska? Europa anapu pirenchi ma uandasïndi: “Ménisï eratsisïnga uándikukuarhini. Peruni jatsiska ambakiti jarhuajperata. Juchiti kúnguarhikuarini jarhuatasti parani no niárani uándikukuarhini. Erachichajtsïni méntkisï animarisïndi ka xénchani. Nóksï iáminduecha mítisti eskani depresioni kámasïnga, peru iáminduechaksï méntkisï listu jarhasïndi parajtsïni jarhuatani. Temungurhiri ma jarhasti engajtsïni ísï kuidarijka enajkiksï juchiti tátiche. Listuksï jarhasïndi na uéjki jandoreni jurhiakua o chúrikua parajtsïni jarhuatani”. Ísïsti eskachi no iáminduecha úsïnga májkueni jarhuajpini. Peru engachi mintsita jingoni arhiaska ambe ma para jarhuataani, kánikua marhuakuauati imechani engaksï pʼamenchakua ma kámajka éjpurhu. *

13. ¿Ambe uétarhisïni úni para uinhaperantaani erachichani?

¹³ Ju je jorhenguarhini kurhaani (Sant. 1:19). Engachi kurhangukuaska máteruechani ambe engaksï pʼikuarherani jauaka, xarhatakuauakachi eskachi xénchaasïnga. ¿Nénachi uinhaperantasïni imani enga komu pʼikuarherani jauaka? Ju je jánguarhintani eratsini nénachi pʼikuarherapirini jucha engachi imeri lugari jimbo japiringa ka iatsitakuarhu kurhamarhini ambe ma parachi kurhangukuni na enga pʼikuarherani jaka. Juchari kánharhikua jatsisti para xarhatakuni eskachi meru interesi pásïnga imani jimbo ka eskachi xénchasïnga. Engajtsïni nema uékaaka iámindu ambe eiangukuarhini ambe enga nitamakuarhini jaka, ju je tekantskua xarhatakuni ka jurajkuni eska uandaaka. Sánderuchi uáka kurhangukuni na enga pʼikuarherani jaka engachi tekantskua jingoni kurhajchaska. Ístu, imajtsïni sánderu mintsikaati ka sánderu uékaati kurhaani ambe engachi jucha arhiaka. Engachi mintsita jingoni xarhataska eskachi interesi pásïnga máteruecha jimbo, niárasïngachi kánikua uinhaperpentani.

14. ¿Andichisï no jatsi para arhinchpeni?

¹⁴ Ju je no arhinchpetini. Enga ma kʼuiripu enga kómu pʼikuarherani jauaka ísï exeaka eskachi arhinchaxaka, sánderu no sési pʼikuarheraati. Ka nájkirukachi jánguarhintani jauaka jarhuatani, sánderu úkua jukaati eskachi sési pʼikuastantaaka. Biblia uandasïndi: “Jarhasti ima enga no eratsiparini  uandajka enga ísïka eska espada jimbo chʼurhurpini jarhani, peru ima enga jánhaskakua jingoni uandajka sési pʼikuaskpentasïndi” (Prov. 12:18). Ísïsti, juchachi no nemani uékasïnga no sési pʼikuastani juchari uandakuecha jingoni, peru engachi uandaska ambe ma no eratsiparini, uákachi no sési pʼikuastpini. Parachi úni uinhaperantaani máteruechani xénchperakua jingoni, ju je jánguarhintani imecheri lugari jimbo jarhani (Mat. 7:12).

15. ¿Náki ambakiti jarhuajperatachi jatsiski para úni uinhaperantaani máteruechani uékperakua jingoni?

¹⁵ Ju je úrani Tata Diosïri Karakatani (arhinta je Roma 15:4, 5). Biblia jindesti ambakiti jarhuajperata ma engajtsïni uinhaperantajka jimboka Tata “Diosï[riska] enga íntspijka tekaantskua ka uinhapikua [o enga uinhaperpintajka]”. Parachi sési úrani Bibliani, jatsiskachi BIBLIOTEKA INTERNETIRHU Watchtower ka Jarhuajperata paraksï Jeobaeri testiguecha estudiarini, engajtsïni uáka jarhuatani exeantani textuechani ka publikasionichani parachi úni uinhaperantaani juchari erachichani.

16. ¿Náki kualidadichanchi jatsiski para xarhataani engachi animarini jauaka nemani enga kómu pʼikuarherani jauaka?

¹⁶ Ju je sési kámpini ka xénchpini. Jeoba mismu jindesti “Táti enga pʼamojpijka ka Diosï enga uinhaperpintajka iámindu ambe jimbo” ka “pʼamojkuasïndi” imechani engaksï marhuakujka (arhinta je 2 Korintu 1:3-6; Luk. 1:78; Rom. 15:13). Pablujtsïni ambakiti ejemplu ma íntskusti para xarhataani ini kualidadichani jimboka ísï úspka eska Jeoba. Karaspti: “Sino juchaksïni sési kámasïrenga ka kaxumbikua jingoni, eska ma amamba na kaajka tʼirerani imeri sapiichani. Ka engaksïni xáni tsípijka exeni, jucha ísï pʼikuarherasïrenga enajkiksïni no solu eiangupirini Diosïri ambakiti eianhperakuani sino asta juchari tsípikuanchi jamberi íntspini chánksïni jimbo, jimbokaksïni xáni mintsita jingoni uékasïnga” (1 Tes. 2:7, 8). Engachi májkueni xénchpitiska eska Tata Diosï, imajtsïni úraati para úni mókukuantani kómarhikuechani ima kʼuiripueri enga uandanhiani jaka.

17. ¿Nénachi jatsiski para exeani erachichani ka pirenchichani parachi úni uékperakua jingoni uinhaperantaani?

¹⁷ Ju je no erokuarhini eskaksï erachicha iámindu ambe sési uáka. No nema perfektuesti. Erokuarhini eskaksï iámindu ambe sési uáka, no sési jarhasti ka no sésijtsïni pʼikuastaati (Ecl. 7:21, 22). Ju je miáni eska Jeoba no jukari jamberi erokuarhisïnga juchari ambe. Engachi ísïuaka eska Jeoba, tekakuantauakachi máteruechani engaksï no sési uáka ambe ma (Efes. 4:2, 32). Nochi jatsiska para ísï kurhangutaraani eskaksï no jánguarhintasïnga ka ni terokutantaani jarhani máteruechani jingoni, jimbokaksï sánderu no sési pʼikuarheraaka. Enbesi de inde ambe úni, jatsiskachi para pʼindeni felisitariuani imani ambe jimbo engaksï újka. Inde ambe animariuauati ka jarhuatauati paraksï tsípikua jingoni marhuakuni Jeobani (Gal. 6:4).

18. ¿Andichisï uéjki uinhaperantaani erachichani uékperakua jingoni?

¹⁸ Para Jeoba, iámindu imeri marhuarichachi kánikua jukaparhakueska. Ka ístu para Jesusi, enga íntspika imeri tsípikuani juchantsïni jimbo (Gal. 2:20). Iámu mintsita jingonchi xénchaasïnga juchari erachichani ka uékasïngachi xénchperakua jingoni kuidariuani. Parachi úni uinhaperantaani erachichani, ju je “méntku jauenani úni jarhani ambe engachi jimbo sési pájperani jauaka ka uinhaperperantanchi” (Rom. 14:19). Kánikuachi uékaxakaia irekani Paraisurhu, nani engachi nóteru jatsiauakia rasonichani parachi kómu pʼikuarherani. Nóteru jauatia pʼamenchakua ambe, guerrecha, uarhikua pekadu jimbo, familieri problemecha, níteruchi no sési kánhania, ni no sési pʼikuarherani. Enga na kʼamaraakia mili uéxurhini, kʼuiripuechaksï perfektueuatia. Imecha engaksï tsípiti pakaraaka últimu pruebarhu, Jeoba ísï jiókuarhiauati komu imeri uájpecha ixú Echerirhu engaksï nóteru ma pekadu jukaraakia (Rom. 8:21). Ju je seguirini jarhani xarhatani uékperakua enga uinhaperpintajka ka ju je jarhuajperani máteru ka máteruni jingoni niárani imani xáni sési jásï jimbanhi parhakpinirhu enga Tata Diosï eiatspika.